Anga hẽ Suku Omunu Muẽle?
Omanu vamue va tambulula ndoco:
◼ “Eye o kasi kolonepa viosi. Eye wa tuwa ndofela.”
◼ “Eye, ongusu yimue yinene ka yi letiwe, haiyo yi kuete olondunge.”
Nye Yesu a popia?
◼ “Vimbo lia Tate muli olonjo via lua.” (Yoano 14:2) Olondaka via Yesu vi lekisa okuti Suku o kuete ocitumãlo coku kala.
◼ “Nda tunda ku Isia, kuenje ndeya voluali, cilo nunda voluali kuenje ngenda ku Isia.” (Yoano 16:28) Yesu wa tavele okuti Suku Omunu kuenda o kuete ocitumãlo caye.
YESU ka la lekisa Suku ndongusu yimue ka yi letiwe. Eye wa vangola la Suku kuenda wa likutalaila kokuaye. Wa tukula Yehova okuti Isiaye wokilu, ci lekisa okuti wa kuata ukamba uwa la Suku.—Mateo 6:14, 26, 32.
Ocili okuti “lomue wa la mola Suku” momo “Suku espiritu.” (Yoano 1:18; 4:24) Pole eci ka ci lomboloka okuti eye omunu umue ka kuete etimba. Embimbiliya li tu sapuila hati: “Nda kuli etimba liositu kulivo etimba liespiritu.” (1 Va Korindo 15:44) Anga hẽ Yehova o kuete etimba liespiritu?
Oco o kuete. Eci Yesu a pinduiwa, wa ‘iñila kilu kuenje wa tu molẽhela kovaso a Suku.’ (Va Heveru 9:24) Eci ci tu longisa ovina vivali vi kuete esilivilo lialua viatiamẽla ku Suku. Catete, eye o kuete ocitumãlo coku kala. Cavali, eye Omunu muẽle, hangusu yimueko ño yi sangiwa kolonele viosi.
Unene wa Suku u muiwa ndati kovina viosi? Suku o pondola oku tuma espiritu sandu liaye, okuti ongusu yaye ya pama kolonepa viosi violuali. Ndonjali yolõla eka poku lembeleka omõlaye, Suku wa siata oku tuma espiritu sandu oco a tẽlise ocipango caye.—Osamo 104:30; 139:7.
Omo okuti Suku Omunu, eye o kuete ovituwa, kuenje, kuli ovina a sole, kuenda evi ka sole. Embimbiliya li tu sapuila okuti eye o sole omanu, o sanjukila upange, wa suvuka oku fendela oviteka, kuenda o nyale olondingaĩvi. (Efetikilo 6:6; Esinumuĩlo 16:22; 1 Olosoma 10:9; Osamo 104:31) Kukanda wa 1 Timoteo 1:11, eye o tukuiwa hati, ‘Suku yesanju.’ Yesu wa popia hati tu pondola oku sola Suku lutima wetu wosi!—Marko 12:30.a
[Atosi pombuelo yamẽla]
a Oco o sange alomboluilo akuavo tanga ocipama 1 velivulu Embimbili Li Longisa Nye? lia sandekiwa Lolombangi Via Yehova.
[Etosi Liavelapo kemẽla 5]
Suku wa siata oku tuma espiritu sandu oco a tẽlise ocipango caye, ndonjali yolũila omõla eka liaye