Ceci Tu Lilongisila Ku Yesu

Catiamẽla Koku Tata Vakuavo

Momo Lie tu Sukilila Oku Lekisila Ohenda?

Ndaño okuti omanu va ku tata lãvi, wa siata hẽ oku va kuatela ohenda? Tu sukila oku kuama ongangu ya Yesu yoku kuatela ohenda omanu ndaño muẽle vava va tu suvuka. Yesu wa popia hati: “Nda vu sole ava vo soli esunga liene li panduiwa lelie? Omo ndaño vakuakandu va sole ava va va sole. . . . Ene puãi, soli ovanyali vene loku va linga ohenda. . . . Kuenje vu linga omãla va Tõlo: omo eye ombokela vakualutukãi la vakuakandu.”​—⁠Luka 6:​32-36; 10:​25-37.

Momo lie tu sukilila oku ecela vakuetu?

Eci tu linga ekandu tu pinga ongecelo ku Suku. Yesu wa popia hati, oku pinga ku Suku vohutililo oco a ecele akulueya etu ca sunguluka. (Mateo 6:​12) Yesu wa lekisa okuti, Suku o tu ecela lika nda tu ecelavo ava va tu lueyela. Eye wa popia hati: “Nda weceli omanu ahuku avo oco Isiene o kasi kilu ecelavo ahuku ene. Puãi nda ene ka weceli omanu ahuku avo, Isiene haico ka ecela ahuku ene.”​—⁠Mateo 6:​14, 15.

Ndamupi apata a pondola oku kuata esanju?

Ndaño okuti Yesu ka la kuela, tu pondola oku lilongisila kokuaye ovina vialua vi kuatisa apata oku kuata esanju. Eye wa tu sila ongangu yiwa tu sukila oku kuama koku vangula kuenda kovilinga. Konomuisa atosi atatu a kuãimo:

1.  Ulume o sukila oku sola ukãi waye ndetimba liaye muẽle. Yesu wa eca ongangu yiwa kalume. Eye wa sapuila olondonge viaye hati: “Ndu wihi ocihandeleko cokaliye cokuti, Lisoli pokati. Ndeci ame ndo soli, haico ene, lisolivo pokati.” (Yoano 13:​34) Embimbiliya, poku tiamisila onumbi yaco kalume, li popia hati: “Ene alume, soli akãi vene ndeci Kristu a sola ekongelo, kuenje wa li liecela. Haico ca sesamela alume oku sola akãi vavo ndatimba avo muele. U o sole ukãi waye o lisole eye muele. Momo lomue wa la suvuka etimba liaye muele, puãi o li tekula loku li lava ndeci Kristu o lava ekongelo liaye.”​—⁠Va Efeso 5:​25, 28, 29.

2.  Olohueli vi sukila oku likolela pokati. Oku linga uvasi ekandu linene kovaso a Suku kuenda ci nyõla olohuela. Yesu wa popia hati: ‘Ka wa tangeli okuti, Oco ulume osia isiaye la inaye, o likakatela lukãi waye, kuenje kavali kavo va linga etimba limuamue? Oco ka va lingi vali omanu vavali, puãi va linga etimba limuamue. Oco eci ca tokekisa Suku omunu ka ka ci tepise. Kuenje mopia lene siti, Wosi o nyala ukãi waye, nda halondaka yoku pekelisa, kuenje o kuela ukãi ukuavo, o linga ukahonga. Lu o kuela ukãi wa nyaliwa layevo o linga ukahonga.’​—⁠Mateo 19:​4-9.

3.  Omãla va sukila oku pokola kolonjali viavo. Eci Yesu a kala omõla wa amamako oku pokola kolonjali viaye vina ka via lipuile, ndaño okuti eye wa kala omunu wa lipua. Otembo Yesu a tẽlisa 12 kanyamo, Embimbiliya li popia hati: “Wa lokila kumue lavo, weya ko Nasara, kuenje wa pokoyola kokuavo.”​—⁠Luka 2:51; Va Efeso 6:​1-3.

Momo lie ci kuetele esilivilo oku kapako olonumbi evi?

Poku longisa olondonge viaye Yesu wa popia hati: “Nda wa kũlĩhi ovina evi, vu sumũlũha nda vu vi linga.” (Yoano 13:​17) Oco tu kale Akristão vocili tu sukila oku kapako elungulo lia Yesu liatiamẽla koku tata vakuetu eci a popia hati: “Kokulisola kuene pokati oko omanu vosi va limbukila okuti vulondonge viange.”​—⁠Yoano 13:⁠35.

Oco o sange olonumbi vikuavo tala ocipama 14 velivulu Embimbiliya li Longisa Nye?a

Etosi pombuelo yemẽla]

[Elitalatu kemẽla 17]

[Elitalatu kemẽla 16]

Olusapo lua Yesu luatiamẽla komõla ocisandui lu tu longisa esilivilo lioku lekisa ohenda kuenda oku ecela. ​—⁠Luka 15:​11-32.

[Elitalatu kemẽla 17]

Olohueli vi sukila oku likolela pokati