Kuatisa Omõlove Oku Liyaka Lesumuo

ECI ukãi umue a endele vovenda yoku landisa alivulu, wa sumuile calua, kuenje wa vangula lukuakulandisa hati: “Ovenda yove yeyuka to alivulu, pole, sia sangelemo elivulu li pondola oku kuatisa omõlange!” Ukãi waco, wa kala oku sandiliya olonumbi vioku kuatisa omõlaye, oco a tẽle oku pandikisa lesumuo omo lioku fisa umue vepata.

Ukãi tua tukula ndeti, o kuete esunga lioku sakalala. Momo ka ca lelukile oku kuatisa omõla oku liyaka lesumuo liangandiavo wa fa! Komãla vana va kasi oku tatiwa lolonjali viavo, olofa vi pondola oku nyõla ocisola ci kasi vepata. Nda ove unjali, o pondola oku kuatisa ndati omõlove eci umue vepata a fa?

Ocili okuti eci tu fisa umue ngandietu, ndaño tu likolisilako oku tula utima, lopo esakalalo lesumuo ka li piti. Pole, kuka ivaleko oku eca ekuatiso komõlove. Velivulu limue lia sandekiwa kosipitali yolupale luo Minnesota, ko Amerika, mua sonehiwa hati: “Omãla vana va yevelela eci omãla vakuavo va popia, olonjanja vialua va siata oku kuata ovisimĩlo ka via sungulukile.” Elivulu liaco, handi li amisako vali hati: “Omãla va sukila oku yeva ovina viocili.” Omo liaco, lomboluila omãla vove ovina via lisoka lutunga wavo. Pole oku ci linga ka ca lelukile, momo omãla va litepa koku kuata elomboloko.​—⁠1 Va Korindo 13:⁠11.

Ndomo o Sapuilako Omõlove Eci ci Lomboloka Oku fa

Ekonomuiso limue lia lingiwa, lia lekisa okuti, olonjali poku sapuilako omãla vavo ovina viatiamẽla kolofa, vi sukila oku yuvula oku tukula olondaka ndeci, “wa pekela,” “wa nyelela,” ale “wa enda.” Momo oku tukula olondaka viaco, ci pondola oku eca ovisimĩlo ka via sungulukile komõla. Ocili okuti, Yesu wa tukula ondaka yaco ndocindekaise poku lekisa ekalo liomunu wa fa. Pole, ivaluka okuti eye ka kaile oku vangula lomãla. Eye noke wa eca elomboluilo liocindekaise caco. Yesu wa sapuila olondonge viaye hati: “Ukuetu Lasaru wa pekela.” Ndaño okuti olondonge via kala ale akulu, “puãi va soka okuti [Yesu] wa tukula oku puyukila votulo.” Kuenje “Yesu wa teta onimbu, wa va sapuila hati, Lasaru wa fa.” (Yoano 11:​11-14.) Nda okuti kakulu ca sukilile oku va lomboluila ondaka yaco, enene vali omãla va sukila oku va lomboluila ciwa!

Asonehi Mary Ann Emswiler la James P. Emswiler, va popia ndoco: “Pamue onjali yi seteka oku sapuila omõlaye eci ci lomboloka oku fa lolondaka vimue ka vi sumuisa, pole oku ci linga, ceca ovisimĩlo vĩvi okuti viu kokela usumba.” Oku sapuila omõla okuti ngandietu wa pekela, ci vetiya omõla oku kuata usumba wokuti eci aka pekela luteke pamue ka pasuka vali. Oku sapuilavo omõla okuti ngandietu “wa enda,” cu vetiya oku yuvula oku siala lika liaye.

Olonjali vialua, eci vi sapuila omãla vavo ovina viatiamẽla kolofa, vi seteka oku popia olondaka vina okuti ka vi lomboloka ciwa. (1 Va Korindo 14:⁠9) Olonoño vi lungula olonjali oku vetiya omõla vavo oku linga apulilo atiamẽla kolofa. Momo oku ci linga ci kuatisa oku eca elomboloko liwa kuenda ci lekisa onjila yikuavo yoku kuatisa omõla.

Ono Yolonumbi Via Koleliwa

Votembo yoku lila, pamue omõlove imba ovaso kokuove oco u kuatise oku tambulula apulilo aye. Oco hẽ pi ove o pondola oku sanga olonumbi via koleliwa viatiamẽla kolofa? Omanu valua, va siata oku sanga elembeleko kuenda elavoko lia koleliwa poku tanga olonumbi Viembimbiliya. Olonumbi viaco via koleliwa momo vi lombolola eci ca nena olofa, ekalo liava va fa kuenda elavoko ava va fa va kuete. Oku sapuila omõla okuti “ava va fa lacimue va kũlĩha,” cu kuatisa oku limbuka okuti ngandiavo wa fa, ka kasi oku tala ohali. (Ukundi 9:⁠5) Handi vali Vembimbiliya, Suku wa likuminya okuti tuka li sanga vali la vangandietu va fa voluali luokaliye, palo posi.​—⁠Yoano 5:​28, 29.

Eci o tangela Ovisonehua vi Kola komõla, ci pondola oku u kuatisa oku limbuka okuti, Embimbiliya lieca elembeleko kuenda olonumbi vialio via koleliwa kotembo yohali. Eci cika vetiya omõla oku limbuka okuti ove unjali wa kapako Ondaka ya Suku.​—⁠Olosapo 22:6; 2 Timoteo 3:⁠15.

Atambululo Kapulilo Atiamẽla Kolofa

Poku kuatisa omõla oku liyaka lesumuo, citava okuti ku molẽha ovina vimue via tatama. Nye ove o sukila oku linga?a Tu konomuisi apulilo amue a siata oku lingiwa.

• Anga ka citava oku lekisa komõlange esumuo ñuete? Ocili okuti olonjanja vimue ca sunguluka oku yuvula oku lekisa komõla okuti ove wa sumua. Anga hẽ oku lekisa komõla okuti ove wa sumua cĩvi? Olonjali vialua via limbuka okuti oku sapuila omãla ocili catiamẽla kesumuo liavo ci kuete esilivilo. Vakuavo va siata oku tanga lomãla vavo ovolandu a sangiwa Vembimbiliya, okuti a lekisa omanu va lila omo liesumuo. Yesu wa lolula asuelẽla eci ekamba liaye Lasaru a fa. Ivaluka okuti Yesu ka yuvuile oku lekisa esumuo liaye.​—⁠Yoano 11:⁠35.

• Citava hẽ okuti omõlange o kala ponjo yonambi ale endavo kayambo poku ka kenda ocivimbi? Nda wa nõlapo okuti omõla endavo kayambo eci vaka kenda ocivimbi, ca sunguluka oku u sapuila selo esunga lieci ku lingiwila ovina viaco. Olonjanja vimue, olonjali vi kuete esunga lioku tateka omãla vavo oku kala ponambi ale kovina vikuavo viatiamẽlako. Omãla vana va siata oku yevelela ohundo yonambi yi lingiwa Lolombangi Via Yehova, va kuatisiwa lolonumbi Viembimbiliya. Handi vali, ‘esumbilo’ kuenda ocisola comanu va siata oku kala konambi ci pondola oku eca elembeleko komõla.​—⁠Va Roma 12:​10, 15; Yoano 13:​34, 35.

• Anga hẽ citava oku sapuilako omõlange olofa via umue ngandietu? Olonoño vimue via popia hati, nda o yuvula oku sapuilako omõlove ovina viatiamẽla kolofa via umue ngandiene, eye oka sima okuti ove o kasi oku u limbika ondaka yimue yi kuete esilivilo. Usonehi umue otukuiwa hati, Julia Rathkey, wa popia ndoco: “Oku longisa omõla ovina viatiamẽla kolofa cu kuatisa oku yuvula oku kala lusumba.” Oku tukula ovituwa viwa viomunu wa fa, ci pondola oku kuatisa omãla oku yuvula esumuo. Olonjali vina okuti Olombangi Via Yehova, via siata oku lembeleka omãla vavo Lembimbiliya loku lekisa okuti ava va fa vaka pinduiwa voluali luokaliye palo posi, muna ka muka kala vali oku vela ndaño oku fa.​—⁠Esituluilo 21:⁠4.

• Ndi pondola oku kuatisa ndati omõlange osimbu tu kasi okulila? Osimbu vu kasi okulila, omõlove pamue o yeva esumuo lialua. Citava okuti omõla o tema kuenda o sakalala omo ka tẽla oku eca ekuatiso. Nda okuti omõla o li vetela evelo omo liolofa viangandiene, kuka sakalale, kuenda kuka kuate usumba loku sima okuti pamue o kuatiwa loku vela. O pondola oku kuatisa ndati omõlove oku liyaka lesumuo? Pamue omõlove ka kasi oku sima okuti ove kua limbukile esumuo liaye. Ivaluka okuti omõla o sukila ekuatiso liove. Kuka sime okuti omõla ka yevite esumuo. Lekisa okuti wo kolela poku linga apulilo o kuatisa oku sapela love. Nda wa ci linga ove kumue lomõlove vuka pamisiwa “lovisonehua.”​—⁠Va Roma 15:⁠4.

• Ndi kuatisa ndati epata liange oku amamako oku linga upange lovina vikuavo? Olonoño vimue via popia hati, oku amamako oku linga upange, ci kuete esilivilo. Momo ci kuatisa oku mãlako esumuo. Olombangi Via Yehova, via limbuka okuti oku pitisa kovaso ovina viespiritu, oku kongelamo oku lilongisa Embimbiliya loku endaenda kolohongele, ci pondola oku pamisa ekolelo liepata.​—⁠Esinumuĩlo 6:​4-9; Va Heveru 10:​24, 25.

Ocili okuti, osimbu handi Yehova Suku ka malẽleko oku vela kuenda olofa, omãla olonjanja vimue vaka liyaka locitangi colofa via umue ngandiavo. (Isaya 25:⁠8) Omo liaco, oku kolela loku pamisa omãla, ci pondola oku va kuatisa oku liyaka lesumuo.

[Etosi pombuelo yemẽla]

[Elitalatu kemẽla 11]

Vetiya omõlove oku linga apulilo kuenda oku vangula ovina vi u sakalaisa

[Elitalatu kemẽla 12]

Amamako lesokiyo liovina viespiritu oku kongelamo elilongiso Liembimbiliya vepata