Ocisoko 123 Ca Vamanji Va Pindisiwa
Kosikola Yo Gileada Va Vetiyiwa Oku “Fetika Oku Fẽla”
KUNYAMO wo 2007 keteke 8 Yenyenye Linene Casapalo, ci soka 6.352 komanu va tunda kueci ci soka 41 kolofeka, va kala kohongele yoku malusula ocisoko 123 Cosikola yo Gileada. Kowola ye 10:00 komẽle, manji Anthony Morris, usongui wovipama haeye watiamẽla Kosungu Yakulu Yolombangi Via Yehova, wa yolela omanu vosi va kala kohongele yaco. Noke liolondaka vioku fetika, wa vilikiya manji Gary Breaux, Ukuacisoko Cakulu Vombetele ko Estados Unidos, wa linga ohundo yatete.
Manji Breaux, wa vetiya olondonge hati, ka va sukila oku sakalala calua leposo lio ketimba, momo vana va kasi oku linga ocipango ca Yehova, va posoka kovaso Aye. (Yere. 13:11) Eye wa va vetiya oco vamameko leposo liaco. Noke, manji Gerrit Lösch, watiamẽla Kosungu Yakulu Yolombangi Via Yehova, wa popia hati, ca sunguluka oku lavoka onima, nda tu kasi oku vumba Yehova. (Va Hev. 11:6) Pole, tu sukila oku vetiyiwa locisola co vutima.
Manji William Samuelson, mitavaso Yoseketa Yosikola Yupange Wakristão, wa vetiya olondonge oku sumbila ocikele cavo coku sapula eci catiamẽla ku Soma wa viala, kuenda oku lekisa ovituwa viavo viwa.a Manji Sam Roberson, oñuatisi ya mitavaso Yoseketa Yosikola Yupange Wakristão, wa vetiyavo olondonge oco vi kapeko ovituwa viwa via vakuavo. Momo nda va ci linga, ci va kuatisa oku ‘sola vakuavo.’—1 Pet. 2:17.
Noke liolohundo viaco vievetiyo, manji Mark Noumair, ulongisi wosikola yo Gileada, wa pulisa vamanji vamue va pindisiwa kosikola yaco, oco va lombolole ovolandu va kuata kupange woku kunda vokuenda kuosikola yo Gileada. Ovolandu avo a kuatisa vosi va kala vohongele yaco, oku limbuka ocisola va kuetele upange woku kunda, kuenda onjongole yavo yoku kuatisa omanu. Manji Kent Fischer, o talavaya Voseketa Yombetele ko Patterson, wa pulisa vamanji vamue Vakuacisoko Cakulu Volombetele va tunda kolofeka vitatu kuli olomisionaliu. Olondaka viavo via vetiya omanu vosi oku kongelamo olonjali violomisionaliu, oku kũlĩha okuti ava va pindisiwa kosikola noke yoku tambula ovikele viavo vaka kuatisiwa ciwa kolofeka va tumiwa. Manji Izak Marais, o talavaya Voseketa yoku Pongolola Alivulu Valimi Akuavo, wa pulisa vamanji vamue va kasi kupange wumisionaliu anyamo alua. Ovolandu avo, a vetiya vamanji va pindisiwa kosikola oku limbuka esanju li tunda kupange waco.
Manji Geoffrey Jackson, watiamẽla Kosungu Yakulu Yolombangi Via Yehova, wa linga ohundo yavelapo losapi hati: “Noke Liovina Viosi wa Yevi, Nye Uka Linga?” Manji Jackson, una wa kala omisionaliu Kombuelo yo Pasifiku ci panda 25 kanyamo, wa linga ohundo yatiamẽla kolondaka via sulako viohundo Yesu a Lingila Komunda. Yesu vohundo yaco, wa tukula alume vavali va tunga olonjo okuti, umue wa lunguka, ukuavo ka lungukile. Manji wa lombolola okuti, olonjo viaco via tungiwila pocitumãlo cimuamue. Ulume una ka lungukile, wa tungila onjo yaye veseke, osimbu okuti una wa lunguka, wa fẽla toke vohanda, kuenje wa kapako ociseveto conjo yaye. Eci ombela yeya lofela, onjo ya tungiwa vohanda ka ya kupukile, pole, yina ya tungiwila veseke ya teka.—Mat. 7:24-27; Luka 6:48.
Yesu wa lombolola okuti, vana va yevelela ovina a longisa, pole ka va vi kapiko va sokisiwa lulume una ka lungukile. Vana va yevelela kuenda va kapako ovina Yesu a longisa, va sokisiwa lulume wa lunguka. Manji Jackson, wa sapuila olondonge via pindisiwa kosikola hati: “Kupange wene wumisionaliu nda wa kapiko olonumbi Viembimbiliya wa lilongisi, uka sokisiwa ndulume wa lunguka.” Poku malusula ohundo yaye, wa vetiya olomisionaliu oco vi ‘fetike oku fẽla’ kolofeka va tumiwa.
Noke, olondonge via tambula ovikanda viavo viuvangi mua sonehiwa olonduko violofeka oku va tumiwa, kuenje Manji Morris poku malusula ohongele, wa lombolola olondaka vimue vielungulo. Eye wa malusula ohongele yaco poku vetiya olondonge oco viamameko oku kuama Yesu kuenda oku kolela okuti Yehova oka va ĩha ongusu.
[Etosi pombuelo yemẽla]
a Oseketa Yosikola Yupange Wakristão, lekuatiso Liocisoko Celongiso, oyo yi songuila Osikola yo Gileada, losikola Yocisoko Cakulu Volombetele, kuenda osikola yakulu va nyula akongelo.
[Elitalatu kemẽla 31]
ULANDU WOCISOKO CACO
Etendelo liolofeka viava va kala kohongele: 10
Etendelo liolofeka va tumiwa: 24
Etendelo liolondonge: 56
Anyamo va kuete: 33.5
Otembo va kasi vocisoko ca Yehova: 17.9
Anyamo va kasi kupange wotembo yosi: 13.8
[Elitalatu kemẽla 32]
Ocisoko 123 ca Vamanji va Pindisiwa Kosikola yo Gileada
Ulala wolonduko vikuãimo, u fetikila kepĩli, kuenda u sulila kondio okupisa kulala watete toke wa sulako.
(1) Esparza, E.; Papaya, S.; Bilal, A.; Suárez, M.; Evers, E.; Dimichino, K. (2) Rosa, M.; Fujii, R.; Ratey, O.; Leveton, J.; Van Leemputten, M. (3) Boscaino, A.; Beck, K.; Budanov, H.; Braz, C.; Peltz, K.; Siaw, A. (4) Leveton, S.; Santikko, H.; Conte, S.; Wilson, J.; Rylatt, J.; Pierce, S.; Fujii, K. (5) Rosa, D.; Boscaino, M.; Austin, V.; Rodiel, P.; Bilal, P.; Dimichino, P. (6) Ratey, B.; Czyzyk, D.; Clarke, C.; Riedel, A.; Esparza, F.; Siaw, P.; Van Leemputten, T.(7) Rodiel, J.; Evers, J.; Green, J.; Czyzyk, J.; Santikko, M.; Rylatt, M. (8) Peltz, L.; Austin, D.; Riedel, T.; Beck, M.; Pierce, W.; Conte, S.; Green, S. (9) Suárez, J.; Clarke, J.; Papaya, S.; Budanov, M.; Wilson, R.; Braz, R.