Suku Helie?

OVE o tambulula hẽ ndati epulilo eli? Vamue va sima okuti va kũlĩha Suku kuenda va kuete ukamba laye. Vakuavo va sima okuti Suku o kasi ocipãla lavo. Ndaño va tava okuti kuli Suku, ka va kũlĩhĩle ovina viatiamẽla kokuaye. Nda ove o tava okuti kuli Suku, o tambulula ndati apulilo ava?

1. Anga hẽ Suku omunu muẽle?

2. Suku o kuete hẽ onduko?

3. Anga hẽ Yesu eye Suku Tõlo?

4. Suku o kuete hẽ ocikembe lame?

5. Suku o tava hẽ olonjila viosi vioku u fendela?

Nda wa linga apulilo ava komanu vamue, oka limbuka okuti va eca atambululo a litepa. Omanu va kuete ovisimĩlo vialua viatiamẽla ku Suku.

Oku Kũlĩha Atambululo ci Kuete Esilivilo

Osimbu Yesu a kala oku sapela lukãi umue pocisimo, wo lekisa esilivilo lioku kũlĩha ocili catiamẽla ku Suku. Ukãi u Samaria wa tavele okuti Yesu wa kala uprofeto. Pole kua kala ocina cimue ca sakalaisa ukãi waco. Momo etavo liukãi waco lia litepele letavo lia Yesu. Eci a lekisa atatahãi aye, Yesu wo sapuila hati: “Ene vu fendela eci ka wa kũlĩhili.” (Yoano 4:​19-​22) Lonjila eyi, Yesu wa lekisa okuti atavo havosiko va kũlĩha Suku.

Eci hẽ ci lomboloka okuti lomue o pondola oku kũlĩha vali Suku? Lakamue. Yesu wa sapuila ukãi waco hati: “Vakuakufendela vocili va fendaila Isia vespiritu locili, momo omanu ndovo ovo Isia a sanda oku u fendela.” (Yoano 4:​23) Ove hẽ o kasi pokati ka vana va fendela Suku “vespiritu locili”?

Etambululo liove kepulilo eli, li kuete esilivilo liocili. Momo lie? Momo Yesu wa lekisa esilivilo liukũlĩhĩso wocili eci a likutilila hati: “Omuenyo ko pui wowu, oku ku kũlĩha, ove lika vu Suku yocili, loku kũlĩhavo Yesu Kristu, u wa tuma.” (Yoano 17:⁠3) Kuenje, oco o kuate omuenyo ko pui, o sukila oku kuata ukũlĩhĩso wocili wa tiamẽla ku Suku!

Anga hẽ citava oku kũlĩha ocili catiamẽla ku Suku? Ocili okuti citava! Oco hẽ, o pondola oku sanga ndati ocili caco? Yesu poku tukula eci catiamẽla kokuaye muẽle wa popia hati: “Ame ndinjila, haime ndicili, haime ndimuenyo. Lomue iya ku Isia, te lame.” (Yoano 14:⁠6) Eye wa popiavo hati: “Lomue wa kũlĩha Isia, te Omõlaco, kuenda u Omõlaco a panga oku u situluila.”​—⁠Luka 10:⁠22.

Onjila yiwa yoku kũlĩha Suku, yi sangiwa kalongiso a Yesu Kristu, Omõla a Suku. Omo liaco, Yesu wa popia hati: “Nda vu pandikisa oku pokola kolondaka viange, vulondonge viange ocili, kuenje vu kũlĩha ocili, kuenda ocili cu yovola.”​—⁠Yoano 8:​31, 32.

Yesu nda wa tambulula ndati apulilo atãlo a tukuiwa kefetikilo?

[Elitalatu kemẽla 4]

Anga hẽ o kasi oku fendela Suku umue kua kũlĩhĩle?