Talamẽla Lepandi Eteke Lia Yehova
“Kekolelo liene vu vokiyako . . . epandi.”—2 PETULU 1:5, 6.
1, 2. Epandi li lomboloka nye kuenda momo lie Akristão va sukilila oku pandikisa?
ETEKE lia Yehova, li kasi ocipepi. (Yoeli 1:15; Sofoniya 1:14) Etu Tuakristão, tua nõlapo oku amamako loku pokola ku Suku, kuenda tu talamẽla otembo eci Yehova aka kemalisa uviali waye. Osimbu handi otembo yaco ka yeyile, tu liyaka lesuvu, lepembe, lelambalalo, kuenda olofa omo liekolelo lietu. (Mateo 5:10-12; 10:22; Esituluilo 2:10) Kuenje, tu sukila oku kuata epandi, momo olio li tu kuatisa oku tamalãla kovitangi. Upostolo Petulu, o tu vetiya hati: “Kekolelo liene vu vokiyako . . . epandi.” (2 Petulu 1:5, 6) Omo liaco, tu sukila oku kuata epandi momo Yesu wa popia hati: “U o pandakaisa toke kesulilo eye o popeliwa.”—Mateo 24:13.
2 Tua siatavo oku liyaka lokuvela, lesumuo, kuenda ovitangi vikuavo. Nda tua liwekapo oku pandikisa, Satana o sanjuka! (Luka 22:31, 32) Lekuatiso lia Yehova, tu tẽla oku pandikisa kovitangi. (1 Petulu 5:6-11) Tu konomuisi ovolandu amue a lekisa ndomo tu pondola oku talamẽla eteke lia Yehova lepandi kuenda lekolelo.
Oku Vela ka Kua Tepuluile Ekolelo Liavo
3, 4. Lombolola ulandu umue u lekisa okuti tu pondola oku vumba Yehova ndaño lovitangi vioku vela.
3 Koloneke vilo, Suku ka lingi ocikomo coku tu sakula. Pole, o tu ĩha ekuatiso lioku pandikisa koku vela. (Osamo 41:1-3) Manji umue ukãi o tukuiwa hati Sharon, wa popia hati: “Ndendela komangu yalola tunde vutila omo liuveyi wociteyateya okuti, wa tepulula epondolo liange lioku vangula. Uveyi waco, wa tepululavo esanju liange tunde vutila.” Eye, omo lioku lilongisa ovina vialua viatiamẽla ku Yehova kuenda kolohuminyo viaye vioku nena uhayele wa lipua komanu vaye, co kuatisa oku kuata elavoko. Ndaño okuti ka pondola oku vangula ciwa kuenda enda levando, wa siata oku kuata esanju kupange woku kunda. Noke liekũi latãlo kanyamo wa popele hati: “Uhayele wange u kasi oku tepuluka calua, pole ekolelo liange ku Suku lukamba ndi kuete Laye, vi kasi oku pamisiwa. Nda sanjuka calua omo lioku kala pokati komanu va Yehova loku tambula ekuatiso liaye.”
4 Upostolo Paulu wa vetiya Akristão voko Tesalonike oco va ‘kolise ava va leñela,’ ale va sumua. (1 Va Tesalonike 5:14) Ovitangi vimue ndeci esumuo lialua, vinena enyumãlo. Kunyamo wo 1993 manji Sharon wa soneha ndoco: “Omo liesumuo lialua, nda fetika oku hongua, . . . kuenje, nda pita anyamo atatu loku nyumãla. Pole, nda tambula elembeleko kuenda olonumbi viakulu vekongelo. . . . Lekuatiso Liutala Wondavululi Yehova wa nyiha olondunge via ndi kuatisa oku liyaka locitangi cenyumãlo. Nda limbuka okuti, Yehova wa kapako omanu vaye kuenda wa kũlĩha ovitangi va kasi oku liyaka lavio.” (1 Petulu 5:6, 7) Manji Sharon, toke cilo, o kasi oku amamako kupange woku kunda, osimbu a talamẽla eteke linene lia Yehova.
5. Nye ci lekisa okuti, Akristão va pondola oku pandikisa kovitangi viesakalalo?
5 Akristão vamue va siata oku kuata esakalalo lialua omo liovitangi va mola kosimbu. Manji umue o tukuiwa hati, Harley, wa mola ungangala wa lingiwa vokuenda Kuyaki Wavali wa pita voluali. Poku pekela, wa enda oku lota ovina vialua kuenje o liyula hati: “Lavulula! Lunguka!” Noke o pasuka lusumba kuenje o sakalala calua. Vokuenda kuotembo, olonjoi viaco via tepuluka omo lioku litumbika ku Suku.
6. Manji umue wa tẽla ndati oku liyaka lovitangi?
6 Manji umue eci a endele kosipitali, olondotolo via limbuka okuti, o kuete uveyi umue u pongolola ovituwa viaye vokuenda kuotembo. Kuenje, ka ca lelukile oku enda kupange woku kunda. Pole, wa likolisilako oku endaenda kupange waco, momo wa kũlĩhĩle okuti upange woku kunda owo weca omuenyo kokuaye kuenda komanu vana vo yevelela. (1 Timoteo 4:16) Olonjanja vimue ka kuatele utõi woku totola kepito, pole wa popia hati: “Noke liotembo yimue, nda likolisilako oku tulumũla utima, kuenje nda fetika oku kunda konjo lanjo. Omo lioku amamako kupange woku kunda, nda pamisa ekalo liange kespiritu.” Eye, ka co lelukilile oku endaenda kolohongele, pole, wa lekisa ombili poku limbuka esilivilo lioku likongela la vamanji. Omo liaco, wa likolisilako oku endaenda kolohongele olonjanja viosi.—Va Heveru 10:24, 25.
7. Ndaño okuti vamue va kuete ohele yoku vanguila powiñi, ale oku endaenda kolohongele, va siata oku lekisa ndati epandi?
7 Akristão vamue, va kuete esakalalo lioku yokokela ovitangi vimue. Pamue, va kuata ohele yoku vanguila powiñi, ca piãla enene eci va kasi kolohongele. Sokolola ocitangi va siata oku liyaka laco poku eca atambululo kolohongele ale poku linga ohundo Kosikola Yupange Wakristão! Pole, tua sanjuka calua poku limbuka epandi va siata oku lekisa, kuenda ombili yavo yoku endaenda kolohongele loku kuata onepa kovipama.
8. Nye ci pondola oku kuatisa omunu eci a liyaka lovitangi viesumuo?
8 Oku pekela ciwa, ku kuatisa omunu oku pandikisa kesumuo. Pole, pamue ci sukila ekuatiso liondotolo. Handi vali, oku likutilila ku Suku, ku ecavo ekuatiso lia velapo. Osamo 55:22, yi popia hati: “Tuika Yehova ocitele cove kuenje eye o ku kuatisa. Lalimue eteke [a] tava okuti ukuesunga o sengiwa.” Omo liaco, “kolela Yehova lutima wove wosi.”—Olosapo 3:5, 6.
Oku Pandikisa Kenyumãlo
9-11. (a) Nye ci tu kuatisa oku tepulula esumuo eci umue ngandietu a fa? (b) Ongangu ya Ana yi tu kuatisa ndati oku pandikisa kovitangi?
9 Eci umue ngandietu a fa, tu sumua calua. Avirahama wa lila calua eci ukãi waye Sara a fa. (Efetikilo 23:2) Yesu ndaño okuti wa lipuile, “wa lila” calua eci ekamba liaye Lasaru a fa. (Yoano 11:35) Ocili okuti, eci omunu a fisa ukuepata liaye, o sumua calua. Pole, Akristão va kũlĩha okuti kuli elavoko liepinduko. (Ovilinga 24:15) Omo liaco, ka va “sumua ndomanu vakuavo ka va kuete elavoko.”—1 Va Tesalonike 4:13.
10 Tu pandikisa ndati kesumuo? Tu konomuisi ocindekaise cimue ci pondola oku tu kuatisa. Nda umue ekamba lietu o linga ungende, ka tu sumua vokuenda kuotembo yalua, momo tua kũlĩha okuti, eci a aka pinduka, tuka li sanga vali laye. Cimuamue haico ci pita letu eci manji umue a fa. Ka tu sumua calua, momo tua kũlĩha okuti, oka pinduka.—Ukundi 7:1.
11 Oku ivaluka okuti, “Suku ukuakulembeleka pokati kovina viosi,” ci tu kuatisa oku pandikisa kesumuo. (2 Va Korindo 1:3, 4) Ulandu wukãi umue ocimbumba o tukuiwa hati Ana, una wa kala kocita catete, u pondolavo oku tu lembeleka. Noke lianyamo epanduvali tunde eci va likuela, wa linga ocimbumba eci ulume waye a fa. Pole, eci a tẽlisa akũi ecelãla kanyamo lanyamo akuãla, wa kala oku amamako oku fendela Yehova vonembele. (Luka 2:36-38) Ndaño okuti wa kala ulika, oku litumbika ku Yehova, kuo kuatisa oku pandikisa kovitangi. Omo liaco, oku kuata onepa kovopange vekongelo, loku endaenda kupange woku kunda olondaka viwa Viusoma, ci tu kuatisa oku pandikisa kovitangi.
Oku Pandikisa Kovitangi Vikuavo
12. Vamanji vamue va siata oku liyaka lovitangi vipi vepata?
12 Vamanji vamue, va siata oku liyaka lovitangi vepata. Nda umue pokati kolohueli wa wila vukahonga, epata liosi li sumua calua! Ohueli va lueyela, o kopa kuenje, ka pekela, momo o kala otembo yalua loku lila. Noke poku linga ovopange amue o livalula ale o nyola ovina viaco omo liesumuo. Pamue ka kuata onjongole yokulia, noke o kopa, kuenje o sumua calua. Olonjanja vimue, ka kuata epondolo lioku linga ovopange vekongelo. Omo liaco, omãla va pitavo lovitangi vialua!
13, 14. (a) Elembeleko lipi Salomone a tambula vohutililo a linga poku tumbikiwa kuonembele? (b) Momo lie tu pingila espiritu sandu vohutililo?
13 Eci tu liyaka lovitangi vepata, Yehova o tu ĩha ekuatiso tu sukila. (Osamo 94:19) Ohutililo Soma Salomone a linga eci a tumbika onembele, yi lekisa okuti Suku o yeva olohutililo viomanu vaye. Eye wa likutilila ndoco: “Nda omunu umue pamue omanu vove vosi va Isareli va likutilila ohutililo yimue loku lomba elombelo limue, omunu omunu loku kũlĩha ohali yutima waye muẽle, loku olũila ovoko aye konjo yilo; oco ove, kilu, kocitumãlo cove, yevelela, ecela, linga, kuenje muisa omunu omunu eci ca sesamẽla olonjila viaye viosi, momo ove lika wa kũlĩha ovitima viomãla vosi vomanu. Oco ovo va ku sumbe oloneke viosi va tumãla vofeka yina wa ecele kolosekulu vietu.”—1 Olosoma 8:38-40.
14 Oku pinga ekuatiso liespiritu sandu vohutililo, ci pondola oku tu kuatisa. (Mateo 7:7-11) Vapako espiritu, mua kongela ovituwa vimue ndeci: Esanju, kuenda ombembua. (Va Galatia 5:22, 23) Tu kuatisiwa calua, poku limbuka okuti, Isietu o kasi kilu, o tambulula olohutililo vietu. Kuenje, esumuo li piñanyiwa lesanju kuenda ombembua!
15. Olonumbi vipi Viembimbiliya vi tu kuatisa oku yuvula asakalalo?
15 Olonjanja vimue, eci tu lavoka oku liyaka lovitangi, tu kuata esakalalo lialua. Pole, tu pondola oku yuvula asakalalo amue, poku ivaluka olondaka via Yesu wa popia hati: “Ko ka kali lohele yomuenyo wene, hoti: Tu lia nye? Tu nyua nye? Pamue yetimba liene hoti: Tu wala nye? . . . Tete vanjiliyi usoma [wa Suku] kuenda esunga liaye, kuenje ovina evi viosi viu vokiyiwi.” (Mateo 6:25, 33, 34) Upostolo Petulu, o tu vetiya oku ‘eca ku Suku ovitangi vietu viosi, momo eye o tu lava.’ (1 Petulu 5:6, 7) Ca sunguluka oku likolisilako oku tetulula ovitangi tu liyaka lavio. Pole, noke yoku linga ovina viosi tu tẽla, ka tuka eceleli okuti asakalalo a tu tateka oku likutilila. Ukualosamo wa popia hati: “Kundika ku Yehova onjila yove. U kolela, kuenje eye o ci linga.”—Osamo 37:5.
16, 17. (a) Momo lie tua siatela oku liyaka lasakalalo? (b) Onima yipi tu pondola oku tambula, nda tua pokola kolondaka vielivulu lia Va Filipoi 4:6, 7?
16 Paulu wa soneha ndoco: “Lacimue ko ka ci kuateli ohele, puãi kovina viosi apingilo ene a sapuiwe ku Suku lolopandu volohutililo viene lalombelo ene. Kuenje, ombembua ya Suku, yina ya piãla olondunge viosi, yi lava ovitima viene lovisimĩlo viene vu Kristu Yesu.” (Va Filipoi 4:6, 7) Omo okuti, tuvitumbulukila via Adama, ka tu tẽla oku yuvula asakalalo osi, momo ka tua lipuile. (Va Roma 5:12) Akãi voko Hiti vana Esau a kuelele, “va valisa ca lua utima” wolonjali viaye, Isake la Rebeka vana va kala afendeli va Suku. (Efetikilo 26:34, 35) Oku vela, kua nenele esakalalo lialua Kakristão vamue ndeci, Timoteo la Trofimo. (1 Timoteo 5:23; 2 Timoteo 4:20) Paulu, wa sakalalele calua omo lia vamanji. (2 Va Korindo 11:28) Pole, Yehova ‘ukuakuyevelela olohutililo,’ o kuatisa vana vo kuetele ocisola.—Osamo 65:2.
17 Osimbu tu talamẽla eteke linene lia Yehova, tu kuete ekuatiso lelembeleko Liaye, momo eye “Suku yombembua.” (Va Filipoi 4:9) Eye, ‘ukuahenda, kuenda ukuacali.’ Handi vali, ‘wa sunguluka haeye ukuakuecela, kuenda wa kũlĩha okuti, tu neketela.’ (Etundilo 34:6; Osamo 86:5; 103:13, 14) Omo liaco, tu amamiko loku likutilila Kokuaye, oco tu kuate ombembua kuenda ekavuluko lio vutima.
18. Tu pondola ndati oku “mõla” Suku ndomo elivulu lia Yovi 42:5 li ci lombolola?
18 Eci olohutililo vietu vi tambuluiwa, tu limbuka okuti Suku o kasi letu. Yovi noke yoku pandikisa kovitangi, wa popia hati: “Oku ku yeva letũi nda ku yeva yeva, cilo puãi iso liange lia ku mõla.” (Yovi 42:5) Poku kuata elomboloko liovina viespiritu, loku lekisa ekolelo, kuenda olopandu, ci tu kuatisa oku limbuka ekuatiso lia Suku loku u ‘mola’ kovaso etu. Ukamba waco, u tu nenela ombembua vutima!
19. Nye ci pondola oku pita letu, nda tua ‘sapula ku Yehova asakalalo etu’?
19 Nda tua ‘eca ku Yehova asakalalo etu,’ tu pondola oku pandikisa kovitangi, lombembua yi lava ovitima vietu kuenda olondunge vietu. Ombembua yaco yi tu kuatisa oku kuata elianjo loku yuvula usumba, kuenda ka tu sakalala omo liovitangi.
20, 21. (a) Ulandu wa Stefano u lekisa uvangi upi woku tulumũla utima eci tu lambalaliwa? (b) Lombolola ulandu umue wo koloneke vilo, watiamẽla koku tula utima poku liyaka lovitangi.
20 Ndonge Stefano, wa tulile utima eci ekolelo liaye lia setekiwa. Osimbu ka ecele uvangi wa sulako, vosi va kala Vonjango, ‘va mola okuti, ocipala caye ca kala ndocipala cungelo.’ (Ovilinga 6:15) Eye wa tulile utima ndungelo omunga ya Suku. Eci Stefano a lombolola ekandu liolonganji via ponda Yesu, vosi yavo “va fungula vovitima, kuenje vo litakilila ovayo.” Omo okuti Stefano ‘we yukile espiritu sandu, wa vanja kilu, kuenje, wa mola ulamba wa Suku, la Yesu o kasi kondio ya Suku.’ Ocinjonde caco, ca pamisa ekolelo liaye, kuenje wa pandikisa toke kolofa. (Ovilinga 7:52-60) Cilo, ndaño okuti ka tu kuata vali ovinjonde, pole, eci tu pita velambalalo, tu pondola oku tula utima omo liekuatiso lia Suku.
21 Kũlĩhĩsa ulandu wa va manji vamue va fila kocila coku talisila ohali omanu ko Alemanya vokuenda Kuyaki Wavali wa pita voluali luosi. Manji umue wa sonehela epata liaye hati: “Kesulilo liesombiso, va ndi sapuila okuti ndi pondiwa. Eci nda yeva ondaka yaco, nda popia lolukandi hati, pandikisa ño toke koku fa. Nda tukulavo olondaka vikuavo via Ñala Yesu. Pole, koka yokoki. Momo ndi kuete ombembua kuenda nda tula utima. Ene ka vu tela oku kuata elomboloko liaco.” Umalẽhe umue Ukristão wa tetiwa utue poku pondiwa, wa sonehelavo olonjali viaye hati: “Cilo tua pitahãla ale vokati kuteke. Ndi kuete handi epuluvi lioku pongolola ovisimĩlo viange. Anga hẽ, nda nda likala Ñala yetu, ndi kuata vali esanju voluali lulo? Sio si kuata vali esanju! Cilo wa kũlĩhi okuti, ndi tunda voluali lulo lesanju kuenda lombembua.” Ocili okuti, Yehova o kuatisa omanu vaye vakuekolelo.
O Pondola Oku Pandikisa!
22, 23. Nye ciku kuatisa oku talamẽla lepandi eteke lia Yehova?
22 Citava okuti pamue ku liyaki lovitangi ndevi tua konomuisa vocipama cilo. Pole, Yovi ufendeli wa Suku wa popia hati: “Omunu wa citiwa lukãi ukualoneke viñamiñami, haiye we yuka lohali.” (Yovi 14:1) Pamue, unjali yimue yi kasi oku likolisilako oku pindisa omãla lolonumbi Viembimbiliya. Ovo va pondola oku pandikisa kovitangi kosikola. Pole, o sanjuka calua eci omãla vove va nolapo oku kakatela ku Yehova loku teyuila olonumbi viaye viesunga! Kupange wove, citava okuti o kasi oku liyaka layonjo. O pondola oku pandikisa kovitangi viaco, momo Yehova ‘oku ambatelako ocilemo cove.’—Osamo 68:19.
23 Ove pamue o sima okuti, ku kuete esilivilo voluali. Pole, ivaluka okuti, Yehova ka ivalako upange o kasi oku u lingila, kuenda ocisola wa siata oku lekisa konduko yaye yi kola. (Va Heveru 6:10) Lekuatiso liaye, o pondola oku pandikisa kovitangi vi seteka ekolelo. Volohutililo viove, kongelamo ekuatiso lioku linga ocipango ca Suku kuenda ovina vikuavo o yongola oku linga. Nda wa ci linga, oka tambula asumũlũho alua osimbu amamako oku talamẽla lepandi eteke lia Yehova.
O Tambulula Ndati?
• Momo lie Akristão va sukilila oku pandikisa?
• Nye ci tu kuatisa oku pandikisa koku vela kuenda kesumuo?
• Olohutililo vi tu kuatisa ndati oku pandikisa kovitangi?
• Momo lie tu sukilila oku talamẽla lepandi eteke lia Yehova?
[Elitalatu kemẽla 17]
Oku kolela Yehova, ku tu kuatisa oku pandikisa kesumuo