Tuamamiko Oku Endela Vonduko Ya Yehova Suku yetu

‘Etu tu endela oloneke ka vi pui, vonduko ya Yehova Suku yetu.’​—⁠MIKA 4:⁠5.

1. Kotembo ya Noha oluali lua kala ndati? Ndamupi eye a litepele lomanu vakuavo?

ENOKE, eye omunu watete wa tukuiwa Vembimbiliya okuti, wa endaenda la Suku. Noha, eye omunu wavali okuti wa kuamavo ongangu ya Enoke. Embimbiliya li tu sapuila hati: “Noha [wa kala] ukuesunga, haeye wa pua evelo koloneke viaye. Noha wa endaenda la Suku.” (Efetikilo 6:⁠9) Koloneke via Noha omanu valua ka va kaile oku fendela Yehova. Evĩho lia vokiya eci ovangelo vana va tomba Suku veya voluali oku kuela akãi. Noke va cita omãla valume “va kemãla” va tukuiwa hati, Ovindululu. Kuenje ungangala weya oku livokiya calua voluali. (Efetikilo 6:​2, 4, 11) Pole, Noha wamamako lesunguluko liaye ku Yehova kuenje wa “sapula esunga.” (2 Petulu 2:⁠5) Eci Yehova a tuma Noha oku tunga ocimbaluku coku popela omanu, eye ‘wa linga cosi vo sapuila.’ (Efetikilo 6:​22) Omo liaco, Noha wa endaenda la Suku.

2, 3. Ongangu yipi yiwa Noha a tu sila?

² Paulu vulandu waye watiamẽla komanu vakuekolelo vo kosimbu, wa kongelamo Noha. Eye wa popia hati: “Noha, omo a kala lekolelo, . . . eci a lunguiwila ovina ka via molehẽle handi, wa kuata ohele, yu wa [tunga] ocimbaluku coku popela onjo yaye; oco wa pisa oluali kuenje wa linga kapiñala kesunga lina liya lekolelo.” (Va Heveru 11:⁠7) Noha, wa lekisa ongangu yimue yiwa. Eye wa kuatele ekolelo liokuti, olondaka via Yehova vika tẽlisiwa. Omo liaco, wa pita otembo yalua loku talavaya. Kuenda wa pesela ovipako viaye oco a tẽlise ocikundi ca Suku. Koloneke vilo, kuli omanu valua va siata oku kuama ongangu yaye. Omo lionjongole yoku linga ocipango ca Yehova, va siata oku yuvula oku sanda ovokuasi oluali lulo. Kuenje va siata oku pesela otembo yavo longusu yavo kuenda ovokuasi avo kupange wa Yehova. Omanu vaco va sesamẽla epandiyo omo liekolelo liavo. Momo elikolisilo liavo lika va popela ovo muẽle. Kuenda lika popelavo vana va tava kondaka yavo.​—⁠Luka 16:9; 1 Timoteo 4:⁠16.

³ Noha lepata liaye va kala kotembo yimue okuti ka ca lelukile oku lekisa ekolelo ku Yehova. Ovo va kala kotembo yimue ya lisoka leyi ya kukululu yavo Enoke una wa tukuiwa vocipama cosemana ya pita. Kotembo ya Noha, voluali ka mua kaile omanu valua va vumba Yehova. Pole, mua kala lika omanu ecelãla va puluka Ketande. Noha wa kundila omanu vamue olongangala haivo vakuavituwa via vĩha. Eye kumue lepata liaye va tunga ocimbaluku oco va puluke Ketande va kala oku lavoka. Pole kotembo yaco, lomue wa kũlĩhĩle Etande. Omo liaco, omanu va lavisile upange wa Noha.

4. Eci Yesu a tukula ulandu wo koloneke via Noha, ocituwa cipi a pisa?

⁴ Yesu poku tukula ulandu wo koloneke via Noha, ka popele eci ciatiamẽla kungangala, latavo esanda, kuenda evĩho. Pole kotembo yaco ovina evi via luile calua. Yesu wa pisa lika ocituwa cavo coku likala oku pokola kelungulo. Eye wa popia hati: “Omanu va kala loku lia kuenda oku nyua, oku kuela loku kueliwa, toke keteke Noha a iñila vocimbaluku.” Anga hẽ oku lia, oku nyua, oku kuela loku kuelisa ekandu? Sio, hekanduko. Kotembo yaco ovo va kala oku lavoka Etande kuenda Noha wa kala oku kunda ondaka yocili. Omo liaco, va sukilile oku kuama ovituwa via Noha kuenda oku pokola kelungulo liaye. Pole, “ka va limbukile cimue, toke eci Etande lieya kuenje lia va nyõla vosi.”​—⁠Mateo 24:​38, 39.

5. Noha lepata liaye va lekisile ovituwa vipi?

⁵ Poku ivaluka ulandu wo koloneke via Noha, tu limbuka okuti, eye wa kuamẽle onjila ya sunguluka. Koloneke viaco osimbu Etande ka lieyile, ka ca lelukile oku yuvula ovituwa vĩvi viomanu. Noha kumue lepata liaye, va kuatele ekolelo liocili poku tunga ocimbaluku loku kapamo ovinyama. Anga hẽ Noha lepata liaye ka va kuatele onjongole yoku soliwa lomanu kuenda oku ambata omuenyo umue uwa? Citava okuti va kuatele onjongole yaco. Pole, ka va ecelele okuti, onjongole yaco yi va yapula vonjila ya Yehova. Ekolelo liavo lia va popela Ketande. Yehova wa kundula omanu vosi ka va pokuile kelungulo lia kala oku eciwa. Momo va kala oku tẽlisa lika olonjongole viavo muẽle.

Voluali Mueyuka Vali Ungangala

6. Noke Yetande oluali lua kala ndati?

⁶ Noke Yetande, omanu va fetika vali oku livokiya voluali. Pole, omanu vaco va kala vakuakandu kuenda ‘ovisimĩlo viavo vĩvi tunde vutila.’ (Efetikilo 8:​21) Kotembo yaco, ovangelo ka va kuatele vali epondolo lioku li pongolola vatimba ositu. Pole, va kuata unene woku yapula omanu. Ovituwa vĩvi viomanu via lekisile okuti ‘oluali lu kasi povaka Eliapu.’ Omo liaco, omanu va Yehova va sukilile ‘oku tamãlala layonjo Eliapu,’ ndeci ci kasi oku pita Lakristão vocili koloneke vilo.​—⁠1 Yoano 5:19; Va Efeso 6:​11, 12.

7. Noke Yetande ungangala wa lisandula ndati voluali?

⁷ Okupisa kotembo ya Nimuroti, noke Yetande, oluali lueya oku yuka vali ungangala. Cilo, omanu va livokiya calua kuenda uloño u kasi oku livokiya calua. Omo liaco, voluali mueyuka vali evĩho lialua. Kosimbu omanu va enda oku liyaka lolosipata, lolonjelia kuenda ovisongo. Pole, vokuenda kuotembo, voluali mua fetika oku molẽha ovimalẽho vikuavo viuyaki. Uyaki Watete wa pita voluali luosi, wa nena ovota okaliye anene kuenda olombalão viuyaki okuti vonjanja yimosi, vi ponda omanu valua. Omo liaco, Uyaki waco wa ponda omanu valua. Ovitangi evi, ovio omanu va kala oku lavoka voluali.

8. Olondaka vi sangiwa kelivulu Liesituluilo 6:​1-4, vi kasi oku tẽlisiwa ndati koloneke vilo?

⁸ Kunyamo wo 1914, Yesu wa tumbikiwa komangu Yuviali wa Suku kilu. Kuenje kunyamo waco oco ‘otembo ya Ñala’ ya fetika. (Esituluilo 1:​10) Elivulu Liesituluilo li lombolola ocinjonde ci lekisa Yesu okuti, wa vialekiwa komangu Yusoma. Eye wa endela kokavalu kayela kuenje wa yula uyaki. Konyima yaye kua kuama alume vakuavo va endela kolokavalu vi nena ohali voluali. Umue pokati kavo, wa endela kokavalu kakusuka. Kuenje, ‘vo wĩha omoko yoku imula ombembua kilu lieve. Kuenda vo wĩhavo osipata yinene.’ (Esituluilo 6:​1-4) Okavalu kaco kuenda u wa endelako, va lomboloka uyaki. Osipata yinene, yi lomboloka ovoyaki alua a kasi oku pita voluali koloneke vilo kuenda ovimalẽho viokaliye viuyaki. Cilo, volosipata viaco mua kongela ovota anene okuti vonjanja yimosi a ponda omanu valua. Mua kongelavo ovota ana a pondola oku nyõla a tenda akuavo anene.

Tu Sukila Oku Pokola Kelungulo Lia Yehova

9. Ekalo lio kotembo ya Noha eci handi Etande ka lieyile li sokisiwa ndati leli lioloneke vilo?

⁹ Koloneke via Noha Yehova wa nenele Etande lioku nyõla olondingaĩvi. Momo Ovindululu via yukisile oluali levĩho. Nye ci kasi oku pita koloneke vilo? Oluali koloneke vilo lueyukavo ungangala ndeci ca kala koloneke via Noha. Omanu va pitisa lika kovaso olomĩlu kuenda oku tẽlisa olonjongole viavo. Kuenje ka va tava oku pokola kelungulo li kasi oku eciwa. (Luka 17:​26, 27) Omo liaco, Yehova oka nyõla vali olondingaĩvi.

10. (a) Embimbiliya lia siata oku eca elungulo lipi? (b) Onjila yipi tu sukila oku kuama?

¹⁰ Osimbu handi Etande ka lieyile, Enoke wa lomboluile ocitumasuku catiamẽla kenyõleho tu kasi oku lavoka. (Yuda 14, 15) Yesu wa popiavo hati, kukeya “ohali yapiãla.” (Mateo 24:​21) Ovaprofeto vakuavo, va ecavo elungulo liatiamẽla kotembo yaco. (Esekiele 38:​18-23; Daniele 12:1; Yoeli 2:​31, 32) Elivulu Liesituluilo li lombolola eci catiamẽla kenyolẽho lika pita voluali luosi. (Esituluilo 19:​11-​21) Etu tu sukila oku kuama ongangu ya Noha kuenda oku litumbika kupange woku kunda. Tu sukilavo oku pokola kelungulo lia Yehova kuenda oku kuatisa vakuetu oco va pokolevo Kokuaye. Handi vali, tu sukila oku endaenda la Suku ndeci Noha a linga. Omo liaco, omunu wosi o yongola oku kuata omuenyo ko pui, o sukilavo oku endaenda la Suku. Oco hẽ tu pondola ndati oku ci linga voluali lulo luohali? Tu sukila oku kuata ekolelo liokuti, Yehova oka tẽlisa ocipango caye.​—⁠Va Heveru 11:⁠6.

Tuamamiko Oku Endaenda la Suku Kotembo Yilo Yohali

11. Tu kuama ndati ongangu Yakristão vo kocita catete?

¹¹ Kocita catete, Akristão olombuavekua, va endela vonjila ya Yehova. (Ovilinga 9:⁠2) Ovo va tiamisilile omuenyo wavo koku kolela Kokuaye kuenda ku Yesu Kristu. Handi vali, va kuamẽle ongangu ya Cime cavo Yesu. Koloneke vilo, tu sukilavo oku kuama ongangu yavo.

12. Eci Yesu a linga ocikomo coku tekula omanu, nye ca pitako laye noke?

¹² Yesu vokuenda kupange waye woku kunda palo posi, wa pita lovolandu alua a lekisa esilivilo lioku kuata ekolelo. Onjanja yimue, Yesu wa tekula olohulukãi vitãlo viomanu. Kuenje, omanu vaco va komõhele calua omo liocikomo caco. Kũlĩhĩsa eci ceya oku pita noke. Ulandu Wembimbiliya u popia ndoco: ‘Eci omanu va mõla ocikomo Yesu a linga va fetika oku popia vati: U eye uprofeto una o laika oku iya voluali. Eci Yesu a limbuka okuti omanu va yongola oku u kuata oco vo tumbike komangu yusoma, wa tiukila komunda likaliaye.’ (Yoano 6:​10-​15) Vuteke waco, Yesu wa tilila kocitumãlo cikuavo. Omanu va sumuile calua omo okuti, Yesu ka tavele oku u tumbika komangu yusoma. Eye wa kuatele olondunge vioku kala osoma. Kuenda wa kuatelevo unene woku tẽlisa olonjongole viomanu. Pole, wa kũlĩhĩle okuti, otembo yaye yoku vialekiwa la Yehova ka ya pitĩlile handi. Wa kũlĩhilevo okuti, Uviali waye wokilu.

13, 14. Omanu vana Yesu a tekula va kuatele ovisimĩlo vie? Ekolelo liavo lia setekiwa ndati?

¹³ Noke liocikomo caco, omanu va fetika oku sandiliya Yesu kuenje vo sanga ‘kesinya liokalunga.’ Momo lie omanu va sandiliyila Yesu noke yoku va tila? Valua pokati kavo ka va kuatele onjongole yoku yevelela ondaka ya Suku. Momo eci va pitila ku Yesu, va fetika oku lombolola ndomo Yehova a tekula va Isareli koloneke via Mose eci va kala vekalosoko. Ovo va yonguile okuti, Yesu amamako oku va tekula. Eci Yesu a limbuka ovisimĩlo viavo, wa fetika oku va lomboluila ovina viespiritu oco va pongolole ovisimĩlo viavo vĩvi. (Yoano 6:​17, 24, 25, 30, 31, 35-​40) Noke, eci Yesu a va tila olusapo, vamue pokati kavo va fetika oku lisiõsiõla. Momo wa va sapuila hati: “Nda ka vu li etimba lia Mõlomanu, loku nyua osonde yaye, ka vu kuete omuenyo vovitima viene. U o lia etimba liange loku nyua osonde yange o kuete omuenyo ko pui. Kuenje, ndu u pindula keteke lia sulako.”​—⁠Yoano 6:​53, 54.

¹⁴ Alusapo a Yesu, a enda loku situlula ovisimĩlo viomanu nda va kuete onjongole yoku endaenda la Suku. Cimuamue haico ca pita lolusapo olu. Momo lua nena etatamiso pokati kavo. Embimbiliya li popia hati: ‘Olondonge via Yesu, eci via yeva olusapo luaco, via popia hati: Ondaka eyi ya kãla. Helie o tẽla oku yi yeva?’ Noke Yesu wa va sapuila okuti va sukilile oku kuata elomboloko liolondaka viaye. Momo olondaka viaco viatiamẽlele kovina viespiritu. Kuenje wa popia hati: “Espiritu olio li muisa omuenyo, etimba ka li tẽla cimue. Olondaka nda popia lene ovio espiritu, havio omuenyo.” Eci a popia olondaka evi omanu valua ka va kuatele vali onjongole yoku u yevelela. Ulandu waco wamisako hati: “Tunde opo valua pokati koloñame viaye va tiukila konyima, kuenje ka va endaile vali laye.”​—⁠Yoano 6:​60, 63, 66.

15. Olondonge vimue via Yesu via kuata ovisimĩlo vipi viwa?

¹⁵ Vamue pokati kolondonge via Yesu, ka va kuatele ovisimĩlo vĩvi ndaño okuti, olondaka viaco ka via va lomboloke ciwa. Momo, vamamako oku kolela kokuaye. Petulu wa lekisile ekolelo ku Yesu, kuenje wa popia hati: “A Ñala, kulie tu enda? Ove, ove o kasi lolondaka viomuenyo ko pui.” (Yoano 6:​68) Eyi oyo ongangu yiwa tu sukila oku kuama.

16. Koloneke vilo ndamupi tu pondola oku setekiwa? Ovisimĩlo vipi tu sukila oku kuata?

¹⁶ Koloneke vilo, pamue tu setekiwavo volonepa vialua ndeci ca pita lolondonge via Yesu. Olonjanja vimue tu sumua omo okuti olohuminyo via Yehova ka vi kasi oku tẽlisiwa lonjanga ndomo tu yongola. Pamue eci tu tambula olonumbi vimue viokaliye viatiamẽla Kembimbiliya, tu sumua. Momo olonjanja vimue ka tu kuata lonjanga elomboloko liaco. Handi vali, pamue tu sumua omo liocituwa cimue cĩvi ca manji umue. Pole, ka tuka eceleli okuti, ovina evi vi tu tateka oku vumba Yehova. Olondonge vina via liwekelepo oku kuama Yesu, ka via kuatele elomboloko liovina viespiritu. Omo liaco, tu sukila oku yuvula ongangu yavo.

‘Ka Tuka Tiukili Konyima’

17. Nye ci tu kuatisa oku endaenda la Suku?

¹⁷ Paulu o tu sapuila hati: “Ovisonehua vi kola viosi ovitumasuku.” (2 Timoteo 3:​16) Lekuatiso Liembimbiliya, Yehova o tu sapuila hati: “Eyi oyo onjila, endelimo.” (Isaya 30:​21) Oku pokola kondaka ya Suku, ku tu kuatisa ‘oku kũlĩha ndomo tu pondola oku enda lolondunge voluali lulo.’ (Va Efeso 5:​15) Oku lilongisa Embimbiliya kuenda oku sokolola ovina tua lilongisa, ci tu kuatisa ‘oku endela vonjila ya Yehova.’ (3 Yoano 3) Yesu wa popia hati: “Espiritu olio li muisa omuenyo, etimba ka li tẽla cimue.” Ondaka ya Suku lespiritu sandu liaye kuenda ocisoka caye, ovio lika vi tu kuatisa oku endela vonjila ya sunguluka.

18. (a) Omanu vamue vakuavisimĩlo vĩvi va siata oku linga nye? (b) Ekolelo lipi tu sukila oku kuata?

¹⁸ Koloneke vilo kuli omanu valua va siata oku sumua omo okuti olonjongole viavo ka vi kasi oku tẽlisiwa. Noke, va tiukila vali voluali kuenje, va ‘liwekapo oku lavulula.’ Kuenda ka va pitisa vali kovaso Usoma wa Suku. (Mateo 24:​42) Etu tu sukila oku yuvula ocituwa caco. Paulu wa popia hati: “Etu . . . katuakuaku tokokako loku nyõleha, tuakuekolelo, haetu tu tata ovitima vietu.” (Va Heveru 10:​39) Tu kasi kotembo yimue yevĩho lialua ndeli lia kala kotembo ya Enoke kuenda ya Noha. Pole, tu kuete esumũlũho lioku endaenda la Suku ndeci ovo va linga. Nda tua cilinga, tuka mola oku tẽlisiwa kuolohuminyo Viaye. Yehova oka nyõla olondingaĩvi viosi kuenda oka nena oluali luokaliye. Eli olio elavoko li komõhisa.

19. Uprofeto Mika wa lombolola ndati onjila afendeli vocili va nõlapo?

¹⁹ Ocitumasuku ca Mika ca popele okuti, ‘olofeka vika endela vonduko ya suku yavo.’ Noke wa popia eci catiamẽla kokuaye kuenda kafendeli vakuavo va Yehova hati: ‘Etu tu endela oloneke ka vi pui, vonduko ya Yehova Suku yetu.’ (Mika 4:⁠5) Nda o yongola oku kuama ongangu ya Mika, kuata ukamba la Yehova ndaño lovitangi. (Tiago 4:⁠8) Amamako oku kuata onjongole yoku endaenda la Yehova Suku yetu cilo kuenda otembo ka yi pui.

O Tambulula Ndati?

• Ekalo liotembo ya Noha lia lisoka ndati leli lio koloneke vilo?

• Onjila yipi Noha a kuammẽle kumue lepata liaye? Ndamupi tu kuama ongangu yekolelo liavo?

• Olondonge vimue via Yesu via kuatele ovisimĩlo vipi ka via sungulukile?

• Akristão vocili va nõlapo oku linga nye?

[Elitalatu kemẽla 30]

Koloneke vilo, omanu va tiamisila lika utima kasakalalo omuenyo ndeci ca kala koloneke via Noha

[Elitalatu kemẽla 31]

Etu Tuakristão ka tu liwekapo oku kunda Usoma