Etendelo 666 Helumbuko

Embimbiliya li popia hati: ‘Lomue o tẽla oku landa pamue oku landisa cimue te u o kuete ondimbukiso yokuti onduko yocinyama pamue etendelo lionduko yaye. Eci oku lomboloka ci sukila olondunge. U o kasi lolondunge a tende etendelo liocinyama, momo etendelo liaco etendelo liomunu. Etendelo liaco olio ovita epandu lakũi epandu lepandu.’ ​—⁠Esituluilo 13:​17, 18.

KULI omanu valua va siata oku konomuisa elomboloko liondimbukiso ‘yocinyama.’ Vamue va yongola oku kũlĩha elomboloko lietendelo 666. Ovolandu oku konomuisa eci catiamẽla kocinyama a siata oku lekisiwa ndeci: vo televisão, valivulu kuenda volosinema.

Omanu vamue va tava okuti, etendelo 666, liatiamẽla ku vana Embimbiliya li tukula hati, va Antikristu. Vakuavo va sima hati, etendelo liaco li kapiwa vetimba liomanu. Kuenje, eci ci kuatisa oku va limbuka okuti va kasi oku fendela ocinyama. Kulivo omanu vamue va popia hati, Papa eye okuete ondimbukiso yaco. Ovo va sima hati, nda va linga olokonda vimue londuko ya Papa o tukuiwa hati, Vicarius Filii Dei (yi lomboloka hati Omõla wa Suku), va sanga etendelo 666. Vamue va simavo hati, olombiali ndeci, Diocletian la Nero Caesar va kuetevo etendelo liaco.a

Omanu va kuete ovisimĩlo via litepa leci Embimbiliya li popia kueci catiamẽla ketendelo eli. Embimbiliya li lungula okuti, vosi va kuete ondimbukiso yocinyama vaka kunduiwa, keteke liesulilo lioluali lulo. (Esituluilo 14:​9-11; 19:​20) Tu sukila oku kuata elomboloko lietendelo 666. Yehova o tu kuatisa oco tu kuate elomboloko Liembimbiliya. Kuenje, tu tẽla oku limbuka elomboloko lietendelo liocinyama.​—⁠2 Timoteo 3:16; 1 Yoano 1:5; 4:⁠8.

[Etosi pombuelo yemẽla]