Nda Sanga Elembeleko Liesumuo Nda Kuata Tunde Vutila

Ulandu wa Lomboluiwa la Eusebio Morcillo

Kosãi Yenyenye Linene, Kunyamo wo 1993, nda endele oku nyula okayike ka velapo vofeka yetu. Nda nyula ocitumãlo caco, omo liepapatiso lia Mariví, mukãi wange, wa kala vokayike. Eci nda kala oku songola ocipito caco asongui vamue vo vokayike va ndi vanja sui-i. Osimbu sia fetikile oku lombolola esunga lieci ame la mukãi wange tua kalela pocitumãlo caco linga hu sapuili omuenyo wetu.

NDA citiwila kofeka yo Espanya keteke 5 liosãi ya Kupemba kulima 1954. Ame nduveli pokati komãla ecelãla. Manjange Mariví, wa kala omõla watatu. Inakulu yetu wa tu tekuila vetavo lio Katolika, kuenje toke etaili njivaluka ovina nda enda oku lingila Suku, otembo nda kala la inakulu yetu. Pole, vakuepata liange ka va kapeleko ovina viespiritu. Isietu wa enda oku veta calua Mãi, letu tumãla vaye. Nda kula lusumba kuenda nda sumuile calua poku mola ohali Mãi a tala.

Ovitangi nda pita lavio kosikola, via vokiya esumuo liange. Patele umue wa kala ulongisi kosikola, wa enda oku veta ovitue vietu vocimano, eci tu lueya etambululo limue. Ulongisi ukuavo wetavo, wa enda oku linga ukahonga lomãla vafeko. Alongiso amue o Katolika ndeci, ondalu yifelu, a ñokelele usumba walua. Noke nda liwekapo oku sumbila Suku.

Nda Ambatele Omuenyo Umue Ũvi

Omo sia kũlĩhĩle olonumbi Viembimbiliya, nda ambatele omuenyo umue ka wa sungulukile ndeci, oku linga ukahonga, ungangala, loku endaenda volonjo vioku piluka. Poku liyaka lomanu, nda enda oku va toma olomoko, oviwala viongalafa, kuenda ovina vikuavo vi lemeha. Ndaño sia lingile ungangala waco olonjanja vialua, utima wange wa enda oku ndi sakalaisa calua.

Noke nda kava loku ambata omuenyo waco, yu nda liwekapo oku endaenda kolonjo vioku piluka. Momo volonjo viaco, mua enda oku landisiwila olodroga. Ovina viaco ka via nyihile ombembua yovutima, puãi via ñokela lika esakalalo kuenda anguengue.

Ndaño sia sanjukilile ekalo liange, lopo nda vetiya manjange José Luis, lekamba liaye Miguel, oku ambatavo omuenyo waco. Amalẽhe valua ko Espanya va vetiyiwavo oku ambata omuenyo ũvi. Nda enda oku linga cosi oco ndi sange olombongo vioku landa olodroga. Kuenje lomue vali wa ndi sumbilile.

Yehova wa Ndi Yovola

Vokuenda kuotembo yaco, nda vangula olonjanja vialua lakamba vange okuti kuli Suku, kuenda nda va lekisa okuti omuenyo u kuete esilivilo. Nda yonguile oku sandiliya Suku kuenda omunu ndi sapuila ovisimĩlo viange. Nda limbuka okuti Francisco, ekamba liange liupange, wa kuatele ovituwa viwa. Eye wa sanjukile calua, haeye ukuacili, kuenda wonjukile, kuenje nda sapela laye. Francisco Ombangi ya Yehova, eye wa nyĩha Utala Wondavululi u lombolola eci catiamẽla kolodroga.

Noke yoku tanga ocipama caco, nda likutilila ku Suku siti: “A Ñala, ndi ci okuti ove o njevite kuenda ndi yongola oku ku kũlĩha. Ñuatise, ndinge ohenda!” Francisco kumue Lolombangi vikuavo Via Yehova, va ndi kuatisa lolonumbi Viembimbiliya kuenda alivulu akuavo. Nda limbuka okuti Suku wa tambulula epingilo liange. Kuenje nda fetika oku sapuilako akamba vange kuenda manjange José Luis ovina nda kala oku lilongisa.

Eteke limue, eci tua kala oku enda oku ka tala ovisikilo, nda litepa vendo liakamba vange. Nda limbuka ndomo atimba etu a honguele omo lioku nyua olodroga. Eci nda mola ndomo va sekukila, nda yeva osõi yalua omo liomuenyo tua kala oku ambata. Okupisa keteke liaco, nda nõlapo oku pongolola omuenyo wange, oco ndi linge Ombangi ya Yehova.

Nda pinga ku Francisco Embimbiliya pole eye wa nyĩhavo elivulu A Verdade Que Conduz à Vida Eterna.a Eci nda tanga olohuminyo viokuti Suku oka puenya asuelẽla loku imula olofa, nda limbuka okuti ocili ci pondola oku yovola omanu. (Yoano 8:32; Esituluilo 21:⁠4) Noke nda endele kohongele Vonjango Yusoma, Yolombangi Via Yehova. Ocisola va lekisa kokuange, ca ndi komõhisa calua.

Noke yovina nda mola Vonjango Yusoma, nda laleka José Luis kuenda akamba vange, kuenje nda va sapuila ovina nda yeva kohongele. Eci pa pita oloneke vimue, vosi yetu tua fetika oku endeanda kolohongele. Eteke likuavo eci tua endele kohongele, ufeko umue wa komõha calua poku tu mola Vonjango Yusoma. Eye wa mola okuti tua kala lesinga lia lepa calua, kuenda uwalo wetu ka wa sungulukile. Omo liaco, ka vanjele vali kokuetu. Pole, vosemana yikuavo ufeko waco wa komõha eci a tu mola vali Vonjango Yusoma, momo tua walele olofatu kuenda olongalavata.

Noke yotembo yimue nda endele la Miguel Kohongele Yimbo Yolombangi Via Yehova. Ocisola ca kala pakati kavo​—⁠akulu lomãla​—⁠ka tua la ci mola. Nda komõha calua eci nda mola okuti ohongele yaco ya kala oku lingiwila pocitumãlo tua enda oku talela olomiluko. Pole, ovisikilo lekalo lia kala kohongele yaco, via sanjuisa utima wetu.

Ocimunga cetu cosi ca fetika oku lilongisa Embimbiliya. Noke liolosãi, ecelãla keteke 26 Yevambi Linene kunyamo wo 1974, ame la Miguel tua papatisiwa. Otembo yaco, tua kuata eci ci soka 20 kanyamo. Eci pa pita olosãi vimue akamba vetu vakuãla, va papatisiwavo. Elilongiso Liembimbiliya, lia ndi vetiya oku kuatisa mãi kovopange o vonjo, loku u sapuilako elavoko liange. Kuenje tua linga akamba. Nda fetikavo oku kuatisa vamanjange valume lakãi.

Vokuenda kuotembo mãi kumue la manjange va lilongisavo Embimbiliya, va papatisiwa kuenda va linga Olombangi Via Yehova. Kunyamo wo 1977, nda kuela Soledad, ufeko una wa komõhele eci a tu mola Vonjango Yusoma onjanja yatete. Noke yolosãi vimue tua linga akundi va velapo, ndomo Olombangi Via Yehova vi tukula ava va kunda olondaka viwa otembo yosi.

Manjange wa Yovuiwa

Manjange Mariví, eci a kala omõla va enda oku linga laye ukahonga, kuenje ceya oku u kokela oku ambata omuenyo umue ka wa sungulukile, ndeci upuepue, oku nyua olodroga kuenda oku nyana. Eci a tẽlisa 23 kanyamo vo kapa vokayike kakãi, muna a kala otembo yalua.

Otembo yaco, nda kala oku nyula akongelo Olombangi Via Yehova. Kunyamo wo 1989, ame la Soledad tua nõliwa oku nyula akongelo a kasi ocipepi lokayike Mariví a kala. Eye ka yonguile vali oku kala komuenyo, momo olombiali via tambuile omõlaye. Eteke limue eci nda endele oku u pasuisa, ndo vetiya oku lilongisa Embimbiliya, kuenje wa tava. Eci pa pita osãi wa liwekapo oku nyua olodroga kuenda oku sipa. Ca ndi sanjuisa calua oku mola ndomo Yehova o kuatisa oku linga apongoloko aco.​—⁠Va Heveru 4:⁠12.

Noke yokatembo kamue, Mariví wa fetika oku sapuilako ocili Cembimbiliya omanu a kala lavo kuenda asongui vokayike. Ndaño wa enda oku sondoluiwa volokayike vikuavo, wamamako lupange woku kunda. Wa enda oku kundila olohondo viosi via kala vokayike. Omo liaco, Mariví wa fetika oku longisa Embimbiliya omanu valua va kala vokayike vokuenda kuanyamo.

Eteke limue Mariví wa ndi sapuila onjongole yaye yoku li tumbika ku Yehova kuenda oku papatisiwa. Eye wa kala vali eci ci pitahãla anyamo akuãla vokayike. Nye co kuatisa oku amamako lekolelo? Vokuenda kuotembo yaco, wa enda oku kuama esokiyo liovipama viosi violohongele. Eye wa enda oku lilongisa Embimbiliya kuenda oku likutilila.

Noke, Mariví wa ambatiwa vokayike ka velapo muna mua kala ociva. Kaliye ca tavele oku papatisiwa. Kuenda olombiali via ecelela okuti Mariví o papatisiwa. Ame nda linga ohundo yepapatiso liaye. Ame nda kala laye keteke lia velapo vali vomuenyo waye.

Omo liomuenyo ũvi Mariví ambatele, wa kuatiwa luvei wo SIDA. Kosãi Yelombo yunyamo wo 1994, wopiwa vokayike omo liovituwa viaye viwa. Eye wa tiukila konjo ku Mãi, kuenda wamamako oku kunda toke kolofa viaye noke yanyamo avali.

Nda Yula Ovisimĩlo Vĩvi

Nda kuatavo ovitangi omo liomuenyo nda ambatele. Ohali nda tala peka lia tate, lovina vĩvi nda enda oku linga vutila, via pongolola ekalo liange. Nda fetika oku livela kuenda sia li kuatelele vali ocisola, omo lioku nyumala calua. Pole, Ondaka ya Suku ya ñuatisa oku yuvula ovisimĩlo viaco. Oku sokolola olondaka vi sangiwa kelivulu lia Isaya 1:​18, kuenda Osamo 103:​8-13, ca ndi kuatisa oku yuvula esumuo liaco.

Olohutililo via ñuatisa oku siapo ovisimĩlo vioku lisepuisa. Nda siata oku lila eci ndi likutilila ku Yehova. Handi vali olondaka vi sangiwa kelivulu lia 1 Yoano 3:​19, 20 vi popia hati, “nda tu ci linga tu limbuka okuti tua tiamela kocili, kuenje tu tulila ovitima vietu kovaso aye, eci ovitima vietu vi tu veta evelo. Momo Suku wa piãla, ovitima vietu vi sule, kuenje eye wa kũlĩha cosi,” via ndi pamisa calua.

Poku amela ku Suku lutima “wa teka, haiwo wa samba” nda limbuka okuti sia kaile ño enene lãvi ndomo nda simĩle. Embimbiliya li lekisa okuti Yehova ka yanduluka vana va likekembela haivo va likolisilako oku linga ocipango caye.​—⁠Osamo 51:⁠17.

Ndaño olonjanja vimue ndi yeva esumuo, nda siata oku yukisa utima wange lovina viespiritu, via tukuiwa kelivulu lia va Filipoi 4:⁠8. Nda siatavo oku sokolola Osamo 23 kuenda Ohundo yo Komunda. Eci ndi kuata ovisimĩlo vĩvi, ndi tukula Ovisonehua viaco. Ovio via siata oku ndi kuatisa. Ca piãla enene nda si kuete otulo.

Nda siatavo oku kuatisiwa lepandiyo liukãi wange kuenda Akristão va pama kespiritu. Ndaño kefetikilo ca tĩlile calua oku tava kalungulo avo, Embimbiliya lia ñuatisa oku tava kocisola “ci vanjiliya uwa womanu.” (1 Va  Korindo 13:⁠7) Nda siata oku likolisilako oku limbuka okulueya kuange.

Alikolisilo ange oku yuvula ovisimĩlo ka via sungulukile, a ndi kuatisa oku kala o mitavaso yiwa koku nyula akongelo. Ame kumue lukãi wange tu kasi eci ci soka 30 kanyamo kupange woku kunda olondaka viwa Viusoma. Esanju ñuete lioku kuatisa omanu oku siapo ovisimĩlo vioku lisepuisa, li ndi kuatisavo oku limbuka okuti ovitangi viange vi sule.

Eci ndi sokolola asumũlũho Yehova a siata oku nyĩha, ndi vetiyiwa ndukualosamo wa popia hati: “Otima wange, sivaya Yehova . . . Eye ecela akandu ove osi. O sakula ovoveyi ove osi. O yovola omuenyo wove konjembo. O ku walisa ekolowa liocisola ka ci pui kuenda ohenda.”​—⁠Osamo 103:​1-4.

[Etosi pombuelo yemẽla]

[Elitalatu kemẽla 30]

Nda fetika oku livela kuenda sia li kuatelele vali ocisola, pole Ondaka ya Suku ya ñuatisa oku yuvula ovisimĩlo viaco

[Elitalatu kemẽla 27]

Manjange José Luis lekamba liaye Miguel, va setukula ovituwa viange vĩvi levi viwa

[Elitalatu kemẽla 28, 29]

Epata lia Morcillo kunyamo wo 1973

[Elitalatu kemẽla 29]

Mariví eci a kala vokayike

[Elitalatu kemẽla 30]

Lukãi wange, Soledad