Nye ci Sukiliwa Oco Omunu a Kuate Esanju?

YEHOVA la Yesu va kuete esanju. Kuenda va kũlĩha eci ci nena esanju komanu. (1 Timoteo 1:11; 6:​15) Omo liaco, tu sukila oku lilongisa Embimbiliya oco tu kũlĩhe eci ci nena esanju lia velapo.​—⁠Esituluilo 1:3; 22:⁠7.

Vohundo Yesu a lingila Komunda, wa lombolola eci ci nena esanju. Eye wa popia hati: (1) “Vakuosuke wovutima va sumũlũha.” (2) Ava va lila, (3) lava vomboka vutima kuenda (4) ava va kuete onjala lenyona liesunga, va sumũlũha. (5) Vakuahenda (6) lava va yela kovitima, va sumũlũha. (7) Ava va koka ombembua, (8) lava va yambuilua esunga kuenda (9) ava va fũkĩlĩsua loku lundiliwa omo liesunga, va sumũlũha.​—⁠Mateo 5:​3-11.

Anga hẽ Olondaka Via Yesu Viocili Muẽle?

Olondaka vimue via Yesu ka vi sukila elomboluilo lialua. Ocili okuti omanu vana vomboka, vakuahenda kuenda ava va koka ombembua, va sumũlũha. Pole, vakuanyeño, kuenda olongangala, ka va pondola oku kuata esanju. Helie ka tava kolondaka evi?

Etu tu pondola oku komoha eci tu yeva okuti, omanu va kasi onjala lenyona omo liesunga, va sumũlũha. Kuenda tu komohavo eci tu yeva okuti, ava va lila va sumũlũha. Omanu vaco va kũlĩha ciwa ekalo lĩvi lioluali. Kuenda va kasi oku ‘lisiõsiõla loku leñaleña omo lievĩho li kasi oku lingiwa’ koloneke vilo. (Esekiele 9:⁠4) Ovitangi viaco, ka vi nena esanju kokuavo. Pole, va lilongisa okuti, Suku wa li kuminya oku nena esunga mulo voluali. Kuenje, ohuminyo yaco yi va sanjuisa calua.​—⁠Isaya 11:⁠4.

Omanu vosi va sole esunga, va siata oku sumua calua omo liakandu avo. Ovo va yongola oku linga eci ca sunguluka kovaso a Yehova. Omo lioku kuatela ombili ovina viespiritu, va likolisilako oku pokola kolonumbi via Yehova. Momo va kũlĩha okuti Yehova eye lika o pondola oku va kuatisa kovitangi viavo.​—⁠Olosapo 16:​3, 9; 20:⁠24.

Omanu vana va lila kuenda ava va kuete onjala lenyona liovina viespiritu, va kũlĩha ciwa esilivilo lioku kuata ukamba la Yehova. Oku kuata ukamba la vakuetu ci nena esanju. Pole oku kuata ukamba la Suku, ci nena vali esanju lia velapo. Ava va sole esunga haivo va yongola oku pokola kolonumbi via Yehova, ovo lika va sumũlũha.

Yesu wa popia hati, ava va fũkĩlĩsua loku lundiliwa, va sumũlũha. Citava okuti ka ci leluka oku tava kondaka yaco. Pole, olondaka via Yesu viocili muẽle. Oco hẽ olondaka viaco vi lomboloka nye?

Omanu va Lambalaliwa va Pondola Ndati Oku Sanjuka?

Yesu ka popele hati alundi lelambalalo vi nena esanju. Eye wa popia hati: ‘Ava va yambuiwa omo liesunga va sumũlũha. Ava va fũkĩlĩsua loku lundiliwa ovina viosi vĩvi, va sumũlũha.’ (Mateo 5:​10, 11) Omunu wosi o fũkĩlĩsua omo lioku kala ondonge ya Yesu kuenda oku pokola kolonumbi viaye, eye lika wa sumũlũha.

Akristão vatete va pita lovitangi viaco. Ovitunda Lakulu va Yudea “eci va pañinya ovapostolo, va va tipula. Noke va va handeleka, vati, ka ci tava oku longisa vali vonduko ya Yesu, kuenje va va eca.” Nye ovapostolo va linga? Embimbiliya li lekisa okuti, ovo ‘va tunda Vonjango loku yolela. Momo va sangiwa okuti va sesamẽla oku sepuiwa omo lionduko ya Yesu. Omo liaco, vamamako oku kundila vonembele lo volonjo loku longisa okuti, Yesu eye Mesiya.’​—⁠Ovilinga 5:​40-42; 13:​50-52.

Upostolo Petulu wa lombololavo okuti, elambalalo li nena esumũlũho. Eye wa popia hati: “Nda vo wimbuili onduko ya Kristu . . . wa sumũlũhi, momo nda oco, espiritu liulamba, okuti espiritu lia Suku, li kasi lene.” (1 Petulu 4:​14) Ukristão o sumua nda o tala ohali omo lioku linga esunga. Pole, eye o sanjuka omo lioku kũlĩha okuti espiritu lia Suku li kasi laye. Ndamupi espiritu lia Suku li nena esanju?

Ovilinga Vietimba Ale Apako Espiritu?

Yehova eca lika espiritu liaye komanu vana va pokola kolonumbi viaye. (Ovilinga 5:​32) Pole, ka lieci ku vana va litumbika ‘kovilinga vietimba,’ ndeci: “Ukahonga, evĩho, [akutisasõi], oku fendela oviteka, owanga, asuvu, ema, onya, olonyeño, ocipululu, olonamalala, olonepele, oku livela, ovoholua, ayele, lovina via lisoka lavio.” (Va Galatia 5:​19-​21) Koloneke vilo, ovilinga vietimba via siata calua voluali. Pole omanu vana va litumbika kovilinga viaco, ka va pondola oku kuata esanju ka li pui. Momo ovilinga viaco vi nyõla ocisola pokati kepata. Kuenda vi tepa ukamba. Embimbiliya li lungula okuti, vosi va lingainga ovina viaco “ka va piñala usoma wa Suku.”

Suku eca unene waye komanu vana va lekisa ‘apako espritu’ ndeci: “Ocisola, esanju, ombembua, epandi, unu, esunga, ekolelo, umbombe, [kuenda] esuluviko.” (Va Galatia 5:​22, 23) Nda tua lekisa ovituwa via tukuiwa ndeti, tuka kuata ombembua la vakuetu kuenda la Suku. Kuenje tuka kuata esanju ka li pui. (Tala pokakasia.) Handi vali, nda tua lekisa ocisola, unu, esunga, kuenda ovituwa vikuavo viwa, tuka sanjuisa utima wa Yehova. Kuenda tuka kuata omuenyo ko pui voluali luokaliye, muna muka kala lika esunga.

Oku Nõla Omuenyo Wesanju

Manji umue Wolfgang lukãi waye Brigitte, vo kofeka yo Alemanya, va kuata ukuasi walua. Otembo yaco va kala amalẽhe kuenda va kuatele uhayele. Noke, va fetika oku lilongisa Embimbiliya lonjongole yocili. Ovo va kuata uwalo una watĩla. Onjo yavo ya finile calua. Kuenda va kuata upange umue weca olombongo vialua. Otembo yavo yosi va yi pesilile koku vokiya ovokuasi. Pole, ka va kuatele esanju. Noke, va konomuisa ciwa omuenyo wavo. Kuenje va nõlapo oku pesila otembo yalua kovina viespiritu. Kuenda va fetika oku kũlĩhĩsa eci ci va kuatisa oku kala akamba va Yehova. Onjila ovo va nõlapo, ya va kuatisa oku pongolola ovisimĩlo viavo. Noke, va leluisa omuenyo wavo. Kuenje va litumbika kupange wakundi votembo yosi. Cilo, va kasi oku talavaya Kombetele yo kofeka yo Alemanya. Ovo va kasi oku lilongisa elimi liofeka yo Asia. Momo va yongola oku longisa Ondaka ya Suku komanu va vangula elimi liaco.

Eci hẽ ca va kuatisa oku sanga esanju komuenyo wavo? Ca vakuatisa. Manji Wolfgang wa popia hati: ‘Omo okuti cilo tua li tumbika kupange wa Yehova, tu kuete esanju lialua. Oku vumba Yehova lutima wetu wosi, ku kasi loku pamisa olohuela vietu. Kosimbu olohuela vietu via kala oku enda ciwa. Pole, tua kuata ovisimĩlo via litepa. Cilo, omo lioku litumbika kupange wa Yehova, tu kuete lika ovisimĩlo vimuamue.’

Nye ci Sukiliwa Oco tu Kuate Esanju?

Tu yuvuli “ovilinga vietimba” oco tu kuate esanju. Kuenda tu lekisi ‘apako espiritu lia Suku.’ Oco esanju lietu liamameko, tu sukila oku kuata ukamba la Suku. Omunu wosi o likolisilako oku kuata ukamba waco oka sumũlũha ndomo Yesu a ci popia.

Kuka sime okuti, ku pondola oku kuata esanju. Koloneke vilo, ci tava okuti o kambela uhayele. Pamue o kuata ovitangi volohuela viove. Ci tava okuti ku kuete omãla. Pamue o kasi oku likolisilako oku sanda upange. Kuenda ku kuete olombongo. Pole, o sukila oku pandikisa kuenda kuka pue elavoko. Usoma wa Suku uka mãlako ovitangi viosi tu liyaka lavio cilo. Yehova oka linga ovina viwa. Ukualosamo wa popia hati: “Uviali wove, uviali ko pui. . . . O nyanyumula eka liove, kuenje o kutisa [ovina] viosi vi kasi lomuenyo.” (Osamo 145:​13, 16) Omanu vosi va kasi oku vumba Yehova, va kolela kohuminyo eyi. Omo liaco, nda wa kolelavo kohuminyo yaco oka kuata esanju koloneke vilo.​—⁠Esituluilo 21:⁠3.

[Okakasia Lelitalatu kemẽla 6]

Ovina vi tu Kuatisa Oku Sanga Esanju

Ocisola o lekisa ku vakuene, cika va kuatisavo oku ku sola.

Esanju, lika ku kuatisa oku liyaka lovitangi.

Nda wa lekisa ombembua, oka kala ciwa la vakuene.

Nda wa kuata epandi, kuka konyoha eci o liyaka lovitangi.

Nda wa lekisa unu, oka kuata ukamba la vakuene.

Nda wa lekisa esunga, vakuene vaka ku kuatisa eci o liyaka lovitangi.

Nda wa lekisa ekolelo, Yehova oka ku ĩha olonumbi vioku ku songuila.

Nda wa lekisa umbombe, utima wove uka tulumũha.

Nda wa lekisa esuluviko, oka tẽla oku likandangiya koku lueya.

[Elitalatu kemẽla 7]

Oco o kuate esanju, o sukila oku kapako ovina viespiritu