Ndamupi O Tenda Ovina Vi Kola Ku Yehova?
“Lavululi sanga umue o linga ukuokahonga, pamue ukuetombo [ale ka sumbila ovina vi kola.]”—VA HEVERU 12:15, 16.
1. Ocituwa cipi omanu va Yehova va siata oku yuvula?
ONEPA yalua yomanu voluali, ka va sumbile ovina vi kola. Ulume umue onoño o tukuiwa hati, Edgar Morin, wa lombolola ndoco: ‘Kolono viosi kuopiwa ovituwa viomanu, ka kuli oku sumbila Suku. Ovo ka va kapeleko ekalo lioluali, lofeka va citiwila, kuenda ovolandu akuavo. Omanu va yongola lika oku kuama olonumbi viavo.’ Ulandu owu u lekisa ‘espiritu lioluali ale espiritu lina li kasi oku linga upange vovitima via vakuesino.’ (1 Va Korindo 2:12; Va Efeso 2:2) Pole, omanu vana va litumbika ku Yehova, va yuvula oku kuama ovituwa viaco. Ovo va likolisilako oku pokola kuviali Waye lutima wosi. (Va Roma 12:1, 2) Omanu va Suku va kũlĩha esilivilo liovina vi kola vefendelo liavo ku Yehova. Ovina vipi tu sukila oku tenda okuti vi kola komuenyo wetu? Vocipama cilo, tu konomuisa ovina vitãlo vi kola komanu vosi va Yehova. Ocipama cikuãimo, cika lombolola oku kola kuolohongele vietu. Oco hẽ, ondaka “oku kola” yi lomboloka nye?
2, 3. (a) Ovisonehua via lekisa ndati oku kola kua Yehova? (b) Tu tenda ndati onduko ya Suku?
2 Vovisonehua via va Heveru, ondaka “oku kola” yi lomboloka oku tepiwa. Pole, vefendelo ondaka yaco yi lomboloka oku tepa cimue pokati kovina vikuavo okuti, ci sumbiwa. Yehova eye wa velapo koku kola. Eye o tukuiwa hati, “O Kola” ale wa Piãla Koku Kola. (Olosapo 9:10; 30:3) Kotembo ya va Isareli, ocitunda cinene, ca enda oku wala ekofue liulu li kuete ukolo mua sonehiwa hati: ‘Oku kola kua Yehova.’ (Etundilo 28:36, 37) Ovangelo vokilu ndeci va keruvi kuenda va serafi, va tãi kilu liocalo ca Yehova. Embimbiliya li lombolola okuti, ovo va kasi oku vilikiya hati: “O kola, o kola, o kola Yehova.” (Isaya 6:2, 3; Esituluilo 4:6-8) Oku pituluiwa kuolondaka evi, ku lekisa okuti, oku kola kua Yehova loku lipua kuaye, kua velapo ovina viosi. Omo liaco, Yehova eye Ono yovina viosi vi kola.
3 Onduko ya Suku yi kola. Ukualosamo wa popia hati: “Va sivaye onduko yove yinene yi lingisa usumba. Eye o kola.” (Osamo 99:3) Yesu wa tu longisa oku likutilila ndoco: “A Isietu o kasi kilu. Onduko yove yi sumbiwe.” (Mateo 6:9) Maria ina ya Yesu wa popia hati: “Utima wange u pandiya Yehova. . . . Momo Fu wa ndingila ovina vinene, kuenje onduko yaye yi kola.” (Luka 1:46, 49) Etu tumanu Vaye, tua sumbila onduko yaye ndocina cimue ci kola. Kuenda tu yuvula oku linga cimue ci sepula onduko yaco. Omo liaco, tu sukila oku kũlĩha ovina vi kola ku Yehova kuenda oku vi sumbila.—Amosi 5:14, 15.
Esunga Lieci tu Lekisila Esumbilo ku Yesu
4. Momo lie Embimbiliya li popela hati, Yesu eye “O kola wa Suku”?
4 Yesu omo okuti eye ‘omõla wongunga’ wa Yehova, wo lulika loku kola. (Yoano 1:14; Va Kolossai 1:15; Va Heveru 1:1-3) Eye o tukuiwavo hati: “U o kola wa Suku.” (Yoano 6:69) Eci omuenyo waye wa sondoluiwa kilu okuiya palo posi, wamamako loku kola kuaye. Maria wa cita Yesu lekuatiso liespiritu sandu. Ungelo wo sapuila hati: “Espiritu sandu [li] ku wila . . . omõla o citiwa o tukuiwa [hati], o Kola, Eye Mõla a Suku.” (Luka 1:35) Akristão ko Yerusalãi eci va likutilila, olonjanja vivali va tukula omõla wa Suku hati, “o kola, okuti Yesu.”—Ovilinga 4:27, 30.
5. Ocikele cipi ci kola Yesu a tẽlisa eci a kala palo posi? Momo lie osonde yaye yi kuetele esilivilo?
5 Eci Yesu a kala palo posi, wa kuata ocikele cimue ci kola a sukilile oku tẽlisa. Noke yoku papatisiwa kunyamo wa 29, wa wavekiwa, kuenje wa linga Ocitunda Cavelapo vonembele yi Kola yespiritu ya Yehova. (Luka 3:21, 22; Va Heveru 7:26; 8:1, 2) Eye, wa kala oku lavoka oku fa ndocilumba. Osonde yaye ya peseka, ya linga ocilumba cocisembi coku yovola omanu kekandu. (Mateo 20:28; Va Heveru 9:14) Omo liaco, tu sukila oku tenda osonde ya Yesu ndocina cimue ci kola.—1 Petulu 1:19.
6. Ocituwa cipi tu sukila oku lekisa ku Yesu, kuenda momo lie?
6 Upostolo Paulu poku lekisa okuti tu sukila oku pokola ku Yesu Kristu Osoma haeye Ocitunda Cinene, wa popia hati: “Suku wo kemainya kuenje wo luka onduko ya piãla olonduko vikuavo viosi. Wa ci lingila okuti, konduko ya Yesu ku kekamẽla olongolo viosi viava vokilu lo posi levi viovemehi liongongo, kuenda okuti alimi osi a tava okuti Yesu Kristu eye Ñala, loku muisa Suku Tate ulamba.” (Va Filipoi 2:9-11) Omo liaco, tu lekisa esumbilo kovina Yehova a tenda okuti vi kola poku pokola Kusongui wetu Yesu Kristu Soma haeye Utue wekongelo.—Mateo 23:10; Va Kolosai 1:18.
7. Tu lekisa ndati esumbilo ku Kristu?
7 Voku pokola ku Kristu, mua kongela oku lekisa esumbilo komanu vana a kundika ocikele coku endisa upange waye. Tu sukila oku sumbila ocikele Cakristão olombuavekua vatiamẽla Kocisoko Cakulu Volombangi via Yehova. Cimuamue haico catiamẽla kocikele cakulu voloseketa Violombangi via Yehova, lolomitavaso vi nyula akongelo vimbo kuenda vofeka. Tu sukilavo oku sumbila ocikele cakulu vekongelo. Eliangiliyo liaco lia Yehova li tu vetiya oku lekisa esumbilo kokuavo.—Va Heveru 13:7, 17.
Omanu va Kola
8, 9. (a) Va Isareli va tendiwile ndati okuti va kola? (b) Yehova wa ecele ndati olonumbi vi kola ku va Isareli?
8 Kosimbu, Yehova wa lingile ocisila cukamba la va Isareli. Ukamba waco wa eca kokuavo ocikele coku pokola kolonumbi vimue via velapo. Ovo va tendewile okuti, va kola. Yehova wa va sapuila hati: “Ene wu linga [omanu] vange, va kola, momo ame ndi Yehova ñola, ndo tepisi kolofeka ho lingi vange.”—Ovisila 19:2; 20:26.
9 Eci Yehova a tumbika ofeka ya va Isareli, wa va ĩha olonumbi vi kola. Ovo va tambuilevo ocihandeleko cokuti ka ci tava oku enda Komunda kuna kua eciwila Ekũi Liovihandeleko. Omunu wosi enda komunda yaco, o yambuiwa lolofa. Omunda Sinai ya tendiwile okuti, yi kola. (Etundilo 19:12, 23) Ovitunda, otavernakulu, kuenda ovikuata vikuavo, via tendiwilevo okuti vi kola. (Etundilo 30:26-30) Oco hẽ ekalo lipi li sangiwa vocisoko ca Yehova?
10, 11. Momo lie tu popela okuti, ekongelo Liakristão olombuavekua li kola? Oku kola kuaco ku tiamisiwila ndati ‘kolomeme vikuavo’?
10 Ekongelo Liakristão olombuavekua li kola kovaso a Yehova. (1 Va Korindo 1:2) Ocisoko Cakristão olombuavekua tunde kosimbu, ca siata oku tendiwa ndonembele yi kola. Pole, Akristão olombuavekua havoko onembele yinene ya Yehova yespiritu. Yehova wa tunga vonembele yaco vonduko yespiritu sandu liaye. Upostolo Paulu wa popia hati: “Onjo yaco yosi ya litokeka vu Kristu, yi kula, kuenje yi lingila vu Ñala onembele yi kola. Omo vu kasi vu Kristu, oco lenevo wa tungiwivo vonembele yaco omu Suku a kala kala lespiritu [liaye].”—Va Efeso 2:21, 22; 1 Petulu 2:5, 9.
11 Upostolo Paulu poku sonehela Akristão olombuavekua wa popia hati: “Ka wa kũlĩhĩli okuti ene vunembele ya Suku kuenda okuti espiritu lia Suku li kasi vokati kene? . . . Momo onembele ya Suku yi kola, kuenje ene, ene vunembele yaco.” (1 Va Korindo 3:16, 17) Lekuatiso liespiritu sandu, Yehova wa ‘tunga’ lolombuavekua kuenda o ‘ñuala ñuala pokati kavo.’ (2 Va Korindo 6:16) Eye, o kasi oku songuila ocisoko ‘cukuenje waye wa lunguka.’ (Mateo 24:45-47) Olomeme vikuavo vi sanjukilavo esumũlũho liavo lioku kuatisa olombuavekua.—Yoano 10:16; Mateo 25:37-40.
Ovina vi Kola Vomuenyo Wetu Tuakristão
12. Ovina vipi vi kola komuenuo wetu, kuenda momo lie?
12 Ovina viosi viatiamẽla komuenyo wolombuavekua kuenda kolomeme vikuavo, vi tendiwa okuti vi kola. Ukamba wetu la Yehova u kola. (1 Asapulo 28:9; Osamo 36:7) Omo liesilivilo liukamba waco, ka tu ecelela okuti, cimue ci tu tepa la Yehova. (2 Asapulo 15:2; Tiago 4:7, 8) Ohutililo, yi kuete esilivilo lialua koku pamisa ukamba wetu la Yehova. Daniele wa tendele ohutililo ndocina cimue ci kola. Momo ndaño okuti, omuenyo waye wa kala kohele, wamamako oku likutilila ku Yehova. (Daniele 6:7-11) ‘Olohutililo violosandu’ ale violombuavekua, vi sokisiwa linsesu via enda oku timihiwa vonembele. (Esituluilo 5:8; 8:3, 4; Ovisila 16:12, 13) Eci ci lekisa okuti, ohutililo yi kuete esilivilo li kola. Oku sapela la Yehova Ululiki woluali luosi, esumũlũho limue lia velapo. Omo liaco, ohutililo yi kola komuenyo wetu.
13. Espiritu sandu li kuete unene upi, kuenda tu ecelela ndati okuti li tu kuatisa?
13 Espiritu li kola, li kuete esilivilo lia velapo komuenyo Wakristão olombuavekua kuenda kolomeme vikuavo. Olio, li lomboloka unene wa Yehova. Omo okuti lia siata oku tẽlisa ocipango caye ci Kola, li tukuiwa hati “espiritu sandu” ale “espiritu li kola.” (Yoano 14:26; Va Roma 1:4) Yehova lekuatiso liespiritu sandu liaye, wa siata oku eca komanu vaye unene woku kunda olondaka viwa viusoma. (Ovilinga 1:8; 4:31) Eye eca espiritu liaye komanu vosi va ‘pokola kokuaye’ okuti ‘va endaenda lespiritu’ kuenda ka va lingi ocipango cetimba. (Ovilinga 5:32; Va Galatia 5:16, 25; Va Roma 8:5-8) Unene wa Yehova, u va kuatisa oku kuata “apako espiritu” okuti, ‘kovimuenyo viavo va kola kuenda va sumbila Suku.’ (Va Galatia 5:22, 23; 2 Petulu 3:11) Nda tua tenda espiritu sandu ndocina cimue ci kola, tuka yuvula oku linga cimue ci sumuisa espiritu liaco.—Va Efeso 4:30.
14. Ocikele cipi cupange olombuavekua vi tenda okuti ci kola? Olomeme vikuavo via kongeliwavo ndati vesumũlũho liaco?
14 Tu kuete esumũlũho lioku ambata Onduko yi Kola ya Yehova kuenda oku linga Olombangi viaye. Esumũlũho liaco, tu sukila oku litenda okuti li kola. (Isaya 43:10-12, 15) Akristão olombuavekua, va noliwa la Yehova okuti va linga ‘olondingupange viocisila cokaliye.’ (2 Va Korindo 3:5, 6) Omo liaco, va tambula ocikele coku kunda ‘olondaka viwa viusoma loku longisa omanu kolofeka viosi oco va linge olondonge.’ (Mateo 24:14; 28:19, 20) Ovo va kasi oku tẽlisa ocikundi caco. Kuenje, owiñi wakahandangala vupopi umue wocindekaise, u kasi oku popia kokuavo hati: “Tuenda [lene], momo tua yeva okuti Suku o kasi lene.” (Sakariya 8:23) Owiñi waco, u kasi ‘ndolongunja vi lava oviumbo viayuva’ violombuavekua “oloñuatisi via Suku yetu.” Omo liaco, olomeme vikuavo vi kasi oku kuatisa olombuavekua koku tẽlisa upange woku kunda olondaka viwa voluali luosi.—Isaya 61:5, 6.
15. Upange upi Paulu a tendele okuti u kola? Momo lie tu sukililavo oku kuata ovisimĩlo viaco?
15 Upostolo Paulu, upange waye woku kunda, wa u tendele okuti u kola. Eye wa li tukula “ndoñuatisi ya Kristu Yesu yoku kuatisa vakualofeka vupange wefendelo liondaka yiwa ya Suku.” (Va Roma 15:16) Paulu poku sonehela Akristão voko Korindo, wa tukula upange waye woku kunda ‘ndukuasi.’ (2 Va Korindo 4:1, 7) Lekuatiso liupange wetu woku kunda tu “sapula olondaka viovitumasuku.” (1 Petulu 4:11) Ci kale okuti, tuatiamẽla kocisoko colombuavekua, ale tulomeme vikuavo, esumũlũho lietu lioku kunda olondaka viwa, tu sukila oku li tenda okuti li kola.
“Tu Suisipo Oku Kola Kuetu Loku Sumbila Suku”
16. Nye ci tu kuatisa oku yuvula oku ‘tomba ovina vi kola’?
16 Upostolo Paulu wa lungula Akristão oco va yuvule oku ‘tomba ovina vi kola.’ Eye wa va vetiya oku ‘sandiliya oku kola’ loku ‘lavulula’ “sanga olumbombo lumue lu koka oku lula lu yova, kuenje lu tatamisa okuti, va lua va li vĩhĩsa laluo.” (Va Heveru 12:14-16) Ondaka “olumbombo lumue lu koka oku lula,” yi lomboloka Akristão vamue va siata oku liosiõsiõla omo liovina vimue vi lingiwa vekongelo. Ovo ka va tava kovisimĩlo via Yehova vioku tenda olohuela okuti, vi kola. Kuenda ka va yongola oku liyelisa kovituwa via vĩha. (1 Va Tesalonike 4:3-7; Va Heveru 13:4) Akristão vaco, va siata oku kuama ‘olombangulo vioku tomba Suku,’ vi vanguiwa lomanu vana “va pambuka kondaka yocili.”—2 Timoteo 2:16-18.
17. Momo lie olombuavekua vi sukilila oku kuama ongangu ya Yehova yoku kola kovina viosi viomuenyo wavo?
17 Upostolo Paulu poku sonehela vamanjaye olombuavekua, wa popia hati: “Avakuacisola, . . . tu liyelisi kovina viosi vi vĩhĩsa etimba levi vi vĩhĩsa utima. Tu suisipo okukola kuetu loku sumbila Suku.” (2 Va Korindo 7:1) Olondaka evi vi lekisa okuti, Akristão olombuavekua, va ‘tukuiwila elaleko li kola lia tunda kilu.’ Omo liaco, va sukila oku kuama ongangu ya Yehova yoku kola kovina viosi viomuenyo wavo. (Va Heveru 3:1) Upostolo Petulu, wa vetiyavo Akristão olombuavekua hati: “Kali ndomãla va pokola okuti, ka vu pangisui loloñeyi vĩvi ndeci wa kaili koloneke vionumbi yene. Puãi, ndeci u wo kovongi a kola, lenevo koli kovilinga viene viosi.”—1 Petulu 1:14, 15.
18, 19. (a) “Owiñi wakahandangala” u lekisa ndati okuti wa sumbila ovina vi kola ku Yehova? (b) Vocipama cikuãimo, ovina vipi tuka lilongisa okuti, vi kola Kakristão?
18 Nye ci popiwa catiamẽla ‘kowiñi wakahandangala’ uka puluka ‘kohali ya piãla’? Ovo va sukilavo oku kuama ongangu ya Yehova yoku sumbila ovina vi kola. Kelivulu Liesituluilo va tukuiwa okuti, va kasi oku “vumba” Yehova kocitali conembele yaye yespiritu palo posi. Ovo va kuete ekolelo kocilumba cocisembi ca Yesu, kuenje “olonanga viavo va vi sukula kuenda va vi yelisila vosonde ya Kameme.” (Esituluilo 7:9, 14, 15) Eci ci va ĩha epuluvi lioku talama kovaso a Yehova. Omo liaco, va kuete ocikele ‘coku liyelisa kovina viosi vi vĩhĩsa etimba levi vi vĩhĩsa utima. Va sukilavo oku suisapo okukola kuavo loku sumbila Suku.’
19 Akristão olombuavekua lolomeme vikuavo, va kuete ocikele cikuavo komuenyo wavo. Ocikele caco, oku endaenda kolohongele olonjanja viosi koku fendela Yehova kuenda oku lilongisa Ondaka yaye. Yehova olohongele viomanu vaye, o vi tenda okuti vi kola. Vocipama cikuãimo tuka lilongisa ndomo tu kuata ovisimĩlo via Yehova viatiamẽla koku kola kuovina evi kuenda esunga liaco.
Atosi Oku Pitulula
• Omanu va Yehova va yuvula ovisimĩlo vipi violuali?
• Momo lie Yehova a tukuiwila okuti eye Ono yovina viosi vi kola?
• Tu lekisa ndati okuti tua sumbila oku kola kua Kristu?
• Ovina vipi tu sukila oku tenda okuti vi kola komuenyo wetu?
[Elitalatu kemẽla 23]
Kotembo ya va Isareli, ovitunda, otavernakulu kuenda ovikuata viaco, via tendiwile okuti vi kola
[Elitalatu kemẽla 24]
Akristão olombuavekua palo posi, ovo onembele yi kola
[Elitalatu kemẽla 25]
Olohutililo lupange wetu woku kunda, esumũlũho limue li kola