Elongiso Limue Lia Li Sandula Calua
“Ame nda enda oku lota olonjoi vi lingisa usumba, okuti nda imbiwa vondalu ya tokota fĩ. Omo liusumba waco, sia yonguile vali oku linga eci cĩvi.”—Arline.
OVE hẽ o tava okuti ifelu, ocitumãlo cimue coku yoka olondingakandu? Omanu valua va tava okuti oco. Kunyamo wo 2005, onoño yimue yi talavaya Kosikola ya velapo yi tukuiwa hati, St. Andrews ko Eskosia, ya limbuka okuti asongui valua vetavo, va tava okuti omunu wosi wa litepa la Suku oka imbiwa “vifelu viondalu ka yimi, oku talisiwa ohali otembo ka yi pui.” Vakuetavo valua va tava okuti wosi imbiwa vifelu viondalu o talisiwa ohali yalua.
Elongiso lifelu lia siata oku sandekiwa kolofeka viñi viñi. Kunyamo wo 2007 kofeka yo Estados Unidos, kua lingiwa ekonomuiso limue lia lekisa okuti apa pali ci soka 100 komanu, 70 va tava kifelu viondalu. Kunyamo wo 2004, ocisoko co Gallup ca lingavo ekonomuiso limue kofeka yo Kanada, kuenje va limbuka okuti ci soka 42 por cendu va tava kelongiso lifelu viondalu. Kofeka yo Inglaterra ci soka 32 por cendu, va tavavo okuti kuli ifelu viondalu.
Ceci Asongui Vetavo va Siata Oku Longisa
Asongui valua vetavo va siata oku longisa okuti ifelu ocitumãlo cimue coku kangisa omanu. Ocili okuti, ovo va eca alomboluilo a sangiwa vo Katekismu yetavo lio Katolika ka sandekiwa kunyamo wo 1994. Ovo va siata oku longisa hati, “omunu wosi wa litepa la Suku, o kangisiwa vifelu otembo ka yi pui.”
Omo liaco, omanu valua va tava okuti ifelu ocitumãlo cimue coku kangisa omanu. Asongui vaco va siata oku popia hati, elongiso eli, li sangiwa Vembimbiliya. Usongui umue wo Seminariu yo Teologia yetavo lio Batista ko Amerika, o tukuiwa hati, Albert Mohler wa lekisa ndomo eye a tava kelongiso liaco poku popia hati: “Elongiso lifelu li sangiwa Vovisonehua.”
Momo Lie Ovina tu Tava vi Kuetele Esilivilo?
Nda elongiso liokuti ifelu viondalu liocili, kuenda ocitumãlo coku talisa omanu ohali, ove nda wa kuata usumba. Pole, ovina alongisi vetavo va siata oku longisa vi nena atatahãi kuenda vi kokela omanu usumba ka wa sungulukile. Handi vali, alongiso aco a pembula Suku.
Nye Embimbiliya li popia catiamẽla kondaka eyi? Ovipama vi kuãimo, vika lekisa ovinimbu viopiwa Vembimbiliya lio Katolika kuenda lio Prostestante poku tambulula apulilo atatu akuãimo: (1) Nye ci pita lomanu va fa? (2) Anga hẽ Yesu wa longisa eci catiamẽla kifelu? (3) Oku kũlĩha ocili catiamẽla kifelu ci kuete esilivilo lie kokuove?