Antikristu Wa Situluiwa
NYE o sukila oku linga nda wa limbuka okuti, uvei umue wa sambukila vimbo liene? O sukila oku nyua ovihemba kuenda oku yuvula oku litenga lomanu va kuatiwa luvei waco. Cimuamue haico tu sukila oku linga konepa yespiritu. Embimbiliya li tu sapuila okuti, antikristu, o “kasi ale voluali.” (1 Yoano 4:3) Oco ka tuka yapuisiwe la antikristu, tu sukila oku u kũlĩha kuenda oku u yuvula. Embimbilia li tu ĩha olonumbi vi tu kuatisa kondaka eyi.
Ondaka “antikristu,” yi lomboloka oku ‘likala Kristu.’ Ondaka yaco, yi tiamisiwilavo ku vana va kemba loku litukula hati ovo Kristu, ale va popia hati, olonumiwa viaye. Yesu wa popia hati: “U ka kasi lame o matãla, kuenje u ka kongela kumue lame o sandola.”—Luka 11:23.
Upostolo Yoano ondaka antikristu, wa yi soneha eci papita 60 kanyamo tunde poku fa kua Yesu lepinduko liaye okuti wa enda ale kilu. Tu kuata lika elomboloko liovilinga via antikristu, poku kũlĩha ndomo a siata oku tata olondonge via Yesu palo posi.—Mateo 25:40, 45.
Antikristu o Lomboloka Vana ka va Sole Akristão
Yesu wa lungula olondonge viaye okuti vika suvukiwa loluali. Eye wa popia hati: “[Omanu] vo pakuili kohali kuenje vo wipayi. Vu suvukilua onduko yange lolofeka viosi. Ku ka tuka ovaprofeto vesanda va lua, kuenje va konyuisa va lua.”—Mateo 24:9, 11.
Omanu vana ‘va suvuka’ olondonge via Yesu omo lionduko yaye va tukuiwa hati, antikristu. “Ovaprofeto vesanda” okuti omanu vana va kala Akristão, va tukuiwavo hati, antikristu. (2 Yoano 7) Yoano wa popia hati: “Va antikristu va lua . . . va tunda pokati ketu puãi ka va kaile vetu, momo, nda va kaile vetu, nda va tumãlale letu.”—1 Yoano 2:18, 19.
Olondaka via Yesu levi via Yoano, vi lekisa okuti, antikristu hamunuko umosi. Pole, vondaka yaco mua kongela omanu valua. Omo okuti omanu vaco ovo ovaprofeto vesanda, onjongole yavo oku kemba vakuetavo. Olonjila vipi va siata oku kuama vioku kemba omanu?
Oku Sandekiwa Kuhembi Watavo
Upostolo Paulu wa lungula ekamba liaye Timoteo oco a lunguke la vana va siapo etavo liocili ndeci, Humeneo la Filetu. Momo, “olombangulo viavo vi takĩla ndepute liosembuembue.” Noke wamisako hati: “Ovo va pambuka vondaka yocili, momo va linga vati, epinduko lia pita ale. Va kasi loku nyõla ekolelo lia vamue.” (2 Timoteo 2:16-18) Humeneo la Filetu, va enda oku longisa okuti epinduko, upopi umue wocindekaise. Kuenda Akristão va pinduiwa ale konepa yespiritu. Pole, ku Yehova, omunu o kuata lika omuenyo eci a linga ondonge ya Kristu ndomo Paulu a ci lombolola. (Va Efeso 2:1-5) Elongiso lia Humeneo la Filetu, li patãla ohuminyo ya Yesu yoku pindula ava va fa, lina lika lingiwa kotembo Yuviali wa Suku.—Yoano 5:28, 29.
Vokuenda kuotembo ocisimĩlo coku popia hati epinduko li lomboloka upopi wocindekaise, lieya oku sandekiwa locisoko comanu vamue ka va tava okuti kuli Suku. Elongiso liaco lia vetiyiwavo la vana va tunda vekongelo Liakristão vocili kuenda Vakuoloño woluali. Ovo va enda oku popia okuti ovina viosi vi kasi voluali, via vĩha. Omo liaco, Yesu keyilile palo posi letimba liositu pole wa limolehisa ño ndomunu. Ovina evi, ovio Akristão va sukila oku yuvula ndomo upostolo Yoano a ci popia.—1 Yoano 4:2, 3; 2 Yoano 7.
Handi vali, va luvikiyavo elongiso lia Suku umosi Muvatatu. Elongiso liaco, li lekisa okuti, Yesu o kuetevo Unene Wavelapo ndowu wa Suku, kuenda haeye Omõla wa Suku. Ndotolo Alvan Lamson, wa popia hati: ‘Elongiso lia Suku umosi Muvatatu, ka lia kũlĩhĩwile la va Yudea kuenda ka li sangiwa Vovisonehua vi Kola. Noke elongiso liaco lia lisanduila kolonepa viosi. Kuenda lia iñila vocisoko Cakristão lekuatiso liocisoko cimue ci tukuiwa hati, Pais Platônicos. Oco hẽ, velie va tiamẽlele vocisoko caco? Ava vatiamẽlele kocisoko caco, omanu vana va siapo efendelo liocili okuti va kuamẽle elongiso lionoño yimue yoko Helasi o tukuiwa hati, Plato.
Elongiso lia Suku umosi Muvatatu, lia sandekiwa la umue antikristu. Kuenje, lia sitika ocili catiamẽla ku Suku lukamba ukasi pokati kaye Lomõlaye. Momo li lekisa okuti, Suku omunu umue wocindekaise. (Yoano 14:28; 15:10; Va Kolosai 1:15) Nda Suku omunu umue wocindekaise, tu kuata ndati ukamba laye ndeci Embimbiliya li tu vetiya?—Tiago 4:8.
Ocili okuti, vovisonehua viosimbu, onduko ya Suku yi sangiwamo ci soka 7.000 kolonjanja. Pole, vamue va soneha Embimbiliya valimi akuavo, onduko yaco va yupamo. Kuenje, eci ca vokiya atatahãi pokati komanu. Oku tenda Suku Ukuonene Wosi ndomunu umue wocindekaise haeye ka kuete onduko, ci lekisa etombo Kululiki wetu kuenda Kondaka yaye. (Esituluilo 22:18, 19) Oku piñanya onduko yi kola lolondaka viokuti, Ñala ale Suku, ceca etombo kohutililo ya Yesu eci a popia hati: “Onduko yove yi sumbiwe.”—Mateo 6:9.
Va Antikristu ka va Tava Kusoma wa Suku
‘Koloneke vilo via sulako,’ va antikristu, va livokiya calua. (2 Timoteo 3:1) Ovo va yongola oku kemba omanu oco ka vaka tave okuti Yesu eye Osoma Yuviali wa Suku wokilu, una uka viala oluali luosi.—Daniele 7:13, 14; Esituluilo 11:15.
Asongui vamue vakuatavo, va siata oku longisa okuti, Usoma wa Suku, u lomboloka ekalo liutima womunu. Pole, elongiso liaco ka li sangiwa Vembimbiliya. (Daniele 2:44) Vakuavo, va siatavo oku popia hati, Yesu o lingila upange waye vonduko yolombiali viomanu kuenda vovisoko vikuavo. Pole, Yesu wa popia hati: “Usoma wange . . . hawokilulieveko.” (Yoano 18:36) Satana eye “ombiali yoluali lulo,” haeye “osuku yoluali lulo.” (Yoano 14:30; 2 Va Korindo 4:4) Eli olio esunga lieci Yesu aka kunduila olombiali viosi viomanu, kuenje, oka Viala oluali luosi. (Osamo 2:2, 6-9; Esituluilo 19:11-21) Omanu va siata oku likutilila usoma waco oco wiye palo posi poku pitulula olondaka via Yesu wa popia hati: “Usoma wove wiye. Ocipango cove ci lingiwe posi.”—Mateo 6:10.
Omo okuti asongui vatavo va litenga vopulitika yoluali lulo, va siata oku lambalala vana va kunda Usoma wa Suku. Elivulu Liesituluilo, li tukula ‘Ombavulono Yinene’ ndukãi umue wocipuepue okuti, “wa kolua osonde yolosandu losonde yolombangi via Yesu.” (Esituluilo 17:4-6) Ukãi waco, o kasi oku lingavo upuepue kespiritu, omo lioku kuatisa “olombiali” violuali lulo oco a soliwe lavo. Ukãi wa tukuiwa ndeti, o lomboloka atavo esanda a sangiwa voluali. Ukãi waco, eye onepa yinene ya antikristu.—Esituluilo 18:2, 3; Tiago 4:4.
Atũi va Antikristu Ayua
Kuli omanu valua va litukula hati Akristão pole, va likala ocili Cembimbiliya, kuenda ka va pokola kolonumbi viekalo. Embimbiliya lia popele hati: “Kuiya oloneke okuti omanu ka va tava kokulongisa kuocili, puãi, omo vakasi lovatũi a yua, oco va liongoluila alongisi ndovipango viavo.” (2 Timoteo 4:3) Omanu vaco va litukula ndeti hati alongisi vocili, va tukuiwavo hati, “ovapostolo vesanda, haivo olondingupange vie yuka elimbi, kuenje va liluvikiya ndovapostolo va Kristu.” Embimbiliya li popiavo hati: “Efulilo liavo li soka lovilinga viavo.”—2 Va Korindo 11:13-15.
Vovilinga vĩvi viomanu vaco, mua kongela ‘upuepue’ okuti u lekisa etombo kolonumbi via Yehova. (2 Petulu 2:1-3, 12-14) Koloneke vilo, ovituwa vina vi pisiwa Lembimbiliya ndeci: Alume va lipekela lalume, kuenda ukahokolo, via livokiya calua pokati kasongui vetavo kuenda komanu vavo. Vakuavo ndaño okuti ka va lingi ovina viaco, pole va vi ecelela pokati kavo. Omo liaco, sokisa ovisimĩlo viomanu kuenda ovituwa viavo leci Embimbiliya li longisa ndomo ca lekisiwa kelivulu Liovisila 18:22; Va Roma 1:26, 27; 1 Va Korindo 6:9, 10; Va Heveru 13:4; kuenda Yuda 7.
‘Seteki Alongiso’ Aco
Omo liovina tua konomuisa ndeti, tu sukila oku pokola kolondaka viupostolo Yoano okuti ka tu sepula ovina tua siata oku lilongisa. Eye wa popia hati: “Ko ka tavi kaspiritu [ale kalongiso] osi, puãi seteki aspiritu nda a Suku nda ndati. Momo ovaprofeto vesanda va lua va sandukila voluali.”—1 Yoano 4:1.
Kuama ongangu yomanu volupale luo Berea, va kala vakuavitima via sunguluka. Ovo “va yeva ondaka lombili kuenda, oloneke viosi, va tanga tanga ovisonehua oku kũlĩhĩsa nda hẽ ovina viaco viocili nda ndati.” (Ovilinga 17:10, 11) Omo lionjongole yavo yoku lilongisa ocili, va enda oku konomuisa olondaka va yeva levi va lilongisa loku kũlĩhĩsa nda, vi kuete uvangi Wovisonehua.
Koloneke vilo, Akristão vocili ka va tava oku yapuisiwa lovisimĩlo viomanu. Pole, va konomuisa eci Embimbiliya li longisa. Upostolo Paulu wa popia hati: “Eci ndi likutilila ceci okuti, ocisola cene ci lue, lokulua kuaco kuendele pamosi lukũlĩhĩso luloño wosi.”—Va Filipoi 1:9.
Nda kua fetikile handi oku ci linga, likolisilako oku konomuisa eci Embimbiliya lilongisa, oco o kuate ‘ukũlĩhĩso luloño.’ Vana va kuãi ongangu yomanu voko Berea, ka va kembiwa “lolondaka viuhembi” wa va antikristu. (2 Petulu 2:3) Ovo, va yovuiwa locili catiamẽla ku Kristu kuenda kolondonge viaye.—Yoano 8:32, 36.
[Okakasia Lelitalatu kemẽla 4]
CECI EMBIMBILIYA LI POPIA CATIAMẼLA KU ANTIKRISTU
Upostolo Yoano wa popia hati: “Amãla, vilo ovio oloneke viefulilo. Ndeci wa yevi okuti antikristu iya, haico ci kasi, kuenje va antikristu va lua veya ale.” —1 Yoano 2:18.
“Ohembi helie, te u wa likala hati, Yesu hayeko Kristu? U o likala Isia la Mõla, eye muẽle antikristu.” —1 Yoano 2:22.
“Espiritu liosi ka li tava okuti Yesu Kristu weya letimba olio halia Sukuko, puãi lia antikristu. Wa ci yevi okuti liya, cilo puãi li kasi ale voluali.” —1 Yoano 4:3.
“Olondimbiki via lua via sandukila voluali. Ka vi tava okuti Yesu Kristu weya letimba. Omunu o longisa ndomo eye ondimbiki, haeye antikristu.” —2 Yoano 7.
[Okakasia Lelitalatu kemẽla 5]
OHEMBI YIMUE YI KUETE ATUTU ALUA
Ondaka “antikristu,” yi tiamisiwila komanu vosi ka va pokola kueci Embimbiliya li popia catiamẽla ku Yesu Kristu, kuenda vana va likala Usoma waye. Mua kongelavo vana va sole oku lambalala olondonge via Kristu. Handi vali, mu antikristu, mua kongelavo vana va litukula hati, olonumiwa via Kristu ale va litukula hati, ovo Mesiya. Kuenje va likuminya oku eca ombembua lekalo liwa, lina okuti Yesu eye lika o kuete unene woku li nena.
[Ono Yelitalatu]
Augustine: ©SuperStock/age fotostock
[Elitalatu kemẽla 7]
Tu sukila oku konomuisa Ovisonehua oloneke viosi ndeci omanu voko Berea va linga