‘Eye Oka Kuatavo Ukamba Wocili Love’
“[Suku] ka kasi ocipãla letu vosi omunu omunu.”—OVILINGA 17:27.
1, 2. (a) Eci tu tala olombungululu kilu, apulilo api pamue tu linga atiamẽla Kululiki wetu? (b) Ndamupi Embimbiliya li tu sapuila okuti, omanu ka va kasi ocipãla kovaso a Yehova?
ANGA hẽ eteke limue kuteke ove wa konomuisile ale olombungululu kilu ndomo vi kasi okuti via ku komohĩsa calua? Olohuluwa violombungululu vi kasi kilu kuenda oluali, ovina vimue okuti vi komohĩsa calua. Voluali luaco lua tanda ndeti, mu sangiwavo ongongo yi komohĩsa calua. Eci hẽ ci lomboloka okuti Ululiki wetu “Tõlo koluali luosi” ka lekisa vali esakalalo lomanu kuenda ka ca lelukile oku u kũlĩha?—Osamo 83:18.
2 Embimbiliya li tu sapuila okuti omanu vakuete esilivilo kovaso a Yehova. Omo liaco, Ondaka ya Suku yi tu vetiya oku u sandiliya poku popia ndoco: “[Suku] ka kasi ocipãla letu vosi omunu omunu.” (Ovilinga 17:27; 1 Asapulo 28:9) Handi vali, nda tua kuama onjila yoku kuata ukamba wocili la Suku, eye oka linga ekamba lietu omo lioku likolisilako kuetu. Ndamupi? Olondaka viocipama Cembimbiliya ci tangiwa vokuenda kunyamo ulo wo 2003, vi eca etambululo liesanju ndoco: “Eye amela kokuene.” (Tiago 4:8) Omo liaco, tu konomuisi asumũlũho amue a komohĩsa Yehova a pondola oku eca komanu vana va kuete ukamba wocili laye.
Ombanjaile Yimue yi Tunda ku Yehova
3. Ombanjaile yipi Yehova a eca komanu vana va kuete ukamba wocili laye?
3 Catete, omanu va Yehova va kuete ombanjaile yimue yi soliwe calua eye a va selekela. Ovina ndeci, ovonene osi, ovokuasi, kuenda elilongiso lia velapo lioluali lulo, ka vi pondola oku eca ombanjaile yaco. Ombanjaile yaco eyi yilikasi, Yehova o yeca lika komanu vana okuti akamba vaye vocili. Ombanjaile yaco nye? Ondaka ya Suku yeca etambululo liokuti: “Nda o sandiliya ukũlĩhĩso, loku lipilikila uloño, nda o vi sanda ndeci va sanda sanda opalata kolomina, kuenda o vi vanjiliya ndeci va vanjiliya ukuasi wa selekiwa, oco o kũlĩha oku sumbila Yehova, kuenje o sanga ukũlĩhiso wa Suku. Momo Yehova eye ukuakueca olondunge.” (Olosapo 2:3-6) Sokolola handi eci: omanu kavalipuile va kuata ukũlĩhĩso wocili watiamẽla ku Suku! Ombanjaile yaco, ukũlĩhĩso u sangiwa Vondaka ya Suku, una u sokisiwa ‘lukuasi wa selekiwa.’ Momo lie?
4, 5. Momo lie ‘ukũlĩhĩso wocili Condaka ya Suku’ ci tavela oku u sokisa ‘lukuasi wa selekiwa’? Ci lombolola.
4 Ocili okuti, ukũlĩhĩso wa Suku u kuete esilivilo lia velapo calua. Limue pokati kesilivilo liaco, elavoko liomuenyo ko pui. (Yoano 17:3) Pole, ukũlĩhĩso waco, u pondola oku tu kuatisa cilo muẽle komuenyo wetu. Ndeci, omo lioku lilongisa kuetu lutate Ondaka ya Suku, tu pondola oku sanga atambululo atiamẽla kapulilo a velapo ndeci: Onduko ya Suku helie? (Osamo 83:18) Cipi hẽ ocili catiamẽla komanu va fa? (Ukundi 9:5, 10) Onjongole yipi Suku a kuetele oluali kuenda omanu? (Isaya 45:18) Tu pondola oku kũlĩhavo onjila ya sunguluka yatiamẽla komuenyo okuti, yi sangiwa lika poku pokola kelungulo liocili Cembimbiliya. (Isaya 30:20, 21; 48:17, 18) Ocili okuti, tu sukila oku sandiliya olonumbi vina vi pondola oku tu kuatisa koku liyaka lasakalalo omuenyo kuenda oku kuama onjila yina yi tu ĩha esanju liocili. Ca velapo vali enene ceci okuti, elilongiso lietu Liondaka ya Suku li tu kuatisa oku kũlĩha ovituwa vi komohĩsa via Yehova, kuenda oku kuata ukamba wocili laye. Nye ci kuete vali esilivilo lia velapo okuti ukamba wocili la Yehova watiamẽla ‘kukũlĩhĩso wa Suku’ u sule?
5 Kuli esunga likuavo lieci ukũlĩhĩso wa Suku u sokisiwila ‘lukuasi wa selekiwa.’ Ndeci ovokuasi alua a kasi, ukuasi waco ka wa siatele voluali lulo. Kueci ci soka olohulukãi epandu kolohuluwa viomanu va kasi mulo voluali, kuli lika olohuluwa epandu via vana va kasi oku fendela Yehova, kuenje eci ci lomboloka okuti, pokati kohũlũkãi yomanu, pali lika omunu umosi wa sanga ‘ukũlĩhĩso wocili condaka ya Suku.’ Oco tu limbuke esumũlũho lioku kũlĩha Ondaka ya Suku, tu konomuisi epulilo Liembimbiliya liokuti: Nye ci pita lomanu poku fa? Lekuatiso Liembimbiliya, tua kũlĩha ciwa okuti, omunu eci a fa, ka pondola vali oku limbuka lacimue. (Esekiele 18:4) Pole, elongiso liesanda lioku popia hati, vetimba liomunu muli ocina cimue okuti poku fa ci tuihinya lomuenyo, elongiso liaco li kasi oku taviwa latavo alua oluali. Ondotilina yaco, oyo ya velapo vali calua Kakristão vesanda. Ondotilina yaco yi taviwavo calua vatavo ndeci: Lio Budismu, lio Hinduismu, lio Islamismu, lio Jainismu, lio Judaismu, lio Xintoismu, lio Sikismu kuenda lio Taoismu. Omo liaco, olohuluwa viomanu va kasi oku kembiwa lalongiso aco esanda.
6, 7. (a) Omanu vapi okuti ovo lika va pondola oku sanga ‘ukũlĩhĩso wocili Condaka ya Suku’? (b) Ovolandu api a lekisa okuti Yehova o kasi oku tu sumũlũisa lukũlĩhĩso una wa siata oku yuvuiwa ‘lolonoño kuenda vakualondunge violuali lulo’?
6 Momo lie ku kasilili omanu vatito va kuete ‘ukũlĩhĩso wocili Condaka ya Suku’? Momo, etu ka tu pondola oku kuata elomboloko Liondaka ya Suku nda okuti ka tu kuatisiwa Laye. Ivaluka okuti, ukũlĩhĩso waco tu u tambula ndombanjaile. Yehova eca lika ombanjaile yaco komanu vana va kuete onjongole yoku sandiliya Ondaka yaye lesunguluko kuenda lumbombe wocili. Omanu vaco “ka va kuete uloño nda una u tendiwa loluali.” (1 Va Korindo 1:26, NW) Valua pokati kavo ci tava okuti va tendiwa ‘ndomanu vaño’ kuenda ka va lilongisile calua catiamẽla kovoloño oluali. (Ovilinga 4:13) Pole, eci hacitangiko. Yehova o tu ĩha onima ‘yukũlĩhiso Wondaka yaye,’ omo liovituwa viwa a limbuka kutima wetu.
7 Ndeci, kuli Akristão valua vesanda va lilongisa calua okuti, va siata oku panga alivulu alua a kuete ovolandu ana a tunda Vembimbiliya. Alivulu aco a lombolola eci catiamẽla kesapulo liomanu, elomboloko liolondaka vio Heveru, vio Helasi kuenda ovina vikuavo. Lovina vialua ovo va lilongisa, anga hẽ va sanga ‘ukũlĩhĩso wocili Condaka ya Suku’? Ovo hẽ va kuete elomboloko liosapi Yembimbiliya, yina yi lomboloka oku teyuila omoko ya Yehova yoku viala lekuatiso Liusoma waye wokilu? Anga hẽ ovo va kũlĩha okuti Yehova Suku ka tiamẽlele ku Suku umosi Muvatatu? Ca litepa lavo ceci okuti, etu tu kuete elomboloko liasuapo kapulilo a votuiwa ndeti. Momo lie? Momo okuti, Yehova wa tu sumũlũisa lukũlĩhĩso wavelapo kespiritu una wa siata oku yuvuiwa ‘lolonoño kuenda vakualondunge violuali lulo.’ (Mateo 11:25) Ocili okuti, Yehova wa siata oku sumũlũisa omanu vosi va kuete ukamba wocili laye.
‘Yehova o Lava Omanu Vosi vo Sole’
8, 9. (a) Ndamupi Daviti a lombolola asumũlũho akuavo a tambuiwa lomanu vana va kuete ukamba wocili la Yehova? (b) Momo lie Akristão va sukilila oku laviwa la Suku?
8 Omanu vosi vana va kuete ukamba wocili la Yehova va siata oku tambula ekuatiso Liaye li kola. Ukualosamo Daviti, una wa pita lovitangi vialua wa soneha ndoco: “Yehova o kasi ocipepi lomanu vosi vo vilikiya, okuti vo vilikiya ocili. Oka tẽlisa onjongole yomanu vosi vo sumbila. Oka yeva epingilo liavo lioku va kuatisa kuenje eye oka va popela. Yehova o lava omanu vosi vo sole.” (Osamo 145:18-20, NW ) Omo liaco, Yehova o kasi ocipepi lomanu vana vo sole kuenda o tambulula lonjanga epingilo liavo lioku va kuatisa.
9 Momo lie tu sukilila oku laviwa la Suku? Ocili okuti, omo liovitangi vio koloneke vilo ‘viotembo yohali,’ Akristão vocili va lambalaliwa calua la Satana Eliapu, unyali wa Yehova. (2 Timoteo 3:1) Satana, wa nõlapo muẽle onjila yoku tu ‘yapuisa.’ (1 Petulu 5:8) Satana o tu lambalala, o tu sakalaisa kuenda o tu yonja. Eye o kũlĩhĩsa ovisimĩlo vietu leci ci kasi kutima wetu oco a tu yapuise. Onjongole yaye, yoku honguisa ekolelo lietu kuenda oku nyõla ekalo lietu kespiritu. (Esituluilo 12:12, 17) Omo okuti tu kuete unyali umue ukuonene walua, ka ca sungulukile hẽ oku kũlĩha okuti, “Yehova o lava omanu vosi vo sole”?
10. (a) Ndamupi Yehova a siata oku lava omanu vaye? (b) Oku teyuiwa kupi okuti oko kua velapo vali, kuenda momo lie?
10 Ndamupi Yehova a siata oku lava omanu vaye? Ocili okuti, Yehova wa likuminya oku tu lava, pole eci ka ci lomboloka okuti, lalimue eteke tu liyaka vali lovitangi voluali lulo. Handi vali, eci ka ci lombolokavo okuti, eye o sukila oku linga ovikomo oco a tu lave. Pole, Yehova eca eteyuilo komunu lomunu. Eye lalimue eteke aka ecelela okuti Eliapu li kundula afendeli vosi vocili kulo kilu lieve. (2 Petulu 2:9) Handi vali, Yehova o lava ekalo lietu kespiritu. Eye o tu ĩha ovina viosi tu sukila oco tu pandikise kovitangi okuti tu lava ciwa ukamba wetu laye. Omo liaco, eteyuilo kespiritu olio li kuete esilivilo lia velapo vali. Momo lie? Momo, tu kuete ukamba wocili la Yehova, kuenda ndaño muẽle olofa ka vi tu yokokisa.—Mateo 10:28.
11. Aliangiliyo api konepa yespiritu Yehova a siata oku linga oco a teyuile omanu vaye?
11 Yehova wa siata oku linga aliangiliyo konepa yespiritu oku teyuila omanu vosi vana va kuete ukamba wocili laye. Lekuatiso Liembimbiliya okuti olio Ondaka yaye, tu pondola oku lilongisa eci catiamẽla kohuminyo yaye yoku tu ĩha uloño woku yula ovitangi. (Tiago 1:2-5) Oku pokola kalungulo osi a sangiwa Vembimbiliya, ku pondola oku tu teyuila. Handi vali, Yehova eca “espiritu sandu liaye kuava vo pinga.” (Luka 11:13) Espiritu sandu liaco, olio unene wa velapo voluali luosi okuti, u pondola oku tu kuatisa koku liyaka lovitangi kuenda ayonjo ana a siata oku iya kokuetu. Lekuatiso lia Kristu, Yehova wa siata oku eca ‘olongavelo kalume.’ (Va Efeso 4:8) Alume vaco ava va loñoloha kespiritu, va siata oku likolisilako oku lekisa ohenda ya Yehova poku kuatisa vakuavo kespiritu.—Tiago 5:14, 15.
12, 13. (a) Onjila yipi Yehova a siata oku kuama oco a tu ĩhe okulia kuespiritu kotembo ya sokiyiwa? (b) Esanju lipi ove wa siata oku kuata omo lieliangiliyo lia Yehova lioku tu kuatisa konepa yespiritu?
12 Handi vali, Yehova wa siatavo oku linga aliangiliyo akuavo atiamẽla kokulia kuespiritu kueciwa kotembo ya sokiyiwa oco a tu kuatise. (Mateo 24:45) Yehova wa siata oku tu ĩha cosi tu sukila konepa yespiritu. Eye wa siata oku ci linga lekuatiso lialivulu a siata oku pangiwa ana a lombolola eci ci kasi Vembimbiliya, oku kongelamo Utala Wondavululi lo Despertai!, olohongele viakongelo, lolohongele vimbo kuenda viofeka. Anga hẽ ove ivaluka epuluvi limue eci wa kala kohongele vekongelo, kohongele yimbo ale yofeka okuti wa yeva ondaka yimue ya veta kutima wove kuenje ya ku kuatisa calua? Anga hẽ, ove wa tangele ale ocipama cimue Vutala Wondavululi ale vo Despertai! kuenje noke wa popia okuti: Ocipama eci va ku ci sonehela muẽle ove?
13 Onjila yimue Satana a siata oku kuama oco a yapuise omanu, oku va vetiyila koku kuata owesi, kuenje ci tava okuti vosi yetu tu yonjiwilavo vonjila yaco. Eye wa kũlĩha ciwa okuti esumuo li pondola oku tepulula ekolelo lietu, kuenje ci leluka calua oku tu yapuisa. (Olosapo 24:10) Ocili okuti, tu sukila ekuatiso, momo Satana wa siata oku seteka oku tu vetiyila kovisimĩlo ka via sungulukile. Vutala Wondavululi lo vo Despertai!, mua siata oku sandekiwa ovipama vina vi pondola oku tu kuatisa oku yula ekambo lielavoko ale esumuo. Kueci catiamẽla konepa yimue yovipama viaco, manji umue ukãi wa soneha ndoco: “Nda siata oku tanga ovipama viaco eteke leteke, kuenje via siata oku ndi kokela asuẽlẽla. Nda siata oku vi kapa pula wange okuti eci ndi yeva esumuo vi pondola oku ndi kuatisa. Lekuatiso liovipama viaco, ndi pondola oku limbuka ndomo Yehova a ndi teyuila.”a Anga hẽ ka tu eci olopandu ku Yehova omo a siata oku tu kuatisa lokulia kuaco kuespiritu ku eciwa kotembo ya sokiyiwa? Ivaluka okuti, aliangiliyo aye oku tu kuatisa konepa yespiritu, owo uvangi u lekisa okuti Yehova o kuete ukamba wocili letu kuenda wa siata oku tu teyuila lutate wocili.
Yehova ‘Wa siata Oku Yevelela Olohutililo’
14, 15. (a) Asumũlũho api Yehova a siata oku eca komanu vana va lekisa ukamba wocili laye? (b) Momo lie oku amẽla ku Yehova vohutililo esumũlũho limue liocili?
14 Ocili okuti omanu vana va kuete unene ale omoko yoku viala vakuavo, ka va siatele oku lekisa ukamba wocili lomanu. Anga hẽ ove wa siata oku ci mõla? Oco hẽ tu popia nye catiamẽla ku Yehova Suku? Anga hẽ Yehova ka siatele oku yevelela olohutililo viomanu vana vo vilikiya? Ocili okuti ka siatele oku ci linga! Olohutililo ovio esumũlũho likuavo Yehova a siata oku eca komanu vana va lekisa ukamba wocili laye. Oku amẽla ku Yehova una “ukuakuyevelela olohutililo,” esumũlũho limue liocili. (Osamo 65:2) Momo lie?
15 Konomuisa ulandu owu: Usongui wocisoko cupange umue, o kuete ovikele vialua. Eye o kuete omoko yoku nõla ocitangi a pondola oku potolola eye muẽle kuenda eci a pondola oku eca ku vakuavo oco va ci potolole. Cimuamue haico Ululiki Woluali Luosi a siata oku linga. Eye wa siata oku nõla ocitangi a pondola oku potolola eye muẽle kuenda eci a pondola oku eca komanu oco va ci potolole. Konomuisa ovina viosi Yehova a siata oku eca Komõlaye Yesu. Omõla wa tambula “omoko yoku tetulula.” (Yoano 5:27) Ovangelo va siatavo oku ‘pokola kokuaye.’ (1 Petulu 3:22) Yehova wa eca espiritu sandu liaye oco li kuatise Yesu koku songuila olondonge viaye vi kasi palo posi. (Yoano 15:26; 16:7) Omo liaco, Yesu wa popia hati: “Uviali wosi wokilu lowu wokilu lieve wa nyihiwa.” (Mateo 28:18) Handi vali, kueci catiamẽla kolohutililo vietu, Yehova wa siata oku vi tambulula eye muẽle. Eli olio esunga lieci Embimbiliya li tu vetiyila okuti, olohutililo vietu tu sukila oku vi suñamisa lika ku Yehova, poku vi lingila vonduko ya Yesu.—Osamo 69:13; Yoano 14:6, 13.
16. Momo lie tu kuetele ekolelo liokuti Yehova o yevelela olohutililo vietu?
16 Anga hẽ Yehova wa siata muẽle oku yevelela olohutililo vietu? Nda eye ka kale umue ukuaku lekisa onjongole komanu, nda lalimue eteke a tu vetiya oku kuata ‘ocituwa coku likutilila,’ ale oku sapula kokuaye ovitangi vietu viosi. (Va Roma 12:12; Osamo 55:22; 1 Petulu 5:7) Afendeli va Yehova vakuekolelo vana va kala kosiãhulu, va kuatele ekolelo liokuti, Yehova o yevelela olohutililo. (1 Yoano 5:14) Omo liaco, ukualosamo Daviti wa popia hati: “[Yehova] o yeva ondaka yange.” (Osamo 55:17) Etu tu kuetevo esunga lialua lioku kolela okuti Yehova ekamba lietu, o yevelela olohutililo vietu kuenda asakalalo etu.
Yehova Eca Onima Komanu Vaye
17, 18. (a) Ndamupi Yehova a siata oku eca esilivilo kovopange ana a lingiwa lomanu vaye va loñoloha? (b) Lombolola ndomo elivulu Liolosapo 19:17, li lekisa okuti ovilinga vietu viohenda vi letiwe la Yehova.
17 Ndaño okuti omanu va tava oku lingila cimue Yehova ale ka va tava oku ci linga, eye ka cu tateka oku linga eci a yongola, momo eye Ombiali Yavelapo Voluali luosi. Pole, Yehova Suku, wa siata oku limbuka ombili omanu vo kuetele. Eye eca esilivilo kovopange ana a lingiwa lomanu vaye va loñoloha. (Osamo 147:11) Eli olio esumũlũho likuavo liomanu vana va kuete ukamba wocili la Yehova, momo Eye eca onima komanu vaye.—Va Heveru 11:6.
18 Embimbiliya li lekisa okuti, Yehova wa kapako ovilinga viosi viomanu vana vo fendela. Omo liaco, tu tanga ndoco: “U o linga olosuke ohenda wondika Yehova, kuenje Yehova u tiuwila oviali viaye.” (Olosapo 19:17) Ohenda Yehova a kuetele olosuke, ya lekisiwila Vocihandeleko ca Mose. (Etundilo 23:3; Ovisila 14:21; 19:15) Yehova hẽ ka lekisa esanju eci tu kuama ongangu yaye yoku kuatela ohenda olosuke? Eci tu eca ocina cimue kosuke okuti ka tu lavoka oku tu ci tiuwila, Yehova o ci tenda ndofuka tua levalisa Kokuaye. Yehova wa likuminya oku feta ofuka yaco kuenda oku eca asumũlũho alua. (Olosapo 10:22; Mateo 6:3, 4; Luka 14:12-14) Omo liaco, eci tu lekisa ohenda ku vakuetu olosuke vana tu fendelela kumosi, ci sanjuisa utima wa Yehova. Ocili okuti, tu kuete esanju lialua omo lioku kũlĩha okuti, ovilinga vietu viohenda tua siata oku lekisa ku vakuetu, vi letiwe la Isietu o kasi kilu.—Mateo 5:7.
19. (a) Momo lie tu kuetele ekolelo liokuti Yehova o sole calua upange wetu woku kunda Usoma kuenda oku longisa omanu oco va linge olondonge? (b) Ndamupi Yehova a sumũlũisa ovopange osi a lingiwila oku kuatisa Usoma waye?
19 Yehova wa kapako ovina viosi tu linga viatiamẽla koku kuatisa Usoma waye. Eci tu kuata ukamba wocili la Yehova, ci lomboloka okuti tu yongola oku pesila otembo yetu, ongusu, kuenda ovokuasi vetu oco tu kuatise kupange woku kunda olondaka viwa Viusoma kuenda oku longisa omanu oco va linge olondonge. (Mateo 28:19, 20) Vokuenda kuotembo, tu pondola oku limbuka okuti, eci tu kasi loku linga citito. Omo okuti ka tualipuile, pamue utima wetu u pondola oku tu vetiya oku kuata atatahãi nda Yehova o kasi muẽle oku sanjukila alikolisilo etu. (1 Yoano 3:19, 20) Pole, olombanjaile viosi tu eca ku Yehova omo liocisola tu u kuetele, eye o vi tava ndaño okuti ka via luile. (Marko 12:41-44) Embimbiliya li tu likuminya okuti: “Suku hokuanyako okuti ivalako upange wene kuenda ocisola wa lekisi vonduko yaye.” (Va Heveru 6:10) Omo liaco, Yehova ivaluka kuenda o sumũlũisa ovopange osi a lingiwila koku kuatisa Usoma waye. Handi vali, tu kuete asumũlũho alua cilo, momo tu lavoka omuenyo wa velapo voluali luokaliye lu laika okuiya. Yehova omo liocali caye, oka tẽlisa olonjongole viosi via sunguluka viomanu vana va kuete ukamba wocili laye.—Osamo 145:16; 2 Petulu 3:13.
20. Vokuenda kunyamo ulo wo 2003, ndamupi tu pondola oku kapako olondaka viocisonehua cunyamo? Kuenda lelavoko lie?
20 Vokuenda kunyamo ulo wo 2003, tu sukila oku li pulisa etu muẽle nda tu kasi oku likolisilako loku amamako oku kuata ukamba wocili la Isietu wokilu. Nda tu kasi oku ci linga, tu pondola oku kuata ekolelo liokuti eye oka tẽlisa cosi a likuminya. Ocili okuti, “Suku, . . . lalimue eteke a kemba.” (Tito 1:2) Nda wa kuata ukamba wocili laye, eye oka kuatavo ukamba love. (Tiago 4:8) Lelavoko lie? O pondola oku kuata asumũlũho alua cilo kuenda elavoko lioku ka linga ekamba lia Yehova otembo ka yi pui.
[Atosi pombuelo yamẽla]
a Etambululo liocipama losapi ya linga hati, “Yehova Wavelapo Calua Okuti Utima Wetu Usule,” lia sandekiwa Vutala Wondavululi 1 yosãi ya Kupemba wo 2000 okupisa kemẽla 28 toke 31 kelimi Lioputu.
Ocivaluka?
• Ombanjaile yipi Yehova a siata oku eca komanu vana va kuete ukamba wocili laye?
• Aliangiliyo api konepa yespiritu Yehova a siata oku linga oco a teyuile omanu vaye?
• Momo lie oku amẽla ku Yehova vohutililo, esumũlũho limue liocili?
• Ndamupi Embimbiliya li lekisa okuti Yehova wa siata oku eca esilivilo kovopange ana a lingiwa lomanu vaye va loñoloha?
[Elitalatu kemẽla 15]
Yehova wa siata oku tu sumũlũisa lukũlĩhĩso wavelapo kespiritu
[Elitalatu kemẽla 17]
Yehova wa linga eliangiliyo lioku tu teyuila kespiritu
[Elitalatu kemẽla 18]
Yehova o yevelela ciwa olohutililo vietu viosi
[Elitalatu kemẽla 18]