Ndomo Tu Yula Ovitangi Vioku Kundila Konjo Lanjo
“Tua kuata utõi vu Suku yetu oku u sapuili ondaka yiwa ya Suku pokati kuyaki wa lua.”—1 VA TES. 2:2.
1. Ovitangi vipi Yeremiya a liyaka lavio, kuenda wa vi yula ndati?
YEREMIYA wa kuata ovituwa ndevi vietu. Eci Yehova o wĩha ocikundi coku “linga uprofeto wolofeka,” wa popia hati: “A Ñala Yehova, ame hameko, okupopia si ci tẽla momo ndimõla.” Pole, wa tava ocikele caco omo lioku kolela ku Yehova. (Yere. 1:4-10) Vokuenda kueci ci pitahãla 40 kanyamo, Yeremiya wa liyaka locitangi ca vana ka va tavele kesapulo liaye, wa pembuiwa, kuenda wa tipuiwa. (Yere. 20:1, 2) Olonjanja vimue, wa yonguile oku liwekapo upange waye. Pole, wa pandikisa loku kundila omanu vana ka va lekisile onjongole kesapulo liaye. Lekuatiso lia Suku, Yeremiya wa linga upange una a simĩle okuti, ka kuete epondolo lioku u tẽlisa.—Tanga Yeremiya 20:7-9.
2, 3. Ndamupi afendeli va Suku va siata oku liyaka lovitangi koloneke vilo, ndeci ca pita la Yeremiya?
2 Koloneke vilo, afendeli valua va Suku va siata oku kuata ovisimĩlo ndevi via Yeremiya. Catiamẽla kupange woku kundila konjo lanjo, omanu vamue va siata oku sima ndoco: ‘Lalimue eteke ndika linga upange waco.’ Pole, eci tu limbuka okuti ocipango ca Yehova ceci okuti tu kunda olondaka viwa, tu yula ohele kuenje tu kuata ombili yoku linga upange waco. Olonjanja vimue, valua pokati ketu tua siata oku liyaka lovitangi vi tateka oku lekisa ombili kupange woku kunda. Ocili okuti, ka ca lelukile oku fetika oku kundila konjo lanjo, kuenda oku amamako lupange waco toke kesulilo.—Mat. 24:13.
3 Citava okuti pamue o kasi oku lilongisa Embimbiliya Lolombangi Via Yehova, kuenda wa siata oku endaenda kolohongele. Nye o sukila oku linga nda o kuete ohele yoku fetika oku kundila konjo lanjo? Nda wa papatisiwa ale, kuenda o kuete uhayele, nye o sukila oku linga nda o kuete ohele yoku kundila konjo lanjo? Ivaluka okuti, omanu vakuavisoko viosi, va siatavo oku liyaka locitangi coku kundila konjo lanjo. Pole, lekuatiso lia Yehova, o pondola oku yula ocitangi caco.
Tu Sukila Oku Kuata Utõi
4. Nye ca kuatisa Paulu oku kunda olondaka viwa lutõi?
4 Ocili okuti, oku kundiwa kuolondaka viwa voluali luosi, ku kasi oku lingiwa lekuatiso liespiritu lia Suku, okuti unene womanu hawoko. (Sak. 4:6) Ekuatiso liaco li kasi oku eciwa Kakristão vosi. (2 Va Kor. 4:7) Kũlĩhĩsa ulandu wupostolo Paulu. Ivaluka okuti, eci a lambalaliwile kumue lakamba vaye olomisionaliu, wa soneha hati: “Ndaño eteke tua tala ohali, kuenda tua fũkĩlisua vo Filipoi, ndeci wa kũlĩhi, haimo tua kuata utõi vu Suku yetu oku u sapuili ondaka yiwa ya Suku pokati kuyaki wa lua.” (1 Va Tes. 2:2; Ovil. 16:22-24) Pamue tu komõha calua poku kũlĩha okuti ndaño Paulu wa kuatele ombili kupange woku kunda, olonjanja vimue wa pitavo locitangi coku linga upange waco. Pole, Paulu wa kolelele Yehova poku kunda lutõi olondaka viwa. Omo liaco, tu sukila oku kuama ongangu yaye. (Tanga Va Efeso 6:18-20.) Tu kuama ndati ongangu ya Paulu?
5. Nye ci pondola oku tu kuatisa oku kunda lutõi?
5 Ohutililo yi tu kuatisa oku kuata utõi woku kunda olondaka viwa. Manji umue ukundi wotembo yosi wa popia hati: “Ndi likutilila ku [Yehova] okuti ndi kuata utõi woku kunda oco esapulo liange li vete kovitima viomanu. Ndi likutililavo oco ndi kuate esanju kupange waco. Momo upange waco wa Yehova, kuenda tu u linga lika lekuatiso liaye.” (1 Va Tes. 5:17) Omo liaco, vosi yetu tu sukila ekuatiso liespiritu sandu lia Suku, oco tu kunde lutõi.—Luka 11:9-13.
6, 7. (a) Ocinjonde cipi Esekiele a kuata, kuenda ci lomboloka nye? (b) Ocinjonde caco ci kuete esilivilo lie kafendeli va Suku koloneke vilo?
6 Elivulu lia Esekiele li kuete ovolandu a pondola oku tu kuatisa oku kunda lutõi. Vocinjonde cimue Esekiele a kuata, Yehova wo wĩha ociña celivulu ca sonehiwa vokati lo koñoño yaco olondaka vioku ‘lisiõsiõla loku litetela kuenda oku lila.’ Kuenje, wo tuma okulia ociña caco poku u sapuila hati: “A Mõlõmunu, lia ociña cilo huĩha, kutisa laco imo liove.” Ocinjonde caco ci lomboloka nye? Esekiele wa kala oku lavoka oku tẽlisa ocikele coku eca esapulo limue. Eye wa sukilile oku tẽlisa ocikele caco lutima waye wosi. Uprofeto wa popia hati: “Nda cilia, kuenje vomẽla wange ca sõsa ndowiki.” Oku kundila ondaka ya Suku komanu, kua nena esanju lialua ku Esekiele, kuenda kua kala ndokulia owiki. Eye wa limbukile okuti, wa kuata esumũlũho lia velapo omo lioku tumiwa la Yehova, ndaño wa sukilile oku kunda esapulo lia velapo komanu vana ka va lekisile onjongole.—Tanga Esekiele 2:8–3:4, 7-9.
7 Ocinjonde caco ci kuete esilivilo lia velapo kafendeli va Suku koloneke vilo. Tu kuetevo esapulo lioku kundila omanu vana ka va limbuka alikolisilo etu. Oco tu amameko oku limbuka upange woku kunda ndesumũlũho lia eciwa la Suku, tu sukila oku litekula lokulia kuespiritu. Nda tua kuata owesi woku lilongisa Embimbiliya, ka tu kuata elomboloko lia velapo Liondaka ya Suku. Anga hẽ o pondola oku amamako oku tanga Embimbiliya kuenda oku linga elilongiso lio pokolika? Wa siata hẽ oku sokolola ovina wa tanga?—Osa. 1:2, 3.
Ndomo tu Fetika Ombangulo Kupange Woku Kunda
8. Olonjila vipi via siata oku kuatisa akundi Vusoma oku fetika ombangulo kupange woku kundila konjo lanjo?
8 Onepa yalua yakundi, va kuete ocitangi coku fetika ombangulo onjanja yatete lomunu va sanga vocikanjo. Ocili okuti, vovikanjo vimue, ka ca lelukile oku fetika ombangulo. Vamanji vamue poku sapela lomunu konjo yaye, va siata lika oku tula utima nda va fetika ombangulo lolondaka vi teta onimbu, loku eca otratadu yimue ndomo ca lekisiwa pokakasia ka sangiwa kovinimbu vi kuãimo. Osapi yotratadu ale alitalatu aco, a pondola oku vetiya omunu tua sanga, loku tu kuatisa oku lombololola ocimãho cetu coku nyula omunu waco kuenda oku linga epulilo limue kokuaye. Oku kuama onjila yaco, ci tu kuatisavo oku lekisa olotratadu vitatu ale vikuãla komunu, kuenda oku wecelela oku nõla eyi a yongola. Ndaño tua siata oku eca olotratadu, ale oku vi lekisa komanu vosi tu sapela lavo, pole, ocimãho cetu oku vangula ovina vi vetiya oku fetika lavo elilongiso Liembimbiliya.
9. Momo lie oku li pongiya ku kuetele esilivilo?
9 Oku li pongiya ciwa ci ku kuatisa oku lekisa esanju kuenda oku vangula ciwa lomanu kupange woku kundila konjo lanjo. Ukundi umue wotembo yosi, wa popia hati: “Nda siata oku kuata esanju omo lioku lipongiya ciwa. Kuenda ca siata oku ndi kuatisavo oku vangula lomanu etosi nda pongiya.” Ukundi ukuavo wa popiavo hati: “Oku kũlĩha ulandu u sangiwa valivulu nda sokiya oku eca komanu, ca siata oku ndi nenela esanju poku va eca kokuavo.” Ndaño okuti oku pitolola olondaka tuka popia ci kuete esilivilo, pole, vamanji valua va siata oku kuatisiwa poku vi pitolola lolukandi. Poku ci linga ca siata oku va kuatisa oku linga ovina viwa kupange wa Yehova.—Va Kol. 3:23; 2 Tim. 2:15.
10. Nye ci sukila oku lingiwa oco akundi vope esilivilo kolohongele viupange woku kunda?
10 Olohongele viupange woku kunda vi tu kuatisa oku loñoloha kuenda oku kuata esanju kupange woku kundila konjo lanjo. Nda ocisonehua Cembimbiliya ceteke liaco ci likuata lupange woku kunda, citava oku ci tanga kuenda oku ci lombolola loku teta onimbu. Pole, vamanji va siata oku songola olohongele viaco, va sukila oku lipongiya ciwa kuenda oku linga ocindekaise cimue ca leluka ci likuata lekalo liocikanjo, ale oku eca olonumbi vimue vi kuatisa kupange woku kunda keteke liaco. Nda va ci linga, ci kuatisa akundi oku loñoloha koku eca uvangi. Nda akulu vekongelo kuenda vakuavo va songola olohongele viaco va li pongiya ciwa, ci va kuatisa oku tẽlisa ocimãho caco kuenda oku linga ohongele yaco votembo ya sokiyiwa.—Va Rom. 12:8.
Esilivilo Lioku Yevelela Lutate
11, 12. Oku yevelela lutate ci tu kuatisa ndati oku kundila omanu olondaka viwa? Lombolola ovolandu amue.
11 Ocili okuti, oku lipongiya ciwa ku kuete esilivilo, pole, oku kapako omanu tu sapela lavo kupange woku kunda, ci tu kuatisa oku fetika ombangulo lavo kuenda oku popia olondaka vi vetiya ovitima viavo. Onjila yimue yoku lekisa okuti tua va kapako, oku yevelela lutate eci va vangula. Manji umue mitavaso ukuakunyula akongelo, wa popia hati: “Oku kuata epandi kuenda oku yevelela lutate, ci vetiya omanu oku kuata onjongole yoku yevelela kolondaka viwa. Handi vali, ceca uvangi wokuti, tua va kapako.” Oku yevelela lutate omanu tu sapela lavo, kuenda oku lekisa ohenda kokuavo, ci va vetiya oku tava kesapulo lietu, ndomo ovolandu a kuãimo a ci lekisa.
12 Vukanda umue wasapulo u tukuiwa hati, Le Progrès, kolupale luo Saint-Étienne kofeka yoko Fransa, mu sangiwa ulandu wukãi umue wa lombolola okuti, eci omanu vamue vavali va totola kepito liaye wa sumuile calua. Momo otembo yaco ndopo a fisa oñaña yaye yukãi ya kuata olosãi vitatu. Eye wa soneha hati: “Eci va totola kepito, nda limbuka okuti Olombangi Via Yehova. Vonjanja yaco, nda yonguile oku va tundisa lesumbilo. Pole, nda limbuka okuti, ombrochura vambata peka, yi kuete osapi hati, momo lie Suku a ecelela ohali. Nda yonguile oku kũlĩha esunga lieci Suku a kasi oku ecelela ohali. Omo liaco, nda va laleka oku iñila vonjo oco ndi va tete kolondaka viavo. . . . Nda sapela lavo ci soka owola yimosi. Ovo, va ndi yevelela lohenda yalua. Kuenje eci va popia hati, kaliye tu tiukila, nda kuata ekavuluko vutima, kuenje nda pinga kokuavo oco va tiuke vali onjanja yi kuavo.” (Va Rom. 12:15) Vokuenda kuotembo, ukãi waco wa tava oku lilongisa Embimbiliya. Eye wa tava oku lilongisa omo manji o yevelela lutate kepasu liatete.
13. Tu pondola ndati oku tiamisila esapulo liusoma komunu lomunu tu sanga kupange woku kunda?
13 Nda tua yevelela lutate omanu tu sapela lavo, tu va vetiya oku tu sapuila esunga lieci va sukilila Usoma. Nda tua ci linga, ci tu kuatisa oku va kundila olondaka viwa. Ocili okuti, ukãi waco ka vetiyiwile lovina vamanji va popia, pole, wa vetiyiwa calua poku mola ndomo va kala oku u yevelela lohenda. (Olosap. 20:5) Ovo va siata oku lekisa onjongole komanu va sanga kupange woku kunda. Handi vali, va soneha olonduko viomanu va sapela lavo, letendelo liavo liotelefone, ondaka va sapela lavo, kuenda oku kũlĩhĩsa ovina va sukila. Nda omunu umue wa tukula ovitangi viaye, ovo vaka konomuisa ondaka yaco, kuenje poku tiuka, vo lomboluila olonumbi vimue. Ovo va tiamisila esapulo Liusoma kovitangi omunu lomunu a liyaka lavio ndeci upostolo Paulu a enda oku linga. (Tanga 1 Va Korindo 9:19-23.) Oku lekisa onjongole komanu, ci va vetiya oku tava kolondaka viwa, kuenda ci situlula ‘ohenda ya Suku yetu.’—Luka 1:78.
Lekisa Ovituwa Via Sunguluka
14. Osimbu tu tẽlisa upange wetu woku kunda, tu situlula ndati ohenda ya Yehova?
14 Yehova poku tu ĩha elianjo lioku li nõlela eci tu yongola oku linga, wa lekisa esumbilo kokuetu. Ndaño okuti Suku eye Ukuonenewosi, ka kisika omunu oku u fendela, pole, o koka omanu locisola caye, kuenda o sumũlũisa vosi va tava kaliangiliyo aye. (Va Rom. 2:4) Omo okuti, tulondingupange viaye, tu sukila oku lipongiya olonjanja viosi oco tu ece uvangi wolondaka viwa lonjila yimue yeca esivayo ku Suku yetu ukuahenda. (2 Va Kor. 5:20, 21; 6:3-6) Omo liaco, tu sukila oku kuata ovisimĩlo via sunguluka poku sapela lomanu va kasi vocikanjo cetu. Nye ci tu kuatisa oku yula ovitangi viaco?
15. (a) Nye Yesu a sapuila ovapostolo vaye nda va sanga omunu umue ka tava kesapulo vo kundila? (b) Nye ci tu kuatisa oku tiamisila utima koku sandiliya vakuavitima via sunguluka?
15 Yesu wa longisa olondonge viaye oco ka vika sakalale lomanu vana ka va lekisa onjongole kolondaka viwa, pole, wa vi vetiya oku sanda vakuavitima via sunguluka. (Tanga Mateo 10:11-15.) Omo liaco, oku kuata ovimãho vimue vi tito, ci tu kuatisa oku linga upange waco. Manji umue wa li sokisa lomanu vana va siata oku fẽla ondiamande. Eye wa popia hati: “Ocimãho cange, oku sandiliya omanu vakuavitima via sunguluka va yongola oku kũlĩha ocili Condaka ya Suku.” Manji ukuavo, o kuete ocimãho cokuti, “osemana losemana, o sanga omunu umue o lekisa onjongole poku sapela laye onjanja yatete, kuenje o sokiya oku tiuka lonjanga oco a linge epasu.” Akundi vamue va likolisilako oku tanga ocinimbu cimosi covisonehua lomanu va sapela lavo. Ocimãho cipi o sukila oku kuata?
16. Esunga lie tu kuete lioku amamako lupange woku kunda?
16 Upange woku kundila konjo lanjo ka watiamẽlele lika katambululo a eciwa lomanu tu sanga vocikanjo. Upange woku kunda u popela vakuavitima via sunguluka, pole u kuetevo esilivilo likuavo. Handi vali, u tu ĩha epuluvi lioku lekisa ocisola tu kuetele Yehova. (1 Yoa. 5:3) U tu kuatisavo oku yuvula oku kuata eko liosonde. (Ovil. 20:26, 27) Omo liaco, tu kuete ocikundi coku lungula olondigaĩvi okuti, ‘owola ya Suku yoku tetulula yeya.’ (Esit. 14:6, 7) Omo liupange woku kunda, onduko ya Yehova yi kasi oku sivayiwa voluali luosi. (Osa. 113:3) Omanu ndaño va tava ale ka va tava kesapulo Liusoma, tu sukila oku amamako lupange woku kunda. Momo alikolisilo etu oku kunda olondaka viwa, a sanjuisa Yehova.—Va Rom. 10:13-15.
17. Ndopo omanu vaka kisikiwa oku limbuka nye?
17 Koloneke vilo ndaño omanu valua ka va lekisa onjongole kupange woku kunda, pole, noke vaka limbuka esilivilo liaco. (Mat. 24:37-39) Yehova wa sapuilile Esekiele hati, eci esapulo lieyambulo a kunda li tẽlisiwa, va Isareli vana vakuepata liusuanji, vaka ‘limbuka okuti pokati kavo pa kala uprofeto.’ (Esek. 2:5) Cimuamue haico cika pita loluali lulo. Eci Suku aka nena enyõleho kolondingaĩvi, omanu vosi vaka kisikiwa oku limbuka okuti, esapulo Olombangi Via Yehova via enda oku kundila kovitumãlo viosi kuenda konjo lanjo, lia tunda ku Yehova, Suku yocili. Kuenda vaka limbukavo okuti, Olombangi Via Yehova via kala olonumiwa viaye. Tu kuete esumũlũho lioku ambata onduko yaye, kuenda oku kunda olondaka viwa koloneke vilo via sulako! Omo liaco, lekuatiso liaye tu pondola oku amamako oku pandikisa lovitangi, poku kundila konjo lanjo.
O Tambulula Ndati?
• Tu pondola ndati oku kuata utõi poku kunda?
• Nye ci tu kuatisa oku fetika ombangulo poku kundila konjo lanjo?
• Tu pondola ndati oku lekisa ocisola komanu?
• Nye ci tu kuatisa oku lekisa ovisimĩlo via sunguluka komanu vocikanjo cetu?
[Okakasia Lelitalatu kemẽla 9]
Onjila Yiwa Yoku Fetika Ombangulo
Poku fetika ombangulo:
◼ Noke lioku lama omunu wa sanga konjo, eca otratadu kuenda popia ndoco: “Etali ndeya oco ndu ku lekise ondaka yi kuete esilivilo yi kasi votratadu yilo.”
◼ Ale eca otratadu loku popia ndoco: “Ndeya oku ku nyula oco ndi kũlĩhe ocisimĩlo cove catiamẽla kondaka eyi.”
Nda o tratadu ya taviwa:
◼ Pulisa omunu waco oco a lombolole eci a sima catiamẽla kosapi yotratadu yaco.
◼ Yevelela lutate oco o limbuke ocisimĩlo caye. Eca olopandu omo lietambululo liaye.
Poku amamako lombangulo:
◼ Tanga ocisonehua kuenda lekisa elomboloko liaco. Poku pongiya ocindekaise, ci tiamisila kekalo liomanu oka sapela lavo.
◼ Nda umue wa lekisa onjongole, eca elivulu, kuenda lombolola ndomo elilongiso Liembimbiliya li lingiwa. Noke, sokiya eteke lioku linga epasu.