Suku o Kuete hẽ Ocikembe Lame?
Omanu vamue va tambulula ndoco:
▪ “Omo okuti Suku wa velapo calua ka sakalala lovitangi viange.”
▪ “Eye ka ndi kapeleko.”
Nye Yesu a popia?
▪ “Olongungu vitãlo hẽ, ka vi landisua olosendu vivali? Kuenje layimue yavio yi ivaliwa kovaso a Suku. Puãi ndaño esinga liovovitue viene lia tendiwa liosi. Ko ka kali lusumba. Ene wa velipo okuti olongungu via lua vi sule.” (Luka 12:6, 7) Yesu wa longisa okuti Suku wa tu kapako.
▪ “Oco ko ka kali lohele, hoti, Tu lia nye? pamue tu nyua nye? pamue tu wala nye? Momo ovina viaco ovio vakualofeka va sakalala ño lavio oku vi sanda. Ene puãi, Isiene o kasi kilu wa kũlĩha ale okuti vu sesamela ovina evi viosi.” (Mateo 6:31, 32) Yesu wa kolelele okuti Suku wa kũlĩha ovina tu sesamẽla.
EMBIMBILIYA li popia okuti Suku wa siata oku tu tata. (Osamo 55:22; 1 Petulu 5:7) Oco hẽ, nda wa siata oku tu tata momo lie tu talela ohali yalua koloneke vilo? Nda Suku ukuacisola, haiye ukuonenewosi, momo lie ka malelako ohali?
Oco tu ece etambululo liaco tu sukila oku ivaluka okuti oluali lulo lũvi lu kasi oku vialiwa la Satana Eliapu. Eci Satana a yonja Yesu, wa seteka oku eca kokuaye ovosoma osi oluali, poku u sapuila hati: “Hu iha uviali owo wosi lulamba wawo, momo wa ñundikiwa ame, kuenje ndu weca ku wosi manga.”—Luka 4:5-7.
Helie wa kundika usoma woluali ku Satana? Eci Adama la Heva, olonjali vietu viatete via imba onyima Suku, ovo va nõla Satana ndombiali yavo. Kuenje tunde opo, Yehova Suku wa ecelela okuti Satana o viala oco tu limbuke okuti uviali waye ũvi. Yehova ka kisika omanu oku u vumba, pole eye o tu ĩha epuluvi lioku amẽla kokuaye.—Va Roma 5:10.
Omo liocikembe Suku a tu kuetele, wa linga eliangiliyo lioku tu yovola kuviali wa Satana vonduko ya Yesu. Ndopo muẽle, Yesu oka ‘yula u o kasi longusu yokufa, okuti eliapu.’ (Va Heveru 2:14) Kuenje, eye oka “nyõla ovilinga vieliapu.”—1 Yoano 3:8.
Ilu lieve lika pongoloka ocumbo celau. Kotembo yaco, Suku oka “puenya asuelela osi kovaso [omanu]. Okufa ka ku kalako vali, ndaño oku lila loku liyula lupongo laviovo ka vi kalako vali. Momo ovina viatete [vika] pita.”—Esituluilo 21:4, 5.a
[Atosi pombuelo yamẽla]
a Oco o sange elomboloko lieci Suku a ecelelela ohali, tanga ocipama 11 velivulu losapi hati, Embimbiliya Li Longisa Nye? lia sandekiwa Lolombangi Via Yehova.
[Etosi Liavelapo kemẽla 8]
Ilu lieve lika pongoloka Ocumbo celau