Ukristão o Kuete Ekolelo

Liocili

YESU KRISTU wa sia lika etavo ale ekongelo limosi. Ekongelo liaco lia kala ndetimba limosi ale ndepata limosi konepa yespiritu. Eci cilomboloka okuti, kua kala ocimunga cimue comanu va nõliwa lespiritu sandu lia Suku okuti omanu vaco vosi va enda oku tendiwa ‘ndomala’ va Suku.​—⁠Va Roma 8:​16, 17; Va Galatia 3:⁠26.

Yesu wa enda oku longisa okuti kua kala lika onjila yimosi Suku a enda oku kuama oco omanu va longisiwe ocili kuenda olondaka vi tuala komuenyo ko pui. Onjila yi tuala komuenyo ko pui, Yesu wa yi sokisa letapalo limue. Eye wa lombolola hati: “Iñilili vombundi ya sukatela, momo ombundi yoku iñila koku nyõleha ya tanda, kuenda onjila yendako ya sanjavala, kuenje va lua va iñilamo. Puãi ombundi yoku iñila komuenyo ya sukatela, lonjila yaco ya tĩla, kuenje vañamiñami va yi sanga.”​—⁠Mateo 7:​13, 14; Yoano 14:6; Ovilinga 4:​11, 12.

Ekongelo Lia Kala Ocimunga Cimosi

Elivulu limue lia lombolola okuti ka tu pondola oku sokisa ekongelo lio kocita catete “ndocisoko cimue ca kala voluali luosi ndeci ci kasi etavo lio Katolika kotembo yilo.” Momo lie? Elivulu liaco liamamako oku lombolola okuti, “momo kotembo yaco ka kua kale handi ocisoko cimue cetavo voluali luosi.”

Lomue o pondola oku kuata atatahãi okuti kotembo yaco ekongelo liatete Liakristão ka lia kũlĩhĩwile lombonge ndeci ca siata oku muiwa latavo osi koloneke vilo. Pole, olio lia kuatele esokiyo liwa. Akongelo ka a litepele. Pole, vosi yavo va limbukile okuti kuli Osungu yimosi Yakulu ko Yerusalãi okuti oyo yi kuete omoko yoku va songuila. Osungu yaco ya kala ovapostolo kuenda akulu vakuavo vekongelo lioko Yerusalãi vana va enda oku likolisilako oco ekongelo li likuate ocimunga ‘ndetimba limosi’ lia Kristu.​—⁠Va Efeso 4:​4, 11-16; Ovilinga 15:​22-31; 16:​4, 5.

Nye ca pita lekongelo lina liocili? Anga hẽ lieya oku pongoloka etavo Liokatolika lina lia kemãla koloneke vilo? Anga hẽ ketavo Liokatolika oko kua tundilila atavo akuavo ndeci o Protestande tu lete ndeti koloneke vilo? Ale kua pita ocina cimue cikuavo?

“Otiliku” Kuenda “Osoka”

Oco tu sange etambululo tu konomuisi lutate eci Yesu Kristu a popia catiamẽla kueci ceya kovaso yoloneke. Ci tava okuti ove o komõha poku lilongisa okuti Yesu wa lavoka oku nyõleha kuekongelo liaye kovaso yoloneke kuenda eye wa ecelela okuti ocitangi caco camamako vokuenda kuovita vianyamo.

Eye wa sokisa ekongelo liaye “lusoma wokilu” poku lombolola okuti: “Usoma wokilu wa soka ndomunu wa imba ombuto yiwa vepia liaye. Puãi, osimbu omanu va pekela, unyali waye weya, wa imba ombuto yosoka votiliku, oco wa enda. Puãi eci ocisila ca tunda kuenje ca ima olomema, oco osoka ya molehavo. Akuenje vamuẽleonjo veya, kuenje vo pula vati, A Ñala, kua kũlile ombuto yiwa vepia liove: Osoka hẽ ya tunda pi? Yu wa va kumbulula hati, Unyali umue wa ci linga. Oco akuenje vo pula vati, O yongola okuti tu yi nolamo? Puãi eye hati, Hacoko, sanga osimbu vu nolamo osoka vu tukũlavo otiliku. Vi kulile ño kumuamue toke koku lombola, kuenje koku lombola mopia la vakuakulombola siti, Handi, noli osoka, yi kuti ovitungu ho yi yoki, puãi unguili otiliku vosila yange.”​—⁠Mateo 13:​24-30.

Yesu wa lombolola hati, eye wa kala ‘uwayi wombuto.’ “Ombuto yiwa” yi lomboloka olondonge viaye viocili. “Unyali” waye, Satana Eliapu. “Osoka” ya kala Akristão vesanda vana va iñila vekongelo Liakristão kocita catete. Eye wa popia hati oka ecelela “otiliku” kuenda “osoka” oku kulila kumosi toke kotembo yoku ungula yina yikeya ‘koloneke via sulako violuali lulo.’ (Mateo 13:​37-43) Ovina evi hẽ vi lomboloka nye?

Oku Yapuka Kuekongelo Liakristão

Eci papita okatembo kamue noke yokufa kuovapostolo, ovapostolo vakuavo vana va kala alongisi va tambula omoko yoku songuila ekongelo. Ovo va fetika oku “vangula ovina via penga ha va koki oloñame okuti vi va kuama.” (Ovilinga 20:​29, 30) Oku sulako Akristão valua veya ‘oku yapuka vekolelo liocili.’ Ovo veya oku tiamẽla ‘kolondaka viesanda viaño.’​—⁠1 Timoteo 4:​1-3; 2 Timoteo 4:​3, 4.

Ndomo ca lomboluiwa velivulu limue, ocili okuti, okupisa kocita cakuãla K. K., “etavo Liokatolika olio lika lia kũlĩhĩwile . . . lombonge Vuviali wa va Roma.” Kuenje, kua kala elitokeko liolomitavaso vietavo kuenda omanu, okuti oku litokeka kuaco kuetavo kuenda olombiali kua kala ocina cimue ca litepa calua letavo Liakristão vokocita catete. (Yoano 17:16; Tiago 4:⁠4) Handi vali, elivulu liaco liamamako oku lombolola okuti, vokuenda kuotembo olonumbi kuenda ovihandeleko viosi vietavo kumosi leci catiamẽla kekolelo liavo via pongoloka “omo lionjongole yoku kũlĩhĩsa calua kuenda oku likongela kuo testamendu yosimbu lelongiso lionoño yimue yi tukuiwa hati, Platão.” Ndomo Yesu Kristu a ci lomboluile ale tete, olondonge viaye viocili ka via kuatele elomboloko lalimue osimbu Akristão vesanda va kala oku amamako lesanda liavo.

Olonjeveleli via Yesu via kũlĩhĩle ciwa ndomo ca tĩlile oku pungula otiliku yiwa vosoka, momo o soka yaco ya litenga calua lovikula okuti votembo yina yi kasi oku kula ka ca lelukile oku yi tepisa lotiliku. Omo liaco, Yesu wa lekisa okuti vokuenda kuotembo ka cika leluka oku tepisa Akristão vocili kuenda vana vesanda. Eci ka ci lomboloka okuti ekongelo Liakristão vocili ka likalako vali, momo eye wa likuminyile oku songuila vamanjaye kespiritu “oloneke viosi toke kesulilo lioluali.” (Mateo 28:20) Yesu wa popia hati, otiliku yamamako oku kula. Cimuamue haico ceya oku pita vokuenda kuanyamo okuti Akristão vocili omunu lomunu ale ovimunga va enda oku likolisilako calua oco vatiamẽle kovina viosi Kristu a longisa. Kuenje, vokuenda kuotembo ovo va lekisa okuti vatiamẽla kocisoko cimue ci letiwe lomanu vosi. Ovo ka va lisokele lovimunga vikuavo viatavo esanda koloneke vilo, okuti vokuenda kuotembo a siata oku lekisa etombo kuenda elaviso ku Yesu Kristu.​—⁠2 Petulu 2:​1, 2.

“Omunu Wekandu o Tukuluka”

Upostolo Paulu wa lomboluilevo eci cikeya kovaso yoloneke catiamẽla koluali lulo lueyuka atavo esanda. Eye wa soneha hati: “Lomue ka ko kembi, momo eteke liaco ka liya te tete olukonyo lueya, kuenje omunu wekandu o tukuluka.” (2 Va Tesalonike 2:​2-4) “Omunu wekandu” ocimunga casongui vetavo liesanda vana va litumbika pomangu yavelapo oco va viale ekongelo “Liakristão.”

Oku lekisa etombo ku Suku kua fetika kotembo yupostolo Paulu. Kuenje, kua livokiya noke yoku fa kuovapostolo kuenda ka va kuatele vali layimue ohele. Upostolo Paulu wa lombolola hati ‘ovilinga via Satana, vi kala lunene wosi, lovilimbu, lovikomo viesanda. Vi kalavo lelimbi liosi lievĩho.’ (2 Va Tesalonike 2:​6-12) Eci ci lekisa ciwa ovilinga via siata oku lingiwa lasongui vatavo alua vokuenda kuesapulo!

Asongui vetavo Liokatolika va siata oku lekisa komanu okuti o Katolika koko Roma oko etavo liocili kuenda ovitunda viavo “via piñala ocikele cavo kovapostolo vatete vokuenda kuovitumbulukila viapata toke kokuavo.” Ocili okuti oku piñala kuavo ka ku sangiwa Vembimbiliya kuenda ka ku sangiwa vesapulo lalimue. Ka kuli lalimue esapulo liocili li lekisa okuti atavo eya noke yolofa viovapostolo via Yesu vana va kala oku songuiwa lespiritu sandu lia Suku.​—⁠Va Roma 8:9; Va Galatia 5:​19-21.

Oco hẽ, nye ci popiwa kueci catiamẽla katavo akuavo ana eya noke yoku moleha la pongoloko akuavo? Anga hẽ atavo eya oku tiukila kovina viosi viaenda oku tẽlisiwa lekongelo Liakristão vokocita catete? Veya hẽ oku yelisiwa kolonepa viosi viomuenyo wavo ndeci ca kala ekongelo liatete Liakristão? Ocili okuti noke yapongoloko aco, omanu vosi veya oku kuata Ambimbiliya avo muẽle velimi liavo. Pole, atavo alua handi amamako oku longisa olondotilina viesanda.​—⁠Mateo 15:​7-9.

Kũlĩhĩsa okuti, Yesu Kristu wa eca ohuminyo yokuti ekongelo liaye liocili lika tumbuluiwa kotembo yina yi tukuiwa okuti koloneke via sulako. (Mateo 13:​30, 39) Oku tẽlisiwa kuovitumasuku ku lekisa okuti cilo tu kasi ale koloneke via sulako. (Mateo 24:​3-35) Omo liaco vosi tu sukila oku lipula etu muẽle ndoco: ‘Etavo liocili hẽ lipi? Eci ci pondola oku leluka calua oku sandiliya etavo liaco liocili.

Ci tava okuti pamue ove wa siata oku li yeva okuti wa sanga ale etavo ale ekongelo liaco liocili. Ci kuete esilivilo oku kũlĩhĩsa nda ocili muẽle. Momo lie? Momo ndeci ca kala kocita catete, ci tavavo okuti koloneke vilo ku kalavo lika etavo limosi liocili. Anga hẽ ove wa konomuisa ciwa ovihandeleko vikuamiwa vetavo liaco nda via likuata levi via enda oku kuamiwa lekongelo Liakristão vokocita catete kuenda nda kua siata muẽle ocili oku kuamiwa lesunga eci Yesu Kristu a longisa? Momo lie ku konomuisila cilo muẽle? Olombangi via Yehova vika kuata esanju lialua lioku ku kuatisa oku ci linga cilo muẽle.​—⁠Ovilinga 17:⁠11.

[Elitalatu kemẽla 5]

Anga hẽ etavo liove lia siata oku kuama muẽle lesunga olonumbi vina via enda oku kuamiwa Lakristão vokocita catete kupange woku kunda kuenda oku lilongisa Embimbiliya?