“Eteke Linene Lia Yehova Li Kasi Ocipepi”
“Eteke linene lia Yehova li kasi ocipepi; li li oci pepi muẽle, li yayulako.”—SOFONIYA 1:14.
1, 2. (a) Eteke lipi lia velapo Akristão va kasi oku lavoka? (b) Apulilo api tu sukila oku linga kuenda momo lie?
U FEKO umue, o lavoka lesanju eteke liuvala waye. Ukãi umue omisi, o lavoka lesanju oku citiwa kuoñaña yaye. Onalavayi yimue ya kava, yi kevelela eteke oloneke viaye viepuyuko kupange vi fetika. Onjongole yipi yimuamue omanu ava vakuete? Ovo va lavoka eteke limue li kuete esilivilo komuenyo wavo. Ndaño okuti va kuete esanju lia piãla, pole elavoko liavo lia litepa. Ovo va sukila oku lipongiya osimbu va lavoka eteke liaco.
2 Koloneke vilo, Akristão vocili, va kasi oku lavoka okuiya kueteke limue lia velapo. Olio, li tukuiwa hati, ‘eteke linene lia Yehova.’ (Isaya 13:9; Yoeli 2:1; 2 Petulu 3:12) Okuiya ‘kueteke lia Yehova’ ku lomboloka nye kuenda kuka pongolola ndati ekalo liomanu? Tu lekisa ndati okuti tua liangiliyila okuiya kueteke liaco? Tu sukila oku kuata etambululo cilo. Momo ovolandu alekisa oku tẽlisiwa Kuembimbiliya li popia hati: “Eteke linene lia Yehova li kasi ocipepi; li li ocipepi muẽle, li yayulako.”—Sofoniya 1:14.
“Eteke Linene Lia Yehova”
3. “Eteke linene lia Yehova” li lomboloka nye?
3 “Eteke linene lia Yehova” li lomboloka nye? Embimbiliya li lekisa okuti, ondaka “Eteke lia Yehova,” yi tiamisiwila kotembo Yehova aka kundula ovanyali vaye kuenda oka kemãlisa onduko yaye. Va Yudeya lomanu va kala ko Yerusalãi, kuenda olongangala vioko Bavulono la va Egito, ka va kapeleko olondaka evi omo liekambo liekolelo. Pole, vosi yavo va kunduiwa eci Yehova a nena eyambulo kokuavo. (Isaya 2:1, 10-12; 13:1-6; Yeremiya 46:7-10) Koloneke vilo, tu lavokavo “eteke linene lia Yehova.” Keteke liaco, Suku oka kundula omanu vosi va siata oku pembula onduko yaye. Eteke lia Yehova, lika fetika loku nyoliwa ‘kuo Bavulono Yinene,’ okuti oyo ocisoko catavo esanda voluali luosi. Noke, lika sulila vuyaki wo Harmagedo una uka kundula olondingaĩvi viosi voluali lulo.—Esituluilo 16:14, 16; 17:5, 15-17; 19:11-21.
4. Momo lie omanu va sukilila oku lulumila okuiya kueteke lia Yehova?
4 Ndaño omanu vamue ka va tava okuti eteke liesulilo li kasi ocipepi, pole, va sukila oku lulumila okuiya kueteke liaco. Momo lie? Momo vonduko yuprofeto Sofoniya, Yehova wa popia hati: “Eteke [lia Yehova] eteke lionyeño, eteke liesakalalo lohali, eteke lienyõlẽho lohulunguta, eteke liowelema loluvumbulu, eteke liovalende lowelema wa lua.” Eteke liaco, lika nena esakalalo komanu valua, ndomo uprofeto Sofoniya a ci popia hati: “Ndi nenela omanu vosi esakalalo . . . momo va lueyela Yehova.”—Sofoniya 1:15, 17.
5. Momo lie omanu valua va kuetele esanju liokuiya kueteke lia Yehova?
5 Kuli omanu valua va kasi oku lavoka lesanju okuiya kueteke lia Yehova. Momo lie? Momo va kũlĩha okuti eteke liaco, lika kala liepopelo kuenda lieyovo liolondingesunga. Keteke liaco, onduko ya Suku yika kemanyiwa kuenda yika sumbiwa. (Yoeli 3:16, 17; Sofoniya 3:12-17) Eteke lia Yehova citava okuti li kala liesanju ale liesumuo. Pole, cosi catiamẽla komuenyo omanu va kasi oku ambata cilo. Tu sukila oku tenda ndati okuiya kueteke lia Yehova? Ove hẽ wa lipongiya? Anga hẽ omuenyo o kasi oku ambata cilo, u lekisa okuti wa kapako okuiya kueteke lia Yehova?
“Kuiya Vakuetombo Loku Tomba” Kuavo
6. Onepa yomanu valua va siata oku tenda ndati “eteke lia Yehova,” kuenda momo lie Akristão vocili ka va komohela?
6 Omo liekalo liletiwe koloneke vilo, onepa yalua yomanu ka va kapeleko “eteke lia Yehova” li kasi ocipepi. Momo va siata oku pembula Olombangi via Yehova vi vetiya okuiya kueteke liaco. Ovituwa viomanu vaco, ka vi komohĩsa Akristão vocili. Ovo va ivaluka elungulo liupostolo Petulu wa popia hati: “Tete limbuki okuti, koloneke via sulako, kuiya vakuetombo loku tomba, va enda loloñeyi viavo vietimba, vati: Ohuminyo yetukuluko lia Ñala yi kasi pi? Momo, tunde eteke akulu vetu va pekela [ale va fa], ovina viosi vi kasi ño ndeci via kala tunde kefetikilo lioluali.”—2 Petulu 3:3, 4.
7. Nye ci tu kuatisa oku amamako loku lavulula?
7 Nye ci tu kuatisa oku yuvula ovisimĩlo vĩvi okuti tu amamako loku lavulula? Petulu o tu sapuila hati: “Nda vetiya ovitima viene viocili loku vu wivaluisa, okuti wivaluki olondaka via popia ale ovaprofeto va kola, locihandeleko ca Ñala, haeye Upopeli, cina wa ci popia lovapostolo vene.” (2 Petulu 3:1, 2) Oku pokola kelungulo liovaprofeto, ku tu kuatisa oku amamako loku lavulula. Citava okuti, elungulo liovaprofeto tua siata oku liyeva olonjanja vialua. Pole, yilo oyo otembo tu sukila oku amamako loku pokola kalungulo aco.—Isaya 34:1-4; Luka 21:34-36.
8. Momo lie omanu vamue ka va pokuila kalungulo Embimbiliya?
8 Momo lie omanu vamue ka va pokuila kalungulo Embimbiliya? Upostolo Petulu wamisako loku popia hati: “Ocipango cavo muẽle [ale olonjongole viavo, ] va ivalako okuti, londaka ya Suku, kosiahũlu ilu lia kala ale, kuenje ongongo ya ñualiwa lovava, haiyo ya tunda vokati kovava. Loluali lua kaile koloneke viaco lua nyõliwa lovava kuenje lua taka.” (2 Petulu 3:5, 6) Ocili okuti, ovo ka va tava kokuiya kueteke lia Yehova. Ovo, ka va yongola okuti, kuiya cimue ci va tateka oku amamako lovopange avo. Kuenda ka va yongolavo oku sombisiwa la Yehova omo liomuenyo vambata. Ndomo Petulu a ci popia, omanu vaco va yongola lika oku tẽlisa “ocipango cavo muẽle.”
9. Omanu vo koloneke via Noha kuenda via Lote, va lekisile ovituwa vipi?
9 Omo liolonjongole viavo vĩvi, vakuetombo ka va tava kondaka yokuti, Yehova wa kundula omanu kosimbu. Yesu kumue lupostolo Petulu, va tukula ovilunga vivali via pita ‘koloneke via Noha kuenda via Lote.’ (Luka 17:26-30; 2 Petulu 2:5-9) Osimbu handi Etande ka lieyile, omanu ka va tavele kelungulo lia Noha. Eci Lote a kala oku lungula catiamẽla koku lunduiwa kuolupale luo Sodoma kuenda luo Gomora, ‘olondatembo viaye via simĩle okuti, wa kala oku sevula lavo.’—Efetikilo 19:14.
10. Nye Yehova aka linga lomanu vana ka va pokola kalungulo aye?
10 Koloneke vilo, omanu va kuetevo ovituwa viaco. Pole, tu kũlĩhĩsi olondaka Yehova a sapuila omanu vana ka va kapeleko elungulo liaye. Eye wa popia hati: “Njambula ava va tumãla ño konasi yavo, vana va likundakunda lovitima viavo vati: Yehova ka lingi ciwa, cĩvi ka ci lingivo. Oco ipako viavo vi pundiwa, lolonjo viavo vi linga ovingululu. Ndaño va tunga olonjo ka va kalamo. Va tuika oviumbo viayuva, puãi ka va nyui kovinyu yaco.” (Sofoniya 1:12, 13) Koloneke vilo, omanu va sakalala lika lupange wavo. Pole, upange waco, ka uka va ĩha ekuatiso ka li pui. Momo lie? Momo eteke lia Yehova lika va kuata ocipikipiki, kuenje, ovokuasi va seleka, ka aka va popela.—Sofoniya 1:18.
‘Amamako Loku Talamẽla’
11. Elungulo lipi tu sukila oku ivaluka?
11 Omo okuti tua litepa lomanu voluali, tu sukila oku pokola kelungulo liuprofeto Havakuki wa popia hati: “Ocitumasuku eci ci kuete muẽle otembo yaco. Ci yayula oku lingiwa. Ka ci kembi. Ndaño ci tutuvala, ove o ci talamẽla. Ciya muẽle, ka ci cilua.” (Havakuki 2:3) Omo okuti ka tualipuile, pamue tu sima okuti, eteke lia Yehova ka li kasi okuiya lonjanga. Pole, tu sukila oku ivaluka okuti, Yehova ka cilua oku tẽlisa olohuminyo viaye. Eteke liaye li keya votembo yina omanu ka va simĩle.—Marko 13:33; 2 Petulu 3:9, 10.
12. Elungulo lipi Yesu a eca kuenda lia litepa ndati locituwa colondonge viaye?
12 Yesu poku vetiya esilivilo lioku lavoka eteke lia Yehova, wa popia hati, citava okuti vamue pokati kolondonge viaye, va liwekapo oku lavulula. Noke, wa popia eci catiamẽla kokuavo hati: “Nda ukuenje waco ka sungulukile, kuenje o likunda lutima waye, hati, cime cange keya ndopo, kuenje o fetika oku tipula akuenje vakuavo, loku lia kuenda oku nyuila kumue loloholua, cime cukuenje waco iya eteke ukuenje ko lavoka, lekumbi ka kũlĩhĩle. Oco cime caye u yambula.” (Mateo 24:48-51) Pole, vamanji vatiamẽla kocisoko cukuenje wa lunguka, va kasi oku amamako loku lavulula koloneke vilo, kuenda va lipongiya. Yesu wa eca kokuavo ocikele coku tata “vakuanjo yaye vosi” va kasi palo posi.—Mateo 24:42-47.
Tu Sukila Oku Lavulula
13. Yesu wa vetiya ndati eci catiamẽla koku lavulula?
13 Akristão vo kocita catete, va sukilile oku lavulula. Ovo, va sukilile oku tila lonjanga vo Yerusalãi eci va limbuka okuti, “ya ñualĩwa lovita.” (Luka 21:20, 21) Ocitangi caco, ca pita kunyamo wa 66. Kũlĩhĩsa ndomo Yesu a vetiya Akristão oku lavulula poku va sapuila hati: “U o kasi kilu lionjo ka ka loke kopi ovina vi kasi vonjo; u o kasi vepia ka ka tiukile ha kopa ocilisikĩlilo [ale uwalo] waye.” (Mateo 24:17, 18) Ovolandu a lekisa okuti, o Yerusalãi noke yoku ñualiwa ocingonja, kueya oku pita anyamo akuãla. Kunyamo wa 66, momo lie Akristão va sukilile oku pokola kolondaka via Yesu vioku lavulula?
14, 15. Momo lie Akristão vo kocita catete va sukilile oku tila eci o Yerusalãi ya ñualiwa lolohoka?
14 Ocili okuti, asualali voko Roma ka va nyolele o Yerusalãi vokuenda kuanyamo akuãla. Pole, ka ci lomboloka okuti, omanu va kuatele ombembua. Momo otembo yaco, ya kala yungangala. Ulume umue onoño, wa popia hati, vokuenda kuotembo yaco vo Yerusalãi ‘mua pita uyaki wa ponda omanu valua kuenda ungangala.’ Akuenje va enda oku kuatiwa oco va tambule olonumbi viusualali kuenda oku teyuila ofeka oloneke viosi. Vana okuti ka va yonguile oku tiamẽla kovisoko viaco, va enda oku tendiwa ndolomakuli. Omo liaco, nda umue Ukristão wa sialele volupale, nda wa liyaka lovitangi vialua.—Mateo 26:52; Marko 12:17.
15 Ocili okuti, Yesu wa lunguile omanu voko Yudea lava voko Yerusalãi oco va fetike oku tila. Elungulo liaco, lia kuatele esilivilo. Momo, noke liolosãi vimue, olohoka via va Roma, vieya oku tiuka vali oco va tẽlise onjongole yavo. Kunyamo wa 67, va ñuala ocingonja o Galilea, noke, kunyamo ukuavo, va ñualavo ocingonja o Yudea. Ekalo liaco, lia nena ohali yalua luhukũi vofeka. Kuenje, ka ca lelukile umue u Yudea oku tila vo Yerusalãi. Polombundi violupale pa kala olondavululi. Omo liaco, omunu wosi wa yonguile oku tila, va enda oku u lundila hati, wa siapo va Yudea oco a kuatise va Roma.
16. Nye Akristão vo kocita catete va sukilile oku linga oco va puluke kovitangi?
16 Ovolandu a tukuiwa ndeti, a lekisa esunga lieci Yesu a vetiyila oku kuata ocituwa coku lavulula. Akristão va sukilile oku lunguka oco ka vaka tiamisile ovitima viavo kovokuasi. Ovo va sukililevo oku ‘siapo ovikuata viavo viosi’ oco va pokole kelungulo lia Yesu. (Luka 14:33) Olondonge vina via pokuile kelungulo lioku tilila kesinya liolui Yordão, via popeliwa.
Tu Amamiko Loku Lavulula
17. Momo lie tu sukilila oku amamako loku lavulula?
17 Ovitumasuku Viembimbiliya vi lekisa okuti, tu kasi kotembo yesulilo lioluali lulo. Yilo oyo otembo yoku lavulula okuti kosimbu ci sule. Ocili okuti, eci olombiali vi tumbika ombembua vofeka, pamue esualali ka li simi okuti kuiya vali uyaki. Pole, nda ka lia lavuluile, eci vo vilikiya lonjanga oco a ende kuyaki, ka tẽlisa ocikele caye. Momo ka lipongiyile, kuenje o pita lovitangi. Cimuamue haico ci pondola oku pita letu konepa yespiritu. Nda ka tua lavuluile, ka tu tẽla oku liteyuila kalambalalo. Kuenje, eci eteke lia Yehova liya, li tu sanga okuti ka tua lipongiyile. (Luka 21:36; 1 Va Tesalonike 5:4) Omo liaco, nda umue ‘wa liwekapo oku kuama Yehova,’ yilo oyo otembo yoku u sandiliya vali.—Sofoniya 1:3-6; 2 Va Tesalonike 1:8, 9.
18, 19. Nye ci tu kuatisa oku kapako okuiya ‘kueteke lia Yehova’?
18 Upostolo Petulu, o kuete esunga lioku tu lungula oco tu amameko loku lavoka ‘eteke linene lia Yehova.’ Tu ci linga ndati? Tu ci linga poku pitisa kovaso ovina vi kola kuenda oku sumbila Suku. (2 Petulu 3:11, 12) Oku litumbika kupange wa Yehova, ku kuatisa oku lavoka lekolelo okuiya kueteke Liaye. Ondaka, ‘oku lavoka,’ kelimi lio Helasi, yi lomboloka oku kuata ‘ocituwa coku lavulula.’ Etu ka tu tẽla oku yayuisa otembo oco tu pitile lonjanga keteke Yehova aka nena esulilo lioluali lulo. Pole, nda tua kuata ombili kupange Waye, tuka limbuka okuti otembo yi pita lonjanga.—1 Va Korindo 15:58.
19 Oku sokolola olonumbi vi sangiwa Vondaka ya Suku, ci pamisa ekolelo lietu lioku lavoka eteke lia Yehova. (2 Petulu 3:12) Volonumbi viaco, ka mua kongelele lika ovitumasuku viatiamẽla kokuiya kueteke lia Yehova. Pole, mua kongelavo asumũlũho aka eciwa komanu vana va kasi oku talamẽla okuiya kueteke lia Yehova.—Sofoniya 3:8.
20. Elungulo lipi tu sukila oku pokola?
20 Yilo oyo otembo tu sukila oku pokola kelungulo lia eciwa kuprofeto Sofoniya wa popia hati: “Osimbu kuambatiwile ndovisaikiti vi enda lofela; osimbu onyeño ya Yehova ka ya ku wilile, osimbu eteke lionyeño ya Yehova ka lieyile kokuove. Sandi Yehova, ene ambombe vofeka, haene wukuakulinga [ale ukuakupokola] kovihandeleko viaye. Sandi esunga lokuomboka. Mbi wu wundisiwi keteke lionyeño ya Yehova.”—Sofoniya 2:2, 3.
21. Omanu va Suku va nõlapo oku linga nye vokuenda kunyamo ulo wo 2007?
21 Omo liovina tua konomuisa vocipama cilo, kua nõliwa ocipama Cembimbiliya cunyamo ulo wo 2007, ci popia hati: “Eteke linene lia Yehova li kasi ocipepi.” Omanu va Yehova, va kũlĩha okuti, eteke liaco ‘li kasi ocipepi kuenda li yayulako.’ (Sofoniya 1:14) Eteke liaco ‘ka li cilua.’ (Havakuki 2:3) Osimbu tu lavoka okuiya kueteke lia Yehova, tu amamiko loku lavulula. Nda tua ci linga, tuka limbuka okuti, ocitumasuku caco ndopo ci tẽlisiwa.
Otambulula Ndati?
• “Eteke linene lia Yehova” li lomboloka nye?
• Momo lie omanu vamue ka va kuetele ocituwa coku lavulula?
• Momo lie Akristão vo kocita catete va sukilile oku lavulula?
• Tu lekisa ndati ocituwa coku lavulula?
[Elitalatu kemẽla 12]
Ocipama Cembimbiliya cunyamo ulo wo 2007 ci popia hati: “Eteke linene lia Yehova li kasi ocipepi.”—Sofoniya 1:14.
[Elitalatu kemẽla 9]
Omanu vosi vakuetombo, Yehova oka va kundula ocipikipiki ndeci ca pita koloneke via Noha
[Elitalatu kemẽla 10]
Akristão va tunda lonjanga vo Yerusalãi eci va limbuka okuti ya ‘ñualiwa lolohoka’