Ocisoko 124 Ca Vamanji Va Pindisiwa Kosikola Yo Gileada

Olomisionaliu Vi Sokisiwa Lolohuma

NOKE liolosãi epandu, kua siata oku malusuiwa Osikola yo Gileada okuti, epata liosi lio Betele kofeka yo Estados Unidos, li lalekiwa. Keteke 8 kosãi Yelombo yunyamo wo 2008, vamanji va tunda kueci ci pitahãla 30 kolofeka, va li kongelele lepata lio Betele oco va kale kohongele yoku malusula ocisoko 124 Cosikola yo Gileada. Ci soka 6.411 ya vamanji, va sanjukila kumosi lolondonge keteke liaco lilikasi.

Manji Stephen Lett, wa songola ohongele haeye watiamẽla Kosungu Yakulu Yolombangi Via Yehova, wa fetika ohongele yaco lohundo yi kuete osapi hati: “Kuendi Ndolohuma Via Yehova.” Elivulu Liesituluilo 9:​1-4, li sokisa ocimunga Cakristão olombuavekua ndolohuma. Momo kunyamo wo 1919, va tumbulula ombili yavo kupange woku kunda. Olondonge via ivaluisiwa okuti, omo lioku tiamẽla ‘kolomeme vikuavo,’ va kongeliwa kolohuma viocindekaise.​—⁠Yoa. 10:⁠16.

Manji Lon Schilling, watiamẽla Kocisoko Cakulu ko Betele yo Estados Unidos, wa linga ohundo losapi hati: “Kali Akamba.” Ohundo yaco, yopiwa Vembimbiliya vulandu watiamẽla ku Akuila lukãi waye Priska vo kocita catete. (Va Rom. 16:​3, 4) Ocisoko cosikola yo Gileada, ca kuata eci ci soka 28 kolohueli. Ovo va ivaluisiwa okuti, oco vamameko lupange wavo wumisionaliu, va sukila oku pamisa olohuela viavo. Embimbiliya li popia hati, Akuila lukãi waye Priska, va lekisa ongangu yiwa yoku pamisa olohuela viavo. Upostolo Paulu kumue la vamanji vekongelo, va limbuka okuti, Akuila lukãi waye Priska, va kala akamba. Olohueli viosi okuti olomisionaliu, vi sukila oku talavaya kumuamue, oku fendela kumuamue, oku pandikisila kumuamue kovitangi vioku talavaya kolofeka vikuavo, kuenda oku likuatisa pokati.​—⁠Efet. 2:⁠18.

Manji Guy Pierce watiamẽla Kosungu Yakulu Yolombangi Via Yehova, wa linga ohundo losapi hati: “Tava Kohenda ya Yehova Poku Linga Ovina Via Sunguluka.” Eye wa lombolola okuti, oku kala omunu uwa, ci kuatisa oku yuvula oku linga ovina vĩvi. Omunu uwa o linga ovina via sunguluka oco vi kuatise vakuavo. Yehova Suku eye wa velapo koku lekisa ohenda komanu. (Sak. 9:​16, 17) Ohenda ya Suku, yi tu vetiya oku lingila vakuetu ovina viwa. Manji Pierce poku malusula ohundo yaye, wa pandiya olondonge loku popia hati: “Wa siati oku linga ovina viwa. Omo liaco, tua kolela okuti, uka amamako loku tava kohenda ya Yehova Suku poku linga ovina viwa kocikele wa tambuli kokuaye.”

Manji Michael Burnett, una wa kala omisionaliu okuti cilo ulongisi kosikola yo Gileada, wa linga ohundo losapi hati: ‘Ukũlĩhĩso wa Tambula, u Linge Ndondimbukiso yo Peka Liove Ale Ndonjivaluko yo Kocipala Cove.’ Va Isareli, ondimbukiso va enda oku kapa ‘peka liavo’ kuenda kocipala cavo, ya va kuatisa oku ivaluka ndomo Yehova a va yovola locikomo poku tunda Kegito. (Etu. 13:​16) Olondonge via ivaluisiwa oku kapako ovina viosi va lilongisa Kosikola yo Gileada, oco vi kale ndondimbukiso peka liavo, kuenda ndonjivaluko kocipala cavo. Manji Burnett, wa lombolola esilivilo lioku lekisa umbombe kuenda oku kapako olonumbi Viembimbiliya poku tetulula ovitangi pokati kolomisionaliu, kuenda vekongelo.​—⁠Mat. 5:​23, 24.

Manji Mark Noumair, okuti ulongisi wosikola yo Gileada vokuenda kuotembo yalua, wa linga ohundo losapi hati: “Ocisungo Cipi Cimbiwa Catiamẽla Kokuove?” Kosimbu, omanu va enda oku imba ovisungo noke lioku yula uyaki. Cimue pokati kovisungo viaco, ca situlula uhembi wepata lia Ruvene, lia Dani, kuenda lia Asiere, vana ka va lekisile onjongole yoku tẽlisa ovikele viavo. Pole, epata lia Sevulono, lia pandiyiwa omo liombili va kuata yoku tẽlisa ovikele viavo. (Olong. 5:​16-​18) Ndeci olondaka viwa viocisungo vi limbukiwa lonjanga, haico catiamẽla kovilinga Viakristão okuti, vi limbukiwavo lomanu vosi. Omunu wosi o lekisa ombili lepandi kupange woku kunda, ivalukiwa la Yehova Suku, kuenda vamanji va kuama ongangu yaye. Osimbu vamanji vekongelo vamamako oku limbuka ovituwa vietu viwa, va vetiyiwa oku kuama ongangu yetu.

Ocisoko 124 ca vamanji va pindisiwa kosikola yo Gileada, va talavaya eci ci soka 3.000 kolowola kupange woku kunda. Momo, upange waco watiamẽla kepindiso va tambula. Manji Sam Roberson, una watiamẽla Koseketa Yosikola Yupange Wakristão, wa linga ohundo losapi hati: “Tavi Oku Songuiwa Lespiritu Sandu.” Vohundo yaco, wa pulisa vamanji vana va pita kosikola yo Gileada, oco va lombolole ovolandu va sanga kupange woku kunda. Noke liovolandu aco, manji Patrick LaFranca, una watiamẽla Kocisoko Cakulu ko Betele yo Estados Unidos, wa pulisa vamanji vana va pita osimbu kosikola yo Gileada, okuti cilo va kasi oku talavaya kolofeka vikuavo. Olondonge via sola calua alungulo va tambula ku vamanji vaco.

Manji Anthony Morris, una watiamẽla Kosungu Yakulu Yolombangi Via Yehova, wa linga ohundo ya sulako losapi hati: “Ivaluki Okuti, Ovina vi Letiwe ka vi Kala Otembo Yalua.” Ovisonehua vi tu vetiya oku kuata elavoko kasumũlũho tuka tambula ku Yehova okuti, ka a sokisiwa lohali tua siata oku liyaka layo cilo. (2 Va Kor. 4:​16-​18) Koloneke vilo, tua siata oku liyaka luhukũi, ekambo liesunga, elambalalo, uvei, kuenda olofa. Citava okuti, olomisionaliu vi pita lovitangi via tukuiwa ndeti. Pole, oku ivaluka okuti, ovitangi viaco ka vi kala otembo yalua, ci tu kuatisa oku pamisa ekalo lietu kespiritu kuenda oku amamako lelavoko.

Ohongele yaco ya malusuiwa lohundo ya Manji Lett okuti, vosi va yi yevelela lutate. Eye wa vetiya olondonge oco viamameko lupange wavo, poku popia hati: “Ndaño lovitangi, tu amamiko loku pandikisa, momo Yehova o tu kuatisa.” Eye wa vetiya olomisionaliu viokaliye oku kala ndolohuma poku amamako kupange wa Yehova, loku lekisa ombili, ekolelo, kuenda oku pokola kokuaye otembo ka yi pui.

[Okakasia kemẽla 30]

ULANDU WOCISOKO CACO

Etendelo liolofeka viava va kala kohongele: 7

Etendelo liolofeka va tumiwa: 16

Etendelo liolondonge: 56

Anyamo va kuete: 33.8

Otembo va kasi vocisoko ca Yehova: 18.2

Anyamo va kasi kupange wotembo yosi: 13.8

[Elitalatu kemẽla 31]

Ocisoko 124 ca Vamanji va Pindisiwa Kosikola yo Gileada

Ulala wolonduko vi kuãimo, u fetikila kepĩli, kuenda u sulila kondio okupisa kulala wa tete toke wa sulako.

(1) Nicholson, T.; Main, H.; Senge, Y.; Snape, L.; Vanegas, C.; Pou, L. (2) Santana, S.; Oh, K.; Lemaitre, C.; Williams, N.; Alexander, L. (3) Woods, B.; Stainton, L.; Huntley, E.; Alvarez, G.; Cruz, J.; Bennett, J. (4) Williamson, A.; González, N.; Zuroski, J.; Degandt, I.; May, J.; Diemmi, C.; Tavener, L. (5) Lemaitre, W.; Harris, A.; Wells, C.; Rodgers, S.; Durrant, M.; Senge, J. (6) Huntley, T.; Vanegas, A.; Pou, A.; Santana, M.; Bennett, V.; Tavener, D.; Oh, M. (7) Zuroski, M.; Rodgers, G.; Diemmi, D.; Nicholson, L.; Alvarez, C.; Snape, J. (8) Harris, M.; González, P.; Main, S.; Woods, S.; Stainton, B.; Williamson, D.; Durrant, J. (9) Cruz, P.; Degandt, B.; Williams, D.; Wells, S.; Alexander, D.; May, M.

[Elitalatu kemẽla 32]

Osikola yo Gileada, yi sangiwa ko Torre de Vigia kuna va siata oku Pindisila vamanji