Anga hẽ wa Kolela Kelavoko Liepinduko?

“Kuli epinduko.”​—⁠OVILINGA 24:⁠15.

1. Momo lie okuti lomue o puluka kolofa?

KUNYAMO wo 1789, onoño yimue kofeka yo Amerika o tukuiwa hati, Benjamin Franklin, wa popia hati: ‘Voluali lulo, ka muli lacimue ci tẽlisiwa. Pole, oku fa loku feta elisimu, ovio lika vi tẽlisiwa.’ Olondaka evi via siata oku komõhisa omanu valua. Ocili okuti, omanu vana vakuesino, ka va siatele oku feta elisimu. Pole, lomue o puluka kolofa. Handi vali, olofa ka vi ponyi. Momo viya muẽle, kuenda lomue o tẽla oku vi tila. Omo okuti, Konjembo kaku yuka, toke cilo olofa vi kasi oku ambata omanu vana tu sole. (Olosapo 27:​20) Omo liaco, tu kũlĩhĩsi olondaka vimue vi lembeleka.

2, 3. (a) Momo lie vamue va kuetele ekolelo liokuti ka vaka fa? (b) Nye tu konomuisa vocipama cilo?

² Ondaka ya Yehova yi tu sapuila okuti, ava va fa vaka pinduiwa. Pole, elavoko liaco, hanjoiko. Momo voluali ka muli omunu o kuete unene woku tateka ocipango ca Yehova. Koloneke vilo, omanu valua ka va kũlĩhĩle okuti kuli omanu vamue vaka puluka kolofa. Momo lie tu tavela okuti, kuli vamue vaka puluka kolofa? Momo ‘owiñi umue wakahandangala okuti lomue o tẽla oku u tenda, uka puluka kohali ya piãla.’ (Esituluilo 7:​9, 10, 14) Ovo vaka kala otembo ka yi pui. Omo liaco, ka vaka pita volofa. Kuenje, “unyali o sulako oku imũha kufa.”​—⁠1 Va  Korindo 15:⁠26.

³ Catiamẽla kelavoko liepinduko, tu sukila oku kuata ekolelo ndeli upostolo Paulu a kuata eci a popia hati: “Kuli epinduko lia vakuesunga lava havakuesungako.” (Ovil. 24:​15) Tu konomuisi atosi atatu atiamẽla kepinduko. Etosi liatete tu kũlĩhĩsa lieli: Nye ci kuatisa oku tẽlisiwa kuelavoko liepinduko? Liavali: O sanga ndati elembeleko kelavoko liepinduko? Elavoko liaco, li ku kuatisa ndati oku ambata omuenyo wa sunguluka cilo?

Elavoko Liepinduko Lika Tẽlisiwa

4. Momo lie epinduko li kuetele esilivilo lia velelapo vocipango ca Yehova?

⁴ Kuli ovina vialua vi eca uvangi wokuti elavoko liepinduko lika tẽlisiwa. Epinduko olio lia velapo vocipango ca Yehova. Ivaluka okuti, Satana wa tuala omanu kekandu lina lia nena olofa kokuavo. Yesu poku lombolola catiamẽla ku Satana, wa popia hati: “Eye omondi tunde kefetikilo.” (Yoano 8:​44) Pole, Yehova wa likuminyile okuti, “ukãi” ale ocisoko caye cokilu, oka kuata “ombuto” yina yika sasõla utue wa Satana “onyõha yosiahũlu” okuti, ka kalako vali. (Efetikilo 3:​1-6, 15; Esituluilo 12:​9, 10; 20:​10) Osimbu Yehova amamako oku situlula ocipango caye oku kongelamo Ocikoti ca Mesiya, wa lekisa okuti, Mesiya kaka nyõla lika Satana. Ondaka ya Suku yi popia hati: “Oco Omõla a Suku a tukulukila okuti o nyõla ovilinga Vieliapu.” (1 Yoano 3:⁠8) Olofa via tunda kekandu tua piñala ku Adama, via kongeliwa pokati kovilinga vinene via Satana vina Yehova a yongola oku kundula vonduko ya Yesu Kristu. Omo liaco, ocilumba cocisembi ca Yesu kuenda epinduko liaye, vi kuete esilivilo liavelapo.​—⁠Ovilinga 2:​22-24; Va Roma 6:⁠23.

5. Epinduko lika kemãlisa ndati onduko ya Yehova?

⁵ Yehova wa nõlapo oku kemãlisa onduko yaye. Satana wa siata oku vĩhisa onduko ya Suku kuenda oku sandeka uhembi. Eye omo lioku popia uhembi, wa sapuila Adama la Eva okuti, nda va lia kepako Suku a va handeleka okuti ka citava oku liako, ‘ka va fi.’ (Efetikilo 2:​16, 17; 3:⁠4) Omo liaco, tunde kotembo yaco toke cilo, Satana wa siata oku sandeka uhembi walua ndeci, elongiso liokuti, eci omunu a fa vetimba liaye mu tunda ocilelembia ka ci fi. Pole, Yehova oka situlula uhembi waco lekuatiso liepinduko. Kuenje oka lekisa okuti, eye lika o kuete epondolo lioku Tumbulula omuenyo womanu kuenda oku va tata locisola.

6, 7. Yehova o tenda ndati oku pindula omanu va fa, kuenda tua kũlĩha ndati ocikembe caye?

⁶ Yehova oyongola oku pindula ava va fa. Catiamẽla kondaka eyi, Embimbiliya li lombolola ciwa ocikembe ca Yehova. Kũlĩhĩsa olondaka viomunu umue wa Yehova o tukuiwa hati, Yovi. Eye wa popia hati: “Omunu nda o fa o kala vali lomuenyo? Momo nda oco nda nda talamela ño oloneke viosi viomuenyo wange toke mbilikiyiwa, kuenje nda wa mbilikiya, [ndi ku] kumbulula. Nda oco ove [o] kuatela upange wovaka ove ongeva.” (Yovi 14:​14, 15) Olondaka evi vi lomboloka nye?

⁷ Yovi wa kũlĩhĩle okuti noke yoku fa, o kala otembo yimue veyambo. Otembo yaco yoku kala veyambo, wa yi tendele ndupange wa tĩla. Pole, wa kuatele ekolelo liokuti, epinduko lika tẽlisiwa. Momo lie? Momo wa kũlĩhĩle okuti, Yehova ukuacikembe kuenda o kuete ‘ongeva’ yoku mola vali ukuenje waye. Omo liaco, oka pindula omanu vosi vakuesunga. Kuenje, oka ecavo komanu vosi epuluvi lioku kala otembo ka yi pui Voluali Luokaliye palo posi. (Luka 23:43; Yoano 5:​28, 29) Omo okuti eci oco ocipango ca Suku, helie o tẽla oku ci tateka?

8. Yehova ‘wa eca ndati uvangi’ woku pamisa elavoko lietu lio kovaso?

⁸ Epinduko lia Yesu, lia eca elavoko kokuetu. Upostolo Paulu eci a linga ohundo yimue ko Atenai, wa popia hati: “[Suku] wa tukula eteke lioku tetuluila oluali lesunga, kuenje wa nõla ale ulume o linga onganji yaco. Poku pindula ulume waco ku vakualufa opo a lekisila komanu vosi okuti, ondaka yaye yocili.” (Ovilinga 17:​31) Omanu vamue eci va yeva ondaka yatiamẽla kepinduko, va yi sepula. Pole, vakuavo va tava kondaka yaco. Citava okuti, pamue ondaka yaco ya vetiya ovitima viavo. Eci Yehova a pindula Yesu, wa linga ocikomo cinene. Momo wo pindula okuti, ka kuata vali etimba liositu, pole, o kuata etimba liespiritu. (1 Petulu 3:​18) Eci Yesu a pinduka wa kuata unene walua okuti, una a kuatele osimbu handi ka citiwile palo posi u sule. Eye ka fi vali, kuenda noke lia Yehova, eye omunu wavali o kuete unene kilu. Cilo, o kuete epondolo lioku tẽlisa ocikele a tambula ku Isiaye. Vonduko ya Yesu, Yehova oka pindula omanu vakuavo vaka kuata omuenyo kilu kuenda ava vaka kuata omuenyo palo posi. Yesu wa popia hati: “Ame ndipinduko haime ndimuenyo.” (Yoano 5:25; 11:​25) Yehova eci a pindula Omõlaye, wa eca elavoko komanu vosi vo vumba.

9. Ovolandu Embimbiliya a lekisa ndati okuti, epinduko lika tẽlisiwa muẽle?

⁹ Epinduko lia lingiwila kovaso omanu valua, kuenda lia sonehĩwa Vondaka ya Suku. Ulandu Wembimbiliya u lombolola apinduko ecelãla a lingiwa kosimbu mulo voluali. Ovikomo viaco, ka via lingiwile vuyombeki, pole, via lingiwila kovaso omanu valua. Yesu wa pindula Lasaru una okuti, tunde eci a kendiwile papitile ale oloneke vikuãla. Epata liaye kuenda akamba, lomanu vakuavo, va mola epinduko liaco. Uvangi wokuti, Yesu wa tumiwile la Yehova, wa muiwa lomanu vosi. Ovitunda vietavo liesanda vina via kala ovanyali vaye, ka va kuatelevo atatahãi atiamẽla kovikomo viaco. Noke va fetika oku sandiliya onjila yoku ponda Yesu kuenda Lasaru. (Yoano 11:​17-44, 53; 12:​9-​11) Omo liaco, tu sukila oku kuata ekolelo liokuti, epinduko lika tẽlisiwa. Yehova wa tu ĩha ovolandu atiamẽla kapinduko a lingiwa kosimbu oco a tu lembeleke kuenda oku pamisa ekolelo lietu.

Kuata Elembeleko Kelavoko Liepinduko

10. Nye ci tu kuatisa oku sanga elembeleko kelavoko liepinduko?

¹⁰ Anga hẽ ove o kuata usumba eci omuenyo wove u kala kohele? O pondola oku sanga elembeleko kovolandu epinduko a sonehĩwa Vembimbiliya. Oku tanga ovolandu aco loku a kũlĩhĩsa ciwa kuenda oku sokolola ndomo ovina viaco via pita, ci pamisa ekolelo liove kelavoko liepinduko. (Va Roma 15:⁠4) Ovolandu aco ka a lomboloka asapulo amue esanda. Momo a pita muẽle lomanu va kasi ndetu okuti, va kala voluali. Tu konomuisi ulandu wepinduko liatete lia sonehiwa Vembimbiliya.

11, 12. (a) Ocitangi cipi ocimbumba coko Sarepata a liyaka laco, kuenda nye a linga kefetikilo? (b) Lombolola unene Yehova a ecele kuprofeto Eliya woku lingila ocikomo ukãi ocimbumba.

¹¹ Kũlĩhĩsa ulandu owu. Otembo yimue uprofeto Eliya wa sikilile konjo yocimbumba cimue vimbo lio Sarepata. Ukãi waco woyekisa vohondo yimue kosapalalo yaye, kuenje wa kalako olosemana vimue. Kotembo yaco, vofeka mua kala ocitenya kuenje kua kala onjala yalua. Omanu va kala oku fa lonjala. Noke, Yehova wa tuma Eliya oku linga ocikomo cimue oco a sumũlũise ocimbumba caco omo liekolelo liaye. Eci Yehova a eca ku Eliya unene woku linga ocikomo coku eca osema kuenda ulela, okulia kukãi waco lomõlaye, kua kala ale okupua. Noke kueya ocitangi cinene. Omõlaye wa fetika oku vela, kuenje wa fa. Ukãi waco wa sumuile calua. Momo otembo yaco ulume waye wa fa ale, kuenje omõlaco eye lika wa enda oku u kuatisa. Noke omo liesumuo, wa fetika oku siñala uprofeto Eliya kuenda Yehova Suku yaye. Nye uprofeto a linga?

¹² Eliya ka pisile ukãi waco omo liolondaka vĩvi a kala oku popia. Pole, wo sapuila hati: “Nyihe omõlove.” Noke, wambata omõlaco kosapalalo, kuenje wa likutilila olonjanja vialua ku Yehova oco omuenyo waye u tiuke vali vetimba. Yehova wa yeva ohutililo yaco. Eci Eliya a limbuka okuti omõla wa pinduka, wa kuata esanju lialua. Ovaso omõla a patuluka kuenje wa fetika oku vanja. Noke Eliya wo nena ku inaye, kuenje wo sapuila hati: “Tala omõlove o kasi lomuenyo.” Ukãi wa kuata esanju lialua. Kuenje, wa popia hati: “Kaliye ndi ci okuti, umunu wa Suku, kuenda ondaka ya Yehova vomẽla wove, yocili.” (1 Olosoma 17:​8-​24) Ekolelo liaye ku Yehova kuenda kuprofeto waye, lia pamisiwa vali calua.

13. Ulandu wa Eliya woku pindula omõla wukãi ocimbumba, u tu lembeleka ndati koloneke vilo?

¹³ Oku ivaluka ovolandu aco, cinena elembeleko. Momo a lekisa okuti, Yehova o kuete unene woku kundula unyali wetu kufa. Ivaluka okuti, keteke liepinduko omanu valua vaka kuata esanju ndeli liukãi una ocimbumba. Kilu kuka kalavo esanju eci Yehova aka tuma omõlaye oco a pindule omanu va fa. (Yoano 5:​28, 29) Anga hẽ, wa fisa umue ngandiove? Poku kũlĩha okuti Yehova oka pindula ava va fa, ci ku ĩha elembeleko liocili.

Elavoko Liove Kuenda Omuenyo Wove Cilo

14. Elavoko liepinduko li ku kuatisa ndati komuenyo wove?

¹⁴ Elavoko liepinduko li ku vetiya oku ambata omuenyo upi cilo? Elavoko liepinduko li ku kuatisa oku pandikisa kovitangi vielambalalo, leci omuenyo wove u kala kohele. Satana oyongola okuti, o kuata usumba lolofa oco o yapuke vekolelo liove poku ku ĩha ohuminyo yoku popeliwa vepuluvi liaco eci o liyaka lovitangi. Pole, ivaluka olondaka a sapuilile Yehova eci a popia hati: “Cosi omunu a kasi laco o ci ecela omuenyo waye.” (Yovi 2:⁠4) Satana poku popia olondaka viaco, wa lundila omanu vosi oku kongelamo ove. Anga hẽ, eci omuenyo wove u kala kohele o liwekapo oku vumba Yehova? Poku ivaluka elavoko liepinduko, o kuata onjongole yoku pandikisa kuenda oku linga ocipango ca Suku.

15. Olondaka via Yesu vi sangiwa kelivulu lia Mateo 10:​28, vi tu lembeleka ndati eci omuenyo wetu u kala kohele?

¹⁵ Yesu wa popia hati: ‘Koka kuateli usumba ava va ipa etimba puãi ka va tẽla oku nyõla omuenyo. Pole, kuateli usumba u o tẽla oku nyõlela omuenyo letimba Vongehena.’ (Mateo 10:​28) Ka tuka kuateli usumba Satana lomanu vaye palo posi. Ocili okuti, vamue va kuete unene woku tu linga ovina vĩvi kuenda oku tu tuala kolofa. Pole, evĩho kuenda olofa va tu nenela, ka vi kala otembo yalua. Yehova wa likuminya oku malako ovina viosi vĩvi vi lingiwa komanu vaye, kuenda oka pindula ava va fa. Yehova eye lika tu sukila oku kuatela usumba kuenda oku lekisa esumbilo kokuaye. Momo eye o kuete unene woku nyola etimba lomuenyo womunu okuti, ka kuata vali elavoko liepinduko. Yehova ka yongola okuti ovina viaco viya kokuove. (2 Petulu 3:⁠9) Etu tumanu va Yehova, tu sukila oku kuata ekolelo liokuti, tua yovuiwa omo lielavoko liepinduko. Nda tu amamako lekolelo, tuka tambula omuenyo ko pui. Satana kumue lolondele viaye, ka va tẽla oku linga cimue ci tateka elavoko liaco.​—⁠Osamo 118:6; Va Heveru 13:⁠6.

16. Ekolelo tu kuetele kelavoko liepinduko, li tuvetiya oku ambata omuenyo upi?

¹⁶ Nda tua kolela kelavoko liepinduko, tu pongolola ovituwa vietu vĩvi. Tu kũlĩha okuti, ‘nda tu kasi lomuenyo ale tu fa, tua tiamẽla ku Yehova.’ (Va Roma 14:​7, 8) Omo lioku pitisa kovaso ovina viespiritu, tu pokola kelungulo lia Paulu wa popia hati: “Ko ka lisetahaisi loluali lulo, puãi kuati ovitima viokaliye okuti ovimuenyo vi pongoluiwa, kuenje vu limbuka ndeci ci kasi ocipango ca Suku okuti ciwa, ca sunguluka, ca pua eko.” (Va Roma 12:⁠2) Omanu valua koloneke vilo, va kasi luveke woku tẽlisa lika oloñei viavo. Omo okuti, omuenyo ulo va u tenda okuti utito, va tiamisila lika utima wavo kolonjongole vietimba. Momo ka va kuete elavoko. Ndaño okuti, vamue pokati kavo va kuete etavo, pole, efendelo liavo li lekisa okuti, ka va kasi oku linga ‘ocipango ca Suku ca pua eko.’

17, 18. (a) Ondaka ya Suku yi lombolola ndati otembo yitito yomuenyo wetu, pole Suku o tu yonguila nye? (b) Momo lie tu sukilila oku sivaya Yehova eteke leteke?

¹⁷ Ocili okuti, ka tu kuete otembo yalua yoku kala komuenyo. ‘Momo omuenyo wetu u nyõleha lonjanga, kuenje u takata.’ Pamue citava okuti, tu kala komuenyo ci soka 70 ale 80 kanyamo. (Osamo 90:​10) Mulo voluali, omanu tu kasi ndowangu utalala ale ndulembo kuenda ndofela yi pita ombamba. (Osamo 103:15; 144:​3, 4) Pole, Suku ka sokiyile okuti omanu va kala ño okatembo kamue loku linga ovopange avo lovitangi vioku vela kuenje va fa. Eye wa lulika omanu lelavoko lioku kala otembo ka yi pui. Embimbiliya li popia hati: ‘Suku wa kapa otembo ka yi pui vutima womanu.’ (Ukundi 3:​11) Anga hẽ, Suku ongangala okuti, o kapa onjongole yaco vutima wetu kuenje ka ecelela okuti yi tẽlisiwa? Sio, hacoko, “momo Suku eye ocisola.” (1 Yoano 4:⁠8) Eci aka pindula ava va fa, oka va ĩha omuenyo ko pui.

¹⁸ Tu eca olopandu ku Yehova omo lioku tu ĩha elavoko liepinduko, li pamisa ekolelo lietu. Ka tuka pitisi lika kovaso olonjongole vietu vietimba. Tu sukila oku yuvula oku sakalala lovina violuali lulo lũvi. (1 Va  Korindu 7:​29-31; 1 Yoano 2:​17) Etu ka tu kasi ndomanu vana ka va kuete elavoko. Momo tu kuete esumũlũho lioku kũlĩha okuti, nda tu amamako oku kolela Yehova, tuka kuata omuenyo ko pui. Omo liaco, tua amamiko oku sivaya Yehova una oka tẽlisa ohuminyo yepinduko.

O Tambulula Ndati?

• Elavoko liepinduko li tu vetiya oku yeva nye vutima?

• Uvangi upi u lekisa okuti, elavoko liepinduko lika tẽlisiwa?

• Elavoko liepinduko li ku lembeleka ndati?

• Elavoko liepinduko li ku vetiya oku ambata omuenyo upi cilo?

[Elitalatu kemẽla 20]

Yovi wa kũlĩhĩle okuti, Yehova oka pindula vakuesunga

[Elitalatu kemẽla 23]

“Tala omõlove o kasi lomuenyo”