Oku Enda Lesunguluko Ci Nena Esanju
“Esumũlũho lia Yehova li muisa ukuasi, hailio ka li vokiya . . . ohali.”—OLOSAPO 10:22.
1, 2. Momo lie tu sukilila oku yuvula oku sakalala calua lotembo yo kovaso?
ONOÑO yimue kocifuka co Amerika wa popia hati: ‘Oku sakalala calua lovina vio kovaso, ci tateka omunu oku sanjukila ovina a kuete.’ Eci oco ca siata oku pita lomãla. Omo lioku sokolola calua ovina vaka linga eci vaka kala akulu, ka va kapeleko ekalo liwa lioku kala omãla.
2 Etu tuafendeli va Yehova, tua siatavo oku kuata ocitangi caco. Tu lavoka oku tẽlisiwa kuohuminyo ya Yehova yoku nena Oluali Luokaliye palo posi. Otembo yaco, ka kuka kala vali oku vela, oku kuka kuenda ohali. Ndaño okuti ca sunguluka oku talamẽla asumũlũho aco, tu sukila oku yuvula oku sakalala calua lovina viaco. Momo nda tua sakalala lavio, ka tu limbuka vali ekalo lietu liwa kespiritu. Kuenje tu fetika oku pua epandi loku sumua omo lionjongole yetu ka ya tẽlisiwile. (Olosapo 13:12) Ovitangi viomuenyo, vi pondola oku tu nenela esumuo. Noke ka tu kuata vali onjongole yoku vumba Yehova. Kuenje tu fetika oku kuata ovisimĩlo ka via sungulukile kuenda oku lisiõsiõla. Tu pondola lika oku yuvula ovisimĩlo viaco nda tua ivaluka asumũlũho tua siata oku tambula cilo.
3. Nye tu konomuisa vocipama cilo?
3 Elivulu Liolosapo 10:22 li popia hati: “Esumũlũho lia Yehova li muisa ukuasi, hailio ka li vokiya . . . ohali.” Ekalo liwa kespiritu olio esumũlũho liomanu va Yehova koloneke vilo. Tu konomuisi asumũlũho tua siata oku tambula konepa yespiritu kuenda elomboloko liaco. Oku sokolola ohenda Yehova a siata oku lekisa komanu va sunguluka, ci pamisa onjongole yetu yoku amamako oku u vumba lesanju.—Olosapo 20:7.
Asumũlũho tu Tambula Cilo
4, 5. Alongiso api Embimbiliya ove wa sanjukila kuenda momo lie?
4 Tu kuete ukũlĩhĩso wovina Embimbiliya li longisa. Vakuatavo esanda, va siata oku popia hati, va kolela Kembimbiliya. Pole, ka va pokola kueci li longisa. Momo pokati kavo, pali ovisimĩlo via litepa viatiamẽla kovina Embimbiliya li longisa. Ekalo liavo lia litepa leli Liolombangi via Yehova. Ndaño va tunda kolofeka viosi kuenda kapata osi, pole, va fendela Suku una okuti va kũlĩha onduko yaye. Ovo ka va fendela osuku yimue yoku luvikiya. (Esinumuĩlo 6:4; Osamo 83:18; Marko 12:29) Olombangi via Yehova via kũlĩha okuti, ocitangi cuviali wa Suku ca katuiwa kefetikilo lioluali, ndopo ci tetuluiwa. Kuenje omo lioku amamako lesunguluko lietu ku Yehova, vosi yetu tua kongeliwa vocitangi caco. Etu tua kũlĩha eci ci pita lomunu poku fa. Ka tu kuete usumba wokuti Suku imba vondalu yifelu ovilelembia viomanu va linga akandu anene. Tua kũlĩhavo okuti, Suku ka imbi vopulukatoliu ovilelembia viava va linga akandu atito oco noke va ende kilu.—Ukundi 9:5, 10.
5 Tua sanjuka calua omo lioku kũlĩha okuti ovina vi kasi voluali ka vieyile ño ovio muẽle. Yehova eye wa tu lulika lesetahãlo liaye. (Efetikilo 1:26; Malakiya 2:10) Ukualosamo wa imba ocisungo catiamẽla ku Suku hati: “Hu sivayaila ocikomo omo wa ndulika. Ovopange ove a komohisa. Ove wa kũlĩha [ciwa] utima wange.”—Osamo 139:14.
6, 7. Apongoloko wa linga komuenyo wove kuenda apongoloko a vakuene, a siata oku nena asumũlũho api?
6 Tua yovuiwa kovituwa vĩvi. Ovikanda viasapulo via siata oku sandeka asapulo a lekisa ovitangi vi tunda koku sipa, kuholua kuenda kukahonga. Pole, omanu ka va siatele oku pokola kalungulo aco. Nye ci pita lomunu eci a lilongisa okuti Yehova o pisa ovina viaco, kuenda o sumua omo liava va huka? Eye o siapo ovituwa viaco. (Isaya 63:10; 1 Va Korindo 6:9, 10; 2 Va Korindo 7:1; Va Efeso 4:30) Osimbu eye a cilingila oku sanjuisa Yehova, o kuatavo uhayele lombembua yovutima.
7 Onepa yalua yomanu ka va yongola oku siapo ovituwa vĩvi. Pole, unyamo lunyamo omanu valua va siata oku likolisilako oku siapo ovituwa viaco. Ovo va litumbika ku Yehova kuenda va papatisiwa. Handi vali, va eca uvangi u lekisa okuti, va siapo ovituwa viosi vi sumuisa Yehova. Ovolandu aco, a pamisa ekolelo lietu kuenda a tu vetiya oku yuvula oku kala apika vekandu.
8. Elungulo lipi Liembimbiliya li nena esanju vepata?
8 Tu kuete esanju vepata lietu. Kolofeka vialua, omuenyo wepata u kasi kohele. Olohueli vialua via siata oku litepa, kuenje omãla va pita lovitangi vialua. Kolofeka vimue vioko Europa, onepa yalua yapata, yi kasi oku tekuiwa lonjali yimosi. Yehova wa siata oku tu kuatisa ndati oco tu amameko oku endela vonjila ya sunguluka? Tanga elivulu lia Va Efeso 5:22–6:4, oco o limbuke elungulo Yehova a eca kalume, kakãi kuenda komãla. Oku pokola kolonumbi viaco, ci pamisa olohuela. Kuenda ci kuatisavo olonjali oku tekula ciwa omãla vavo oco vepata mu kale esanju. Asumũlũho aco a nena esanju lia piãla.
9, 10. Elavoko lietu liokovaso lia litepa ndati leli liomanu voluali?
9 Tua kolela okuti, ovitangi violuali ndopo vi pua. Koloneke vilo, uloño womanu wa livokiya calua. Kuenda olombiali via siata oku likolisilako oco vi tetulule ovitangi viomanu. Pole, ka via siatele oku ci tẽla. Onoño yimue o tukuwa hati Klaus Schwab, eci a endele konjango yimue yoku konomuisa ovitangi viuhukũi, wa limbuka okuti ‘ovitangi vi kasi oku li vokiya calua. Pole, otembo yoku vi tetulula yi kasi oku tepuluka.’ Eye wa tukula ocitangi cungangala wa lisanduila voluali luosi, evĩho, kuenda ovitangi viuhukũi. Noke wa popia hati: ‘Omanu va sukila oku likuata omunga kuenda oku nõla onjila ya sunguluka oco va potolole ovitangi viaco.’ Toke cilo, ka kuli elavo lioku malako ovitangi vi kasi voluali.
10 Tua sanjuka calua omo lioku kũlĩha okuti, Yehova wa sokiya Osoma Mesiya, una oka tetulula ovitangi viosi viomanu. Lekuatiso Liusoma waco, Yehova aka mãlako ovoyaki osi kuenda oka nena ombembua voluali. (Osamo 46:9; 72:7) Yesu oka popela olosuke lolohukũi kungangala kuenda kohali. (Osamo 72:12-14) Lekuatiso Liusoma wa Suku, ka kuka kala ekambo liokulia. (Osamo 72:16) Yehova ‘oka puenya asuelẽla osi vovaso omanu. Okufa ka ku kalako vali, ndaño oku lila loku liyula lupongo, ka vi kalako vali. Momo ovina viatete vika pita.’ (Esituluilo 21:4) Usoma wa Yesu wa tumbikiwa kilu, ndopo uka tetulula ovitangi viosi omanu va kasi oku liyaka lavio.—Daniele 2:44; Esituluilo 11:15.
11, 12. (a) Anga hẽ esanju lioluali lulo li kuete esilivilo lia velapo? Cilombolola. (b) Nye ci nena esanju lia velapo?
11 Tua kũlĩha eci ci nena esanju liocili. Nye ci nena esanju komuenyo? Onoño yimue ya lombolola okuti, kuli ovina vitatu vi nena ekalo liwa ndeci: Esanju, oku talavaya kupange woku sanda eteku oco o kuatise epata liove, kuenda oku sanga onima yupange wove. Pokati kovina viaco vitatu, eye wa lombolola okuti, esanju olio lia velapo. Noke wamisako hati: ‘Esanju li kuete esilivilo. Momo omanu va siata oku talavaya calua oco va sange esanju komuenyo.’ Nye Embimbliya li popia catiamẽla kondaka eyi?
12 Soma Salomone wa popia hati: “Nda likunda lutima wange, siti: Kaliye, kua ca, nyika muẽle asanju oluali, [ndi] sanjuka lasanju oluali, kuenje tala, eci lacovo esanda. Nda lombolola oku yola, siti, oku vela kutue, nda limbuka asanju oluali kuenje siti, a silivila nye?” (Ukundi 2:1, 2) Embimbiliya li lekisa okuti, esanju liosi liomuenyo ulo, ka li kala otembo yalua. Oco hẽ upange upi wa velapo tu sukila oku pitisa kovaso? Tu kuete upange umue wa velapo okuti, woku kunda loku longisa omanu oco va linge olondonge. (Mateo 24:14; 28:19, 20) Upange woku kunda, u kuete esilivilo lia velapo. Momo u pondola oku tu yovola etu muẽle kuenda vana va tu yevelela. (1 Timoteo 4:16) Etu ‘tulondingupange via Suku, tua kũlĩha okuti, esumũlũho li tunda koku eca olio lia velapo, eli li tunda koku tambula li sule.’ (1 Va Korindo 3:9; Ovilinga 20:35) Upange waco, u nena esanju komuenyo, kuenda weca etambululo ku Satana, una wa siata oku imbula Suku. (Olosapo 27:11) Handi vali, Yehova wa siata oku tu lekisa okuti oku litumbika kokuaye oco ci nena esanju liavelapo kuenda esumũlũho ka li pui.—1 Timoteo 4:8.
13. (a) Momo lie Osikola Yuviali Wakristão yi nenela esanju kokuetu? (b) Ekuatiso lie wa siata oku tambula Kosikola yaco?
13 Tua siata oku pindisiwa. Manji umue o tukuiwa hati Gerhard, ukulu wekongelo vocisoko ca Yehova, wa ivaluka otembo a kala umalẽhe. Eye wa popia hati: ‘Eci nda kala umãlehe nda kuata ocitangi coku popia. Momo eci ndi liyaka locitangi cimue, si tẽla vali oku vangula. Kuenje, ndi fetika oku sukoka. Nda litendele okuti si kuete esilivilo kuenda nda sumuile calua. Olonjali viange, via ndi sonehisa kosikola yoku mioñolola uloño woku vangula. Pole, ka ca ndi kuatisile. Momo ocitangi cange ka ca kaile celimi. Pole, ca kala co vutima. Lekuatiso lia Yehova, noke kua sokiyiwa Osikola Yuviali Wakristão. Omo lioku lisonehisa kosikola yaco, nda fetika oku kuata utõi woku popia. Nda likolisilako oku linga ovina nda lilongisa. Kuenje, ca ndi kuatisa calua. Momo sia kuatele vali osõi kuenda nda kuata utõi woku vangula kupange woku kunda. Cilo, nda siata oku linga olohundo viowiñi. Omo liaco, ndeca olopandu ku Yehova wa ndi kuatisa Losikola yaco.’ Etu tua sanjuka calua omo lioku kũlĩha onjila Yehova a siata oku kuama poku tu pindisa oco tu linge upange waye.
14, 15. Nye ci pondola oku tu kuatisa eci tu liyaka lovitangi? Lombolola ulandu umue.
14 Tu kuete ukamba la Yehova kuenda tua siata oku tambula ekuatiso ku vamanji va sangiwa voluali. Manji umue o tukuiwa hati Katrin, kofeka yo Alemanya, wa sumuile calua eci a yeva ehunguhungu liovava okalunga lia teya olonjo kuenda lia ponda omanu valua kocifuka co Asia. Eci ocilunga caco ca pita ko Tailandia, omõlaye ufeko oko a kala. Vokuenda kueci ci soka eteke lolowola ecelãla, eye ka kũlĩhĩle nda omõlaye o kasi lomuenyo ale wa fa. Noke, weya oku sanjuka calua eci vo telefonalela hati, omõlove ka file.
15 Nye ca kuatisa manji Katrin vokuenda kuotembo yaco yesumuo? Eye wa popia hati: ‘Nda pita otembo yalua loku likutilila ku Yehova. Ohutililo ya ndi kuatisa oku tula utima. Nda kuatisiwavo la vamanji valua veyile oku ndi nyula loku ndi lembeleka.’ (Va Filipoi 4:6, 7) Esumuo lia manji Katrin lia tepuluka omo lioku likutilila ku Yehova kuenda oku kuatisiwa la vamanji. Ukamba wetu la Yehova kumue la Yesu kuenda la vamanji, u kuete esilivilo. Momo u pamisa ekolelo lietu.
16. Lombolola ulandu umue u lekisa esilivilo lielavoko liepinduko.
16 Tu kuete elavoko lioku tambula vangandietu va fa. (Yoano 5:28, 29) Umalẽhe umue o tukuiwa hati, Matthias, wa kulila vepata limue Liolombangi via Yehova. Omo okuti, ka limbukile esumũlũho liaco, wa tunda vocisoko ca Yehova. Eye cilo wa popia hati: ‘Eci nda kala umalẽhe, lalimue eteke nda sapelele ciwa la isia yange. Vokuenda kuanyamo alua, nda enda oku litatamisa laye. Pole, eye wa yonguile oku ndi kuatisa oco ndi kuate ekalo liwa. Isia yange wa ndi solele calua, pole sia kuatele elomboloko liaco. Eteke limue, kunyamo wo 1996, nda tumalele ponele yaye loku u kuata peka. Kuenje lesumuo lialua, nda fetika oku lila. Noke ndo sapuila okuti nda livela omo liovina vĩvi nda ku lingila. Ndu ku sole calua. Pole, eye ka ndi tambuluile. Eci papita okatembo kamue, wa fetika oku vela, kuenje wa fa. Nda nda kala lomuenyo toke eci isia yange aka pinduiwa, tuka lisanga kuenda tuka kuata esanju lialua. Eye oka sanjuka calua eci aka yeva okuti, nda linga ukulu wekongelo. Kuenda ame lukãi wange tu kasi oku talavaya kupange wakundi votembo yosi.’ Elavoko liepinduko li tu nenela esanju lia piãla.
‘Yehova ka Nena Ohali’
17. Ekuatiso lipi li tunda koku sokolola ovina Yehova a siata oku tu lingila?
17 Yesu wa popia eci catiamẽla ku Isiaye hati: “[Eye] o tundasaila ekumbi liaye kolondingaiwa lo kolondingaĩvi. Kuenje o lokasaila ombela vakuesunga la vakuevĩho.” (Mateo 5:45) Ocili okuti, Yehova o kuatisa vakuesunga lolondingaĩvi. Omo liaco, o sumũlũisa calua vana vamamako oku endaenda laye lesunguluko. Osamo 84:11, yi popia hati: “Yehova ecaeca esumũlũho lekemainyo. Lacimue ciwa a limĩla ava va endaenda [lesunguluko].” Eci tu sokolola ovina Yehova a siata oku lingila omanu va lekisa ocisola kokuaye, tu kuata esanju lia piãla.
18. (a) Momo lie tu popela okuti, asumũlũho a Yehova ka a nena ohali? (b) Momo lie omanu vamue va Yehova va talela ohali?
18 ‘Esumũlũho lia Yehova,’ li lomboloka ekalo liwa kespiritu eye a siata oku eca komanu vaye. Kuenda ‘ka li vokiya ohali.’ (Olosapo 10:22) Momo lie Yehova a siatela oku ecelela okuti, omanu vaye va liyaka lovitangi loku tala ohali? Tua siata oku pita lovitangi omo liovina vitatu ndeci: Catete: Utima wetu wa tekela lika kekandu. (Efetikilo 6:5; 8:21; Tiago 1:14, 15) Cavali: Tua ñualiwa la Satana kumue lolondele viaye. (Va Efeso 6:11, 12) Catatu: Tu kasi voluali lueyuka evĩho. (Yoano 15:19) Yehova ecelela okuti tu pita lovitangi. Pole, hayeko wa vi nena kokuetu. Ocili okuti, “ocali cosi ciwa longavelo yosi ya kanguka via tunda kilu, ku Isia yovinyi.” (Tiago 1:17) Asumũlũho a Yehova, ka a nena ohali.
19. Omanu vana va kasi oku endela vonjila ya sunguluka va lavoka oku tambula nye?
19 Oco tu tambule asumũlũho a Yehova, tu sukila oku kuata ukamba laye. Nda tua ci linga, ‘tu liangiliyila ociseveto ciwa cokotembo yi laika oku iya oco tu kuate omuenyo ko pui.’ (1 Timoteo 6:12, 17-19) Voluali luokaliye Yehova a tu likuminya, tuka kuata ekalo liwa kespiritu kuenda ketimba. Omanu vana va ‘yevelela kondaka ya Yehova,’ ovo lika vaka kuata omuenyo ko pui. (Esinumuĩlo 28:2) Omo liaco, tu amamiko oku endela vonjila ya sunguluka.
Nye wa Lilongisa Vocipama Cilo?
• Momo lie tu sukilila oku yuvula oku sakalala lovina vikeya kovaso?
• Asumũlũho api tua siata oku tambula cilo?
• Momo lie omanu va Yehova va talela ohali?