Oku Kũlĩha Ocili Catiamẽla Kifelu Ci Kuete Esilivilo Lie Kokuove?
VANA va longisa okuti ifelu ocitumãlo coku kangisa omanu, va tomba Yehova Suku kuenda ovituwa viaye viwa. Ocili okuti Embimbiliya li popia hati, Suku o ka nyõla olondingaĩvi. (2 Va Tesalonike 1:6-9) Pole, onyeño hayoko ocituwa ca velapo ca Suku.
Suku hangangalako kuenda hokuanyeñoko. Eye wa pula hati: “Ame nga, sanjukila okufa kuondingãivi?” (Esekiele 18:23) Nda Suku ka sanjukila okufa kuondingãivi, o sanjukila ndati oku kangisa omanu otembo ka yi pui?
Ocisola oco ocituwa ca velapo ca Suku. (1 Yoano 4:8) Ocili okuti “ÑALA o lingila vosi ohenda kuenda ocisola caye ci limbukiwila koviluvo viaye viosi.” (Osamo 145:9, The Holy Bible—New International Version) Eye o yongola okuti etu tu u sola lutima wetu wosi.—Mateo 22:35-38.
Anga hẽ o ka Vetiyiwa Locisola ca Suku Ale Lusumba Wifelu?
Elongiso liokuti ocilelembia ci talisiwa ohali vifelu viondalu, li vetiya omunu oku kuatela Suku usumba. Pole eci a lilongisa ocili catiamẽla ku Suku, o fetika oku u kuatela ocisola, loku lekisa esumbilo kokuaye. Vembimbiliya The New American Bible, kelivulu Liosamo 111:10, tu tangako hati: “Oku sumbila ÑALA oko efetikilo liolondunge. Vana vo sumbila ovo va kuete uloño.” Oku sumbila Suku, ka ci lomboloka oku u lulumĩla, pole ci lomboloka oku yuvula oku sumuisa Ululiki wetu. Eci ci tu vetiya oku u kuatela esumbilo lia sunguluka.
Konomuisa ndomo oku kũlĩha ocili ca vetiya Kathleen oku imbapo ocituwa coku nyua olodroga, okuti tunde eci a siapo ocituwa caco, pa pita ale 32 kanyamo. Omo liovituwa vĩvi eye a kuata kuenda lumbuahuku a enda oku linga, wa popia hati: ‘Nda ca tavele oku tiukila vutila, nda nda yuvula ovina vĩvi nda linga oco si ka timĩhiwe vifelu.’ Kathleen wa seteka oku siapo oku nyua olodroga, pole ka ci tẽlele. Eye wa popia hati: “Nda yonguile oku linga ovina viwa, pole ovina viosi vomuenyo wange ka via kuatele vali esilivilo. Ka kua kaile lacimue ca ndi vetiya oku linga eci ciwa.”
Vokuenda kuotembo Olombangi Via Yehova via kundila Kathleen. Eye wa popia hati: “Eci nda lilongisa okuti ka kuli ifelu viondalu, nda limbuka okuti Ovisonehua vi longisa ocili. Oku kũlĩha okuti sika imbiwa vondalu yifelu, ca ndi sanjuisa calua.” Pole eye wa lilongisavo okuti Suku wa likuminya kambombe oku piñala oluali luna ka muka kala vali ũvi. (Osamo 37:10, 11; Luka 23:43) Eye wa popia lesanju hati: “Kaliye ñuete elavoko lioku kala komuenyo otembo ka yi pui Vofeka yelau!”
Anga hẽ elongiso lifelu nda lia kuatisa Kathleen oku imbapo ocituwa coku nyua olodroga? Eye wa popia hati: “Ndaenda oku likutilila ku Yehova oco a ndi kuatise olonjanja viosi eci ndi kuata oñeyi yoku nyua olodroga. Eci ndi kuata ocisimĩlo caco cĩvi, ndi likandangiya oco sika sumuise Suku. Kuenje eye wa tambulula olohutililo viange.” (2 Va Korindo 7:1) Usumba woku sumuisa Suku wa kuatisa Kathleen oku imbapo ovituwa vĩvi.
Oku amamako oku sola Suku loku u sumbila, ci tu vetiya oku linga ocipango caye loku kuata elavoko liasuapo. Ukualosamo wa soneha hati: “Vosi va sumbila Yehova loku endaila volonjila viaye, va sumũlũha.”—Osamo 128:1.
[Okakasia Lelitalatu kemẽla 9]
HELIE OKA YOVUIWA KIFELU?
Vambimbiliya amue, olondaka Geʹen·na kuenda Haiʹdes viopiwa kelimi lio Helasi, va vi pongolola hati, “ifelu.” Kuenje ca siata oku kapa omanu vatatahãi. Eci Embimbiliya li popia hati omunu wa imbiwa vo Geʹen·na, ci lomboloka okuti wa nyõliwa elisi okuti ka kuata vali elavoko liepinduko. Pole eci li popia hati haiʹdes, ale Onjembo ci lomboloka okuti omunu waco o kuete elavoko liepinduko.
Embimbiliya Versão Rei Jaime, li lekisa okuti, noke yepinduko lia Yesu, upostolo Petulu wa sapuila omanu hati, “ka siwile vifelu.” (Ovilinga 2:27, 31, 32; Osamo 16:10) Ondaka ya pongoluiwa palo hati, “ifelu,” kelimi lio Helasi yi tukuiwa hati Haiʹdes ale onjembo. Yesu ka imbiwile vocitumãlo ci kuete ondalu. Onjembo ale “ifelu” via tukuiwa ndeti, vi lomboloka eyambo. Pole Yesu hayeko lika Suku a yovola Konjembo.
Catiamẽla kepinduko, Embimbiliya liaco li popia hati: “Kufa kuenda ifelu va eca ava va kalamo.” (Esituluilo 20:13, 14, RJ) Eci ci lekisa okuti Suku oka yovola vosi va kasi “vifelu” eci vaka pinduiwa. (Yoano 5:28, 29; Ovilinga 24:15) Tuka kuata esanju lialua poku mola vangandietu eci vaka tundisiwa vayambo! Yehova, Suku ukuacisola ka ci pui, eye oka ci tẽlisa.