Osimbu O Kasi Umalẽhe, Nõlapo Oku Vumba Yehova
“Kala lovina wa lilongisa haivio wa kolela.”—2 TIM. 3:14.
1. Yehova o tenda ndati upange Wolombangi viaye amalẽhe?
UPANGE u kola amalẽhe va kasi oku linga, u kuete esilivilo liocili ku Yehova, momo wa tuma oku soneha ocitumasuku catiamẽla kokuavo. Ukualosamo wa imba ocisungo hati: “Eteke o songola olohoka viove kolomunda vi kola omanu vove va lieca kokuove olumue. Ndokutalala kuowume womẽle haico ci kasi ongusu yove yokumalehe.” (Osa. 110:3) Yehova wa kapako amalẽhe vana va yongola oku u vumba.
2. Koloneke vilo amalẽhe va siata oku vetiyiwa ndati catiamẽla koloneke viavo vio kovaso?
2 Ene wamalẽhe u kasi vekongelo Liakristão, anga hẽ, wa li tumbiki ale ku Yehova? Amalẽhe vamue ka ca lelukile kokuavo oku nõla oku vumba Suku yocili. Asongui vakualomĩlu, alongisi, vamue vakuepata, kuenda akamba, va siata oku vetiya amalẽhe oku tiamisila utima koku sanda ovokuasi. Amalẽhe vamue eci va nõlapo oku vumba Yehova, va pembuiwa la vakuavo. Pole, oku vumba Suku yocili, oyo onjila yavelapo o pondola oku kuama komuenyo wove. (Osa. 27:4) Omo liaco, tu konomuisi apulilo atatu ndeci: Momo lie o sukilila oku vumba Suku? O pondola ndati oku kala ciwa osimbu wambata omuenyo woku litumbika ku Suku ndaño lelambalalo? Apuluvi api upange o pondola oku kuata?
Oku Vumba Yehova Oyo Onjila Yavelapo
3. Ovina Yehova a lulika vi tu kuatisa ndati?
3 Momo lie o sukilila oku vumba Suku yocili? Elivulu Liesituluilo 4:11, li lekisa esunga liaco poku popia hati: “A [Yehova], a Suku yetu, wa posokela oku muisua ulamba lesumbilo lunene. Momo ove wa sovola ovina viosi. Vi kasilili ocipango cove, haico via lulikiwa laco.” Yehova eye Ululiki wovina viosi. Voluali muli ovina vialua via posoka! Oviti, olonelẽho, ovinyama, okalunga, olomunda, kuenda olomupa violondui, viosi via lulikiwa la Yehova. Osamo 104:24, yi popia hati: “Oluali lue yuka ovilulikilo [via Suku].” Tu eca olopandu ku Yehova omo a tu lulika letimba kuenda olondunge vi tu kuatisa oku sanjukila oluali kuenda ovina viwa vi kasimo! Oku sokolola ovina viaco, ka ci tu vetiya hẽ oku u vumba?
4, 5. Ovilinga vipi vi komohisa via vetiya Yehosua oku kuata ukamba la Yehova?
4 Esunga likuavo lioku vumba Yehova, li sangiwa volondaka via Yehosua kesongo ka va Isareli. Osimbu a kala oku panda koku fa, wa sapuila omanu va Suku hati: “Ene vosi wa kũlĩhi vovitima viene lovolonulo viene, okuti polondaka viosi viwa Yehova Suku yene o popeleli, layimue ya kambapo. Viosi muẽle vio suisiluipo.” Momo lie Yehosua a popela olondaka evi?—Yeh. 23:14.
5 Osimbu Yehosua a kala oku kula Kengito, weya oku kũlĩha ohuminyo ya Yehova yoku eca ku va Isareli ofeka yavo. (Efet. 12:7; 50:24, 25; Etu. 3:8) Yehosua wa mõla eci Yehova a fetika oku tẽlisa ohuminyo yoku nena Ekũi Liafengi Kegito kuenda oku kisika Fareo ukuesino oku ecelela va Isareli oku tunda vofeka. Yehosua wa kala pokati ka vana va yovuiwa Vokalunga Kakusuka, kuenda wa molavo eci ovava okalunga a lundula Fareo kumue lolohoka viaye. Osimbu va Isareli va kala oku linga ungende ‘Vekalasoko linene hailio li lingisa usumba’ liomunda Sinai, Yehosua wa mola ndomo Yehova a eca kokuavo ovina viosi va sukilile. Lomue pokati kavo wa fa lenyona ale lonjala. (Esin. 8:3-5, 14-16; Yeh. 24:5-7) Eci otembo ya va Isareli ya pitila yoku tambula olofeka vinene via va Kanana loku piñala Ofeka Yohuminyo, Yehosua wa mola ndomo Suku una eye kuenda va Isareli va enda oku fendela a va kuatisa.—Yeh. 10:14, 42.
6. Nye ci ku vetiya oku kuata onjongole yoku vumba Suku?
6 Yehosua wa kũlĩhĩle okuti Yehova wa tẽlisa olohuminyo Viaye. Omo liaco, Yehosua wa popia hati: “Ame kumue lonjo yange, tu vumba Yehova.” (Yeh. 24:15) Nye ci popiwa catiamẽla kokuove? Eci o sokolola ndomo Suku yocili a tẽlisa olohuminyo viaye kuenda evi aka tẽlisa kovaso yoloneke, ka ci ku vetiya hẽ oku u vumba ndeci Yehosua a linga?
7. Momo lie oku papatisiwa vovava ku kuetele esilivilo?
7 Oku kũlĩhĩsa ovina vi komohisa Yehova a lulika kuenda oku sokolola olohuminyo a tẽlisa, kuenda evi ka tẽlisile handi, ci ku vetiye oku litumbika Kokuaye kuenda oku lekisa elitumbiko liaco poku papatisiwa vovava. Epapatiso, enanga limue li kuete esilivilo lieciwa la vana va yongola oku vumba Suku. Eci oco Yesu a linga, kuenda wa tu sila Ongangu yiwa. Osimbu ka fetikile handi upange waye woku kala Mesiya, wa endele ku Yoano Upapatisi oco a papatisiwe. Momo lie Yesu a ci lingila? Eye wa popia hati: “Sia tundilile kilu oku linga ocipango cange, te ocipango cu wa numa.” (Yoa. 6:38) Oco Yesu a lekise okuti weyilila oku linga ocipango ca Isiaye, wa papatisiwa.—Mat. 3:13-17.
8. Momo lie Timoteo a nõlelapo oku fendela Suku, kuenda nye ove o sukila oku linga?
8 Kũlĩhĩsavo eci catiamẽla kumalẽhe Timoteo, una Yehova a ĩhile upange woku kunda olondaka viwa kuenda ovikele vikuavo. Momo lie Timoteo a nõlelapo oku fendela Suku yocili? Embimbiliya li tu sapuila okuti, eye ‘wa kapeleko ovina a lilongisa kuenda wa vetiyiwa oku vi tava.’ (2 Tim. 3:14) Nda wa lilongisa Ondaka ya Suku, kuenda wa vetiyiwa oku tava okuti yocili, o kasi oku kuama ongangu ya Timoteo. Omo liaco, o sukila oku nõla onjila o kuama. Momo lie ku vanguila lolonjali viove catiamẽla kueci o yongola oku linga? Akulu vekongelo va pondola oku ku kuatisa oku sanga elomboloko lieci Ovisonehua vi kisika oco o papatisiwe.—Tanga Ovilinga 8:12.
9. Nye vakuene va pondola oku sima eci o nõlapo oku papatisiwa?
9 Nda wa papatisiwa, o kuete epuluvi lioku fetika oku vumba Suku yocili. Nda wa ci linga, ci lekisa okuti, wa nõlapo oku endela vonjila yi tuala komuenyo ko pui, kuenje o kuata esanju li tunda koku linga ocipango ca Suku. (Va Hev. 12:2, 3) Handi vali, oka sanjuisavo vakuepata liove vana va nõla ale onjila yaco, kuenda akamba vove vekongelo. Ca piãla enene, oka sanjuisa utima wa Yehova. (Tanga Olosapo 23:15.) Vamue ci tava okuti ka va kuata elomboloko lieci wa nõlelapo oku fendela Yehova, kuenda va sima okuti wa nõla onjila ka ya sungulukile. Pamue vaku lambalala. Pole, o pondola oku yula ovitangi viaco.
Ceci o Pulisiwa la Vakuene Ale Ceci o Lambalaliwa
10, 11. (a) Apulilo api omanu va pondola oku linga atiamẽla kesunga lieci wa nõlelapo oku vumba Suku? (b) Nye o pondola oku lilongisa kocituwa Yesu a lekisa poku tambulula apulilo atiamẽla kefendelo liocili?
10 Onjongole yove yoku vumba Yehova citava okuti yi sumuisa akamba vove kosikola, omanu vo posongo yove, kuenda epata liove. Pamue vaku pula esunga lieci wa nõlela onjila yaco, kuenda eci catiamẽla ketavo liove. O va tambulula ndati? O sukila oku kũlĩhĩsa ovisimĩlo viove oco o tẽle oku va lomboluila esunga lieci wa nõlela onjila yaco. Poku eca atambululo kapulilo atiamẽla ketavo liove, o sukila oku kuama ongangu ya Yesu.
11 Eci asongui vetavo lia va Yudea va pula Yesu catiamẽla kepinduko, poku va tambulula wa tiamisila ovisimĩlo viavo kocisonehua cimue ka va kapeleko. (Etu. 3:6; Mat. 22:23, 31-33) Eci umue ukuavisonehua a pula Yesu hati, ocihandeleko cipi cavelapo, eye wo tambulula loku tukula ovinimbu Viembimbiliya. Ulume waco wa sanjukilile etambululo lia Yesu. (Ovis. 19:18; Esin. 6:5; Mar. 12:28-34) Yesu uloño waye woku tukula Ovisonehua kuenda upopi waye wa sunguluka, wa vetiya ‘owiñi oku litepa mekonda liaye,’ kuenje ovanyali vaye ka va tẽlele oku u kuata. (Yoa. 7:32-46) Eci weca etambululo kepulilo liatiamẽla kekolelo liove, kuama Embimbiliya, pole ci linga ‘lumbombe kuenda esumbilo.’ (1 Pet. 3:15) Nda kua kũlĩhĩle ndomo o tambulula epulilo limue, sapuila omunu waco hati, ndika konomuisa epulilo liove, kuenje ndi nena etambululo keteke likuavo. Noke, sandiliya etambululo liaco velivulu li tukuiwa hati Índice das Publicações da Torre de Vigia, ale vo Watchtower Library (Biblioteca da Torre de Vigia) vo CD-ROM, nda lia sandekiwa velimi liove. Nda wa li pongiya ciwa, oka tẽla oku ‘kumbulula ciwa omunu wosi waku pula cimue.’—Va Kol. 4:6.
12. Momo lie o sukilila oku yuvula oku sumua omo lielambalalo?
12 Pamue omanu vaku pula ovina vikuavo viatiamẽla konjila wa nõlapo yoku vumba Suku, kuenda ketavo liove. Ocili okuti, Satana Eliapu unyali wa Suku, eye ombiali yoluali lulo. (Tanga 1 Yoano 5:19.) Omo liaco, kuka talamẽle oku pandiyiwa lomanu ale oku soliwa lavo omo lionjila wa nõlapo yoku vumba Suku. Pole, o pondola oku liyaka lovitangi. Vamue citava okuti ‘vaku popia lãvi,’ kuenda vamamako oku ci linga. (1 Pet. 4:4) Pole, ivaluka okuti, haveko lika o kasi oku liyaka lovitangi viaco. Yesu Kristu wa pitavo velambalalo. Upostolo Petulu wa pitavo velambalalo, kuenda wa soneha hati: “A vakuacisola, ko ka komoheli ekangiso lia soka ndondalu liya kokuene oku vu nyika. Ko ka simi hoti, cimue ka ca siatele ceya kokuetu. Puãi yoleli omo wa iñili vohali ya Kristu.”—1 Pet. 4:12, 13.
13. Momo lie Akristão va kuetele esunga lioku sanjuka eci va liyaka lelambalalo?
13 Omo okuti ove Ukristão, o kuete esunga lioku sanjuka poku pandikisa kelambalalo. Momo lie? Momo nda wa soliwa loluali, ci lekisa okuti, ku kasi oku pokola ku Suku, pole o kasi oku pokola kolonumbi via Satana. Yesu wa lungula hati: “Lene vosi, eci omanu vosi vo sivayi, ngongo yene, momo haico vaisiavo va linga lovaprofeto vesanda.” (Luka 6:26) Elambalalo li lekisa okuti, Satana kuenda oluali luaye va tema love, momo wa nõlapo oku vumba Yehova. (Tanga Mateo 5:11, 12.) Omo liaco, ‘nda vaku imbula omo lionduko ya Kristu,’ sanjuka.—1 Pet. 4:14.
14. Asumũlũho api omunu a pondola oku tambula nda wamamako lekolelo ku Yehova ndaño lelambalalo?
14 Nda wamamako lekolelo ku Yehova ndaño lelambalalo, o tambula onima yiwa. Nda wa ci linga, eca uvangi uwa watiamẽla ku Suku, kuenda Komõlaye. Oku pandikisa kuove lekolelo, ku pamisa vamanji. Omanu vana ka va kũlĩhĩle Yehova eci va mola ohali yove, va pondola oku vetiyiwa oku u sandiliya. (Tanga Va Filipoi 1:12-14.) Osimbu amamako oku limbuka ndomo Yehova a eca ongusu yoku pandikisa kovitangi, ocisola cove kokuaye ci livokiya.
Kua ku ‘Yulukila Epito Linene’
15. ‘Epito lipi linene’ lia yulukilile upostolo Paulu?
15 Upostolo Paulu wa popia eci catiamẽla kupange waye woku kunda ko Efeso, poku soneha hati: “Kua njulukila epito linene lioku linga upange wa lua.” (1 Va Kor. 16:8, 9) Epito liaco lia kala epuluvi lioku amisako upange woku kunda olondaka viwa kuenda oku longisa omanu oco va linge olondonge volupale luaco. Paulu omo lioku tava upange waco, wa kuatisa valua oku lilongisa catiamẽla ku Yehova kuenda oku linga afendeli Vaye.
16. Kunyamo wo 1919, “epito” lia yulukila ndati olombuavekua via siala palo posi?
16 Kunyamo wo 1919, Yesu Kristu wa yuluila “epito” olombuavekua via siala palo posi. (Esit. 3:8) Ovo va iñila vuvelo waco kuenje va fetika oku kunda olondaka viwa kuenda oku longisa ocili Cembimbiliya lonjongole yalua okuti kosimbu cisule. Nye ceyilila kupange wavo woku kunda? Cilo, olondaka viwa via li sanduila kolonepa viosi violuali, kuenda ci soka olohuluwa epanduvali komanu va lavoka oku kuata omuenyo ko pui voluali luokaliye lua Suku.
17. O pondola ndati oku iñila ‘puvelo unene woku linga upange wa lua’?
17 “Epito linene lioku linga upange wa lua,” toke cilo lia yulukila omanu vosi va Yehova. Vana va iñila vuvelo waco, va kuata esanju lialua osimbu vamamako oku kunda olondaka viwa. Ene wamalẽhe okuti wafendeli va Yehova, u tenda ndati esumũlũho lioku kuatisa vakuene oku ‘tava kolondaka viwa’? (Mar. 1:14, 15) Ove hẽ wa sokolola ale oku litumbika kupange wakundi vavelapo ale wakundi va sokamo? Citava okuti iñila kupange woku tunga Olonjango Viusoma, oku talavaya ko Betele, kuenda kupange wumisionaliu. Omo okuti oluali lulo lua Satana lu panda kesulilo, oku li tumbika kovopange a tukuiwa ndeti, ci kuete esilivilo koloneke vilo. Ove hẽ, o tava oku iñilila ‘puvelo waco unene’ osimbu handi kuli otembo yoku ci linga?
“Seteki Oco vu Limbuke Okuti Yehova Ukuahenda”
18, 19. (a) Nye ca kuatisa Daviti oku pamisa onjongole yaye yoku vumba Yehova? (b) Nye ci lekisa okuti Daviti ka kuatele owesi woku vumba Suku?
18 Ukualosamo wa vetiya vakuavo oco va ‘seteke kuenda oku limbuka okuti Yehova ukuahenda.’ (Osa. 34:8) Eci Soma Daviti woko Isareli a kala umalẽhe haeye ungombo, Yehova wo popela kovinyama via tema. Suku wo kuatisa eci a liyaka lunyali waye Goliata, kuenda wo popela kovitangi vikuavo. (1 Sam. 17:32-51; Osa. 18, olondaka vioku fetika) Daviti omo liohenda ya Suku, wa vetiyiwa oku soneha hati: “A Yehova Suku yange, ovikomo wa linga, lovisimilo wa tu simila, via lua cimue. Lomue wa lisoka love.”—Osa. 40:5.
19 Ocisola Daviti a kuatela Yehova ceya oku livokiya calua, kuenda wa kuatele onjongole yoku U sivaya lutima waye wosi lolondunge viaye viosi. (Tanga Osamo 40:8-10.) Daviti vokuenda kuomuenyo waye, lalimue eteke a kuatele owesi woku fendela Suku yocili. Oku vumba Suku, kuo nenela esanju lialua ka li sokisiwa. Daviti noke lioku kuka wa popia hati: “Ove wulavoko liange, a Yehova, haive nda ku kolela tunde kutila wange, a Yehova. Ku ka njanduluke, a Suku, ndaño eci ñuka leci ñala lowele.” (Osa. 71:5, 18) Ekolelo lia Daviti kuenda ukamba a kuata la Yehova, vieya oku u pamisa calua ndaño wa kukile.
20. Momo lie oku vumba Suku oyo onjila yavelapo o pondola oku kuama komuenyo wove?
20 Ekalo liomuenyo wa Yehosua, wa Daviti kuenda waTimoteo, li eca uvangi wokuti, oku vumba Yehova oyo onjila yavelapo o sukila oku kuama komuenyo wove. Elau li tunda kovokuasi oluali lulo, ka li sokisiwa lesumũlũho li tunda koku ‘vumba Yehova lutima wove wosi lomuenyo wove wosi.’ (Yeh. 22:5) Nda kua litumbikile handi ku Yehova, li pula ndoco: ‘Nye ci nateka oku linga Ombangi ya Yehova?’ Nda ufendeli wa Yehova okuti wa papatisiwa, ku yongola hẽ, oku vokiya esanju liove komuenyo? Omo liaco, vokiya upange wove woku kunda, kuenda amamako oku kula kespiritu. Ocipama cikuãimo, cika lekisa ndomo o pondola oku kula kespiritu poku kuama ongangu yupostolo Paulu.
O Tambulula Ndati?
• Tukula atosi avali a lekisa esunga lieci tu sukilila oku vumba Suku.
• Nye ca kuatisa Timoteo oku nõlapo oku vumba Suku?
• Momo lie o sukilila oku pandikisa eci o pita velambalalo?
• Apuluvi api upange aku yulukila?
[Elitalatu kemẽla 18]
Oku vumba Yehova, oyo onjila ya velapo komuenyo
[Elitalatu kemẽla 19]
O pondola hẽ oku tambulula apulilo atiamẽla kekolelo liove?