Oku Kala Ukuacili Ku Kuete Esilivilo?
ULUME umue Jack,a wa sapuila ukuavo Petulu hati: ‘Ove o kasi oku tambula olombongo vitito kupange wove. Pole, nda wa ilukila kupange wange, oka fetiwa olombongo vialua.’
Petulu wa tambulula hati: ‘Ocisimĩlo cove, ciwa. Pole, kupange wange, ndi kasiko otembo yalua. Ovo va siata oku ndi kuatisa calua. Omo liaco, ndi yongola oku koleliwa lavo.’
Noke, Jack, wa tambulula hati: ‘Oku kala ukuacili ku kuete esilivilo. Pole, ka ca lelukile oku lekisa ocituwa caco.’
Jack, wa kuatele esunga poku popia olondaka evi. Momo voluali lulo ocituwa coku likolela pokati ka ca siatele. Omunu poku kala ukuacili o sukila oku pesela otembo, longusu kuenda oku tẽlisa eci a likuminya. Anga hẽ ocituwa caco ci kuete muẽle esilivilo?
Ocituwa Caco ka ca Siatele Pokati Komanu
Kofeka yo Alemanya, kuli ocisoko cimue Cupange woku Pulisa eci omanu va sima catiamẽla kondaka yimue. Vakuacisoko caco va pulisa omanu vamue ondaka yatiamẽla koku kala ukuacili. Valua pokati kavo, va popia hati, oku kala ukuacili ku kuete esilivilo. Vakuacisoko caco va pulisavo amalẽhe vamue va kuete 18 toke 24 kanyamo. Valua pokati kavo va tambulula okuti, oku kala ukuacili, ocituwa cimue ciwa.
Oku kala ukuacili, ocituwa cimue ci soliwe lomanu valua. Pole, omanu ka va siatele oku lekisa ocituwa caco. Kolofeka vimue vioko Europa, olohueli, lapata, kuenda akamba, ka va siatele vali oku likolela pokati. Cimuamue haico ca siata oku pita pokati kolonalavayi la vacime cavo, kuenda komanu vana vakualomĩlu. Oco hẽ, momo lie omanu ka va lekisila ocituwa caco?
Olonjanja vimue asakalalo omuenyo a siata oku tateka omanu oku tẽlisa olohuminyo viavo vioku kala vakuacili. Omanu vana va sumua omo lioku kembiwa, cilo va kuete ohele yoku kolela vakuavo. Momo va sima okuti, voluali lulo ka muli omunu ukuacili. Vakuavo va nõlapo oku yuvula oku linga ohuminyo la vakuavo.
Oku kala ukuacili ocituwa cimue ciwa haico ci soliwe lomanu. Pole, ocituwa caco omanu ka va ci kapeleko. Omo liaco, tu konomuisi apulilo amue ndeci: Anga hẽ oku kala ukuacili ku kuete muẽle esilivilo? Kulie tu sukila oku lekisa ocituwa caco? Ndamupi tu ci lekisa? Ekuatiso lie li tunda koku kala ukuacili?
[Etosi pombuelo yemẽla]
a Vocipama cilo kuenda eci ci kuãimo, olonduko vimue via pongoluiwa.
[Elitalatu kemẽla 3]
Oku kala ukuacili, ocituwa cimue ci soliwe lomanu. Pole, ocituwa caco ka va ci kapeleko