Olohuela Kuenda Ocikele Coku Kala Onjali Koloneke Vilo Via Sulako

“Oloneke via tu tukuiwila via linga vimbumbulu.”​—⁠1 VA KOR. 7:⁠29.

1. (a) Ovina vipi via kongeliwa ‘vohali yo koloneke’ via sulako? (b) Momo lie tu kuetele esakalalo lovitangi via siata vepata?

ONDAKA ya Suku ya popele okuti, ‘kotembo yesulilo,’ kuka kala ovoyaki, ovilemawe, onjala, kuenda afengi. (Dan. 8:​17, 19; Luka 21:​10, 11) Embimbiliya lia lungula okuti, kotembo yaco, voluali muka pita apongoloko alua. Ovitangi viepata, viatiamẽlavo ‘kohali yo koloneke via sulako.’ (2 Tim. 3:​1-4) Momo lie apongoloko aco a kuetele esilivilo kokuetu? Momo, ovitangi viaco via lisanduila kolonepa viosi kuenda vi vetiya Akristão oku kuata ovisimĩlo vĩvi viatiamẽla kolohuela kuenda kocikele coku kala onjali. Ndamupi?

2. Omanu voluali va tenda ndati olohuela loku li tepa kuolohueli?

² Koloneke vilo, oku litepa kuolohueli kua livokiya calua, kuenda kua li sanduila kolofeka vialua voluali. Pole, tu sukila oku ivaluka okuti, ocisimĩlo ca Yehova Suku catiamẽla kolohuela kuenda koku litepa kuolohueli ca li tepa lovisimĩlo violuali. Cipi ocisimĩlo ca Suku?

3. Yehova la Yesu Kristu va tenda ndati olohuela?

³ Yehova Suku o yongola okuti, olohueli viosi viamamako lohuminyo yavo yolohuela. Eci Yehova a tokekisa ulume wa tete lukãi watete volohuela, wa popia hati: “Ulume o . . . litokeka lukãi waye, kuenje va linga etimba limuamue.” Yesu Kristu wa pitulula olondaka viaco kuenda wa popia hati: “Eci ca tokekisa Suku omunu ka ka ci tepe.” Noke wamisako hati: “Wosi o nyala ukãi waye, nda halondaka yoku pekelisako, kuenje o kuela ukãi ukuavo, o linga [ukahokolo].” (Efet. 2:24; Mat. 19:​3-6, 9) Omo liaco, Yehova la Yesu, va yongola okuti olohuela viamamako kuenda vi sulila lika nda umue pokati kavo wa fa. (1 Va  Kor. 7:​39) Omo okuti olohuela eliangiliyo limue li kola, ka ca sungulukile oku vi tepa. Embimbiliya li lekisa okuti Yehova Suku o nyale ava va tepa olohuela viavo lovitangi vimue ka vi kuete uvangi Wondaka yaye.a​—⁠Tanga Malakiya 2:​13-16; 3:⁠6.

Ocikele Coku Tata Olohuela

4. Momo lie amalẽhe vamue Akristão va siatela oku livela noke yolohuela?

⁴ Omanu voluali lulo lua vĩha, va tiamisila lika ovisimĩlo viavo kukahonga. Oloneke viosi tua siata oku mola oviluvialuvia via vĩha. Ovio, vi pondola oku nyola olondunge vietu, capiãla enene amalẽhe va sangiwa vekongelo. Amalẽhe va pondola ndati oku tamalãla lovina viaco vĩvi vi vetiya oloñeyi vioku lipekela ndaño va seteka oku vi yuvula? Vamue va siata oku seteka oku vi yuvula poku kuela selo ndaño ka va pitilile vutunga waco. Ovo va sima okuti, nda va ci linga va yuvula oku wila vukahonga. Pole, valua pokati kavo noke liolohuela va siata oku livela omo lionjila va nõla. Momo lie? Momo noke yoku kuela, oloñeyi vietimba vi tepuluka kuenje va limbuka okuti, ka va kuete ovimaho vimuamue lomunu va likuela laye. Kuenje, olohueli viaco vi liyaka lovitangi vialua.

5. Nye ci kuatisa olohueli oku pamisa ohuminyo yavo yolohuela? (Tanga etosi pombuelo yemẽla.)

⁵ Oku likuela lomunu umue ka lekisa ovituwa ukuavo a lavokaile, ci nena ovitangi ndaño Ukristão. (1 Va  Kor. 7:​28) Akristão vocili va kũlĩha okuti, nda ka pali onumbi yovisonehua, ka citava oku tepa olohuela viavo ndaño lovitangi. Omo liaco, vana vamamako oku pamisa ohuminyo yolohuela viavo, va sesamẽla epandiyo kuenda ekuatiso lia vamanji vekongelo.b

6. Amalẽhe Akristão va sukila oku tenda ndati elavoko lioku kuela?

⁶ Ove hẽ umalẽhe umue ka kuelele handi? Nda oco, o tenda ndati omunu oka likuela laye? Nda wa kevelela toke eci o kula ketimba lo kolondunge, kuenda kespiritu osimbu kua fetikile handi oku namulãla la umue Ukristão, o pondola oku yuvula ovitangi. Ovisonehua ka vi tukula anyamo omunu a sukila oku kuata oco a kuele.c Pole, Embimbiliya li lekisa okuti, omunu o sukila oku kevelela toke eci a kuata utunga una okuti oloñeyi vioku lipekela via tepuluka. (1 Va  Kor. 7:​36) Momo lie? Momo oloñeyi viaco vi nyola ovisimĩlo lolondunge viove kuenda vi ku vetiya oku nõla onjila yi ku nenela ovitangi. Ivaluka okuti, elungulo lia Yehova li sangiwa Vembimbiliya liatiamẽla kolohuela, li pondola oku ku kuatisa kuenda li nena esanju.​—⁠Tanga Isaya 48:​17, 18.

Ocikele Colonjali

7. Nye ca siata oku pita lamalẽhe va kuela selo, kuenda ovitangi vipi va siata oku liyaka lavio?

⁷ Vamue omo lioku kuela selo, va linga olonjali osimbu okuti amalẽhe calua. Ovo ka va kuatele otembo yoku li kũlĩha ciwa osimbu ka va kuatele oñaña yi sukila oku tatiwa ciwa olowola viosi. Eci yi citiwa, ukãi o fetika oku tiamisila utima koñaña, kuenje ulume o sima okuti, ka soliwe vali. Oku pita uteke wosi loku tata oñaña, okuti olonjali ka vi pekela, ci nena ekavo kuenda ci kapa ukamba wavo kohele. Noke, va fetika oku sumua loku sima okuti elianjo liavo li kasi oku tatekiwa. Omo lioñaña va kuete, ka va pondola vali oku enda kovitumãlo vimue loku linga ovina va yongola. Va tenda ndati epongoloko liaco?

8. Olohueli vi tenda ndati esumũlũho lioku cita omãla kuenda momo lie?

⁸ Ndeci olohuela vi sukila oku tatiwa lonjila ya sunguluka, haico ci pita lolohueli vi kuete omãla. Ovio vi sukila oku tenda esumũlũho liaco ndombanjaile ya eciwa la Suku. Eci olohueli vi liyaka lapongoloko eyilila koku cita oñaña, va sukila oku likolisilako oku endisa ciwa ovikele viavo. Omo okuti, Yehova wa eca komanu uloño woku cita omãla, olonjali vi sukila oku tenda oñaña ‘ndocipiñalo ca eciwa Laye.’ (Osa. 127:⁠3) Akristão olonjali, va likolisilako oku tẽlisa ovikele viavo ndomo ca sunguluka “vu Kristu.”​—⁠Va Efe. 6:⁠1.

9. (a) Nye ca kongela voku tata omõla? (b) Nye ulume a sukila oku linga oco ukãi waye amameko oku pama kespiritu?

⁹ Voku tekula omãla mua kongela oku likolisilako vokuenda kuanyamo alua. Vocikele caco mua kongela oku pesela otembo longusu. Ulume o sukila oku kũlĩha okuti, ukãi waye noke lioku cita, o pita anyamo alua okuti ka yevelela ciwa ovipama vi lingiwa kolohongele kuenda ka kuata otembo yoku linga elilongiso Liembimbiliya pokolika loku sokolola eci a lilongisa omo lioku tata oñaña. Ocitangi caco, ci tepulula ukamba waye la Yehova. Omo liaco, ulume o sukila oku likolisilako oku eca ekuatiso koku tata omõla. Omo liovipama ukãi a pumba kohongele, ulume waye o sukila oku u kuatisa poku sapela laye konjo catiamẽla katosi amue a tukuiwa. O sukilavo oku eca ekuatiso liaye koku tata oñaña, oco ukãi waye a kuate epuluvi lioku kunda olondaka viwa Viusoma.​—⁠Tanga Va Filipoi 2:​3, 4.

10, 11. (a) Omãla va pindisiwa ndati ‘lovilongua via’ Yehova? (b) Momo lie Akristão vamue olonjali va sesamẽlela epandiyo?

¹⁰ Vocikele coku kala onjali, mua kongela oku eca okulia, uwalo, onjo yoku kala, oku tata uhayele, kuenda ovina vikuavo. Koloneke vilo via sulako, amalẽhe va sukila oku lilongisa olonumbi viwa tunde vutila oco vi va kuatise. Olonjali vi sukila oku ‘longisa omãla loku va pindisa lovilongua via Ñala Yehova.’ (Va Efe. 6:⁠4) Voku ‘va pindisa lovilongua,’ mua kongela oku va longisa ovisimĩlo via Yehova tunde vutila toke eci va linga amalẽhe.​—⁠2 Tim. 3:​14, 15.

¹¹ Eci Yesu a sapuila olondonge viaye hati, vi sukila ‘oku longisa omanu vo kolofeka viosi,’ wa kala oku vetiyavo olonjali oco vi kuatise omãla vavo oku kala olondonge. (Mat. 28:​19, 20) Voluali lulo, ka ca lelukile oku tẽlisa ocikele caco omo liayonjo a siata pokati kamalẽhe. Pole, olonjali vina vi likolisilako oku pindisa omãla vavo oco va linge Akristão, vi sesamẽla epandiyo lia vamanji. Ovo va “yula” ayonjo oluali omo liekolelo liavo kuenda ekuatiso va tambula kolonjali viavo.​—⁠1 Yoa. 5:⁠4.

Oku Likandangiya Oku Kuela Ale Oku Cita Omãla Omo Liocimãho ca Velapo

12. Momo lie Akristão vamue va siatela oku pita otembo yalua okuti ka va kuela?

¹² Omo okuti “oloneke via tu tukuiwa via linga vimbumbulu,” kuenda ‘oluali lu kasi oku pongoloka,’ Ondaka ya Suku yi tu vetiya oku konomuisa esilivilo lioku amamako okuti omunu ka kuela. (1 Va  Kor. 7:​29-​31) Akristão vamue, va siata oku nõlapo oku amamako okuti ka va kuela, ale va nõlapo oku pita otembo yalua okuti ka va kuela. Ovo ka va ci lingila oku kuata elianjo oco va tẽlise olonjongole viavo. Pole, va ci lingila oku vumba Yehova ‘lutima wosi.’ (Tanga 1 Va  Korindo 7:​32-35.) Vamanji vamue ka va kuelele, va litumbika kupange wakundi votembo yosi, ale va talavaya Kombetele. Vakuavo va siata oku eca ekuatiso liavo poku pindisiwa Kosikola Yoku Angiliya Olondingupange. Vana va siata oku litumbika kupange wakundi votembo yosi osimbu handi ka va kuelele okuti noke va nõlapo oku ci linga, va limbuka okuti, epindiso va tambula, lia siata oku va kuatisa volohuela viavo.

13. Momo lie vamanji vamue vakuele va siatela oku yuvula oku cita omãla?

¹³ Kolonepa vialua violuali, olohueli vimue via siata oku nõlapo oku amamako okuti ka va citi omãla. Vamue va ci linga omo liuhukũi, pole, vakuavo va ci linga oco va kuate elianjo lioku talavaya kupange wavo woku sanda eteku. Pokati Kakristão pali vamue okuti ka va yongolavo oku cita omãla. Ovo va ci lingila oco va litumbike kupange wa Yehova lutima wosi. Pole, ka ci lomboloka okuti, ka va kuete esanju volohuela viavo. Va sanjukila oku pitisa kovaso upange Wusoma okuti, esumũlũho li tunda kolohuela viavo li sule. (1 Va  Kor. 7:​3-5) Olohueli vimue vi vumba Yehova poku litumbika kupange woku nyula akongelo vimbo, vakuavo va nyula akongelo vofeka, kuenda vakuavo va talavaya Kombetele. Kulivo vamue va litumbika kupange wakundi votembo yosi ale kupange wumisionaliu. Omo liaco, Yehova ka ivalako upange wavo kuenda ocisola va lekisa konduko yaye.​—⁠Va Hev. 6:⁠10.

“Ohali Yoketimba”

14, 15. ‘Ohali yipi yoketimba’ olonjali Akristão va siata oku liyaka layo?

¹⁴ Upostolo Paulu wa sapuila Akristão vakuele hati, vaka tala “ohali yoketimba.” (1 Va  Kor. 7:​28) Vohali yaco mua kongela ovitangi viekambo liuhayele pokati kolohueli, komãla, ale kolonjali viavo via kuka. Mua kongelavo ovitangi vikuavo kuenda esakalalo lioku tekula omãla vavo. Ndomo ca lekisiwa kefetikilo liocipama cilo, Embimbiliya lia popele okuti, “koloneke via sulako kuiya otembo yohali.” Vohali yaco, mua kongelavo omãla “va siñaila olonjali viavo.”​—⁠2 Tim. 3:​1-3.

¹⁵ Oku tekula omãla, ka ca lelukile kolonjali Akristão. Tu pondolavo oku liyaka lovitangi via siata ‘kotembo yilo yohali.’ Olonjali Akristão va kuete uyaki woku tamãlala lẽviho ‘lioluali lulo’ li pondola oku nyõla omãla vavo. (Va Efe. 2:​2, 3) Pole, olonjanja vimue uyaki waco ka u yuliwa! Omõla una okuti olonjali viaye Akristão, pamue o liwekapo oku vumba Yehova, kuenje o vokiya “ohali” kolonjali vina via likolisilako oku u tekuila volonjila via Suku.​—⁠Olosap. 17:⁠25.

Kuka “Kala Ohali ya Lua”

16. “Ohali” yipi Yesu a tukula?

¹⁶ Kovaso yoloneke ku keya “ohali” yimue ya litepa lovitangi violohuela levi vioku cita omõla. Ohali yaco yika pitahãla ovitangi viosi omanu va kasi oku liyaka lavio. Yesu vocitumasuku catiamẽla koku tukuluka kuaye kuenda kesulilo lioluali lulo wa popia hati: “Koloneke viaco [kuka] kala ohali ya lua, yimue ya linga ndoyo ka ya leya tunde kefetikilo lioluali toke cilo, kuenje ka yiya vali.” (Mat. 24:​3, 21) Noke, wa lombolola okuti, owiñi wakahandangala uka puluka ‘kohali ya lua.’ Pole, noke Satana oka linga uyaki waye wa sulako Lolombangi Via Yehova vakuambembua. Omo liaco, cika kala otembo yimue yohali yalua kakulu kuenda komãla.

17. (a) Momo lie tu lavokaila otembo yo kovaso lekolelo? (b) Nye ci tu kuatisa oku kuata ovisimĩlo via sunguluka viatiamẽla kolohuela kuenda koku cita omãla?

¹⁷ Ka tu sukila oku kuata usumba lovitangi vikeya kovaso. Olonjali vina via kolela Yehova, vi lavoka oku kuatisiwa kumue lomãla vavo. (Tanga Isaya 26:​20, 21; Sof. 2:​2, 3; 1 Va  Kor. 7:​14) Pole koloneke vilo via sulako, ka tuka eceleli okuti, ohali yaco yi yapula ovisimĩlo vietu via sunguluka viatiamẽla kolohuela kuenda koku cita omãla. (2 Pet. 3:​10-​13) Omo liaco, cikale okuti ka tua kuelele ale tua kuela pole ka tu kuete omãla, tu amamiko oku eca esivayo ku Yehova kuenda kekongelo.

[Atosi pombuelo yamẽla]

Oku Pitulula

• Momo lie Akristão amalẽhe va sukilila oku yuvula oku kuela lonjanga?

• Voku tekula omãla mua kongela nye?

• Momo lie Akristão vamue va nõlelapo oku yuvula oku kuela, ale nda va kuela ka va yongola oku cita omãla?

• “Ohali” yipi olonjali via siata oku liyaka layo?

[Elitalatu kemẽla 17]

Momo lie amalẽhe va sukilila oku kevelela toke eci va linga akulu, oco va kuela noke?

[Elitalatu kemẽla 18]

Ulume o sukila oku kuatisa ukãi waye oco a pange onepa kolohongele

[Elitalatu kemẽla 19]

Momo lie olohueli vimue via nõlelapo oku yuvula oku cita omãla?