‘Linga Ondonge Yange’

“Omunu nda o yongola oku ñuama, ka ka litende vali eye muẽle, a tikule [uti waye] eteke keteke, a ñuame.”​—⁠LUKA 9:⁠23.

1, 2. (a) Elaleko lipi Yesu a linga? (b) Wa siata oku kapako ndati elaleko liaco?

YESU wa malusula upange waye poku kundila ko Perea, kesinya Liolui Yordão, konano yo Yudea. Noke, wa li sanga lumalẽhe umue ukuenje wa pula eci a sukilile oku linga oco a kuate omuenyo ko pu.i Yesu poku limbuka okuti umalẽhe waco wa pokuile Kocihandeleko Suku a ecele ku Mose, wo laleka loku u sapuila hati: “Kuende, ka landise cosi o kuete, ci avela olosuke, kuenje o kala lipako kilu; oco wiye o ñuame.” (Mar. 10:​21) Sokolola okuti, nda umue wa lalekiwa oku kuama Yesu Omõla wongunga wa Suku Tõlola, o kuata esanju lialua!

² Umalẽhe waco ka tavele kelaleko lia Yesu, pole, vakuavo va tava. Noke Yesu wa sapuila Filipu hati: “Ñuame.” (Yoa. 1:​43) Filipu wa tava kelaleko liaco, kuenje, wa linga upostolo. Noke, Yesu wa lalekavo Mateo, kuenje wa tava. (Mat. 9:9; 10:​2-4) Yesu wa lalekavo omanu vakuavitima via sunguluka eci a popia hati: “Omunu nda o yongola oku ñuama, ka ka litende vali eye muẽle, a tikule [uti waye] eteke keteke, a ñuame.” (Luka 9:​23) Omo liaco, omanu vosi va pondola oku kala olondonge via Yesu nda va yongola. Ove hẽ, o yongola oku ci linga? Valua pokati ketu tua tava kelaleko lia Yesu, kuenje, tua siata oku eca elaleko liaco kupange woku kunda.

3. Tu pondola ndati oku yuvula oku yapuka vonjila tua nõla yoku kuama Yesu?

³ Omanu vamue va siata oku tava oku lilongisa Embimbiliya, pole, noke va liwekapo oku ci linga. Kuenje, ‘va siapo’ oku kuama Yesu. (Va Hev. 2:⁠1) Tu pondola ndati oku yuvula onjanjo yaco? Tu sukila oku lipula ndoco: ‘Momo lie tua tavela oku kuama Yesu? Oku u kuama ci lomboloka nye?’ Oku sokolola apulilo aco, ci tu kuatisa oku pamisa onjongole yetu yoku amamako vonjila tua nõla. Nda tua ci linga, tu vetiya vakuetu oku kuama Yesu.

Momo Lie tu Sukilila Oku Kuama Yesu?

4, 5. Momo lie Yesu a nõliwila oco a songuile omanu?

⁴ Uprofeto Yeremiya wa popia hati: “A Yehova, ndi ci okuti okuenda kuomunu ka ku kasi povaka aye muẽle. Omunu enda ka tẽla eye muẽle oku suñamisa okuenda kuaye.” (Yer. 10:​23) Olondaka via Yeremiya vi kasi oku tẽlisiwa. Momo, omanu ka va lipuile ka va pondola oku li songuila ovo muẽle. Pole, tua tava kelaleko lioku kuama Yesu, momo tua lilongisa okuti, eye wa nõliwa oco a tu Songuile. Omo liaco, tu konomuisi ovituwa vimue via Yesu.

⁵ Catete, Yehova wa nõla Yesu oco a kale Mesiya haeye Usongui. Ululiki wetu, eye lika wa kũlĩha omunu a nõla oco a linge Usongui wetu. Cavali, Yesu o kuete ovituwa tu pondola oku kuama. (Tanga Isaya 11:​2, 3.) Ongangu yaye ya lipua. (1 Pet. 2:​21) Catatu, Yesu wa siata oku tata ciwa vana va pokola kokuaye, kuenda wa lekisa ocituwa caco poku eca omuenyo waye oco va yovuiwe. (Tanga Yoano 10:​14, 15.) Eye wa lekisa okuti, ungombo uwa, poku tu vetiya oku kuata ekalo liwa, lelavoko lioku kuata omuenyo ko pui. (Yoa. 10:​10, 11; Esit. 7:​16, 17) Omo liaco, tua nõlapo oku u kuama. Nye ca kongela voku kuama Yesu?

6. Nye ca kongela voku kuama Yesu?

⁶ Oku kala ondonge ya Kristu ka ci lomboloka lika oku tukuiwa hati, Tuakristão. Koloneke vilo, omanu valua va siata oku litukula hati Akristão, pole, ovituwa viavo vi lekisa okuti, ‘olondingaĩvi.’ (Tanga Mateo 7:​21-23.) Nda omunu umue wa lekisa onjongole kesapulo liusoma, tu u lomboluila okuti, Akristão va pokola kovina va siata oku longisa, kuenda va lekisa ongangu yiwa kovina viosi va linga. Oco tu kuate elomboloko liaco, tu konomuisi ovina tua kũlĩha viatiamẽla ku Yesu.

Tu Kuami Ongangu ya Yesu Yoku Kuata Olondunge

7, 8. (a) Olondunge vi lomboloka nye, kuenda momo lie Yesu a kuatela olondunge vialua? (b) Yesu wa lekisa ndati olondunge, kuenda tu kuama ndati ongangu yaye?

⁷ Yesu wa lekisa ovituwa viwa, pole, tu konomuisa lika vikuãla pokati kovituwa viaco ndeci: Olondunge viaye, umbombe, ombili, kuenda ocisola. Catete, tu konomuisi ndomo olondunge vio kuatisa oku limbuka ovina a sukilile oku linga. Upostolo Paulu wa soneha hati: “Vu [Yesu] mua solekiwila ovokuasi osi olondunge luloño.” (Va Kol. 2:⁠3) Olondunge Yesu a kuata via tunda pi? Eye wa popia hati: “Mopia ovina evi ndomo Isia a ndongisa.” (Yoa. 8:​28) Omo okuti Yehova eye wa eca olondunge viaco, ka tu komõha esunguluko Yesu a lekisa poku linga ovina.

⁸ Yesu wa lekisa esunguluko poku nõla ovina a yonguile oku linga. Kuenje, wa nõlelepo oku kuata omuenyo wa leluka poku pitisa kovaso ocipango ca Suku. Eye wa pesila otembo yaye kuenda ongusu yaye kupange woku kunda Usoma. Omo liaco, tu kuami ongangu ya Yesu yoku kuata ‘omuenyo wa leluka’ poku yuvula oku pesila otembo kovina ka vi kuete esilivilo. (Mat. 6:​22) Akristão valua, va siata oku leluisa omuenyo wavo, oco va pesile otembo yalua kupange woku kunda. Vamue va siata oku litumbika kupange wakundi votembo yosi. Nda wa litumbika kupange waco, o sesamẽla epandiyo. ‘Oku sandiliya tete usoma,’ ci nena esanju lialua.​—⁠Mat. 6:⁠33.

Tu Lekisi Umbombe Ndeci Yesu a Linga

9, 10. Yesu wa lekisa ndati umbombe?

⁹ Cavali, tu konomuisi ndomo Yesu a lekisa umbombe. Omo okuti ka tua lipuile, vamue nda va tambula ovikele viupange, va siata oku li velisapo. Pole, Yesu ka lekisile ocituwa caco! Ndaño Yesu o kuete ocikele coku tẽlisa ocipango ca Yehova, pole, ka livelisilepo. Omo liaco, tu sukila oku kuama ongangu yaye. Paulu wa soneha hati: “Upi ongangu ku Kristu Yesu. Kali lutima ndowu eye a kala lawo. Momo Kristu Yesu, ndaño wa kaile nda Suku, haimo ka sandele ulamba woku lisokisa la Suku. Puãi wa lipesela eye muẽle, wa linga ndupika, wa citiwa lesetahãlo liomunu.” (Va Fil. 2:​5-7) Nye ca kongela voku lekisa ocituwa caco?

¹⁰ Yesu wa sanjukilile esumũlũho lioku kala la Isiaye kilu, pole, ‘wa lieca’ oku iya palo posi. Omuenyo waye wa sondoluiwila vimo liufeko umue u Yudea, kuenje, noke yolosãi ecea, wa citiwa. Eye ka kuatele omunu u teyuila, kuenda wa kala karpinteiro. Yesu wa kulila vonjo ya isiaye Yosefe. Ndaño wa lipuile, pole, wa pokola kolonjali viaye vakuakandu. (Luka 2:​51, 52) Omo liaco, wa lekisa umbombe!

11. Tu pondola ndati oku kuama ongangu ya Yesu yoku lekisa umbombe?

¹¹ Tu kuama ongangu ya Yesu yoku lekisa umbombe poku tava ovopange omanu vamue va siata oku sima hati, ka a kuete esilivilo. Tu konomuisi ocikele coku kunda olondaka viwa. Pamue tu sima okuti, upange waco ka u kuete esilivilo, capiãla enene nda omanu ka va lekisa onjongole, ale va tu popia lãvi. Pole, nda tua amamako kupange waco, tu kuatisa omanu oku tava kelaleko lioku kuama Yesu. Upange waco u tu vetiya oku kuatisa omanu oco va popeliwe. (Tanga 2 Timoteo 4:​1-5.) Ocikele cikuavo, coku yelisa Onjango yetu Yusoma. Oco tu tẽlise ocikele caco, tu sukila oku lekisa umbombe, momo vupange waco mua kongela oku inasi ovinene, oku sukula posi, kuenda oku yelisa oletelete! Omo liaco, tu sukila oku kapako ocikele coku yelisa Onjango Yusoma, momo upange waco watiamẽla kefendelo lietu ku Suku. Nda tua linga ovopange omanu vamue va siata oku sima okuti, ka a kuete esilivilo, tu kasi oku lekisa umbombe kuenda tu kuãi ongangu ya Kristu.

Tu Lekisi Ombili Kupange Woku Kunda Ndeci Yesu a Linga

12, 13. (a) Yesu wa lekisa ndati ombili kupange woku kunda, kuenda nye co vetiya oku ci linga? (b) Nye ci tu vetiya oku lekisa ombili kupange woku kunda?

¹² Tu konomuisi ombili Yesu a lekisa kupange woku kunda. Eci a kala palo posi, wa linga ovina vialua. Eye, wa talavaya la isiaye Yosefe una wa kala karpinteiro. Yesu kupange waye woku kunda, wa linga ovikomo vialua oku kongelamo oku sakula vana vavela, kuenda oku pindula ava va fa. Pole, wa velisilepo upange woku kunda olondaka viwa, loku longisa vana va tava kesapulo liaye. (Mat. 4:​23) Omo okuti tulondonge via Yesu, tu sukila oku kuama ongangu yaye yoku kunda olondaka viwa. Tu ci linga ndati? Tu ci linga poku kuama ongangu yaye yoku tẽlisa ocipango ca Suku.

¹³ Ocisola Yesu a kuatela Suku, co vetiya oku kundila omanu kuenda oku va longisa. Pole, wa solelevo ovina a longisa. Eye wa sapuila omanu ovina a kũlĩha viatiamẽla ku Suku. Etu tua siatavo oku longisa omanu. Tu sokololi ovina vimue tua lilongisa Vondaka ya Suku! Tua kũlĩha ocitangi ca votuiwa catiamẽla kuviali wa Suku, kuenda ndomo cika tetuluiwa. Tua kũlĩhavo eci Embimbiliya li longisa catiamẽla kekalo liava va fa, kuenda asumũlũho tuka tambula voluali luokaliye lua Suku. Ndaño ovina viaco tua vi lilongisa osimbu, ale ndopo, pole, vi kuete esilivilo. (Tanga Mateo 13:52.) Ovina Yehova a siata oku tu longisa, vi tu vetiya oku kuata ombili kupange woku kunda, kuenda oku lekisa ocisola komanu.

14. Tu kuama ndati ongangu ya Yesu yoku longisa?

¹⁴ Tu konomuisi ndomo Yesu a enda oku longisa omanu. Eye, wa enda oku tukula Ovisonehua poku longisa. Poku fetika ombangulo wa enda oku popia hati: “Ca sonehiwa.” (Mat. 4:4; 21:​13) Poku kundila omanu wa enda oku tukula Ovisonehua vio Heveru. Kupange woku kunda, tu sukila oku longisa ovina vi sangiwa Vembimbiliya ndeci Yesu a linga. Nda tua ci linga, tu kuatisa omanu oku limbuka okuti, ovina tu longisa vi tunda ku Suku. Tu sanjuka calua nda tua sanga omunu umue o tava oku tanga ocinimbu Cembimbiliya, kuenda o limbuka esilivilo lioku lilongisa Ondaka ya Suku! Omo liaco, tu sanjuka calua nda umue o tava kelaleko lioku kuama Yesu.

Tu Kuami Ongangu ya Yesu Yoku Sola Omanu

15. Ocituwa cipi cikuavo Yesu a lekisa, kuenda oku ci sokolola ci tu vetiya oku linga nye?

¹⁵ Ocituwa cikuavo ca Yesu tu konomuisa, ocisola a kuatela omanu. Upostolo Paulu wa soneha hati: “Ocisola ca Kristu oco ci tu vetiya” oku sola omanu. (2 Va Kor. 5:​14) Oku sokolola ocisola Yesu a lekisa komanu vosi, ci tu vetiya oku kuama ongangu yaye.

16, 17. Yesu wa lekisa ndati ocisola komanu?

¹⁶ Yesu wa lekisa ndati ocisola komanu? Wa ci linga poku eca omuenyo waye ndocilumba. (Yoa. 15:​13) Eye wa lekisavo ocisola komanu volonepa via litepa, vokuenda kupange woku kunda. Yesu wa lekisavo ohenda komanu va kala oku talisiwa ohali. Eci a mola Maria kuenda vakuavo va kala oku lila omo lia Lasaru wa fa, eye wa limbuka esumuo liavo. Ndaño Yesu wa kuata epondola lioku pindula Lasaru, pole, wa “lila.”​—⁠Yoa. 11:​32-35.

¹⁷ Eci Yesu a fetika oku kunda, ulume umue ukuavilundu weya kokuaye loku popia hati: “Nda o ci panga o tela oku ñayisa.” Yesu wo tambulula ndati? Ulandu waco wamisako hati: “Yesu wo kuatela ohenda,” poku u lingila ocikomo. Noke, “oku alũla eka liaye, wo lamba, [kuenda ] wa popia laye hati, ‘Nda ci panga, kaya.’ Haico ovilundu vio tunda kuenje wa kaya.” Ocihandeleko Suku a ecele ku Mose ci lekisa okuti, vakuavilundu va vĩha, pole, Yesu wa sakula ulume waco okuti, ka ca sukilile oku u lamba. Pole, Yesu noke yoku sakula ukuavilundu, wa ecelela okuti, o lambiwa la vakuavo onjanja yimosi vunyamo. Omo liaco, Yesu wa lekisa ohenda komanu!​—⁠Mar. 1:​40-42.

18. Tu pondola ndati oku lekisa ‘ocisola ku vakuetu.’

¹⁸ Omo okuti tulondonge via Kristu, tu vetiyiwa oku lekisa ‘ocisola ku vakuetu.’ (1 Pet. 3:⁠8) Pamue ka ci leluka oku kuata elomboloko liesumuo lia manji umue omo liuvei a liyaka lawo okuti ka u kuete ovihemba. Ca piãla enene nda ka tua la kuatiwa luvei waco. Yesu wa lombolola ovitangi vioku vela, ndaño wa lipuile. Tu pondola ndati oku kuama ongangu yaye? Tu ci linga, poku yevelela lutate vana va kasi oku tala ohali omo lioku vela, poku lipula ndoco: ‘Nda nda kuatiwile luvei waco nda nda kuata ovisimĩlo vipi?’ Nda tua lekisa ohenda ku vakuetu va tala ohali, tu kuata epuluvi lioku ‘va kolisa.’ (1 Va Tes. 5:​14) Omo liaco, tu sukila oku kuama ongangu ya Yesu.

19. Ongangu ya Yesu yi tu kuatisa ndati?

¹⁹ Tu sanjuka calua poku limbuka ovina Yesu Kristu a longisa kuenda ovituwa a lekisa! Nda tua lilongisa catiamẽla kokuaye, tu kuama ongangu yaye, kuenda tu vetiyiwa oku kuatisa vakuetu ndeci eye a linga. Omo liaco, tu sanjukili oku kuama ongangu ya Mesiya Osoma!

O Tẽla Oku Lombolola?

• Tu lekisa ndati olondunge ndeci Yesu a linga?

• Kovina vipi tu sukila oku lekisa umbombe?

• Tu lekisa ndati ombili kupange woku kunda?

• Tu kuama ndati ongangu ya Yesu yoku lekisa ocisola komanu?

[Okakasia Lelitalatu kemẽla 5]

ELIVULU LI TU KUATISA OKU KUAMA ONGANGU YA KRISTU

Kohongele yofeka ya lingiwa kunyamo wo 2007, kua sandekiwa elivulu li kuete 192 kamẽla losapi hati: ‘Linga Ondonge Yange.’ Elivulu liaco, lia pongiyiwila oku kuatisa vamanji oco va kuame ongangu ya Yesu. Noke liovipama vivali vioku fetika, onepa yatete, yi lekisa ovituwa via Yesu ndeci: Umbombe, utõi, olondunge, epokolo, kuenda epandi.

Olonepa vikuavo vielivulu, vi lombolola ocikele ca Yesu coku kala ulongisi, ukundi wolondaka viwa, kuenda li lombololavo ndomo Yesu a lekisa ocisola komanu. Elivulu liaco, li pondola oku kuatisa Akristão oku kuama ongangu ya Yesu.

Omo liaco, tua kolela okuti, elivulu liaco, li tu vetiya oku li pula ndoco: ‘Anga hẽ, ndi kasi oku kuama Yesu? Ndi pondola ndati oku kuama ongangu yaye?’ Olio, li pondola oku kuatisa ‘vakuavitima via sunguluka va nõliwila omuenyo ko pui’ oco va linge olondonge via Kristu.​—⁠Ovil. 13:⁠48.

[Elitalatu kemẽla 4]

Yesu wa tava oku iya palo posi oco a citiwe letimba liositu. Ocituwa cipi a lekisa?

[Elitalatu kemẽla 6]

Nye ci tu vetiya oku lekisa ombili kupange woku kunda?