Tu Suisipo “Okukola Kuetu Loku Sumbila Suku”

CATIAMẼLA koku kola kua Yehova Suku, Embimbiliya li popia hati: “O kola, o kola, o kola, [a] Yehova.” (Isa. 6:3; Esit. 4:⁠8) Kelimi lio Heveru kuenda lio Helasi, ondaka “okukola” yi lomboloka oku lipua, oku liyelisa kefendelo, kuenda oku yuvula evĩho. Oku kola kua Suku ku tiamisiwila koku lipua kovituwa.

Anga hẽ Yehova Suku o kola, ka lavokavo okuti afendeli vaye va liyelisa konepa yespiritu kuenda kovituwa ndeci va siata oku liyelisa ketimba? Ndomo ca lekisiwa Vembimbiliya, Yehova o yongola okuti afendeli vaye va linga omanu va kola. Kelivulu lia 1 Petulu 1:​16, tu tangako ndoco: “Omo ame ñola oco lenevo vu kola.” Omanu ka va lipuile va pondola hẽ oku setukula oku kola kua Yehova? Va pondola oku ci linga ndaño ka va lipuile. Nda tua liyelisa konepa yespiritu, tu kala omanu va kola kovaso a Suku, kuenda tu kuata ukamba laye.

Tu pondola oku liyelisa ndati voluali lulo lua vĩha? Ovituwa vipi tu sukila oku yuvula? Apongoloko api tu sukila oku linga koku vangula lo kovituwa vietu? Tu kũlĩhĩsi eci tu lilongisa kovina Suku a kisikile ku va Yudea eci va tunda ko Bavulono kunyamo wo 537 O.Y.

‘Kuka Kala Elila li Kola’

Yehova wa popele hati, omanu vaye va kala kumandekua ko Bavulono, vaka tumbulula ofeka yavo. Vocitumasuku caco mua kongelele ohuminyo yi popia hati: “Pa kala elila, lelila liaco li tukuiwa liti, Elila li Kola.” (Isa. 35:8a) Olondaka evi vi lekisa okuti Yehova ka yuluile lika onjila oco va Yudea va tiukile kofeka yavo, pole wa likuminyavo oku va teyuila vungende wavo.

Koloneke vilo, Yehova wa yulula “Elila li Kola” li kuatisa omanu oku tunda vo Bavulono Yinene, ocisoko catavo esanda. Tunde kunyamo wo 1919, eci a yovola Akristão olombuavekua ketavo liesanda, ovo va siata oku amamako oku yuvula alongiso esanda toke cilo. Koloneke vilo, etu tuafendeli va Yehova, tua sanjukila oku liyelisa konepa yespiritu, kuenje ocituwa caco ci tu kuatisa oku kuata ukamba la Yehova kuenda ombembua la vamanji.

‘Okacunda katito’ okuti Akristão olombuavekua, kuenda ‘owiñi wakahandangala wolomeme vikuavo,’ va nõlapo oku endela vonjila yi kola kuenda va kasi oku laleka vakuavo oku endela vonjila yaco. (Luka 12:32; Esit. 7:9; Yoa. 10:​16) “Elila li Kola” lia yulukila ava va yongola oku eca “atimba [avo] ndocilumba ci kasi lomuenyo, haico ci kola, kuenje ci sanjuisa Suku.”​—⁠Va Rom. 12:⁠1.

“Vakuevĩho ka va Endelamo”

Eci va Yudea va tiukila kofeka yavo kunyamo wo 537 O.Y., va sukilile oku liyelisa. Catiamẽla konumbi yoku endela ‘Velila li Kola,’ elivulu lia Isaya 35:8 li popia hati: “Vakuevĩho ka va endelamo. Vakuesanda ka va lueyisa u endelamo.” Omo okuti ocimãho ca velelepo ku va Yudea poku tiukila ko Yerusalãi oku tumbulula efendelo liocili, va sukilile oku tundisa vakuacipululu pokati kavo kuenda vana ka va kapeleko ovina vi kola. Omanu vaco va sukilile oku kuata ovisimĩlo via Yehova viatiamẽla koku liyelisa. Koloneke vilo, vana va yongola oku taviwa la Suku, va sukila oku kuama olonumbi viaco. Va sukilavo oku suisapo “okukola [kuavo] loku sumbila Suku.” (2 Va  Kor. 7:⁠1) Ovituwa vipi vĩvi tu sukila oku yuvula?

Upostolo Paulu wa soneha hati: “Ovilinga vietimba vi moleha, vievi: ukahonga, evĩho, [kuenda] ohumba.” (Va Gal. 5:​19) Vukahonga mua kongela oku lipekela kuomanu ka va kuelele kuenda oku linga uvasi. Vohumba mua kongela “umbondo, upuepue kuenda akutisasõi.” Omo okuti Yehova o kola, ka sole ovituwa viaco. Omunu wosi o linga ukahonga o tundisiwa vekongelo. Vana va li litumbika koku “linga evĩho,” va tundisiwavo vekongelo.​—⁠Va Efe. 4:⁠19.

Ondaka “evĩho” yi tiamisiwila kakandu osi. Kelimi lio Helasi, ondaka yaco yi tiamisiwila kovituwa viosi via vĩha, ci kale kekalo, kupopi kuenda kakamba vãvi. Mua kongelavo akandu ana ka a sombisiwa.a Vana va li tumbika kovina viaco va tẽla hẽ oku suisapo oku kola kuavo?

Sokolola ndeci okuti Ukristão umue o fetika oku tala omanu va kasi epolõla vuyombeki. Omo lielinga liaco lĩvi onjongole yaye yoku liyelisa kovaso a Yehova yi fetika oku tepuluka. Ndaño elinga liaco ka li tendiwa ndekandu linene, li honguisa elikolisilo liaye lioku amamako oku linga ‘ovina via pua evĩho, viesunga, via sumbiwa, kuenda evi vi sivayaiwa.’ (Va Fil. 4:⁠8) Oku tala omanu va kasi epolõla ku nyõla ukamba wetu la Suku. Omo liaco, tu yuvuli oku vangula ovina viatiamẽla kevĩho.​—⁠Va Efe. 5:⁠3.

Konomuisa ocindekaise cikuavo. Sokolola ndeci okuti Ukristão o kuete ocituwa coku litukusa kovimatamata viuyali toke eci a liupa oloñeyi vioku lipekela. Ndaño ondaka yaco ka yi sangiwa Vembimbiliya, anga hẽ ocituwa caco ka ci nyõli ovisimĩlo viaye? Nda wamamako locituwa caco kaka nyõla hẽ ukamba waye la Yehova Suku omo lioku livĩhĩsa kovaso aye? Tu konomuisi elungulo liupostolo Paulu liatiamẽla koku liyelisa “kovina viso vi vĩhisa etimba levi vi vĩhisa utima” kuenda koku ipaya “ovituwa vĩvi [viatiamẽla] koluali, viokuti ukahonga, levĩho, lokanyaima, kuenda oñeyi yĩvi, locipululu.”​—⁠2 Va  Kor. 7:1; Va Kol. 3:⁠5.

Omo okuti oluali lua vialiwa la Satana, lu kasi oku vetiya ovituwa vĩvi. Ka ca lelukile oku siapo ovituwa vĩvi. Pole, Akristão ka va “lingainga nda vakualofeka . . . va kasi luveke wovovitima.” (Va Efe. 4:​17) Yehova o tava lika okuti tu endela ‘Velila li Kola’ nda tua yuvula ovituwa ka via sungulukile.

“Ka mu Kala Ohosi”

Omo okuti Yehova Suku o kola, oco tu taviwe laye, tu sukila oku linga apongoloko kovituwa kuenda kolombangulo vietu. Elivulu lia Isaya 35:9 li popia hati: “Ka mu kala ohosi kuenda ocinyama ca tema ka cendelamo.” Vana va kuete ovituwa viungangala haivo va popia olondaka viukãlu, va sokisiwa lovinyama via tema. Omo liaco, ka vaka iñila voluali luokaliye Suku a tu likuminya. (Isa. 11:6; 65:​25) Vosi va yongola oku taviwa la Suku, va sukila oku siapo ovituwa vĩvi kuenda oku suisapo oku kola kuavo.

Ovisonehua vi tu lungula hati: “Ocikumbiti lonyeño lekaka kuenda onjuela lusokui locipombo, viosi vimbipo.” (Va Efe. 4:​31) Kelivulu lia va Kolosai 3:​8, tu tangako hati: “Cilo puãi, vimbipo viosi. Imbipo muẽle onyeño, lekaka, lukuse, kuenda oku lundila, lolombangulo vi linga osõi.” Ondaka ‘olombangulo vi linga osõi’ yi lomboloka oku popia lãvi vakuetu, oku va imbula kuenda oku popia atonãi.

Koloneke vilo, ombangulo yi linga osõi ya siata calua, ndaño vapata. Olohueli vimue via siata oku lihoya loku li tonda pokati, kuenda vi kongelavo omãla vovina viaco. Akristão va sukila oku yuvula ocituwa caco.​—⁠1 Va  Kor. 5:⁠11.

Oku Suisapo “Okukola Kuetu Loku Sumbila Suku” ku Nena Asumũlũho!

Tu kuete esumũlũho linene lioku vumba Yehova Suku yetu o kola. (Yeh. 24:​19) Ekalo liwa tu kuete konepa yespiritu vocisoko ca Yehova, li tu nenela esanju lialua. Oku lekisa ovituwa viwa kovaso a Yehova, oyo onjila ya velapo kokuetu.

Ndopo Suku oka tẽlisa ohuminyo yoku pongolola ilu lieve oco li linge Oluali luokaliye. (Isa. 35:​1, 2, 5-7) Vana va likolisilako oku endela volonjila via Suku, vaka kuata esumũlũho lioku kala voluali luokaliye. (Isa. 65:​17, 21) Omo liaco, tu amamiko oku fendela Suku loku liyelisa kespiritu oco tu kuate ukamba laye.

[Etosi pombuelo yemẽla]

[Elitalatu kemẽla 26]

Va Yudea va kisikiwile oku linga nye oco va endele ‘Velila li kola’?

[Elitalatu kemẽla 27]

Oku tala omanu va kasi epolõla ku nyõla ukamba wetu la Yehova

[Elitalatu kemẽla 28]

“Onjuela lusokui locipombo, viosi vimbipo”