Va Kuete Ongusu Ndaño Va Hongua
O PONDOLA oku yuliwa lovitangi viove. Ovio vi kakatela ndatuli. Pamue o sima okuti, ku kuete epondolo lioku vi yula. Poku sokisa ekalo liove leli lia vakuene, o sima okuti, ovo va kasi ciwa. Handi vali, citava okuti o kasi oku liyaka lovitangi vikuavo vioku vela kuna kua tepulula ongusu yove kuenda esanju liove. Omo liaco, o kuete ovisimĩlo viokuti ku tẽla oku yula ovitangi viaco. Ove pamue o kuata ovisimĩlo ndevi via Yovi wa popia ku Suku hati: “Nda wa tavele oku mbundisa vonjembo! Nda wa tavele oku mbundisa toke onyeño yove yimũha! Nda wa tavele oku nukuila eteke loku njivaluka!”—Yovi 14:13.
O pondola ndati oku yula ekambo lielavoko? Ndaño ka ca lelukile, o sukila oku yuvula oku sokolola calua kovitangi viaco. O sukila oku konomuisa epulilo Yehova a lingile ku Yovi ukuekolelo hati: “Eci nda seveta oluali ove wa kala pi? Nda ukualondunge sapuileko. Elie wa lu valeka? Siti wa ci kũlĩha. Elie wa lu seteka lukolo?” (Yovi 38:4, 5) Osimbu tu konomuisa apulilo a lingiwa ndeti, tu vetiyiwa oku kũlĩha uloño wa Yehova kuenda unene waye. Eye o kuete esunga lioku ecelela okuti ovitangi violuali lulo viamamako toke cilo.
“Osongo Vetimba”
Omo liekolelo upostolo Paulu a kuata, wa pinga ku Yehova oco o upe ocitangi a liyaka laco okuti ca kala ‘ndosongo vetimba’ liaye. Eye, wa likutilila ku Suku olonjanja vitatu, oco o popele kocitangi caco. Ndaño ka tua kũlĩhĩle ovitangi viaco, pole, via tepuluile esanju lia Paulu kupange wa Yehova. Ovitangi viaco, wa vi sokisa loku vetiwa olonjanja viosi. Omo liaco, Yehova wo tambulula hati: “Ocali cange cu ku tẽla, momo unene wange u loñolohela poku pekengua.” Yehova kopile osongo yaco vetimba lia Paulu. Ndaño losongo yaco, Paulu wamamako oku pandikisa, kuenje wa popia hati: “Eci nda pekengua, oco ñuete ongusu.” (2 Va Kor. 12:7-10) Nye a yonguile oku popia lolondaka evi?
Ovitangi Paulu a liyaka lavio, ka vi yulile lovikomo, kuenda ka vio tatekele oku tẽlisa upange a tambuile ku Yehova. Paulo wa kolelele okuti, Yehova o tẽla oku u popela, kuenje wamamako oku likutilila loku pinga ekuatiso kokuaye. (Va Fil. 4:6, 7) Paulu kesulilo liomuenyo waye palo posi, wa popia hati: “Nda yaka uyaki uwa. Oku yoloka nda mala. Koku tata ekolelo nde lipua.”—2 Tim. 4:7.
Yehova wa siata oku tuma omanu vaye ka va lipuile oco va tẽlise ocipango caye, ndaño lovitangi vamamako oku eca esivayo kokuaye. Eye o pondola oku eca kokuavo olonumbi luloño waye, oco va tẽle oku liyaka lovitangi viavo, kuenda oku amamako lesanju kupange woku kunda. Ndaño omanu ka va lipuile, kuenda va hongua, va siata oku linga upange wa Yehova vocisoko Caye.
Paulu wa lombolola esunga lieci Suku kopilile osongo vetimba liaye poku popia hati: “Si litambela asituluilo aco a piãla.” (2 Va Kor. 12:7) Paulu “osongo” a kuatele, yo wivaluisa okuti, ka tẽlele oku linga ovina viosi, kuenda co kuatisa oku lekisa umbombe. Cimuamue haico Yesu a longisa poku popia hati: “U o liamisa kunene amisua kutito, kuenje u o liamisa kutito amisua kunene.” (Mat. 23:12) Ovitangi vi kuatisa omanu va Yehova Suku oku kala ambombe kuenda oku limbuka okuti oco va pandikise toke kesulilo, va sukila oku kolela kokuaye. Omo liaco, va ‘lipandela Yehova’ ndeci upostolo a linga.—1 Va Kor. 1:31.
Oku Mãlako Ehonguo
Omanu vamue va hongua, pamue ka va kũlĩhĩle esunga liaco. Vakuavo, va siata oku likolela ovo muẽle omo liovokuasi avo. (1 Va Kor. 10:12) Ehonguo lia siatavo oku vetiya omanu oku sima okuti, va velapo vakuavo.
Yoava una wa kala kesongo wovita via Soma Daviti, wa kuatele utõi kuenda epondolo lioku tetulula ovitangi. Pole, wa linga ekandu linene omo lioku lekisa epela kuenda ocipululu. Eye wa ponda va kesongo vavali vakuavita. Tete wa fetuluinya poku ponda Avinere. Eci Yoava a likembisa oku lama ocimumba caye Amasa, wo kuata kolonjele oco o sipule, kuenje wo ponda losipata ya kala peka liaye liepĩli. (2 Sam. 17:25; 20:8-10) Yoava wa piñala komangu ya Amasa una wa kala kesongo wovita, kuenda wa sanga epuluvi liwa lioku li yovola kunyali waye, lelavoko lioku kala vali kesongo. Ove o pondola oku limbuka okuti, Yoava ka lavele ovisimĩlo viaye oku kongelamo ocipululu a kuatele. Eye wa lekisile ungangala, kuenda ka yonguile oku likekembela. Eci Soma Daviti a kala oku panda kolofa, wa pindisa omõlaye Salomone oco a yambule Yoava omo liungangala waye.—1 Olos. 2:5, 6, 29-35.
Tu sukila oku yuvula oku tẽlisa olonjongole ka via sungulukile, poku likolisilako oku lekisa ovituwa viwa. Catete, tu sukila oku kũlĩhĩsa olonjongole viaco. Noke tu likolisilako oku vi yuvula. Tu ci linga poku likutilila ku Yehova olonjanja viosi, oku pinga ekuatiso lioku yula ahonguo aco, kuenda oku lilongisa Ondaka yaye. Nda tua ci linga, ci tu kuatisa oku liyaka lolonjongole viaco. (Va Hev. 4:12) Tu sukilavo oku likolisilako oku yaka oco tu yule ahonguo etu kuenda oku yuvula ovisimĩlo viokuti, lalimue eteke tu yula ovitangi viaco. Omo okuti ka tua li puile, uyaki waco citava okuti wamamako vokuenda kuotembo yalua. Paulu wa liyakavo locitangi caco, kuenje wa soneha hati: “Eci manga hacoko ndinga, te eci [ndi] nyãle oco ndinga.” Paulu ka kuatele onjongole yoku linga eci cĩvi, pole, omo okuti ovisimĩlo viaco via kala vutima waye, ka ca lelukile oku vi yuvula. Pole, wa tẽla oku liyaka lahonguo aco, poku pinga ekuatiso ku Suku vonduko ya Yesu Kristu. (Va Rom. 7:15-25) Omo liaco, Paulu wa popia hati: “Mbeta etimba liange loku li pokuisa, sanga eci nda longisa ale vakuetu ame muẽle nimiliwa.”—1 Va Kor. 9:27.
Omanu va siata oku lisandela esunga. Tu pondola oku yuvula ocituwa caco, poku lekisa ovisimĩlo vi li kuata lonjongole ya Yehova, kuenda oku kapako elungulo Paulu a ecele Kakristão poku va sapuila hati: “Nyehuli eci cĩvi. Kakateli eci ciwa.” (Va Rom. 12:9) Oco tu yule ahonguo etu, tu sukila oku kala vakuacili, oku pandikisa, kuenda oku kũlĩhĩsa ekalo liomuenyo wetu. Daviti wa pinga ku Yehova hati: “Kũlĩhisa utima wange lovisimilo viange.” (Osa. 26:2) Eye wa kũlĩhĩle okuti Suku wa kapako olonjongole vietu, kuenda o tu ĩha ekuatiso tu sukila. Nda tua pokola kolonumbi Yehova a siata oku tu ĩha lekuatiso Liondaka yaye kuenda espiritu sandu liaye, ci tu kuatisa oku yula ahonguo aco.
Vamue va siata oku sakalala lovitangi viavo, momo va sima okuti ka va tẽla oku vi potolola. Akulu vekongelo va pondola oku eca ekuatiso liocisola, kuenda evetiyo. (Isa. 32:1, 2) Pole, va sukila oku lekisa esunguluko. Momo kuli ovitangi vimue okuti, ka tu tẽla oku vi tetulula voluali lulo. Pole, valua va siata oku sanga onjila yoku liyaka lavio.
Yehova wa Likuminya Oku tu Kuatisa
Ndaño tu liyaka lovitangi, tua kũlĩha okuti Yehova o tu songuila kuenda o tu kuatisa. Embimbiliya li popia hati: “Lisepuisi vemẽhi lieka lia pama lia Suku, okuti kotembo yaye o wamisi kunene. Ohele yene yosi yi yeki kokuaye momo eye o vu lava.”—1 Pet. 5:6, 7.
Eci manji Kathy o kasi oku talavaya ko Betele anyamo alua a limbuka okuti ulume waye wa kuatiwa luvei umue u tukuiwa hati, mal de Alzheimer, wa simĩle okuti ka tẽla oku li yaka lawo. Eye wa likutilila ku Yehova oco o wĩhe olondunge vioku li yaka luvei waco. Osimbu uvei waco wa kala oku li vokiya, vamanji va lekisa ocisola cavo poku lombolola ndomo ukãi waco a pondola oku liyaka luvei wulume waye. Vamanji vaco va panga onepa kekuatiso Yehova a siata oku eca, kuenda manji Kathy, wa tẽla oku tata ulume waye toke kolofa viaye, eci a tẽlisa 11 kanyamo luvei waco. Eye wa popia hati: “Lasuẽlela alua ndeca olopandu ku Yehova omo liekuatiso liaye, momo lia nyĩha ongusu yoku pandikisa. Kefetikilo sia kuatele ocisimĩlo cokuti ndika amamako oku linga upange wange ndaño lovitangi kuenda esumuo!”
Ekuatiso Lioku Yula Ovitangi
Omanu vamue eci va liyaka lovitangi, va siata oku sima okuti Yehova ka tambulula olohutililo viavo vioku pinga ekuatiso koloneke vilo viohali. Pole, tu sukila oku ivaluka olondaka via Daviti eci a linga ukahokolo la Batisieva. Eye wa popia hati: “A Suku, ove ku timi utima wa teka, haiwo wa samba.” (Osa. 51:17) Daviti wa likekembela kuenda wa kũlĩhĩle okuti, o pondola oku amẽla ku Suku loku tambula ongecelo yakandu. Yesu wa limbuka ekuatiso liespiritu lia Yehova. Evanjeliu lia sonehiwa la Mateo li tukula olondaka via Isaya vina via tiamisiwila ku Yesu wa popia hati: “Oluneva lua sasoha eye ka lu teya. Ocinyaña ci taima ka cimi, toke a yulisa esunga.” (Mat. 12:20; Isa. 42:3) Eci Yesu a kala palo posi, wa lekisa ohenda kolosuke kuenda ku vana va enda oku talisiwa ohali. Eye ka kuatele ovituwa vi lekisa ndu okuti wa kala oku ima ocinyi condiyelo ya vana va sokisiwile ndoluneva lutaima. Pole, wa lekisa ohenda komanu va tala ohali kuenda wa tumbulula ekalo liwa liomuenyo wavo. Eye wa linga ovina viaco eci a kala palo posi. Ove hẽ, ku tava okuti Yesu o tẽla oku ku kuatisa oku yula ehonguo liove? Elivulu lia Va Hev. 4:15, li lombolola okuti, Eye o pondola oku ‘yeva oku leñela kuetu.’
Paulu eci a soneha catiamẽla ‘kosongo ya kala vetimba liaye,’ wa limbuka okuti unene wa Kristu wa ‘wila’ kokuaye. (2 Va Kor. 12:7-9) Eye wa mola eteyuilo lia Suku vonduko ya Kristu, ndeci omunu a sanga eteyuilo kehunguhungu liofela. Tu kuami ongangu ya Paulu okuti, ka tu ecelela oku tatekiwa lahonguo kuenda ovitangi vikuavo. Oco tu pame kespiritu, tu sukila oku kapako ovina viosi Yehova a siata oku tu ĩha lekuatiso liocisoko caye palo posi. Tu likolisilako loku kolela ku Yehova lelavoko liokuti, o songuila olonjila vietu. Nda tua limbuka ndomo unene wa Suku wa siata oku tu kuatisa kahonguo etu, ci tu kuatisa oku kuama ongangu ya Paulu wa popia hati: “Eci nda pekengua, oco ñuete ongusu.”—2 Va Kor. 12:10.
[Elitalatu kemẽla 3]
Paulu wa likutilila ku Yehova oco o kuatise oku tẽlisa upange waye
[Elitalatu kemẽla 5]
Soma Daviti wa ecele ku Yoava ocikele coku songuila ovita
[Elitalatu kemẽla 5]
Yoava wa tẽlisa ocikele caye poku ponda unyali waye Amasa
[Elitalatu kemẽla 6]
Akulu vekongelo va siata oku eca olonumbi Viovisohehua vi tu kuatisa oku liyaka lovitangi