Embimbiliya li Pongolola Omuenyo Womanu

Momo lie ukãi umue ka kolelele kosimbu etavo, kaliye a kasilili oku kuatisa omanu oku lilongisa ovina viatiamẽla ku Suku? Nye ca vetiya ulume umue wa solele omapalo viungangala oku kala ukuambembua? Ndamupi ulume umue wa enda oku nyua olodroga haeye wa kala oholua kuenda wa liyaka yaka lomanu volokololo, a pongoluila ekalo liaye lĩvi? Kũlĩhĩsa ulandu womanu vaco vocipama cilo.

Ulandu

Onduko: Penelope Toplicescu

Utunga: 40 Kanyamo

Ofeka a Citiwila: Australia

Esapulo: Ka Kolelele Vali Etavo

Ekalo Liange Kosimbu: Nda citiwila volupale luo Sydney, kofeka yo Australia, kuenje eci nda tẽlisa anyamo avali, ame lepata liange, tua ilukila ko Nova Guiné. Tua kala volupale luo Rabaul anyamo avali, kuenda anyamo ecelãla volupale luo Bougainville. Omo okuti vofeka yo Nova Guiné ka mua kaile o Televisãu, ame kumue la kota liange, tua enda oku pita otembo yalua oku liteva volui, kuenda oku iñila onutu vovava loku linga olomundo.

Eci nda kuata anyamo ecea, nda fetika oku lekisa onjongole ketavo. Omo okuti mãi yange wa kala vetavo lio Katolika, wa ndi peya oku iñila kosikola yimue olomandele via kala oku longisila Embimbiliya. Nda tiamẽlele ketavo lio Katolika, kuenje eci nda tẽlisa ekũi kanyamo nda papatisiwa.

Puãi, eci tua tiukila ko Australia, nda fetika oku kuata atatahãi lalongiso o vetavo liange. Osimbu nda kala kosikola, nda lilongisa esapulo lio kosimbu, kuenje tua enda oku sapela la tate ndomo etavo lia fetika, yu tua kuata ovisimĩlo viokuti, ovina vi sangiwa Vembimbiliya viuhembi. Noke, nda siapo etavo lio Katolika.

Eci nda tẽlisa 16 kanyamo, olonjali viange via litepa. Omo mãi wa kuata ovitangi vialua, ame nda enda konjo ku isia yange, okuti otembo yaco wa kala lukãi ukuavo. Pole, mume wange wa sialele la mãi, kuenje va ilukila kolupale lukuavo. Nda sumuile calua omo nda kala lika liange. Kuenje noke yanyamo avali, nda fetika vali oku kuata ukamba la mãi. Nda limba vuholua kuenda oku nyua olodroga, loku endaenda kayele. Eci nda kala lalima 20, nda liwekapo oku tangela kosikola, kuenda nda sanga upange, pole nda ambatele omuenyo umue wa vĩha.

Eci nda tẽlisa 25 kanyamo, nda fetika vali oku sokolola ovina nda lilongisa Vembimbiliya. Noke nda iñila kupange ukuavo, kuna nda sanga Liene, ufeko umue wa sanjuka calua okuti ndaño cime cetu wa enda oku u kelõhaila, eye lopo wa lekisa esumbilo kokuaye. Eci ndo pula esunga lieci a sumbilile cime cetu, eye wa ndi sapuila okuti, o lilongisa Embimbiliya Lolombangi Via Yehova, kuenda o kasi oku likolisila oku kapako olonumbi vialio. Liene wa fetika oku ndi longisa Embimbiliya. Nda simĩle okuti eye o yongola oku ndi longisa ovina viosi a kũlĩha viatiamẽla Kembimbiliya vonjanja yimosi. Eteke liaco luteke, Liene wa tambulula apulilo ange a tiamẽla Kembimbiliya vokuenda kuolowola vitatu. Nda komõha calua, ndomo a tambulula apulilo osi ndo linga lekuatiso Liembimbiliya.

Eci nda tiukila konjo noke lioku sapela la Liene, nda temẽla Suku omo ka ecelele okuti, ndi kũlĩha ovina viaco selo. Nda kũlĩhĩle okuti, Olombangi Via Yehova, omanu vamue vawa, kuenda nda simĩle okuti si pondola oku siapo ovituwa viange vĩvi. Nda simĩlevo okuti, si pondola oku kundila konjo lanjo, ndeci Olombangi Via Yehova via siata oku linga. Ndaño nda amamako oku lilongisa Embimbiliya Lolombangi Via Yehova, ocimãho cange ca kala lika oku sanga elongiso limue liuhembi oco ndi liwekepo oku lilongisa lavo. Eteke limue nda limbuka okuti si tẽla oku sanga uhembi laumue.

Ndomo Embimbiliya Lia Pongolola Omuenyo Wange: Ovina vialua nda lilongisa Vembimbiliya viatiamẽla kovituwa viwa, via fetika oku sakalaisa utima wange. Oco ndi kuate utima wa tula, nda liwekapo oku nyua olodroga. Pole, eci nda enda kofeka yikuavo, nda fetika vali oku litumbika kayele, kuenda kuholua. Olonjanja vimue, nda enda oku likolisilako oku kapako olonumbi Viembimbiliya, pole nda fetika vali oku ambata omuenyo wa vĩha. Poku likutilila ku Yehova nda enda oku kuata osõi omo liekalo liange, kuenda nda li tendele okuti, si sesamẽla oku likutilila kokuaye.

Eci nda lilongisa ovitangi Soma Daviti a kuata la Batisieva, kuenda ndomo Yehova a lekisa ohenda kokuavo, ca ndi kuatisa calua. Daviti eci a tambula elungulo omo liekandu a linga, wa litavela. Eye wa lekisa umbombe poku tava kelungulo a tambula. (2 Samuele 12:​1-​13) Olonjanja viosi, eci ndi lueya, nda enda oku sokolola ulandu wa Daviti, kuenda wa ndi vetiya oku likutilila ku Yehova loku pinga ongecelo. Ndaño nda enda oku likutilila noke yoku linga ekandu, pole, nda nõlapo okuti, osimbu sia lingile ekandu, ndi sukila oku likutilila, kuenje eci ca siata oku ndi kuatisa calua.

Ndomo Nda Kuatisiwa: Ndaño sia kuatele ovituwa viwa, haimo olondaka vi sangiwa kukanda wa va Efeso 4:​29-31, via ndi kuatisa oku yuvula ‘ocikumbiti lonyeño kuenda ekaka.’ Osimbu nda kala oku likolisilako oku lekisa esuluviko, nda fetika oku lava upopi wange poku sapela la vakuetu. Elungulo lia Yesu liokuti: “Oku popia kuene ku linge nda oco, oco,” lia ndi kuatisa oku nõla lutate ovina ndi yongola oku linga.​—⁠Mateo 5:⁠37.

Ndaño mãi ka solele Olombangi Via Yehova, eye wa ndi sapuila hati, wa sanjukila calua apongoloko nda linga. Eye wa ndi sapuila hati: “Ove kua lingile ukãi umue uwa omo liovina wa lilongisa vutila, olonumbi via Yehova ovio via ku kuatisa oku linga apongoloko aco.” Olondaka viaye via ndi nenela esanju lialua.

Cilo, nda limbuka okuti omuenyo wange u kuete esilivilo. Ame kumue lulume wange, tunde eci tua litumbika kupange wakundi votembo yosi, pa pita ale anyamo ecea. Nda siata oku kundila konjo lanjo, kuenda nda limbuka okuti, upange waco u nena onima ya velapo.

Ulandu

Onduko: Denis Busigin

Utunga: 30 Kanyamo

Ofeka a Citiwila: Russia

Esapulo: Wa Solele Calua o Karate

Ekalo Liange Kosimbu: Nda citiwila ko Perm, kuenda nda kulila ko Furmanov, olupale lumue lu kuete eci ci soka 40.000 komanu, lu sangiwa kocivanja co Ivanovo kofeka yo Russia. Olupale luo Furmanov, lu kuete oviti via posoka calua okuti, pokuenye amẽla aco a kuete evala liungolo, kuenda ponjovo a kusuka. Oku upisa kunyamo wa 1980 toke 1990, volupale luaco, mue yukile evĩho lialua. Epata liange lia kala vonjo yimue yitito calua. Ndaño okuti onjo yaco ya sukatela, omo tua kala lolonjali viange kuenda manjange.

Eci nda tẽlisa anyamo epanduvali, nda iñila kosikola yo karate. Nda solele calua omapalo yaco. Nda enda oku kala otembo yalua vonjo yolomapalo kumue lakamba vange. Eci nda tẽlisa anyamo 15, nda tambula uvia ukusuka, kuenda noke, nda tambula uvia ukuavo wevala livumbula. Nda pangele onepa kocisoko ca va kuakarate kofeka yo Russia, kuenda ko Eurásia. Nda lavokaile oku kuata ekalo liwa, pole eci nda tẽlisa anyamo 17, omuenyo wange wa pita lapongoloko anene.

Ame kumue lakamba vange, tua linga ungangala, kuenje tua kuatiwa. Noke, nda kala vokayike ci soka anyamo avali. Ka ca lelukile oku kala vokayike. Nda mola Embimbiliya onjanja yatete, eci nda kala vokayike. Nda tanga elivulu Liefetikilo, leli Liolosamo, kuenda Otestamento Yokaliye. Nda simĩle okuti oku patekela ohutililo Yesu a longisa yokuti, a Isietu Wokilu, kuenda oku yi pitolola koñolosi osimbu sia pekelele, ci ndi kuatisa.

Kunyamo wo 2000, nda tunda vokayike, pole sia kuatele ocimãho lacimue vomuenyo wange. Kuenje nda fetika oku nyua olodroga. Otembo yaco, oco mãi yange a fa. Omo ame ndo solele calua, ka ca lelukile oku liyaka locitangi caco. Pole, nda kuata onjongole yoku siapo olodroga, yu nda fetika vali oku endaenda konjo yolomapalo vio karate. Noke, nda ilukila kolupale luo Ivanovo. Kuenje nda sanga upange vonjo yolomĩlu. Usongui wonjo yaco, ukãi umue okuti Ombangi ya Yehova. Eye, wa ndi sapuila ovina vimue via velapo viatiamẽla Kembimbiliya, kuenje wa sokiya okuti manji ukuavo o lilongisa lame Embimbiliya.

Ndomo Embimbiliya Lia Pongolola Omuenyo Wange: Osimbu nda kala oku lilongisa Embimbiliya, nda vetiyiwa calua poku kũlĩha ocipango ca Suku coku pongolola oluali okuti lu linga luokaliye, kuenda ndi yongola oku kala voluali luaco. Noke, nda limbukavo okuti Yehova Suku, o kuete olonumbi via velapo kuenda o yongola okuti omanu va vi pokola. Nda pita otembo yalua loku tẽlisa lika olonjongole viange. Ame nda lilongisa okuti, Yehova o yongola okuti, ndi kapako vakuetu loku lekisa ovituwa vina sia kuatele kosimbu ndeci, ohenda, ocisola, kuenda ombembua.

Oku sokolola ovina Yehova a ndi lingila poku eca Omõlaye ndocisembi ha ndi yovola kekandu, ca ndi vetiya oku lekisa olopandu kocisola ca Suku loku linga apongoloko komuenyo wange. Osamo 11:​5, ya ndi longisa okuti, Yehova ka sole ungangala. Kuenje, nda liwekapo oku tala ovina vi vetiya ungangala vo Televisãu loku vi suvuka. Ndaño ka ca lelukile, nda likolisilako oku siapo olomapalo viungangala. Olondaka vi sangiwa kukanda wa 1 va Korindo 15:​33, via ndi kuatisa oku limbuka okuti, akamba vange va ponduile oku ndi vetiya oku linga ovina ka via sungulukile. Eli olio esunga lieci va ndi kapelele vokayike. Kuenje nda liwekapo oku enda lakamba va sole olomapalo viungangala.

Ndomo Nda Kuatisiwa: Oku kala kala kumue Lolombangi Via Yehova, loku lilongisa Embimbiliya, ca ndi kuatisa oku linga ukuacili. Ukanda wa va Heveru 13:​5, wa ndi lekisa esilivio lioku sanjukila ovina ndi kuete, kuenda oku yuvula oku sola olombongo. Oku kapako elungulo liaco, ca ñuatisa oku yuvula uhembi loku nyana.

Nda velisilepo calua akamba vange. Pole, kosimbu nda nyõlele ukamba lomanu omo liocipululu. Ocili okuti Olombangi Via Yehova ka via lipuile, pole nda lilongisa okuti, via kapako olonumbi via Suku, kuenda via siata oku pokola kalungulo, poku kala la vakuavo. Kaliye ndi kuete akamba vocili pokati Kolombangi Via Yehova.

Nda sia lilongisile Embimbiliya, loku pokola kolonumbi vialio, nda sia kũlĩhĩle ndomo omuenyo wange u kasi cilo. Pamue nda nda kapiwa vali vokayike, ale nda nda kokela omanu ohali lovitangi. Kaliye nda kuela ukãi umue ndi sole calua, una ndi kuete laye omãla vavali, kuenje vosi yetu vepata tua sanjukila oku kuatisa omanu oku kũlĩha ovina viatiamẽla ku Suku.

Ulandu

Onduko: José Carlos Pereira da Silva

Utunga: 31 Kanyamo

Ofeka a Citiwila: Brazil

Esapulo: Wa Enda Oku Litĩla Lomanu Volokololo

Ekalo Liange Kosimbu: Nda kulila vosanjala yimue ya liña calua yi tukuiwa hati Americana, volupale luo São Paulu. Ka mua kaile ovava a yela oku nyua, ndaño olokalete. Vosanjala yaco, mua kala ungangala walua kuenda umbandi.

Nda kula lungangala kuenda nda kala onjaki. Nda enda oku litĩla lomanu volokololo, kuenje valua posongo yetu va ndi kuatelele usumba. Uwalo wange, wa enda oku vetiya omanu oku ndi kuatela usumba. Nda enda oku nyua calua toke eci ndi kolua. Nda nyua nyua olodroga nda kota liange. Umue pokati ka va kota liange omo lioku nyua calua olodroga, wa fa.

Ndomo Embimbiliya Lia Pongolola Omuenyo Wange: Eci nda li sanga Lolombangi Via Yehova, via ndi lekisa Vembimbiliya okuti, Suku o ka pongolola ilu lieve ha li lingi ofeka yokaliye. (Luka 23:​42, 43; Esituluilo 21:​3, 4) Nda lilongisavo okuti, ava va fa, ka va kũlĩhĩle vali cimue, kuenda Suku ka kangisa olondingaĩvi vondalu yifelu. (Ukundi 9:​5, 6) Elongiso liaco, lia ndi lembeleka calua. Ovina nda lilongisa viatiamẽla ku Suku, via ndi vetiya oku pongolola omuenyo wange. Ka ca lelukile oku siapo olodroga, oku nyua calua, oku liyaka lomanu kuenda upopi ka wa sungulukile.

Pole, olondaka viupostolo Paulu vi sangiwa kukanda wa 1 va Korindo 6:​9-11, via ndi kuatisa calua. Ovinimbu viaco, vi lombolola ovituwa vĩvi Akristão vo kocita catete va kuata, okuti ovio nda kuatelevo. Pole, ovinimbu viaco vi popiavo hati: “Vamue pokati kene, osimbu, wa kaili lovituwa viaco. Puãi, wa sukuiwi, wa lingiwi olosandu kuenje wa tendiwi nda vakuesunga vonduko ya Ñala Yesu Kristu lo [vespiritu] lia Suku yetu.” Olondaka evi, via nyĩha elavoko liokuti nda ponduilevo oku linga apongoloko komuenyo wange, oco ndi sanjuise utima wa Suku.

Eci nda fetika oku kuata ukamba Lolombangi Via Yehova, nda limbuka okuti vakuetavo liocili. Ndaño ovo va kũlĩhile ovituwa nda kuatele kosimbu, va ndi yolela lesanju kuenje nda linga ekamba liavo.

NDOMO NDA KUATISIWA: Nda sia tavele oku lilongisa Embimbiliya, loku linga apongoloko komuenyo wange, pamue nda si kasi vali lomuenyo. Oku kuatisa kota liange oku lilongisa Embimbiliya loku siapo olodroga, ca ndi nenela esanju liocili. Nda siata oku vetiya vakuepata liange oku lilongisa Embimbiliya. Ngeca olopandu omo lioku litumbika kupange wa Suku, una wa siata oku tu kuatisa!

[Etosi Lia Velapo kemẽla 9]

“Nda nõlapo okuti, osimbu sia lingile ekandu, ndi sukila oku likutilila, kuenje eci ca siata oku ndi kuatisa calua”