Yehova “Eca Onima Kuava Vo Sanda”
“[Omunu] wosi o yongola oku kokela ku Suku, co sesamẽla oku kolela okuti kuli Suku, kuenda . . . Suku eca onima kuava vo sanda.”—VA HEVERU 11:6.
1, 2. Momo lie omanu vamue va Yehova va siatela oku kuata ovisimĩlo ka via sungulukile?
MANJI umue o tukuiwa hati Barbara,a wa popia hati: ‘Ndimbangi ya Yehova vokuenda kueci ci soka akũi atatu kanyamo. Pole, nda siata oku sima okuti si sesamẽla oku tukuiwa hati, Ombangi ya Yehova. Nda litumbika kupange wakundi votembo yosi. Kuenda nda siata oku tambula asumũlũho alua. Pole, si kuete ekolelo liokuti Ndimbangi ya Yehova.’ Manji ukuavo o tukuiwa hati, Keith, wa lombololavo ovisimĩlo vimuamue hati: ‘Nda kũlĩha okuti omanu va Yehova va kuete esunga lioku kuata esanju. Pole si kuete esanju liaco. Momo olonjanja vimue nda siata oku sima okuti, si sesamẽla oku kala omunu wa Yehova.’
2 Omanu valua va Yehova vo kosimbu va kuatelevo ovisimĩlo viaco. Cimuamue haico ci kasi oku pita Lakristão vocili koloneke vilo. Ove hẽ wa siatavo oku kuata ovisimĩlo viaco? Citava okuti o kasi oku liyaka lovitangi vialua. Pole, vamanji vakuavo va molẽha ndu okuti ka va kuete ovitangi komuenyo wavo. Kuenje o sima okuti, Yehova ka ku sole. Kuenda ku sesamẽla ekuatiso liaye. Yuvula ovisimĩlo viaco. Embimbiliya li tu sapuila hati: “[Yehova] ka tombele, ndaño oku nyehula ohali yohukũi. Ko wundisilile ocipala, puãi eci a vilikiya wo yeva.” (Osamo 22:24) Olondaka viocitumasuku eci catiamẽla ku Mesiya, vi lekisa okuti, Yehova o yevelela olohutililo viomanu vaye. Kuenda ecavo onima kokuavo.
3. Momo lie tua siatela oku liyaka lovitangi?
3 Voluali lulo ka muli omunu ka liyaki lovitangi. Ndaño muẽle omanu va Yehova va siatavo oku liyaka lovitangi. Tu kasi voluali lua vialiwa la Satana Eliapu. (2 Va Korindo 4:4; 1 Yoano 5:19) Eye wa siata oku lambalala Olombangi via Yehova. Pole, Yehova ka lingi ocikomo coku teyuila omanu vaye kovitangi viaco. (Yovi 1:7-12; Esituluilo 2:10) Osimbu handi Yehova ka nenele esulilo lioluali lulo, tu sukila oku ‘pandikisa kohali. Tu sukilavo oku kuata ocituwa coku likutilila,’ loku kolela okuti Yehova o tu lava. (Va Roma 12:12) Ka tuka kuati ovisimĩlo viokuti, Yehova wa tu yanduluka.
Epandi Liomanu va Yehova Kosimbu
4. Lombolola ovolandu amue a lekisa ndomo omanu va Yehova va pandikisa lovitangi kosimbu.
4 Omanu va Yehova kosimbu, va liyakele lovitangi vialua. Hana wa sumuile calua omo okuti ka kuatele omãla. Kuenje wa simĩle okuti Yehova wo yanduluka. (1 Samuele 1:9-11) Uprofeto Eliya eci a lambalaliwile la Nasoma Isevele, wa kuatele usumba walua. Kuenje wa likutilila ku Yehova hati: “Njupe omuenyo wange, momo sia velelepo olosekulu viange.” (1 Olosoma 19:4) Upostolo Paulu wa sumuile calua omo liekandu a piñala. Kuenje wa popia hati: “Eci njongola oku linga ciwa, cĩvi ceci.” Noke wamisako hati: “Ndukuelamba we!”—Va Roma 7:21-24.
5. (a) Yehova wa sumũlũisa ndati Hana, la Eliya kuenda Paulu? (b) Elembeleko lie tu tambula Vondaka ya Suku eci tu kuata ovisimĩlo ka via sungulukile?
5 Ocili okuti, Hana, la Eliya kuenda Paulu, va pandikisa kupange wa Yehova. Kuenje va tambula asumũlũho alua. (1 Samuele 1:20; 2:21; 1 Olosoma 19:5-18; 2 Timoteo 4:8) Ovo va liyaka lovitangi vialua ndeci: esumuo, kuenda usumba. Koloneke vilo, eci tu liyaka lovitangi, citava okuti tu kuatavo esumuo. Poku liyaka lasakalalo omuenyo, ove pamue o sima okuti Yehova ka ku sole. Oco hẽ nye o sukila oku linga? O pondola oku tambula elembeleko li tunda Vondaka ya Suku. Vocipama cosemana ya pita, tua lilongisa olondaka via Yesu wa popia hati, Yehova ‘wa tenda esinga liovitue vietu.’ (Mateo 10:30) Olondaka evi, vi lekisa okuti, Yehova wa kapako omanu vaye. Ivaluka olusapo lua Yesu luatiamẽla kolongungu. Ocili okuti, Yehova wa kapako olonjila viaco. Oco hẽ ka kapeleko ovitangi viove?
6. Embimbiliya li tẽla ndati oku lembeleka omanu vana va liyaka lovisimĩlo ka via sungulukile?
6 Ocili hẽ okuti Yehova wa kapako omanu ka valipuile? Eye wa va kapako, kuenda ka va yanduluka. Vembimbiliya mu sangiwa ovolandu alua a lekisa uvangi waco. Eci tu tanga ovolandu aco, tu popia ndeci Daviti a popia hati: “Eci atatahãi a nduila vutima okulemba kuove oko ku ñolisa.” (Osamo 94:19) Omo liaco, tu konomuisi elembeleko li tunda Vondaka ya Suku. Elembeleko liaco li tu kuatisa oku limbuka okuti, Suku wa kapako ovitangi vietu. Kuenda tu kũlĩhavo okuti, nda tuamamako oku linga ocipango caye, tuka tambula onima kokuaye.
‘Omanu va Nõliwa’ la Yehova
7. Vonduko Yuprofeto Malakiya, ocitumasuku cipi Yehova a lombolola catiamẽla ku va Isareli olondingaĩvi?
7 Vokuenda kuocita catãlo, va Yudea va liyakele lovitangi vialua. Ovitunda via enda oku tava ovinyama via lemãla levi vivela okuti vieciwa ndocilumba kutala wa Yehova. Olonganji, via enda oku lekisa ocame poku tetulula ovitangi. Vofeka mua kala ovituwa vialua vĩvi ndeci: Umbanda, uhembi, oku nyana kuenda uvasi. (Malakiya 1:8; 2:9; 3:5) Malakiya wa sapula ocitumasuku catiamẽla kokuavo. Eye wa lombolola okuti, Yehova oka yelisa omanu vaye kevĩho liaco. Kelivulu liaco tu tangako ndoco: “Va linga vange, . . . muẽle, eteke ñatuka. Ndi va popela ndeci onjali yi popela omõlãye u vumba.”—Malakiya 3:17.
8. Momo lie elivulu lia Malakiya 3:17, li tiamisiwilila kowiñi wakahandangala?
8 Ocitumasuku ca Malakiya ci kasi oku tẽlisiwa koloneke vilo, pokati kolombuavekua vi soka 144.000 komanu. Ovo va linga ‘ofeka yi kola, haivo omanu va nõliwa’ la Yehova. (1 Petulu 2:9) Ocitumasuku ca Malakiya, ci lembelekavo ‘owiñi wakahandangala una utãi kovaso yocalo lo kovaso ya Kameme okuti, va wala olonanga vi yela.’ (Esituluilo 7:4, 9) Ovo kumue lolombuavekua, va linga ocunda cimuamue. Kuenda Yesu Kristu eye Ungombo wavo.—Yoano 10:16.
9. Momo lie Yehova a tukuila ‘omanu vaye hati, va kola’?
9 Yehova wa siata oku tenda ndati omanu vana va nõlapo oku u vumba? Elivulu lia Malakiya 3:17, li lekisa okuti, Yehova o sole calua omanu vana vovumba ndeci isia a sole omõlaye. Kũlĩhĩsa olondaka Yehova a tukula lavio omanu vaye. Eye wa popia hati, ‘omanu vange va kola.’ Ambimbiliya amue poku tukula ocinimbu eci a popia ndoco: ‘Omanu vange, ocipiñalo cange, ukuasi wange.’ Momo lie Yehova a tukuila omanu vaye hati va kola? Momo Eye ukualopandu. (Va Heveru 6:10) Eye o kuetele ocisola omanu vana va kasi oku u vumba lutima wavo wosi. Kuenda va linga akamba vaye.
10. Ndamupi Yehova a siata oku teyuila omanu vaye?
10 Nda o kuete ocikuata cimue ci silivila o citata ndati? Ocili okuti, o likolisilako loku ci tata ciwa. Cimuamue haico Yehova a linga lomanu vaye ‘va kola.’ Eye ka va teyuila kovitangi viosi va liyaka lavio. (Ukundi 9:11) Pole, wa siata oku va teyuila konepa yespiritu. Kuenda o va ĩha ongusu yoku pandikisa kovitangi. (1 Va Korindo 10:13) Kosimbu, Mose wa sapuilile omanu va Yehova hati: “Kolisiko. Kuati utõi, . . . Momo u endela kumue love, eye Yehova Suku yove. Eye ka ku tokoka, ndaño oku ku yanduluka.” (Esinumuĩlo 31:6) Omo liaco, Yehova o sumũlũisa ‘omanu vaye va kola’ kuenda oku va tata ciwa.
Yehova “Eca Onima”
11, 12. Oku kũlĩha ocisola ca Yehova, ci tu kuatisa ndati oku yuvula atatahãi atiamẽla kokuaye?
11 Kuli uvangi ukuavo u lekisa okuti, Yehova wa kapako omanu vaye kuenda o va sumulũisa. Eye wa sapuilile va Isareli hati: “Seteki ondaka yange nda siu yikuluili olonjanela viokilu loku u sukumuĩli esumũlũho lia piãla enene, liokuti apa li selekiwa ka pa molẽha!” (Malakiya 3:10) Yehova oka sumũlũisa omanu vaye poku va ĩha omuenyo ko pui. (Yoano 5:24; Esituluilo 21:4) Esumulũho liaco, li lekisa uvangi wocisola kuenda ohenda Yaye. Handi vali, li ecavo uvangi wokuti, Eye o sole calua omanu vana va kasi oku u vumba. Poku kũlĩha okuti Yehova Eca Onima, ci tu kuatisa oku yuvula oku kuata atatahãi atiamẽla kupange tu kasi oku u lingila. Yehova o tu vetiya oco tu kuate elomboloko liaco. Paulu wa popia hati: “Wosi o yongola oku kokela ku Suku, co sesamẽla oku kolela okuti kuli Suku, kuenda . . . Suku eca onima kuava vo sanda.”—Va Heveru 11:6.
12 Etu tu vumba Yehova omo liocisola tu u kuetele. Kuenda ka tu ci lingila omo lionima a tu likuminya. Pole, ca sunguluka oku kuata elavoko lioku tambula onima kokuaye. (Va Kolosai 3:23, 24) Yehova omo liocisola caye, o sumũlũisa omanu vana vo sanda lutima wosi.
13. Momo lie ocilumba cocisembi oco uvangi wa velapo wocisola Yehova a tu kuetele?
13 Ocisola ca velapo Yehova a kuetele omanu, ca lekisiwa veliangiliyo liocisembi. Upostolo Yoano wa popia hati: “Omo Suku a sola ndoco oluali, oco a ecela Omõlaye wongunga okuti wosi u kolela ka fi, puãi o mõla omuenyo ko pui.” (Yoano 3:16) Eliangiliyo liocisembi ca Yesu, li tu kuatisa oku yuvula ovisimĩlo viokuti, ka tu kuete esilivilo ku Suku. Momo, Yehova poku eca Omõlaye wongunga ndocilumba, wa lekisa ocisola ca velapo kokuetu.
14. Paulu wa lekisa ndati okuti wa kũlĩhĩle esilivilo liocisembi?
14 Eci o yonjiwa lovisimĩlo viokuti, ku kuete esilivilo ku Yehova, sokolola eliangiliyo liocisembi. Ivaluka okuti ocisembi, ombanjaile yimue ya tunda ku Yehova oco a ku kuatise. Eci oco upostolo Paulu a linga. Eye wa popia hati: “Ndukuelamba we!” Noke wamisako hati: “Mitakati Yesu Kristu, haeye Ñala yetu, a pitiye olopandu ku Suku” una wa ndi “sola haeye wa liecela oku mopela.” (Va Roma 7:24, 25; Va Galatia 2:20) Paulu poku popia olondaka evi, ka kaile oku lipanda. Eye wa kũlĩhĩle okuti, Yehova u kuetele ocisola. Ove o sukilavo oku limbuka okuti, ocisembi ombanjaile yimue Yehova aku ĩha. Omo liaco, Yehova eye Onjovoli yetu kuenda eca onima kuava vo vumba.
Lunguka Layonjo a Satana
15-17. (a) Satana wa siata oku yapula ndati omanu lovisimĩlo ka via sungulukile? (b) Ekuatiso lie tu pondola okupa kovitangi Yovi a liyaka lavio?
15 Ove pamue ku tava okuti elembeleko Liondaka ya Suku li tiamisiwila kokuove. Citava okuti o sima hati, vakuene va sesamẽla oku kuata omuenyo ko pui voluali luokaliye. Pole, ove ku sesamẽla omuenyo waco. Nda o kuete ovisimĩlo viaco nye o sukila oku linga?
16 Ove wa kũlĩha elungulo Paulu a eca Kakristão vo ko Efeso hati: “Malẽhi ovimalẽho viosi via Suku okuti vu tẽla oku tamalãla latutu Eliapu.” (Va Efeso 6:11) Eci tu yeva elungulo lioku lunguka latutu Eliapu, tu sima lika oku yuvula oku sakalala lovokuasi, kuenda ukahonga. Momo olonjanjo viaco ovio via siata oku yapula omanu va Yehova tunde kosimbu. Pole, tu sukila oku ivaluka okuti Satana ka siatele lika oku yapula omanu lovina evi. Eye wa siatavo oku va yapula lovisimĩlo viokuti ka va soliwe la Yehova.
17 Satana o kuete uloño woku yapula ovisimĩlo viomanu oco va liwekepo oku fendela Yehova. Tu ivaluki olondaka Bildade a sapuilile Yovi hati: ‘Omunu o linga ndati ukuesunga ku Suku? U wa citiwa lukãi o tẽla ndati oku yela? Tala, ku Suku ndaño osãi ka yi tui, ndaño olombungululu ka vi yeli kovaso aye. Oco hẽ omunu una okuti enyo, siti ca piãla vali enene? Omõla omunu hẽ okuti ocipuka, siti ca piãla enene?’ (Yovi 25:4-6; Yoano 8:44) Yovi wa sumuile calua poku yeva olondaka evi. Omo liaco, kuka ecelele okuti Satana oku sumuisa. Pole, lunguka layonjo Aye. Kuenda likolisilako oku linga eci ca sunguluka ku Yehova. (2 Va Korindo 2:11) Yehova wa pisa ovisimĩlo via Yovi kuenje wo sumũlũisa poku u wiha ovina viosi a pesile.—Yovi 42:10.
Yehova ‘wa Velapo Ovitima Vietu’
18, 19. Olondaka viokuti ‘Suku wa velapo ovitima vietu,’ vi lomboloka nye? Eye wa kũlĩha ndati ovina viosi’?
18 Ka ca lelukile oku ivala ovisimĩlo vĩvi vi kasi vutima wetu. Pole, espiritu lia Yehova li pondola oku ku kuatisa oco o yule ‘olombindikiyo viosi vi tamalãla lukũlĩhĩso wa Suku.’ (2 Va Korindo 10:4, 5) Eci o kuata ovisimĩlo ka via sungulukile, ivaluka olondaka viupostolo Yoano wa popia hati: ‘Tua tiamẽla kocili, kuenje tu tulila ovitima vietu kovaso a Yehova, eci ovitima vietu vi tu vetela evelo. Momo Suku wa velapo ovitima vietu, kuenje eye wa kũlĩha cosi.’—1 Yoano 3:19, 20.
19 Olondaka viokuti, ‘Suku wa velapo ovitima vietu,’ vi lomboloka nye? Olonjanja vimue utima wetu u tu vetela evelo. Ca piãla enene eci tu liyaka lesumuo li tunda kakandu etu. Handi vali, pamue vofeka yetu muli ocituwa coku litenda okuti ka tu kuete esilivilo. Noke tu kuata ovisimĩlo viokuti, upange wetu ka u kasi oku taviwa la Yehova. Kuenje tu sumua calua. Olondaka viupostolo Yoano vi lekisa okuti, Yehova wa velapo ovitima vietu. Eye wa kũlĩha akandu tua lingaile kosimbu kuenda alikolisilo tu kasi oku linga oku yuvula ekandu. Handi vali, wa kũlĩhavo onjongole tu kuete yoku u vumba. Daviti wa popia hati: “[Yehova] wa kũlĩha atimba etu, ivaluka okuti tuneketela.” (Osamo 103:14) Yehova eye lika wa tu kũlĩha ciwa.
‘Ekolowa Lieposo Kuenda Ekofue Liusoma’
20. Ndomo ca lekisiwa vocitumasuku ca Isaya, ndamupi Yehova a tenda omanu vaye?
20 Lekuatiso liuprofeto Isaya, Yehova wa ecele komanu vaye elavoko lioku tiukila kofeka yavo. Omanu vana va kala kumandekua Kombavulono, va sukilile oku yeva olondaka evi vielembeleko. Momo va sumuile calua. Yehova poku tukula otembo yaco yoku va yovola, wa popia hati: “O linga ekolowa lieposo peka lia Yehova, haive ekofue liosoma peka lia Suku yove.” (Isaya 62:3) Poku popia olondaka evi, Yehova wa eca ulamba kuenda esumbilo komanu vaye. Cimuamue haico a siata oku linga lolombuavekua viaye koloneke vilo. Eye wa vi kapako calua.
21. Tua kũlĩha ndati okuti Yehova oka sumũlũisa epandi lietu?
21 Ocitumasuku eci ca tẽlisiwa tete Kakristão olombuavekua. Pole, citiamisiwilavo komanu vosi va kasi oku vumba Yehova. Eci o kuata ovisimĩlo vioku tatãla ekalo liove ku Yehova, ivaluka okuti eye oku kuetele ocisola ndaño kua lipuile. Kuenda wa ku tenda ‘ndekolowa lieposo haive ukofue liosoma peka liaye.’ Omo liaco, amamako oku sanjuisa Yehova poku linga ocipango caye lutima wove wosi. (Olosapo 27:11) Nda wa ci linga, Yehova oka sumũlũisa epandi liove.
[Atosi pombuelo yamẽla]
a Olonduko vimue via pongoluiwa.
Ivaluka Eci Tua Lilongisa?
• Yehova wa tu tenda ndati okuti ‘tumanu va kola’ kokuaye?
• Oku kũlĩha okuti, Yehova eca Onima ci kuete esilivilo lie?
• Olonjanjo vipi via Satana tu sukila oku yuvula?
• Ndamupi Yehova a ‘velapo ovitima vietu?’
[Elitalatu kemẽla 23]
Paulu
[Elitalatu kemẽla 23]
Eliya
[Elitalatu kemẽla 23]
Hana
[Elitalatu kemẽla 24]
Vembimbiliya muli ovolandu alua a eca elembeleko