Ocipito Coku Malusula Osikola Yo Gileada Yocisoko 125
Olomisionaliu Via Vetiyiwa Oku Kuama Ongangu Ya Yeremiya
MANJI Geoffrey Jackson watiamẽla Kosungu Yakulu Yolombangi Via Yehova, wa popia hati, “ocisoko eci co Gileada, ci kala ndonjivaluko.” Eye wa tiamisila olondaka viaye kueci ci soka 6.156 komanu va kala kocipito coku malusula Osikola yo Gileada yocisoko 125 ca lingiwa keteke 13 kosãi Yenyenye Linene yunyamo wo 2008. Ocisoko caco ca kuata eci ci soka 56 ya vamanji va pindisiwa. Cilo Osikola yo Gileada ya pindisa ale ci soka 8.000 kolomisionaliu via tumiwa “toke kasulilo okilu lieve.”—Ovil. 1:8.
Manji Jackson okuti eye wa songola ohongele yaco, wa pula hati: “Anga hẽ, uka koleliwa lomanu kupange wene woku kunda?” Noke wa tukula ovina vikuãla vi vetiya omanu oku kuata ekolelo liaco: oku kuata ovituwa viwa, oku eca ongangu yiwa, oku longisa eci ci kasi Vondaka ya Suku, kuenda oku tiamisila utima koku kemãlisa onduko ya Yehova.
Manji David Schafer watiamẽla Kocisoko Celongiso, wa linga ohundo losapi hati: “Anga hẽ Uka Kuata Elomboloko Liovina Viosi?” Eye wa sapuila vamanji va pindisiwa Kosikola yo Gileada hati, oco u “kuate elomboloko liovina viosi” vi sukiliwa kupange wumisionaliu, u sukila oku amamako oku sanda Yehova kuenda oku limbuka ocisoko ‘cukuenje wa kolelua haeye wa lunguka.’—Olosap. 28:5; Mat. 24:45.
Noke Manji John E. Barr watiamẽla Kosungu Yakulu Yolombangi Via Yehova, wa linga ohundo losapi hati, “Kuka Eceleli Lacimue Oku ku Tepi Kocisola ca Suku.” Eye wa lombolola kolondonge kumue lapata avo ovitangi olomisionaliu vi pondola oku liyaka lavio kovikanjo va tumiwa. Eye wa lombololavo okuti, “oku kala vocisola ca Suku, ci tu kuatisa oku kuata ekavuluko komuenyo.” Lacimue ci pondola oku tepa olomisionaliu kocisola ca Suku te lika nda va siapo oku vumba Suku.
Manji Sam Roberson o talavaya Koseketa yi Songuila Olosikola viosi vi Lingiwila ko Partterson, wa vetiya olonjeveleli oku wala “uwalo wa posoka.” Poku lilongisa ovina Yesu a linga kuenda oku vi tiamisila kokuavo, va pondola oku ‘wala Ñala Yesu Kristu.’ (Va Rom. 13:14) Noke manji William Samuelson mitavaso Yoseketa yi Songuila Olosikola viosi vi Lingiwila ko Partterson, wa lombolola ovina omunu a sukila oku linga oco a sumbiwe la vakuavo. Omanu havoko va eca esumbilo liaco, pole, Suku eye o tenda omunu okuti wa sumbiwa.
Manji Michael Burnett, umue pokati kalongisi wa pulisa olondonge vimue oco va lombolole ovolandu avo atiamẽla kupange woku kunda. Ndaño okuti osimbu olondonge via kala Kosikola yo Gileada ko Patterson, kolupale luo Nova York, via tumiwa oku talavaya vocikanjo cina okuti va siata oku kundilamo calua, pole, va sangamo omanu va lekisa onjongole kolondaka viwa. Manji Gerald Grizzle watiamẽla Koseketa Yolohongele Viofeka, wa pulisa vamanji vatatu va pindisiwa Kosikola Yocisoko Cakulu vo Filiale. Ovolandu avo a kuatisa vamanji va pindisiwa Kosikola yo Gileada oku kũlĩha upange vaka linga kolofeka kuna va tumiwa.
Manji David Splane watiamẽla Kosungu Yakulu Yolombangi Via Yehova okuti wa pindisiwa kocisoko 42 Yosikola yo Gileada, wa linga ohundo losapi hati, “Kuama Ongangu ya Yeremiya.” Ndaño Yeremiya wa kuatele ohele locikele caye, pole, Yehova wo pamisa. (Yer. 1:7, 8) Suku oka pamisavo olomisionaliu viokaliye. Manji Splane wa popia hati, “Nda okuete ocitangi lomunu umue, tumala posi, noke soneha ovituwa vi soka ekũi vina ove o sole komunu waco. Nda kua tẽlele oku vi soneha, ci lekisa okuti kua kũlĩhĩle ciwa omunu waco.”
Yeremiya wa likolisilako. Eci a yonguile oku siapo upange waye woku kunda, wa likutilila kuenje Yehova wo kuatisa. (Yer. 20:11) Manji Splane wa sapuila olomisionaliu hati, “Eci u yeva esumuo, likutilili ku Yehova. Uka komõha ndomo Yehova aka ku kuatisi.”
Kesulilo liohongele, usongui wa ivaluisa olonjeveleli okuti, vamanji va pindisiwa ndeti kosikola yo Gileada, va lilongisa olonjila vialua vi va kuatisa oku koleliwa lomanu. Osimbu vamamako lupange wavo woku kunda, leci omanu va limbuka okuti va pondola oku kolela kokuavo, esapulo liavo lika eca onima yiwa.—Isa. 43:8-12.
[Olondaka vielitalatu kemẽla 22]
ULANDU WOCISOKO CACO
Etendelo liolofeka kua tunda olondonge: 6
Etendelo liolofeka va tumiwa: 21
Etendelo liolondonge: 56
Etendelo lia sokamo lianyamo avo: 32.9
Etendelo lia sokamo lianyamo va kasi vocisoko ca Yehova: 17.4
Etendelo lia sokamo lianyamo va kasi kupange wotembo yosi: 13
[Elitalatu kemẽla 23]
Ocisoko 125 ca Vamanji va Pindisiwa Kosikola yo Gileada
Ulala wolonduko vi kuãimo, u fetikila kepĩli, kuenda u sulila kondio okupisa kulala watete toke wa sulako.
(1) Hodgson, A.; Wall, A.; Beerens, K.; Hortelano, M.; Newman, L.; De Caso, A. (2) Jenkins, J.; Jarzemski, T.; Méndez, N.; Corona, V.; Canalita, L. (3) Fryer, H.; Savage, M.; Tidwell, K.; Erickson, N.; Dyck, E.; McBeath, R. (4) Perez, L.; Puse, L.; Skidmore, A.; Young, B.; McBride, N.; Rondón, P.; Goodman, E. (5) Beerens, M.; Ferguson, J.; Pearson, N.; Chapman, L.; Wardle, J.; Canalita, M. (6) Perez, P.; De Caso, D.; Young, T.; Rondón, D.; Goodman, G.; Jenkins, M.; Dyck, G. (7) Corona, M.; Wall, R.; Puse, S.; Méndez, F.; Jarzemski, S.; Savage, T. (8) Newman, C.; Ferguson, D.; Skidmore, D.; Erickson, T.; McBride, J.; Pearson, M.; Chapman, M. (9) Hodgson, K.; Wardle, A.; McBeath, A.; Tidwell, T.; Fryer, J.; Hortelano, J.