Olombangi Via Yehova Via Siata hẽ Oku Tepa Olohuela?

OMANU valua, va siata oku popia hati: “Nda umue pokati kohueli o tunda vetavo kuenje enda ketavo likuavo, ci tepa olohuela.” Olondaka viaco via siata oku tiamisiwila kolohueli vina vi nõlapo oku kala Olombangi Via Yehova. Anga hẽ olondaka evi viocili?

Eci umue pokati kohueli a fetika oku kuata onjongole yoku linga ukuetavo ale o tunda vetavo liosimbu noke iñila vetavo likuavo, ca siata oku sakalaisa omanu vamue. Olonjanja vimue ci koka ocinjoko, esumuo, kuenda ocikumbiti.

Ca piãla enene nda ukãi o yongola oku siapo etavo liosimbu. Nda okuti ukãi wove o kasi oku lilongisa Embimbiliya Lolombangi Via Yehova, anga hẽ eci ci kapa kohele olohuela viene? Nda ove wukãi o kasi oku lilongisa Lolombangi Via Yehova, nye o pondola oku linga oco kuka sumuise ulume wove?

Ceci Ulume a Lavoka

Ulume umue o tukuiwa hati, Mark ko Australia, okuti tunde eci a kuela pa pita 12 kanyamo, eci ukãi waye a fetika oku lilongisa Lolombangi Via Yehova, wa popia hati: “Ame nda lavokaile oku kuata esanju volohuela viange kuenda omuenyo umue uwa. Pole, ukãi wange wa nõlapo oku lilongisa Embimbiliya Lolombangi Via Yehova. Noke nda sima okuti ekalo lietu lia nyõleha. Kefetikilo, sia kuatele esanju omo ukãi wange wa kala oku lilongisa Embimbiliya, pole, eci a ndi sapuila okuti oka papatisiwa oco a linge Ombangi ya Yehova, ca ndi temisile calua.”

Mark wa fetika oku li pula nda olohuela viaye via laikele oku sulila, omo ukãi waye wa linga ukuetavo likuavo. Eye wa simĩle oku tateka ukãi waye oco ka ka lilongise vali Embimbiliya kuenda wa yonguile oku u sapuila okuti ka citava oku vangula Lolombangi Via Yehova. Ndaño okuti Mark wa kala lovisimĩlo viaco, eye wa kevelila okuti pa pita otembo yimue. Kuenje nye ceya oku pita lolohuela viaye?

Mark wa popia hati: “Kaliye olohuela vietu via pamisiwa calua okuti kefetikilo ci sule. Tunde eci ukãi wange a papatisiwa, kuenje wa linga Ombangi ya Yehova, pa pita ale 15 kanyamo kuenda olohuela vietu vi kasi oku amamako oku pamisiwa.” Nye ca pamisa olohuela viavo? Mark wa tambulula ndoco: “Olohuela vietu vi kasi oku pamisiwa omo ukãi wange wa kapako olonumbi Viembimbiliya. Eye wa siata oku lekisa kokuange esumbilo liocili.”

Onumbi Akãi va Sukila Oku Kapako

Nda okuti wa siata oku lilongisa Lolombangi Via Yehova, nye o sukila oku linga oco o kuatise ulume wove? Kũlĩhĩsa olondaka viakãi vo kolofeka vimue.

Sakiko, wo ko Japãu: “Tunde eci nda kuela pa pita ale 31 kanyamo kuenda ndi kuete omãla vatatu. Ndimbangi ya Yehova vokuenda kueci ci soka 22 kanyamo. Oku kala lulume umue okuti hokuetavoko olonjanja vimue ka ca lelukile. Pole, nda siata oku likolisilako oku kapako olonumbi Viembimbiliya viatiamẽla ‘koku yevelela lutate, koku livala oku popia, loku livala konyeño.’ (Tiago 1:​19) Nda siata oku lekisa esumbilo kulume wange kuenda oku tava kolonumbi viaye nda ka vi lipatãla Lembimbiliya. Kuenje eci ca siata oku pamisa olohuela vietu.”

Nadezhda, wo ko Russia: “Olohuela viange via tẽlisa ale 28 kalima, kuenda tunde eci nda linga Ombangi ya Yehova pa pita 16 kanyamo. Eci handi sia fetikile oku lilongisa Embimbiliya, sia simĩle okuti veyange eye usongui wepata. Sia yonguile okuti eye o ndi tumĩla. Pole, nda limbuka okuti oku kapako olonumbi Viembimbiliya, ci kuatisa oku kuata ombembua kuenda esanju vepata. (1 Va Korindo 11:⁠3) Noke nda fetika oku likolisilako oku pokola. Kuenje ulume wange wa limbuka apongoloko nda linga.”

Marli, wo ko Brazil: “Ñuete omãla vavali kuenda tunde eci nda kuela pa pita 21 kanyamo. Ndimbangi ya Yehova vokuenda kuekũi lialima lalima epandu. Nda lilongisa okuti Yehova Suku, o yongola okuti olohueli vi li kuata omunga. Omo liaco, nda siata oku likolisilako oku kala ukãi umue uwa poku vangula kuenda ndi lekisa ovilinga vina vi sanjuisa Yehova lulume wange.”

Larisa, wo ko Russia: “Tunde eci nda linga Ombangi ya Yehova pa pita ale 19 kanyamo, kuenda eli olio epongoloko linene nda linga vomuenyo wange. Ulume wange, wa limbuka okuti olonumbi Viembimbiliya via ndi vetiya oku kala ukãi uwa. Via ndi kuatisavo oku u sola calua. Kefetikilo tua enda ño oku lihoyisa omo lioku pindisa omãla vetu, pole tua tetulula ovitangi viaco. Ulume wange kaliye wa siata oku ecelela omãla vetu oku enda lame kolohongele, momo wa limbuka okuti va kasi oku lilongisa ovina vi va kuatisa.”

Valquíria, wo ko Brazil: “Ñuete omõla umosi, kuenda tunde eci nda kuela pa pita ale 19 kanyamo. Ndimbangi ya Yehova vokuenda kuekũi lianyamo lanyamo atatu. Kefetikilo, ulume wange ka yonguile okuti ame ngenda kupange woku kunda. Pole nda lilongisa oku u tambulula lesumbilo kuenda oku u kuatisa oku limbuka okuti Embimbiliya li kuatisa omanu oku kuata ovituwa viwa. Vokuenda kuotembo, ulume wange wa limbuka ndomo nda velisilepo upange woku kunda. Kaliye eye wa siata oku ndi kuatisa oku linga upange wa Suku. Eci ngenda kupange woku kunda loku longisa omanu Embimbiliya, eye o ndi sindikila lekãlu kuenda o talamẽla lepandi toke kesulilo.”

Linga Eci Ciwa

Nda okuti ohueli yove ya siata oku enda kolohongele Violombangi Via Yehova, kuka kuate ño usumba wokuti olohuela viene vi laika oku tepiwa. Alume lakãi kolofeka vialua voluali, va limbuka okuti Embimbiliya li kuatisa oku kuata olohuela viwa.

Ulume umue okuti Hambangiko ya Yehova wa popia hati: “Ame kefetikilo nda sumuile calua lukãi wange, omo wa linga Ombangi ya Yehova, pole ndaño ka ca lelukile, cilo tu kuete esanju lialua.” Ulume ukuavo poku vangula catiamẽla kukãi waye, wa popia hati: “Ekolelo, epandi kuenda esunga liukãi wange, via ndi vetiya oku sumbila calua Olombangi Via Yehova. Olohuela vietu via pamisiwa omo lietavo liaye. Tua siata oku li tata pokati kuenda olohuela vietu vi kasi oku amamako oku pamisiwa.”

[Okakasia Lelitalatu kemẽla 32]

Olombangi Via Yehova vi Tenda Ndati Olohuela?

Omo Olombangi Via Yehova, vi tenda Embimbiliya okuti Ondaka ya Suku, via kapako eci olio li popia catiamẽla kolohuela. Kũlĩhĩsa atambululo Embimbiliya lieca kapulilo akuãimo:

▪ Anga hẽ Olombangi Via Yehova vi vetiya vamanjavo oku tepa olohuela nda umue pokati kohueli Hambangiko ya Yehova? Sio. Upostolo Paulu wa soneha ndoco: “Ukuetavo nda o kasi lukãi hokuetavoko, kuenje ukãi o tava oku kala laye, ka ko nyale. Ukãi, nda o kasi lulume hokuetavoko, kuenje ulume o tava oku kala laye, ka ka sie veyaye.” (1 Va Korindo 7:​12, 13) Olombangi Via Yehova via kapako onumbi eyi.

▪ Nda okuti ukãi umue veyaye Hambangiko ya Yehova anga hẽ ka sukila vali oku u sumbila? Sio. Upostolo Petulu wa soneha hati: “Ene akãi, pokoli ku vaveyene okuti vamue, ndaño ka va tava kondaka, kuenda ndaño ondaka yimosi ka yi popiwa, haimo va kokiwa lovilinga viakãi vavo, eci va mola ovilinga viene viesunga lesumbilo.”​—⁠1 Petulu 3:​1, 2.

▪ Olombangi Via Yehova via siata hẽ oku longisa okuti ulume eye lika o tumĩla kovina viosi? Sio. Upostolo Paulu wa popia hati: “Njongola okuti vu limbuka okuti utue wulume Kristu; utue wukãi ulume waye; utue wa Kristu Suku.” (1 Va Korindo 11:⁠3) Ukãi Ukristão o sukila oku pokola kulume waye omo eye usongui wepata. Ocili okuti ulume ka kuete unene woku tumĩla kovina viosi. Momo, eye o sukilavo oku pokola ku Suku kuenda ku Kristu. Omo liaco, nda ulume o kisika ukãi waye oku linga ocina cimue okuti ka ci li kuata lovihandeleko via Suku, ukãi Ukristão o nõlapo “oku pokola ku Suku, komanu hakoko.”​—⁠Ovilinga 5:⁠29.

▪ Anga hẽ Olombangi Via Yehova vi longisa okuti ka citava oku li nyãla? Sio. Yesu Kristu wa popia hati: “Wosi o nyala ukãi waye, nda halondaka yoku pekelisako, kuenje o kuela ukãi ukuavo, o linga ukahonga.” (Mateo 19:⁠9) Ocili okuti Olombangi Via Yehova vi tava kocisimĩlo ca Yesu cokuti ukahokolo wecelela omunu oku nyãla ohueli yaye. Pole ka va tundisa akãi vavo omo liovina viaño. Va vetiya vamanji oku pokola kolondaka via Yesu viokuti: “Ulume osia isiaye la inaye, o likakatela lukãi waye, kuenje kavali kavo va linga etimba limuamue. . . . Oco eci ca tokekisa Suku omunu ka ka ci tepise.”​—⁠Mateo 19:​5, 6.