Momo Lie tu Sukilila Oku Kũlĩha Antikristu?
Upostolo Yoano wa popele hati: “Wa yevi okuti Antikristu iya.” (1 Yoano 2:18) Olondaka evi vi komohĩsa calua. Vokuenda kuanyamo, omanu va siata oku sandiliya elomboloko liolondaka evi. Helie antikristu? Otembo yipi a keya? Nye aka linga eci a keya?
KULI omanu valua va tukuiwa hati, antikristu. Kosimbu, vomanu va tukuiwa hati, “antikristu,” mua kongelele va Yudea, Papa yetavo Liokatolika, kuenda olombiali via va Roma. Umue o tukuiwa hati Frederick II okuti, wa kala kuviali okupisa kunyamo wo 1194 toke wo 1250, eci a likala oku likongela Kuyaki woku teyuila etavo, Papa Gregory IX, wo tukula hati, antikristu. Kuenje wo tundisa vetavo Liokatolika. Noke, ukuavo o tukuiwa hati, Innocent IV okuti eye kapiñala ka Gregory, wa tundisavo Frederick vetavo. Pole, Frederick ka tavele oku tukuiwa hati, antikristu.
Upostolo Yoano vovikanda viaye a soneha, eye lika wa tukula ondaka “antikristu.” Ondaka yaco, povinimbu vimue wa yitiamisila komunu umosi. Pole, povinimbu vikuavo, wa yi tiamisila komanu valua. Ovinimbu vimue Viembimbiliya viatiamẽla kondaka “antikristu,” vi sangiwa pokakasia kakuãi vocipama cilo. Poku konomuisa ovinimbu viaco, tu limbuka okuti, antikristu, o lomboloka omunu umue ohembi. Eye o yongola oku yapula omanu vosi va kuete ukamba la Kristu kuenda la Yehova. Upostolo Yoano wa lungula Akristão hati: “A vakuacisola, ko ka tavi kaspiritu osi, puãi seteki aspiritu nda a Suku nda ndati. Momo ovaprofeto vesanda valua va sandukila voluali.”—1 Yoano 4:1.
Yesu, wa lungulavo eci catiamẽla koku kembiwa lovaprofeto vesanda. Eye wa popia hati: “[Ovo] veya kokuene luwalo wolomeme, puãi vokati kavo va linga ovimbungu vi kukulula. Vu va limbukila kapako avo [ale kovilinga viavo].” (Mateo 7:15, 16) Anga hẽ Yesu wa lungulavo olondonge viaye catiamẽla ku antikristu wocindekaise? Tu konomuisi ndomo tu limbuka unyali waco ukuakukemba omanu.