Eyovo Li Tunda Kusoma Wa Suku Li Kasi Ocipepi!
“Usoma wove wiye. Ocipango cove ci lingiwe posi ndeci ci lingiwa kilu.”—MAT. 6:10.
1. Ovina vipi Yesu a velisilepo kelongiso liaye?
ECI Yesu Kristu a linga Ohundo yaye Komunda, wa kongelamo ohutililo muna a tukula atosi avelapo atiamẽla kelongiso liaye. Eye wa longisa olondonge viaye oku likutilila ku Suku hati: “Usoma wove wiye. Ocipango cove ci lingiwe posi ndeci ci lingiwa kilu.” (Mat. 6:9-13) Yesu “wa pita kovaimbo anene lo kovaimbo atito oku kunda, [kuenda] wa sapula ondaka yiwa yusoma wa Suku.” (Luka 8:1) Eye wa vetiya olondonge viaye hati: ‘Tete sandiliyi usoma wa Suku kuenda esunga liaye.’ (Mat. 6:33) Osimbu o lilongisa ocipama cilo, kũlĩhĩsa ndomo oka kuama atosi amue kupange woku kunda. Omo liaco, konomuisa ndomo o pondola oku tambulula apulilo ndeci: Esapulo Liusoma li kuete esilivilo lie? Kovina vipi omanu va sukila oku yovuiwa? Usoma wa Suku uka nena ndati eyovo?
2. Esapulo Liusoma li kuete esilivilo lie?
2 Yesu wa popia hati: “Ondaka eyi yiwa yusoma yi kundilua kuoha koluali, ha yi lingi uvangi kolofeka viosi, oco esulilo liya noke.” (Mat. 24:14) Olondaka viwa viatiamẽla Kusoma wa Suku, vi kuete esilivilo liavelapo voluali luosi! Kueci ci pitahãla 100.000 kakongelo Volombangi Via Yehova voluali luosi, ci soka olohuluwa epanduvali viomanu va Suku, va litumbika kupange woku kunda, loku sapuilako vakuavo catiamẽla Kusoma wa tumbikiwa. Oku tumbikiwa Kusoma waco, oko olondaka viaco viwa. Momo ku lomboloka okuti, Suku wa tumbika uviali waye kilu oco u viale ovina viosi palo posi. Lekuatiso Liusoma waco, ocipango ca Yehova cika tẽlisiwa palo posi ndeci ci kasi oku lingiwa kilu.
3, 4. Nye cika pita palo posi, eci ocipango ca Suku cika tẽlisiwa?
3 Nye cika pita lomanu eci ocipango ca Suku cika tẽlisiwa palo posi? Yehova oka “puenya asuelela osi kovaso avo. Okufa ka ku kalako vali, ndaño oku lila loku liyula lupongo laviovo ka vi kalako vali.” (Esit. 21:4) Lomue oka vela vali ale oku fa omo liekandu kuenda ekambo lioku lipua tua piñala. Omanu va fa okuti Suku o va ivaluka, vaka kuata epuluvi lioku kala otembo ka yi pui, ndomo Embimbiliya li ci popia hati: “Kuli epinduko lia vakuesunga lava havakuesungako.” (Ovil. 24:15) Ka kuka kala vali uyaki, uvei, ale onjala, kuenje ongongo yosi yika pongoluiwa oluali luokaliye. Ovinyama vina okuti cilo via tema, vika kala ciwa lomanu kuenda lovinyama vikuavo.—Osa. 46:9; 72:16; Isa. 11:6-9; 33:24; Luka 23:43.
4 Lasumũlũho a tunda Kusoma wa Suku, tua kolela kocitumasuku Cembimbiliya ci lombolola ndomo omuenyo womanu uka kala. Oco ci popia hati: “Ambombe puãi [vaka] piñala ofeka, kuenje va sanjukila okusalala kualua.” Nye cika pita la vana va siata oku nena ovitangi? Ovisonehua vi popia hati: “Okasimbu kaño handi kuenje ondingaĩvi ka yi kalapo.” Pole, vana “va imba ovaso Yehova [vaka] piñala ofeka.”—Osa. 37:9-11.
5. Nye cika pita loluali lulo?
5 Oco ovina viosi evi vi tẽlisiwe, oluali lulo lua vĩha kumue lolombiali viaco, latavo, kuenda ovisoko violomĩlu, vika kunduiwa. Eci, oco uviali wokilu uka linga. Uprofeto Daniele wa popele hati: “Koloneke violosoma viaco [vi kasi oku viala cilo,] Suku yokilu o katula usoma, kuenje ka u nyolẽha, ka u tambuiwa lomanu vofeka yiñi; puãi owo u nyõla loku lia ovosoma aco osi, haiwo u kala muẽle hũ oloneke ka vi pui.” (Dan. 2:44) Usoma wa Suku okuti, uviali wokaliye wokilu, uka viala omanu va sunguluka palo posi. Omo liaco, tu lavoka “ilu liokaliye loluali luokaliye omu mu kala esunga.”—2 Pet. 3:13.
Tu Sukila Eyovo
6. Embimbiliya li lombolola ndati evĩho li kasi voluali lulo?
6 Satana la Adama kuenda Heva eci va lueyela Suku, va yonguile oku li nõlela ovo muẽle eci ciwa kuenda eci cĩvi, kuenje va nena ovitangi kepata liosi liomanu. Osimbu Etande ka lieyile, ci soka 1.600 kanyamo ‘evĩho liomanu lia luile calua kilu lieve, lovisimĩlo viavo via vĩhile calua oloneke viosi.’ (Efet. 6:5) Noke lioku pita 1.300 kanyamo Salomone wa limbukile okuti, evĩho lieya oku li vokiya calua voluali, kuenje wa soneha hati: “Nda linga siti, ava va fa ale ovo va sumũluha ca velapo, ava va kasi lomuenyo ci sule; puãi u wa va velapo okuti vosi yavo va sule, yu ka citiwile handi okuti ka muĩle ovilinga vĩvi via lingilua vemẽhi liekumbi.” (Uku. 4:2, 3) Tunde eci a soneha olondaka evi toke cilo, pa pita ale 3.000 kanyamo, pole, evĩho li kasi oku livokiya.
7. Momo lie tu sukilila oku yovuiwa la Suku?
7 Omo okuti evĩho li kasi oku amamako tunde kosimbu, cilo omanu va sukila eyovo li tunda Kusoma wa Suku okuti, kosimbu ci sule. Vokuenda kueci ci soka 100 kanyamo, voluali mua pita ovitangi vialua okuti kosimbu ci sule, kuenda ovitangi viaco vi kasi oku livokiya. Ocisoko cimue ca siata oku konomuisa ovitangi violuali ci tukuiwa hati Worldwatch, ca popia hati: “Etendelo liomanu va pondiwa kuyaki vokuenda kuocita cakũi avali kanyamo, lia pitahãla olonjanja vitatu etendelo lia vana va pondiwa kuyaki okupisa kocita catete K.K., toke kunyamo wo 1899.” Tunde kunyamo wo 1914, kua fa eci ci pitahãla 100 kolohuluwa viomanu omo liuyaki! Elivulu limue li lombolola okuti, ci soka 60 kolohuluwa viomanu, va fa omo Liuyaki Wavali wa pita Voluali luosi. Omo okuti cilo olofeka vimue vi kuete ovota oku loya atenda anene, vi kuete epondolo lioku malako onepa yalua yomanu voluali. Ndaño uloño woku lima kuenda woku sakula u kasi oku amamako, pole, anyamo osi onjala lovovei, via siata oku ponda ci soka olohuluwa vitãlo viomãla.—Tanga elivulu Embimbiliya li Longisa Nye? kocipama 9.
8. Olohulukãi vianyamo viuviali womanu, via lekisa nye?
8 Alikolisilo omanu oku malako evĩho, ka a siatele oku tẽlisiwa. Olombiali violuali, vakualomĩlu, kuenda ovisoko viatavo, ka va kasi oku nena ombembua pokati komanu, ekalo liwa, kuenda uhayele. Pole, ovisoko viaco via siata oku vokiya ovitangi pokati komanu. Olohulukãi vianyamo viuviali womanu, via lekisa ocili colondaka vi popia hati: “Okuenda kuomunu ka ku kasi povaka aye muẽle. Omunu enda ka tẽla eye muẽle oku suñamisa okuenda kuaye.” (Yer. 10:23) Ocili okuti, “omunu poku kangisa ukuavo o lilinga eye muẽle cĩvi.” (Uku. 8:9) Omo liaco, “ovina viosi via lulikiwa vi yevalela kumuamue olongembia.”—Va Rom. 8:22.
9. Ekalo lipi Akristão vocili va lavoka “koloneke via sulako”?
9 Catiamẽla koloneke vilo, Embimbiliya li popia hati: “Koloneke via sulako kuiya otembo yohali.” Noke lioku tukula ekalo lioloneke via sulako vemehi liuviali womanu, ocitumasuku ci popia hati: “Omanu vãvi lolohembi vamamako loku linga cĩvi.” (Tanga 2 Timoteo 3:1-5, 13.) Eli olio ekalo Akristão vocili va lavoka, momo ‘oluali luosi lu kasi povaka’ a Satana. (1 Yoa. 5:19) Pole, olondaka viwa vi lekisa okuti, Suku ndopo oka yovola vana vo sole. Ovo vaka yovuiwa koluali lulo lu kasi oku amamako levĩho.
Ono Yeyovo Liocili
10. Momo lie Yehova eye lika Ono yeyovo liocili?
10 Osimbu o kunda olondaka viwa, lomboluila omanu okuti, Yehova eye lika Ono yeyovo liocili. Eye o kuete unene woku yovola omanu vaye kovina viosi vĩvi kuenda wa likuminya oku ci linga. (Ovil. 4:24, 31; Esit. 4:11) Tua kolela okuti, Yehova oka yovola omanu vaye, kuenda oka tẽlisa olohuminyo viaye ndomo a ci popia hati: “Ndeci nda sima haico ci lingiwa.” Ondaka yi tunda vomẽla Waye, ‘ka yi tiukila ño kokuaye.’—Tanga Isaya 14:24, 25; 55:10, 11.
11, 12. Nye Suku a likuminya oku eca komanu vaye?
11 Yehova wa likuminya okuti, oka popela omanu vaye eci aka kundula olondingaĩvi. Eci Suku a tuma uprofeto Yeremiya oco a kundile vakuakandu, wa popia hati: “Ku ka va kuatele ohele.” Momo lie? Momo “ñasi love oku ku kuatisa.” (Yer. 1:8) Cimuamue haico Yehova a linga osimbu handi ka nyolele olondingaĩvi vio ko Sodoma la Gomora. Eye wa tuma ovangelo vavali oco va kuatise Lote lepata liaye oku tunda volupale luaco. Noke, “Yehova . . . wa lowila vo Sodoma lovo Gomora ofuofuo londalu.”—Efet. 19:15, 24, 25.
12 Yehova o pondolavo oku popela omanu vana va linga ocipango caye va kasi voluali luosi. Eci a nyola olondingaĩvi Letande, “wa popela . . . Noha haeye Ndaka wa sapula esunga, kuenje wa popelavo vakuavo epanduvali.” (2 Pet. 2:5) Yehova oka popelavo vakuesunga eci aka nyola oluali lulo lua vĩha. Ondaka Yaye yi popia hati: “Sandi Yehova, ene ambombe vofeka. . . . Sandi esunga lokuomboka. Mbi wu wundisiwi keteke lionyeño ya Yehova.” (Sof. 2:3) Noke yoku nyoliwa kuolondingaĩvi, ‘vakuesunga vaka piñala oluali loku tungamo.’—Olosap. 2:21, 22.
13. Omanu va Yehova va fa, vaka yovuiwa ndati?
13 Kuli omanu valua va Suku va fa omo liuvei, elambalalo, kuenda ovitangi vikuavo. (Mat. 24:9) Oco hẽ, vaka yovuiwa ndati? Ndomo Embimbiliya li ci popia, “kuli epinduko lia vakuesunga.” (Ovil. 24:15) Oku kũlĩha okuti, lacimue ci tateka Yehova oku yovola omanu vaye, ci tu lembeleka calua!
Uviali Umue Wesunga
14. Momo lie tu kuetele ekolelo liokuti, Usoma wa Suku owo lika uviali wesunga?
14 Kupange woku kunda, o sukila oku lombolola okuti, Usoma wa Yehova wokilu, owo lika uviali wesunga. Momo, u lekisa ovituwa vi komohisa via Suku ndeci, esunga, kuenda ocisola. (Esin. 32:4; 1 Yoa. 4:8) Suku wa eca Usoma waco peka lia Yesu Kristu, momo eye lika o tẽla oku viala oluali. Yehova wa sokiyavo okuti, ku nõliwa eci ci soka 144.000 Kakristão olombuavekua palo posi, kuenda oku va pinduila vomuenyo wokilu, okuti va kala kumue la Kristu, oco va viale oluali.—Esit. 14:1-5.
15. Lombolola oku litepa ku kasi pokati Kusoma wa Suku kuenda uviali womanu.
15 Uviali wa Yesu kumue leci ci soka 144.000 kolombuavekua, wa litepa luviali womanu! Olombiali violuali lulo vieyuka lika ungangala loku songuila omanu vavo kovoyaki, kuenda oku nena olofa komanu valua. Eli olio esunga lieci Ovisonehua vi tu vetiyila oku yuvula oku kolela kolombiali viomanu, momo ‘kokuavo ka kuli ekuatiso’! (Osa. 146:3) Pole, Kristu oka viala locisola! Yesu wa popia hati: “Enjui kokuange, vosi wa sovoloki kuenda wa lemiwi kuenje ndu kavuluisi. Likapi okanga yange kuenda lilongisi kokuange, momo ndonjuka, haime nda liketisa vutima, oco vu sanga ekavuluko vovitima viene, momo okanga yange ya sunguluka, locitele cange ca leluka.”—Mat. 11:28-30.
Oloneke Via Sulako Ndopo vi Sulila!
16. Oloneke via sulako vika pitila ndati kesulilo?
16 Tunde kunyamo wo 1914, ‘oluali lulo’ lu kasi koloneke via sulako. (Mat. 24:3) “Ohali ya lua” Yesu a tukula, ndopo yi fetika. (Tanga Mateo 24:21.) Ohali yaco yalua, yika nena esulilo lioluali lulo lua Satana. Oco hẽ, yika fetika ndati? Kuenda yika sulila ndati?
17. Nye Embimbiliya li popia okuti oco cika kala efetikilo liohali yalua?
17 Ohali yalua yika fetika ocipikipiki. “Eteke lia [Yehova]” li keya ocipikipiki, ‘eci omanu vaka popia vati, Tua kolapo, kuenda tu kasi lombembua’! (Tanga 1 Va Tesalonike 5:2, 3.) Ohali yalua yika fetika eci olombiali vika sima hati, vi likuete omunga koku tetulula ovitangi violuali. Omanu vaka komoha calua eci ‘Ombavulono Yinene,’ ocisoko catavo esanda yika kunduiwa ocipikipiki. Kuenje, olosoma violuali kumue lomanu vavo, vaka komõhavo eci Ombavulono Yinene yika kunduiwa.—Esit. 17:1-6, 18; 18:9, 10, 15, 16, 19.
18. Nye Yehova aka linga eci Satana aka seteka oku yaka lomanu Vaye?
18 Eci ovina evi vi fetika oku lingiwa, ‘kekumbi lo kosãi kuenda kolombungululu kuka kala olondimbukiso,’ kuenda ondimbukiso ya Mõlomanu yika tukuluka kilu.’ Noke, tuka ‘petula ovaso etu, momo eyovo lietu li kasi ocipepi.’ (Luka 21:25-28; Mat. 24:29, 30) Satana ale Goge, oka yaka lomanu va Suku. Pole, Yehova poku lombolola catiamẽla ku vana va yaka lomanu vaye, wa popia hati: “Nda umue wa ku lamba ove ca soka okuti wa lamba komoliso [liange].” (Sak. 2:8) Ocili okuti, Satana kaka tẽlisa ocimãho caye coku va kundula. Momo lie? Momo Yehova Ukuonene Wavelapo, oka yovola omanu vaye.—Esek. 38:9, 18.
19. Momo lie tu kuetele ekolelo liokuti, olohoka via Suku vika kundula oluali lulo lua Satana?
19 Eci Suku aka nyola ovanyali vaye, ‘olofeka vika limbuka okuti eye Yehova.’ (Esek. 36:23) Eye oka tuma olohoka viovangelo vaye vaka songuiwa la Kristu Yesu, oco va nyõle oluali luosi lua Satana. (Esit. 19:11-19) Eci tu ivaluka okuti ungelo umue ‘wa pondele ci soka ocita lakũi ecelãla kolohulukãi vitãlo’ viovanyali va Suku, tu kuata ekolelo liokuti olohoka viokilu vika kundula evĩho liosi li kasi voluali lua Satana osimbu ohali ya piãla yika sulila ko Harmagedo. (2 Olos. 19:35; Esit. 16:14, 16) Satana kumue lolondele viaye vaka imbiwa vokayike vokuenda kuohulukãi yanyamo. Noke vaka nyoliwa.—Esit. 20:1-3.
20. Nye Yehova aka linga lekuatiso Liusoma?
20 Oluali luka yelisiwa kevĩho, kuenda olondingesunga vika kala otembo ka yi pui palo posi. Yehova oka lekisa okuti eye Upopeli Wavelapo. (Osa. 145:20) Lekuatiso Liusoma, oka kemalisa uviali waye, londuko yaye, kuenda oka tẽlisa ocipango caye catiamẽla koluali lulo. Omo liaco, oka kuata esanju lialua osimbu o kunda olondaka viwa loku kuatisa vana “va noliwila omuenyo ko pui” oco va limbuke okuti, eyovo li tunda Kusoma wa Suku li kasi ocipepi!—Ovil. 13:48.
Ivaluka Eci Tua Lilongisa?
• Yesu wa situlula ndati esilivilo Liusoma?
• Momo lie omanu va sukilila oku popeliwa cilo okuti kosimbu ci sule?
• Ovina vipi vika pita vokuenda kuohali ya piãla?
• Yehova wa lekisa ndati okuti eye Upopeli Wavelapo?
[Elitalatu kemẽla 12]
Ondaka ya Suku ya popele eci catiamẽla kupange woku kunda u kasi oku lingiwa voluali luosi koloneke vilo
[Elitalatu kemẽla 15]
Yehova o pondolavo oku tu popela ndeci a popela Noha lepata liaye
[Elitalatu kemẽla 16]
Yehova oka “puenya asuelẽla osi . . . okufa ka ku kalako vali.”—Esit. 21:4.