Apulilo Alingiwa Lavakuakutanga

Anga hẽ, vocikasia covisila mua kala lika ovawe avali Ovihandeleko, ale mua kalavo ovikuata vikuavo?

Eci onembele ya Salomone ya tumbikiwa kunyamo wo 1026, ‘Vocikasia Covisila ka mua kaile ovina vimue vikuavo. Pole, mua kala lika ovawe avali ana Mose a kapelemo ko Horeve, cina Yehova a lisila ocisila la va Isareli, eci va tunda Kegito.’ (2 Asapulo 5:​10) Noke, va vokiyamo ovina vikuavo.

‘Eci va Isareli va tẽlisa osãi yatatu tunde eci va tunda vofeka Yegito,’ va kala vekalasoko lio Sinai. (Etundilo 19:​1, 2) Noke Mose wa endele Komunda Sinai, kuna aka tambuile ovawe avali mua sonehiwa Ovihandeleko. Eye wa popia hati: “Lame nda ñualãpo, nda loka komunda. Nda kapa ovitale vocikasia nda tunga, kuenje omo vi kasi, ndeci Yehova a sapuila.” (Esinumuĩlo 10:⁠5) Ocikasia caco ka ca kaile otembo yalua. Momo ca kala ño ocikasia cimue Yehova a tumile Mose oku ci tunga oco va selekemo ovawe Ovihandeleko. (Esinumuĩlo 10:⁠1) Ocikasia covisila va fetika oku ci tunga kefetikilo liunyamo wo 1513.

Eci va Isareli va yovuiwa Kegito, va fetika oku lisiõsiõla omo liekambo liokulia. Kuenje, Yehova wa va ĩha omana yoku litekula. (Etundilo 12:​17, 18; 16:​1-5) Noke, Mose wa sapuila Arone hati: “Nyañula ombia, kapamo o meri yo mana yi tumbika ku Yehova, . . . yi solekela ovitumbulukila viene.” Ulandu waco wamisako hati: “Ndeci Yehova a sapuila Mose, haico Arone a linga, wa yi tumbika kovaso yocikasia covisila okuti yi solekiwa.” (Etundilo 16:​33, 34) Omo liaco, Arone wa pokola kolondaka evi, kuenje wa kapa omana vombia. Pole, wa kevelela toke eci Mose a mala oku tunga Ocikasia Covisila. Noke wa kapamo ombia yomana.

Mose wa mãla oku tunga ocikasia covisila kesulilo liunyamo wo 1513. Noke yesino lia Kora lomanu vakuavo, ombueti ya Arone ya kapiwa Vocikasia covisila. Upostolo Paulu, wa tukula ‘ocikasia covisila muna mua kala ombia yulu va kapele o mana, lombueti ya Arone yina ya yova, kuenda ovawe ocisila.’​—⁠Va Heveru 9:⁠4.

Osimbu va Isareli va kala vekalasoko, Yehova wa va tekula lomana vokuenda kuakũi akuãla kanyamo. Eliangiliyo liaco lia sulila eci va fetika ‘okulia ovaima vofeka yohuminyo.’ (Yehosua 5:​11, 12) Oku kapa ombueti ya Arone vocikasia covisila, ca kuata esilivilo. Momo ca kala ondimbukiso yesino liovitumbulukila via va Isareli. Ombueti yaco ya kala vocikasia covisila otembo yosi va Isareli va tumboka vekalasoko. Pole, eci va iñila Vofeka Yohuminyo, va sokiya oku tumbika onembele ya Salomone. Kuenje, osimbu handi ka va tumbikile onembele yaco, ombueti ya Arone, kuenda ombia yomana ya kala vocikasia covisila, va viupamo.