Elavoko Liepinduko Lilomboloka Nye Kokuove?

“[A Yehova] o nyanyumula eka liove, kuenje o kutisa ovina viosi vi kasi lomuenyo.”​—⁠OSAMO 145:⁠16.

1-3. Omanu vamue va kuete elavoko lie? Lombolola ulandu waco.

UMALẼHE umue o tukuiwa hati, Christopher eteke limue wa endele kupange woku kunda konjo lanjo kumue la manjaye, la tiyu kuenda tiya yaye lomãla va tiyu yaye. Ovo va kundila vocikanjo cimue ci kasi ocipepi lolupale luo Manchester kofeka yo Londre. Okalivulu ketu o Despertai!, ka lombolola ciwa ulandu wavo. Oko ka popia hati: ‘Kekumbi noke liupange woku kunda, va endele koku ñuala ñuala kocitumãlo cimue ci kasi ocipepi lokalunga. Pole, noke va tiñulũha lekãlu, kuenje va fa. Keteke liaco kua fa ekũi liomanu komanu vavali. Olosipayu via lombolola okuti, olofa viavo via kala ocilunga cimue cinene.’

² Manji Christopher, kuteke waye wa sulako osimbu handi ka va file, wa endele lepata liaye kohongele Yelilongiso Lielivulu. Kohongele yaco, va lilongisa ondaka yatiamẽla kolofa. Epata liulume umue o tukuiwa hati, Heslop, lia kalavo kohongele yaco. Daviti isia yumalẽhe Christopher, wa popia hati: ‘Omõlange wa kuata olondunge vialua. Kuteke waye wa sulako, wa vanguile ovina vialua viatiamẽla koluali luokaliye kuenda kelavoko liomuenyo ko pui. Vokuenda kuelilongiso eye wa popia hati: Oku kala Ombangi ya Yehova ku kuete esilivilo. Ocili okuti, olofa vi nena esumuo. Pole, tua kũlĩha okuti, vakuetu va fa vaka pinduiwa Voluali Luokaliye. Kuenje tuka kala vali kumosi lavo. Eci eye a popia olondaka evi, lomue pokati ketu wa simĩle okuti olondaka viaco vika tu lembeleka calua.’a

³ Manji Franz wo kofeka yo Australia, wa pondiwa kunyamo wo 1940, omo lioku likala oku tomba olonumbi via Yehova. Pole, osimbu a kala vokayike kofeka yo Berlin, wa sonehela inaye hati: ‘Nda kũlĩha okuti, nda nda tavele oku kala esualali, nda nda linga ekandu limue li tuala kolofa. Kuenda nda sia kuatele vali elavoko liepinduko. Anjali yange, lene a vamanjange, ndi yongola oku u lomboluili okuti, etali va ndi sapuila hati, hẽla komẽle ndika pondiwa. Pole, ka uka sumui. Ame ndi kuete ongusu yi tunda ku Yehova, ndeyi Akristão vo kosimbu va kuatele. Nda wa pandikisi toke kolofa, tuka kala vali pamosi eci tuka pinduiwa Voluali Luokaliye.’b

4. Ovolandu a tukuiwa ndeti a tẽla ndati oku ku kuatisa?

⁴ Vamanji va tukuiwa ndeti, va kuatele ekolelo kelavoko liepinduko. Ulandu wavo, u tu veta kovitima vietu. Omo liaco, tu sukila oku eca olopandu ku Yehova kuenda oku pamisa elavoko lietu liepinduko. Pole, tu konomuisi esunga lieci Yehova aka pinduila omanu, kuenda ekuatiso tu pondola okupa kulandu waco.

Ocinjonde Cepinduko Lioku Kala Palo Posi

5, 6. Ocinjonde cipi Yoano a mola ci sangiwa kelivulu Liesituluilo 20:​12, 13?

⁵ Vocinjonde Yoano a kuata, wa mola ovina vika pita vokuenda kuviali wa Kristu Wohulukãi Yanyamo. Vovina viaco, mua kongela epinduko liomanu valua vaka kala palo posi. Eye wa popia hati: “Nda molavo ava va fa, ava vanene lava vatito. . . . Okalunga ka eca [omanu] va fa va kalamo. Kufa la Njembo va eca ava va fa va kalamo.” (Esituluilo 20:​12, 13) Omanu vosi va fa, cikale ava va kemãla ale vava ka va kemãlele okuti va kasi Vonjembo, vaka pinduiwa. Omanu vosi va kuete va ngandiavo va fila vokalunga, vaka pinduiwavo. Momo Yehova oka tẽlisa ocipango caye ci komohĩsa.

⁶ Eci Yesu aka fetika uviali waye Wohulukãi Yanyamo, Satana oka oka kapiwa vokayike kumue lolondele viaye. Kuenje, Satana kaka tẽla vali oku yapula omanu vana vaka puluka kesulilo lioluali lulo kuenda vana vaka pinduiwa. (Esituluilo 20:​1-3) Ohulukãi Yanyamo, komanu yi kasi soketi otembo yimue yalua. Pole, ku Yehova, yi kasi ‘ndeteke limosi.’​—⁠2 Petulu 3:⁠8.

7. Vokuenda Kuohulukãi yanyamo Yuviali wa Kristu, omanu vaka sombisiwa ndati?

⁷ Ndomo ca lekisiwa vocinjonde, Ohulukãi yanyamo Yuviali wa Kristu, yika kala otembo yesombiso. Yoano wa popia hati: ‘Nda molavo omanu va fa, vanene lava vatito, va talama kovaso yocalo caco, kuenje alivulu a nyanyumuiwa. Elivulu likuavo lia nyanyumuiwa, olio elivulu liomuenyo. Ava va fa va tetuluiwa lovina via sonehiwamo, okuti lovilinga viavo. Kuenje vosi va tetuluiwa, omunu lovilinga viaye.’ (Esituluilo 20:​12, 13) Pole, tu sukila oku kũlĩha okuti, esombiso liaco, ka lika lingiwa loku kuama ovina omunu a lingaile kosimbu ale vievi ka lingile. (Va Roma 6:⁠7) Omunu oka sombisiwa lolonumbi vi sangiwa valivulu aka yuluiwa. Ovilinga omunu aka lekisa noke yoku longisiwa olonumbi viaco, ovio vika tepisa nda onduko yaye yi sonehiwa ‘velivulu liomuenyo,’ ale ka yi sonehiwamo.

‘Epinduko Liomuenyo Ale Liekanga’

8. Nye cika pita lomanu vaka pinduiwa?

⁸ Yoano kefetikilo liulandu waye wocinjonde, wa lombolola okuti, Yesu o ‘kuete olosapi viokufa levi vionjembo.’ (Esituluilo 1:​18) Cilo, Yesu wa linga ‘mitavaso yomuenyo.’ Kuenje, Yehova wo wiha omoko yoku sombisa ‘vakuamuenyo kuenda ava va fa.’ (Ovilinga 3:15; 2 Timoteo 4:⁠1) Oco hẽ, upange waco oka u linga ndati? Eye oka u linga poku pindula omanu va fa. Yesu wa sapuilile omanu vamue a kala oku kundila hati: “Ko ka ci komohi, momo owola yiya eci vosi va kasi vayambo va yeva ondaka yaye, [kuenje] va tundamo.” Noke wamisako hati: “Ava va linga ciwa, va tundila epinduko liomuenyo, ava va linga cĩvi va tundila epinduko liekanga.” (Yoano 5:​28-​30) Oco hẽ, omanu vana vakuekolelo okuti va fa osimbu, va kuete elavoko lie?

9. (a) Omanu vana vaka pinduiwa vaka kũlĩha nye? (b) Elongiso lie lika eciwa kokuavo?

⁹ Omanu vana va fa osimbu eci vaka pinduiwa, vaka mola oku tẽlisiwa kuolohuminyo vina va kolelele. Ovo vaka sanjuka calua momo vaka kũlĩha Ombuto yukãi ya tukuiwa kelivulu Liefetikilo 3:15. Ovo vaka sanjukavo poku yeva okuti, Mesiya wa pandikisa toke kolofa. Kuenda wa eca omuenyo waye ndocilumba cocisembi. (Mateo 20:​28) Ava vaka tambula omanu vaco vapinduiwa, vaka sanjuka calua poku va longisa. Momo, vaka va sapuila okuti, ocilumba cocisembi, ca kala ondimbukiso yocisola kuenda ohenda Yehova a kuetele omanu. Kuenje omanu vaco va pinduiwa vaka limbuka ndomo, Usoma wa Suku u kasi oku tẽlisa ocipango caye palo posi. Poku kũlĩha ovina viaco, vaka kuata onjongole yoku eca esivayo ku Yehova. Ovo vaka kuatavo epuluvi lioku lekisa ukamba wavo la Yehova kuenda la Yesu. Omanu vosi vaka puluka kesulilo lioluali lulo, vaka kuata esanju lioku li tumbika kupange woku longisa omanu vana va pinduiwa. Momo omanu vaco vaka sukilavo oku pokola kocisembi ca Kristu cina Yehova a sokiya.

10, 11. (a) Vokuenda Kuohulukãi Yanyamo, omanu vaka kuata epuluvi lioku linga nye? (b) Tuka kuatisiwa ndati?

¹⁰ Eci Avirahama aka pinduiwa, oka sanjuka calua poku mola ofeka yina a kala oku lavoka. (Va Heveru 11:​10) Yovi oka sanjukavo eci aka limbuka okuti, epandi liaye lia kuatisa omanu valua va Yehova oku liyaka lovitangi. Daniele oka sanjukavo eci aka mola oku tẽlisiwa kuovitumasuku vina Yehova o tumile oku soneha.

¹¹ Cikale omanu vaka pinduiwa ale vava vaka puluka kesulilo lioluali lulo, vosi yavo vaka kala voluali luokaliye. Kuenje, vaka lilongisa ovina vialua viatiamẽla kocipango Yehova a kuetele oluali. Elavoko lioku kala otembo ka yi pui loku amamako oku sivaya Yehova, lika vetiya omanu oku sanjukila elongiso Liuviali wa Yesu. Vosi yetu tuka lilongisa olonumbi vi sangiwa valivulu ana aka yuluiwa. Anga hẽ tuka tẽla oku pokola kolonumbi viaco? Etu tua kũlĩha okuti, Satana oka seteka oku tu yapula. Anga hẽ tuka pokola kolonumbi via Yehova vina vi tukuatisa oku pandikisa kayonjo aco?

12. Nye cika kuatisa omanu oku litumbika kupange woku longisa vakuavo? Nye cika va kuatisavo oku litumbika kupange woku pongolola oluali oco lu linge luokaliye?

¹² Nda ove wa pokola kocisembi ca Kristu, oka tambula asumũlũho alua. Omanu vosi vaka pinduiwa ka vaka kuata vali ovitangi vioku vela ndevi tu kasi oku liyaka lavio cilo. (Isaya 33:​24) Elavoko lioku amamako luhayele, lika ecelela omanu oku sanjukila oku longisa vana vaka pinduiwa oco va endele vonjila yomuenyo. Omanu vaco va pinduiwa, vaka kuatisavo kupange woku pongolola oluali oco lu linge luokaliye. Kuenje vaka eca esivayo ku Yehova.

13, 14. Momo lie Satana aka tundila vokayike? Nye cika pita lomanu vosi noke yoseteko yaco?

¹³ Kesulilo Liohulukãi Yanyamo, Satana oka kutuluiwa kuenda oka kemba vali omanu vamue. Elivulu Liesituluilo 20:​7-9, li lekisa okuti, omanu vana vaka kembiwa la Satana vaka pita vesombiso lioku enda kenyõleho. Pokati komanu vaco vaka nyõleha, paka kala vana vaka pinduiwa vokuenda Kuohulukãi yanyamo. Noke, ‘kilu kuka tunda ondalu kuenje yika va lia.’ Omo liaco, epinduko liavo, lika lomboloka epinduko lioku enda keyambulo. Pole, vakuesunga, vaka puluka kenyõleho liaco. Kuenje epinduko liavo lika lomboloka epinduko ‘liomuenyo ko pui.’​—⁠Yoano 5:⁠29.

¹⁴ Elavoko liepinduko li tu pamisa ndati cilo? Nye tu sukila oku linga oco tuka kuate omuenyo ko pui?

Ceci tu Sukila Oku Lilongisa Cilo

15. Elavoko liepinduko li pondola ndati oku tu lembeleka cilo?

¹⁵ Valua pokati ketu va fisa vangandiavo. Kuenje, cilo va kasi oku likolisilako oku yuvula oku sokolola calua oco esumuo liaco li tepuluke. Pole, elavoko liepinduko lieca kokuetu elembeleko kuenda ongusu yoku pandikisa kovitangi viaco. Omanu vana ka va kũlĩhĩle ocili Cembimbiliya, ka va kuete elembeleko liaco. Paulu wa lembeleka Akristão vo ko Tesalonike hati: “Avamanji, ka tu yongola okuti vu kala lonumbi yava va pekela vokufa, okuti vu sumua ndomanu vakuavo ka va kuete elavoko.” (1 Va  Tesalonike 4:​13) Ove hẽ wa kolela kohuminyo yoluali luokaliye oco oka mole ndomo omanu vaka pinduiwa? Tu sanjuka calua poku ivaluka okuti, eteke limue tuka lisanga vali la vangandietu va fa.

16. Eci omanu va fa vaka fetika oku pinduiwa ove oka kala ndati?

¹⁶ Koloneke vilo, citava okuti ove o liyaka lovitangi vioku vela omo liekandu lia Adama la Heva. Pole, kuka ecelele okuti, esumuo liaco li ku tateka oku kuata elavoko liepinduko. Ivaluka okuti, voluali luokaliye omanu vaka kuata uhayele wa suapo. Handi vali, oka sanjukavo calua eci oka mõla omanu vana va pinduka. Kuenje, oka vetiyiwa oku eca olopandu ku Yehova omo liohenda yaye ka yi pui.

17, 18. Atosi api avali tu sukila oku ivaluka?

¹⁷ Kaliye, tu konomuisi atosi avali a kuete esilivilo. Etosi liatete liatiamẽla kesilivilo liupange wa Yehova tu kasi oku linga cilo. Omo lioku kuama ongangu ya Yesu tua siata oku lekisa ocisola ku Yehova kuenda komanu vosi. Eci tu lambalaliwa ka tu ecelela okuti elambalalo liaco li tepulula ekolelo lietu ku Yehova. Pole, tuamamako loku pamisa ekolelo lietu. Citava okuti pamue tu lambalaliwa toke kolofa. Pole, elavoko liepinduko li tu lembeleka. Kuenda, li tu ĩha ongusu yoku pokola ku Suku kuenda oku kolela Kusoma waye. Ombili yetu kupange wa Yehova yi tu ĩha ongusu yoku lavoka asumũlũho ana Yehova a selekela olondingesunga.

¹⁸ Etosi liavali li lekisa ndomo tu sukila oku pandikisa kayonjo omo liakandu etu. Etu tu kuete ukũlĩhĩso watiamẽla kelavoko liepinduko kuenda tua sanjuka calua omo liohenda ya Yehova. Ukũlĩhĩso waco u tu vetiya okuamamako lepandi. Yoano wa lungula hati: “Ko ka soli oluali pamue ovina vi kasi voluali. Nda omunu o sole oluali, ocisola ca Isia ka ci kasi vutima waye. Momo ovina viosi vi kasi voluali, okuti oñeyi yetimba, loñeyi yovaso, kuenda oku litunila ovina viomuenyo waluo, ka via tundile ku Isia, te koluali. Oluali lu takata loñeyi yaluo, puãi u o lingainga ocipango ca Suku [oka] kala oloneke ka vi pui.” (1 Yoano 2:​15-​17) Ulamba woluali lulo, ka u sokisiwa lomuenyo ko pui tu lavoka oku kuata voluali luokaliye. (1 Timoteo 6:​17-​19) Eci tu yonjiwa lukahonga, tu sukila oku tamalãla oco ka tuka wile vekandu liaco. Tu sukilavo oku yuvula ovituwa viosi vi sumuisa Yehova. Momo, tua kũlĩha okuti, nda tua fa lovituwa viaco osimbu handi esulilo ka lieyile, ka tu kuata elavoko liepinduko.

19. Cilo esumũlũho lie tu sukila oku ivaluka?

¹⁹ Etu tu kuete esumũlũho lioku sanjuisa utima wa Yehova cilo kuenda otembo ka yi pui. (Olosapo 27:​11) Nda tua pandikisa toke kolofa ale toke kesulilo lioluali lulo, tuka lekisa ku Yehova okuti tua tiamẽla kuviali waye. Cikale omanu vana vaka puluka kesulilo lioluali lulo, ale vava vaka pinduiwa Voluali luokaliye, vosi yavo vaka kuata esanju ka li pui.

Yehova Oka Tẽlisa Olonjongole Vietu Viwa

20, 21. Nye cika tu kuatisa okuamamako lepandi ndaño ka tu kuete atambululo kapulilo amue atiamẽla kepinduko? Lombolola esunga liaco.

²⁰ Tua lilongisa ovina vialua viatiamẽla kepinduko. Pole, ovina viaco via tu sila apulilo amue ndeci: Yehova oka tetulula ndati ocitangi comanu vana vakuele okuti noke pokati kavo pa fa umue? (Luka 20:​34, 35) Anga hẽ omanu vana va fa vaka pindukila povitumãlo vina va fila? Anga hẽ, vaka pinduiwila ocipepi lepata liavo? Apulilo ava kuenda akuavo, ka a kuete etambululo. Pole, tu sukila oku ivaluka olondaka via Yeremiya wa popia hati: “Yehova o linga ohenda ava vo talamẽla lava vo sandiliya. Ciwa oku talamẽla eyovo [li tunda ku] Yehova, loku tula utima.” (Asiõsuĩlo 3:​25, 26) Olondaka evi vi lekisa okuti, Yehova oka tambulula apulilo aco votembo ya sokiyiwa. Kuenje tuka kuata elomboloko liaco. Momo lie tu kuetele ekolelo liaco?

²¹ Tu sukila oku ivaluka olondaka viukualosamo wa imbila ocisungo Yehova hati: “[A Yehova] o nyanyumula eka liove, kuenje o kutisa ovina viosi vi kasi lomuenyo.” (Osamo 145:​16) Ocili okuti, voluali lulo eci tu kuka, olonjongole vietu vi fetika oku pongoloka. Ovina vimue tua solele eci tua kala amãlehe, ka tu vi soli vali. Ovisimĩlo vietu lelavoko lioku amamako lomuenyo, vi fetikavo oku pongoloka omo liovitangi tu liyaka lavio. Pole, voluali luokaliye, Yehova oka tẽlisa olonjongole vietu viosi viwa.

22. Momo lie tu kuetele esunga lioku sivaya Yehova?

²² Tu sukila oku amamako lesunguluko. Embimbiliya li popia hati: “Ca sesamẽla vakalei oku lilekisa okuti va sunguluka.” (1 Va  Korindo 4:⁠2) Etu tu kuete ocikele coku kundila omanu vosi olondaka viwa Viusoma wa Yehova. Oku lekisa ombili kupange waco, ci tu kuatisa oku endela vonjila yi tuala komuenyo ko pui. Pole, tu sukila oku ivaluka okuti, ‘ovitangi viya ño kuenda viveta ño.’ (Ukundi 9:​11) Oku kolela kelavoko liepinduko ku tepulula esumuo liovitangi viomuenyo ulo. Citava okuti, pamue osimbu handi Uviali wa Kristu ka weyile, ovitangi viaco vi tu tuala kolofa. Pole, tu sukila oku ivaluka okuti, ndaño cilo tua fa, tuka pinduiwa voluali luokaliye. Kotembo yaco, tuka popia ndeci Yovi a popele ku Yehova hati: ‘Nda wa mbilikiya, ame ndu ku tambulula.’ Omo liaco, tuamamiko oku eca esivayo ku Yehova, una o tẽla oku pindula ava va fa.​—⁠Yovi 14:⁠15.

[Atosi pombuelo yamẽla]

Ivaluka Eci Tua Lilongisa?

• Vokuenda Kuohulukãi Yanyamo omanu vaka sombisiwa ndati?

• Momo lie omanu vamue vaka kuatela ‘epinduko liomuenyo’ kuenda vakuavo ‘epinduko liekanga?’

• Elavoko liepinduko li tu lembeleka ndati cilo?

• Osamo 145:16 yi tu lembeleka ndati poku sokolola apulilo amue atiamẽla kepinduko okuti ka a kuete etambululo?

[Elitalatu kemẽla 27]

Elavoko liepinduko li tu kuatisa ndati cilo?