Akãi Vana va Sanjuisa Utima wa Yehova

“Yehova a ku muise onima ya soka lupange wove; onima yocili yu kuihiwe la Yehova Suku ya Isareli una ove weya oku vunda vavava aye.”—RUTI 2:12.

1, 2. Ndamupi tu pondola oku kuatisiwa poku sokolola ovolandu Embimbiliya atiamẽla kakãi vana va sanjuisa utima wa Yehova?

AKÃI vamue vavali ka va pokuile ku Fareo omo lioku sumbila kuavo Suku. Rahava una wa kala ocipuepue ekolelo liaye lio vetiya oku kapa omuenyo waye kohele oco a teyuile alume vavali va Isareli vana veyile oku kũlĩhĩsa ekalo liofeka. Omo liololondunge kuenda eliketiso ukãi umue wa tẽla oku yovola omanu valua kolofa kuenda wa tutuiya ombuavekua ya Yehova oku wila vekandu lioku pesela osonde yomanu. Oku kuatela ekolelo ku Yehova Suku kuenda oku lekisa ocituwa coku yekisa akombe, ca vetiya ukãi umue ocimbumba haeye onjali oku eca kuprofeto wa Suku okulia kuaye okuti okuo lika kua supilepo. Evi vimue pokati kovilinga vialua viwa vi sangiwa Vembimbiliya viatiamẽla kakãi vana va sanjuisa utima wa Yehova.

² Esanju Yehova a lekisa kakãi vaco kuenda asumũlũho a eca kokuavo, owo uvangi u lekisa okuti, ovituwa viapako espiritu ovio vi kuete vali esilivilo lia velapo Kokuaye okuti omunu oku kala ndomo a tuwa ci sule. Koloneke vilo ovitima viomanu, via tekela lika kekalo liwa lietimba loku sandiliya oku tẽlisa olonjongole viavo okuti oku velisapo vali ovina viespiritu ca va tĩlila. Pole, ovo va pondola oku yula ocitangi caco ndomo olohuluwa viakãi vana va sumbila Suku va sangiwa pokati komanu Vaye va kasi oku ci linga koloneke vilo. Akãi vaco Akristão va kuãi ongangu yiwa yekolelo, yolondunge, yoku yekisa akombe, kuenda ovituwa vikuavo viwa via lekisiwa lakãi vana va sumbilile Suku va tukuiwa Vembimbiliya. Ocili okuti, alume Akristão va sukilavo oku kuama ovituwa viaco viwa viakãi vana vo kosimbu vakuangangu yiwa. Tu konomuisi ovolandu Embimbiliya atiamẽla kakãi vana va tukuiwa kefetikilo liocipama cilo oco tu kũlĩhe ndomo tu pondola oku kuama ongangu yavo.—Va Roma 15:4; Tiago 4:8.

Akãi Vamue ka va Pokuile Fareo

3, 4. (a) Momo lie Sifira la Puwa ka va pokuilile Fareo eci a va handeleka oku ponda oloñaña viosi vialume va Isareli? (b) Ndamupi Yehova a sumũlũisa akãi vaco vavali omo liutõi wavo woku sumbilaSuku?

³ Poku kũlĩhĩsa ovitangi via pita ko Nuremberg kofeka yo Alemanya noke Liuyaki Wavali Voluali Luosi, omanu vana va panga onepa koku ponda omanu valua, va seteka oku lisandela esunga poku popia okuti va ci lingila omo lioku pokola kovihandeleko via tumĩwa. Kaliye sokisa ocituwa comanu vaco locituwa cakãi vavali va Isareli Sifira la Puwa vana vakuatasaile akãi poku cita eci va kala ko Egito yosimbu cina ya vialiwile lombiali yimue okuti onduko yaye ka ya kũlĩhĩwile haeye Fareo una okuti wa kala ongangala. Fareo omo lioku kuata usumba walua woku livokiya kuepata lia va Heveru, wa handeleka akãi vavali va siata oku kuatisa vakuavo poku cita, oco va ponde oloñaña viosi vialume va Heveru poku citiwa. Ndamupi akãi ava va tenda ungangala waco? Ovo, “va sumbila Suku, [kuenje] ka va lingile ndomo mua va handeleka osoma ye Ekigo, va popela omuenyo womãla vaco valume.” Momo lie akãi vaco ka va kuatelele usumba Fareo? Momo ovo ‘va sumbilile Suku yocili.’—Etundilo 1:15, 17; Efetikilo 9:6.

⁴ Ocili okuti, akãi vaco vakuakucitisa veya oku tilila ku Yehova, kuenje Eye weya oku linga ‘ocitililo’ cavo poku va teyuila konyeño ya Fareo. (2 Samuele 22:31; Etundilo 1:18-20) Pole esumũlũho lia Yehova liamamako. Eye wa sumũlũisa Sifira la Puwa lepata liavo muẽle. Yehova wa kemanya akãi vaco poku kapa olonduko viavo Vembimbiliya kumue lovilinga viavo viwa oco ovolandu aco a tangiwe lovitumbulukila vikuavo, osimbu okuti onduko ya Fareo ka ya siatele oku ivalukiwa vali vokuenda kuotembo.—Etundilo 1:21; 1 Samuele 2:30; Olosapo 10:7.

5. Ndamupi koloneke vilo Akristão vamue akãi va siata oku lekisa ocituwa cimuamue ndeci Sifira la Puwa va lekisa? Kuenda ndamupi Yehova aka va ĩha onima?

⁵ Kuli hẽ akãi vamue okuti va sokisiwa la Sifira kuenda Puwa? Ocili okuti kuli! Unyamo lunyamo, kua siata oku kala olohuluwa viakãi vakuotõi kupange woku kunda esapulo lioku yovola omanu volofeka muna okuti, ‘olosoma viaco via kapamo ocihandeleko’ coku tateka upange woku kunda. Kuenje akãi vaco va siata oku kapa kohele elisanjo kuenda omuenyo wavo. (Va Heveru 11:23; Ovilinga 5:28, 29) Omo liocisola akãi vaco va kuetele Suku kuenda omanu vana va lisungue lavo, ovo va siata oku kuata utõi wocili okuti ka va ecelela umue oku va tateka kupange wavo woku kundila vakuavo esapulo Liusoma wa Suku. Omo liaco, kuli Akristão valua akãi okuti va siata oku liyaka loku suvukiwa kuenda elambalalo. (Marko 12:30, 31; 13:9-13) Yehova wa siata oku sanjukila ovilinga viwa kumosi lutõi wakãi vaco ndeci Sifira la Puwa va linga, kuenda Eye oka lekisa ocisola caye kokuavo poku soneha olonduko viavo “velivulu liomuenyo,” omo liokupandikisa kuavo toke kesulilo.—Va Filipoi 4:3; Mateo 24:13.

Ocipuepue Cimue ca Sanjuisa Utima wa Yehova

6, 7. (a) Nye Rahava a kũlĩhĩle catiamẽla ku Yehova lo komanu vaye? Kuenda ndamupi ukũlĩhĩso waco wa vetiya utima waye? (b) Ndamupi Ondaka ya Suku yi kemenya Rahava?

⁶ Kunyamo wo 1473 O.Y., Rahava umue ocipuepue wa kala vo Kanana volupale luo Yeriko. Ci tava okuti eye wa kala ukãi umue wa kũlĩhĩle ciwa ovina viosi viatiamẽla vofeka. Eci alume vavali va Isareli veyile oku kũlĩhĩsa ekalo liofeka, yu veya oku tilila vonjo yaye, eye wa tẽla oku va lomboluila cosi catiamẽla kovikomo va Isareli va pita lavio poku tunda kofeka yo Egito, ndaño okuti papitile ale ci soka 40 kanyamo tunde eci ovikomo viaco via pita! Eye wa kũlĩhĩlevo ovolandu atiamẽla ku va Isareli eci va yula Sihoni la Oge Olosoma via va Amori. Konomuisa ndomo a kuatisiwa lukũlĩhĩso waco. Eye wa sapuila ku vakukũlĩhĩsa ofeka hati: “Nda kũlĩha okuti Yehova wa wihi ofeka. . . . Yehova Suku yene, eye Suku kilu liovailu la palo posi.” (Yehosua 2:1, 9-11) Eci Rahava a lilongisa catiamẽla ku Yehova, kuenda kekuatiso a eca ku va Isareli, co veta kutima kuenda co vetiya oku kuatela ekolelo Kokuaye.—Va Roma 10:10.

⁷ Ekolelo Rahava a kuata lio vetiya oku linga cimue. Eye wa tambula “lombembua” va Isareli olondavululi kuenda wa tava kolondaka vo sapuila viatiamẽla koku yovola omanu eci va Isareli va kundula o Yeriko. (Va Heveru 11:31; Yehosua 2:18-21) Ocili okuti, ovilinga via Rahava via sanjuisa utima wa Yehova, kuenje wa vetiyiwa oku tuma ondonge Tiago oku tukula olonduko vimue ndeci Rahava kuenda Avirahama ekamba lia Suku oco Akristão koloneke vilo va kuame ongangu yavo. Tiago wa soneha ndoco: “Haicovo, ocipuepue cina Rahava hẽ, ka tendiwile ndukuesunga mekonda liovilinga [viaye viwa], eci a yekisa olomunga, kuenje wa vi imba onumbi yonjila yiñi?”—Tiago 2:25.

8. Ndamupi Yehova a sumũlũisa Rahava omo liekolelo a kuata kuenda epokolo liaye?

⁸ Yehova wa sumũlũisa Rahava volonepa via litepa. Eye wa popela omuenyo waye kuenda womanu vana va tililile vonjo yaye ndeci, “ocikumba ca isiaye, lava vosi va kala laye.” Noke eye wa ecelela okuti ovo va “tunga pokati ka va Isareli,” kuenda oku tatiwa ciwa nda vakuafeka yavo. (Yehosua 2:13; 6:22-25; Ovisila 19:33, 34) Pole, Yehova wa linga vali ovina vimue vikuavo. Eye wa sumũlũisavo Rahava poku kemanyiwa okuti o linga kukululu ya Yesu Kristu. Yehova wa lekisa ohenda yi komohĩsa kukãi una Ukanana okuti tete wa litumbikile kefendelo lioviteka! a—Osamo 130:3, 4.

9. Ndamupi ocituwa ca sunguluka Yehova a lekisa ku Rahava kuenda kakãi vakuavo Akristão vo kocita catete ci pondola oku pamisa akãi vamue koloneke vilo?

⁹ Ndeci Rahava a linga, tunde kocita catete toke cilo, kuli akãi vamue okuti va siata oku siapo omuenyo wavo ka wa sungulukile oco va sanjuise Suku. (1 Va Korindo 6:9-11) Ocili okuti vamue pokati kakãi vaco va kulila vekalo limue li kasi ndeli liakãi vo ko Kanana yosimbu, vana okuti va kulila pokati komanu ka va kuete ovituwa viwa okuti olonjanja vimue ovituwa vĩvi kokuavo ovio via sunguluka. Pole, ovo va vetiyiwa oku linga apongoloko komuenyo wavo omo liekolelo lieci va lilongisa Vembimbiliya. (Va Roma 10:17) Kueci catiamẽla kakãi vaco ci tava oku popia hati, “Suku ka kuatele osõi oku tukuiwa [okuti] Suku yavo.” (Va Heveru 11:16) Ovo va sesamẽla ekemanyo liocili!

Wa Pandiyiwa Omo Liolondunge Viaye

10, 11. Vovitangi vipi mua kongela Nabala la Daviti okuti Avigaile wa vetiyiwa oku eca ekuatiso liaye?

¹⁰ Kosimbu kua kala akãi valua va lekisa ekolelo liocili omo liolondunge viavo, kuenje ovituwa viavo via soliwa calua la Yehova kuenda omanu Vaye. Umue pokati kavo Avigaile, ukãi wa Nabala u Isareli una wa kala ohuasi. Olondunge via Avigaile via kuatisa oku popela omuenyo womanu valua kuenda oku tateka Daviti, una weya oku kala soma ya va Isareli, oco kaka wile vekandu lioku pesela osonde. Tu pondola oku tanga ulandu wa Avigaile u sangiwa kelivulu lia 1 Samuele kocipama 25.

¹¹ Ndomo ulandu u lekisa kefetikilo, Daviti kumue lakuenje vaye va kala ocipepi locitumãlo cimue ci lisungue loviunda via Nabala. Ovo lohenda yavo, va teyuila ocunda ca manjavo Nabala u Isareli utanya luteke. Eci Daviti a limbuka okuti okulia kuaye kua pua, weya oku tuma ku Nabala ekũi liakuenje vaye oco vaka pinge okulia. Owola yaco nda oyo Nabala a sanga epuluvi lioku eca olopandu viaye ku Daviti kuenda oku lekisa esumbilo kokuaye, momo Daviti wa kala ombuavekua ya Yehova. Pole Nabala ka tavele oku eca okulia kakuenje va Daviti. Lonyeño yalua, Nabala wa pembula Daviti loku ecelela okuti akuenje vaye va tiukila ovoko okuti ka vambata lacimue. Eci Daviti vo sapuila ocitangi caco, noke wongolola eci ci soka 400 kakuenje vana vambata ovimalẽho oco vo fetuluinye. Pole eci Avigaile a limbuka etambululo lionyeño ulume waye a kuatela akuenje va Daviti, wa tuala lonjanga ku Daviti ovikulia viñi viñi, poku endako eye muẽle.—Okupisa kocinimbu 2 toke 20.

12, 13. (a) Ndamupi Avigaile a lekisa oku kala ukualondungekuenda ukuacili ku Yehova lo kombuavekua yaye? (b) Nye Avigaile a linga eci a tiukila konjo? Kuenda nye ceya oku pita laye?

¹² Eci Avigaile a ñualehẽla la Daviti, wa pinga ongecelo yimue yi lekisa esumbilo liocili lumbombe waye kombuavekua ya Yehova poku u sapuila hati: “Yehova o tumãlisa ciwa epata lia cime cange omo cime cange o kasi loku yaka ovita via Yehova.” Kuenje wa popiavo hati, Yehova oka nõla Daviti oco a linge ombiali yava Isareli. (Ovinimbu 28 toke 30) Handi vali, Avigaile wa lekisa utõi woku vangula la Daviti okuti o yuvula oku fetuluinya, kuenje wo tutuiya oco a likandangiye oku wila vekandu lioku pesela osonde. (Ocinimbu 26 kuenda 31) Omo lieliketiso kuenda esumbilo Avigaile a lekisa, Daviti weya oku tutuiya onyeño yaye kuenda weya oku kuata ovisimĩlo vina via sunguluka. Omo liaco, Daviti wa tambulula hati: “Yehova Suku ya va Isareli, una wa ku tuma kokuange etali, a pandiyiwe. Olondunge viove vi pandiyiwe. Love muẽle, pandiyiwa omo wa niula kongole yoku pesela osonde.”—Ocinimbu 32 kuenda 33.

¹³ Eci Avigaile a tiukila konjo, wa kuata onjongole yoku sapuilako ulume waye ombanjaile a eca ku Daviti. Pole, eci Avigaile a pitĩla konjo, wa sanga okuti ulume waye ‘wa kolua calua.’ Omo liaco, wa kevelela toke eci eye a koluluka kuenje wo lomboluila ulandu waco. Ndamupi Nabala a tenda ulandu waco? Eye wa saluka calua kuenje lutima wa teka weya okuambuka. Noke lioloneke ekũi, Suku wa veta Nabala kuenje wa fa. Eci Daviti a yeva okuti Nabala wa fa, wa nõlapo oku kuela Avigaile una a komohẽle calua omo lioku u kuatela esumbilo liocili. Omo liaco, Avigaile wa tava oku linga ukãi wa Daviti.—Okupisa kocinimbu 34 toke 42.

Ove hẽ o Pondola Oku Kuama Ongangu ya Avigaile?

14. Ovituwa vipi Avigaile a lekisa okuti ovio tu sukila oku kuama?

¹⁴ Anga hẽ ene wakãi lalume u pondolavo oku lekisa ovituwa ndevi via Avigaile? Ci tava okuti pamue ove o yongola oku kuama ongangu yaye eci o sangiwa lovitangi. Handi vali, eci vakuene va ku kokisa onyeño, ci tava okuti pamue o yongolavo oku vangula levando kuenda oku lekisa esunguluko. Nda okuti oco, nye ku likutilila ku Yehova eci catiamẽla kovitangi viaco? Eye wa tu likuminya oku tu ĩha olondunge lelomboloko okuti tu kuata ovisimĩlo vina vi pondola oku kuatisa omanu vosi va ‘pinga lekolelo.’—Tiago 1:5, 6; Olosapo 2:1-6, 10, 11.

15. Vakalo api akãi Akristão va pondola oku lekisa ovituwa viwa ndevi Avigaile a lekisa?

¹⁵ Ovituwa viaco viwa vi kuete esilivilo liocili kukãi una okuti ulume waye ka lilongisa Embimbiliya kuenda ka pokola kolonumbi Viovisonehua. Ci tava okuti pamue eye wa siata oku kolua. Lelavoko liocili, ulume wove oka siapo ovituwa viaco vĩvi, ndeci alume valua va siata oku linga apongoloko komuenyo wavo omo liovituwa viwa viakãi vavo ndeci umbombe, esumbilo kuenda ovilinga viesunguluko.—1 Petulu 3:1, 2, 4.

16. Nda vonjo mueya ovitangi, ndamupi manji ukãi a pondola oku lekisa ovituwa viokuti wa velisapo ukamba waye la Yehova kovina viosi a linga?

¹⁶ Eci ove o sangiwa lovitangi konjo, lekisa epandi kuenda ivaluka okuti Yehova olonjanja viosi o kasi love oco a ku kuatise. (1 Petulu 3:12) Likolisilako oku pamisa ekalo liove kespiritu. Likutilila oco o kuate olondunge lutima wa tulumũha. Nda o yongola oku kuata ukamba wocili la Yehova, o sukila oku linga elilongiso Liembimbiliya olonjanja viosi, oku likutilila kokuaye, loku sokolola eci wa lilongisa kuenda oku kuata ukamba wocili la vamanji Akristão. Ocisola Avigaile a lekisa ku Suku kuenda ocituwa ciwa a lekisa kombuavekua yaye, ka ca tatekiwile lovituwa vĩvi viulume waye una ka kapeleko ovina viespiritu. Eye wa kuatisiwa lolonumbi via sunguluka. Vonjo yina okuti ulume waco ondingupange yiwa ya Suku, ukãi Ukristão wa kũlĩha okuti o sukila oku amamako loku pamisa ekalo liaye kespiritu. Handi vali, ulume waye o kuetevo ocikele coku kuama olonumbi Viembimbiliya oku tata ciwa ekalo liaye kespiritu kuenda oku sanda eteku. Pole, ukãi o sukila oku ‘likolisilako oku linga ovina viosi vi tuala kepopelo.’—Va Filipoi 2:12; 1 Timoteo 5:8.

Eye wa Tambula “Onima Yuprofeto”

17, 18. (a) Oseteko yipi yilikasi yekolelo ukãi ocimbumba wo ko Sarepata a pita layo? (b) Ndamupi ukãi ocimbumba a tenda epingilo lia Eliya? Kuenda ndamupi Yehova o wĩha onima omo liocituwa caye ciwa?

¹⁷ Onjila yiwa Yehova a lekisa poku tata ukãi umue ocimbumba haeye ohukũi kotembo yuprofeto Eliya, yi lekisa okuti eye wa kapako calua omanu vana va siata oku eca ekuatiso kefendelo liocili, poku lieca ovo muẽle kupange waco kuenda oku eca ekuatiso liovina ovo va kuete. Omo liekambo liovava koloneke via Eliya, omanu valua va kala onjala oku kongelamo ukãi ocimbumba kuenda omõlaye ukuenje una wa kala ko Sarepata. Eci ovo va kala oku malusula okulia kuna kua supilepo, veya oku tambula ukombe okuti uprofeto Eliya. Eye wa linga epingilo limue ka lia siatele. Ndaño okuti eye wa kũlĩhĩle ovitangi ukãi waco a kala oku liyaka lavio, pole wo pinga “okambolo” kuenje ukãi wa panga okambolo kaco lulela una wa supilepokuenda okasema. Pole, eye wa vokiyako vali hati: “Ca popia Yehova Suku ya Isareli ceci hati, Vombia yosema ka mu pui, ndaño vocimbutika culela ka mu kambi [ulela], toke eteke Yehova a lokisa ombela kilu lieve.”—1 Olosoma 17:8-14.

¹⁸ Ndamupi ove nda wa tenda epingilo eli lilikasi? Ukãi ocimbumba wo ko Sarepata soketi wa limbuka Eliya uprofeto wa Yehova kuenje “wa linga ndeci co sapuila Eliya.” Ndamupi Yehova a tenda ocituwa cukãi coku yekisa akombe? Eci vofeka mua kala ocitenya lekambo liovava, Yehova wa ecele okulia kukãi, lo komõlaye kuenda ku Eliya. (1 Olosoma 17:15, 16) Ndaño okuti ukãi ocimbumba wo ko Sarepata katiamẽlele kepata lia va Isareli, lopoweya oku tambula ku Yehova “onima yuprofeto.” (Mateo 10:41) Omõla wa Suku wa tukulavo ovituwa viwa viukãi ocimbumba una a pandiya hati, ukãi waco eye tete wa lekisa ongangu yiwa pokati komanu vana ka vakuatele ekolelo volupale luo Nasara, muna a citiwila.—Luka 4:24-26.

19. Ndamupi Akristão vamue akãi koloneke vilo va siata oku kuama ongangu yukãi una ocimbumba wo ko Sarepata? Kuenda ndamupi Yehova a siata oku tenda ovituwa viavo?

¹⁹ Koloneke vilo, kuli akãi valua Akristão okuti va kuete ocituwa cimuamue ndeci cukãi ocimbumba wo ko Sarepata. Ndeci, Kuli vamanji vamue akãi olohukũi haivo va kasi loku tekula epata liavo okuti, olosemana viosi va siata oku yekisa olomitavaso vi nyula akongelo vimbo kuenda akãi vavo. Vakuavo va siata oku eca okulia kakundi votembo yosi kuenda oku kuatisa olosuke. Kulivo vamanji vamue akãi okuti va siatavo oku lieca olumue kuenda oku eca ovina va kuete oco vi kuatise kupange woku kunda Usoma. (Luka 21:4) Anga hẽ Yehova wa siata oku kapako alikolisilo avo? Ocili okuti wa siata oku a kapako! Embimbiliya li popia okuti: “Suku hokuanyako okuti ivalako upange wene kuenda ocisola wa lekisi loku vumba olosandu vonduko yaye, ndeci vu kasi loku linga toke [cilo].”—Va Heveru 6:10.

20. Nye tuka lilongisa vocipama cikuãimo?

²⁰ Kocita catete, kua kala akãi valua va sumbilile Suku okuti va eca ekuatiso ku Yesu kuenda kolondonge viaye. Vocipama cikuãimo tuka lilongisa ndomo akãi vaco va sanjuisa utima wa Yehova kuenda tuka konomuisa ongangu yiwa yakãi vana va kasi [[oku vumba lutima wosi Yehova koloneke vilo ndaño lovitangi.

[Apulilo Elilongiso]

Oku Pitulula

• Ndamupi akãi vamue va tẽla oku sanjuisa utima wa Yehova ndeci:

• Sifira la Puwa

• Rahava

• Avigaile

• Ukãi ocimbumba wo ko Sarepata

• Ndamupi oku sokolola ongangu yiwa ya lekisiwa lakãi va tukuiwa ndeti ku pondola oku kuatisa omunu lomunu pokati ketu? Ci lombolola.

[Elitalatu kemẽla 23]

Kuli akãi valua vakuekolelo okuti va siata oku vumba Suku lutõi ndaño “locihandeleko cosoma”

[Elitalatu kemẽla 24 ]

Momo lie Rahava a lingila omunu umue ukuangangu ya velapo yoku lekisa ekolelo liocili?

[Elitalatu kemẽla 24]

Ovituwa vipi Avigaile a lekisa ove o yongola oku kuama?

[Elitalatu kemẽla 26]

Koloneke vilo kuli akãi valua Akristão okuti va siata oku lekisa ocituwa ndeci ukãi una ocimbumba wo ko Sarepata a lekisa