Otembo Yipi Usoma wa Suku u Keya?
“AÑALA, cilo hẽ, o tumbulula usoma wa Isareli ale?” (Ovilinga 1:6) Ovapostolo va yonguile ou kũlĩha otembo Yesu a laikele oku tumbika Usoma waye. Tunde kotembo yaco toke cilo, pa pita ale 2.000 kanyamo, pole omanu lopo va siata oku pula ndoco: Otembo Yipi Usoma wa Suku u Keya?
Omo Yesu poku kundila omanu wa tukula calua Usoma wa Suku, pamue o sima okuti wa lombolola ondaka yaco. Ocili okuti wa lombolola muẽle ondaka yaco! Eye wa popia ovina viatiamẽla kotembo a laikele oku “tukuluka.” (Mateo 24:37) Oku tukuluka kuaco ku kuete elitokeko loku tumbikiwa Kusoma wa Mesiya. Etukuluko li lomboloka nye? Tu konomuisi olondimbukiso vikuãla Embimbiliya li lekisa viatiamẽla ketukuluko lia Kristu.
1. Kristu wa laikele oku tukuluka noke yotembo yalua yolofa viaye. Yesu wa ta olusapo lumue kuenda olusapo luaco wa lu sokisa lulume wa “tambula uviali ukuavo vofeka yocipãla.” (Luka 19:12) Ocitumasuku caco ca tẽlisiwa ndati? Yesu wa fa kuenda wa pinduiwa, kuenje wa enda kilu, okuti ‘kofeka yocipãla.’ Ndomo Yesu a ci lekisa ale volusapo lukuavo, wa lavokaile oku tiuka ndosoma noke ‘yotembo ya lua.’—Mateo 25:19.
Eci pa pita anyamo amue noke yoku enda kua Yesu kilu, upostolo Paulu wa soneha ndoco: “Eci [Yesu] a lumbila akandu ocilumba cimuamue, oco a tumala oloneke ka vi pui kondio ya Suku. Tunde opo, o talamela toke ovanyali vaye va kapiwa ndociliatelo colomãi viaye.” (Va Heveru 10:12, 13) Omo liaco, ca sukilile oku talamẽla otembo yalua toke koku tukuluka kua Yesu. Otembo yaco, ya sulila eci Yehova Suku a vialeka Omãye Ndasoma Mesiya, ndeci a likuminyile. Okupisa opo, oco Kristu a tukuluka. Anga hẽ omanu va limbuka oku tukuluka kuaco?
2. Omanu ka va muile lovaso oku tukuluka kuaye. Ivaluka okuti, Yesu wa lombolola ondimbukiso yoku tukuluka kuaye. (Mateo 24:3) Momo lie Yesu a ecela ondimbukiso yimue, nda omanu ka va laikele oku mola oku tukuluka kuaye lovaso? Konomuisa ocindekaise eci: Sokolola okuti o yongola oku kũlĩha okalunga. Ove o kuama olondimbukiso vetapalo vi ku songuila toke oko. Eci o pitĩla konele yokalunga o tala oku sanjavala kuaco toke oku ku molẽha ndu okuti ilu lia litokeka lokalunga. Anga hẽ o lavoka oku mola ondimbukiso yimue yinene lolondaka viokuti “Okalunga” oco o tave okuti wa pitĩla? Sio! Momo lie o sukilila vali ondimbukiso yimue, nda ovaso ove a lete ale okalunga kaco?
Ondimbukiso Yesu a eca, ka ya muiwile lomanu, pole ya kuatisa omanu oku limbuka eci ca laikele oku pita kilu. Eye wa popia hati: “Usoma wa Suku ka wiya okuti vu moleha lovaso.” (Luka 17:20) Ondimbukiso yipi ya lekisa komanu palo posi oku tukuluka kua Kristu?
3. Oku tukuluka kua Yesu kua limbukiwila kohali yi kasi oku pita palo posi. Yesu wa popele okuti oku tukuluka kuaye Ndosoma kilu, ku limbukiwila kovoyaki, konjala, kovilemawe, kafengi kuenda kekambo liocisola palo posi. (Mateo 24:7-12; Luka 21:10, 11) Helie wa nena ohali yaco? Embimbiliya li lekisa okuti Satana “ombiali yoluali lulo,” o kasi lonyeño yalua momo wa kũlĩha okuti, tunde eci Usoma wa Kristu wa tumbikiwa, kuo kambela otembo yitito calua. (Yoano 12:31; Esituluilo 12:9, 12) Koloneke vilo, tua siata oku mola onyeño ya Satana kuenda oku tukuluka kua Kristu. Tunde kunyamo wo 1914, tua siata oku mola ovina vialua okuti kosimbu ka via kaileko.
Olondaka evi vi molẽha ndu okuti vi sumuisa, pole vi tu sanjuisa momo Usoma wa Mesiya u kasi ale oku viala kilu. Usoma waco ndopo uka viala oluali luosi. Oco hẽ nda omanu veya oku kũlĩha ndati Usoma waco oco va tave oku vialiwa lawo?
4. Upange woku kunda voluali luosi u lekisa oku tukuluka kua Yesu. Yesu wa popele okuti etukuluko liaye lia laikele oku kala ndeci ca pita “koloneke via Noha.”a (Mateo 24:37-39) Noha ka kaile lika utungi wocimbaluku, eye “wa sapula esunga” komanu. (2 Petulu 2:5) Noha wa lungula omanu okuti esombiso lia Suku lia kala ocipepi. Yesu wa sapuila olondonge viaye okuti vika lingavo upange woku lungula omanu vokuenda kuetukuluko liaye. Eye wa popele hati: “Ondaka eyi yiwa yusoma yi kutindilua kuoha koluali, ha yi lingi uvangi kolofeka viosi, oco esulilo liya noke.”—Mateo 24:14.
Ndomo tua ci mola ale vocipama ca pita, Usoma wa Suku uka kundula olombiali viosi violuali. Upange woku kunda weca komanu epuluvi lioku puluka kenyõleho kuenda oku tiamẽla Kusoma waco. Oco hẽ, o tambulula ndati epulilo li kuãimo?
O Tenda hẽ Usoma wa Suku Ndesapulo Liwa?
Yesu wa eca elavoko ka li sokisiwa poku kundila omanu. Noke yoku lueya kua Adama vocumbo Cedene, Yehova Suku wa likuminyile oku tumbika uviali u pondola oku kuatisa omanu vakuepokolo oku kuata omuenyo ko pui, una a sokiyile tunde kefetikilo lioluali. Ci tu sanjuisa calua oku kũlĩha okuti uviali waco wa tumbikiwa ale kilu. Ohuminyo yaco hayesandako, yocili!
Koloneke vilo, Osoma ya nõliwa la Suku yi kasi oku viala pokati kovanyali vaye. (Osamo 110:2) Voluali lulo lua litepa la Suku, Mesiya o kasi oku tẽlisa onjongole ya Isiaye, yoku sandiliya omanu va yongola oku kũlĩha Suku, kuenda oku u vumba “lespiritu locili.” (Yoano 4:24) Omanu vakuavitunga viosi, ci kale olohukũi ci kale olohuasi, vosi yavo va lalekiwa oku kuata omuenyo ko pui vemehi Liusoma wa Suku. (Ovilinga 10:34, 35) Tu ku laleka oku kakatela kelavoko liaco oco o kuate esumũlũho lioku vialiwa lusoma waco otembo yenda ño hũ!—1 Yoano 2:17.
[Atosi pombuelo yamẽla]
a Olondaka via Yesu vi kembulula eci Ambimbiliya amue a siata oku popia catiamẽla kondaka oku “tukuluka.” Ambimbiliya aco, a pitiya ondaka yaco hati, “oku iya,” “oku pitĩla,” ndu okuti etukuluko liaco li pita ño okatembo katito. Ivaluka okuti Yesu ka sokisile oku tukuluka kuaye lepuluvi Lietande, pole wa sokisa etukuluko liaye lotembo yo “koloneke via Noha.” Omo liaco, oku tukuluka kua Kristu ku lomboloka ovina via laikele oku pita vokuenda kuanyamo amue, okuti omanu ka va kapiko elungulo va tambula omo liasakalalo omuenyo.
[Elitalatu kemẽla 8, 9]
Asapulo ãvi tua siata oku yeva koloneke vilo ondimbukiso yovina viwa vi laika okuiya
[Ofoto ya Eciwa]
Uta: Ofoto yo U.S. Army