O Pondola Ndati Oku Pandikisa Kupange Woku Kunda?
ANGA hẽ eteke limue wa yevele ale ekavo, lesumuo, kuenje wa yonguile oku liwekapo oku kunda olondaka viwa? Elambalalo, asakalalo omuenyo, ekambo liuhayele, oku sepuiwa lakamba, ale ekambo liomanu va lekisa onjongole kolondaka viwa, vi kapa koseteko epandi lietu. Ivaluka ulandu wa Yesu. Eye “mekonda liesanju lio kapiwila kovaso,” wa pandikisa koloseteko vialua. (Va Hev. 12:2) Eye omo lioku kũlĩha alundi a lingiwa ku Suku, wa pandikisa kuenje wa sanjuisa utima wa Yehova.—Olosap. 27:11.
Ove poku pandikisa kupange woku kunda o pondolavo oku sanjuisa utima wa Yehova. Nye o sukila oku linga nda wa limbuka okuti ocitangi cimue ci kasi oku tepulula ombili yove kupange woku kunda? Manji umue o tukuiwa hati, Krystyna okuti wa kuka haeye ka kuete uhayele uwa, wa popia hati: “Olonjanja vimue nda siata oku yeva ekavo lesumuo. Ovitangi viange vina vi tunda koku kuka ndeci, ekambo liuhayele, kuenda asakalalo omuenyo, olonjanja vimue via siata oku tepulula ombili yange kupange woku kunda.” Ove hẽ, o pondola ndati oku pandikisa kupange woku kunda ndaño lovitangi viaco?
Kuama Ongangu Yovaprofeto
Oco akundi Vusoma va pandikise kupange woku kunda, va sukila oku likolisilako oku kuata ovisimĩlo via sunguluka ndeci ovaprofeto va linga kosimbu. Kũlĩhĩsa ulandu wa Yeremiya. Eci a nõliwa oku kala uprofeto, tete wa kuata ohele. Pole, Yeremiya wa pandikisa kupange waye wuprofeto vokuenda kueci ci soka 40 kanyamo omo lioku kolela ku Suku.—Yer. 1:6; 20:7-11.
Manji umue o tukuiwa hati, Henryk wa vetiyiwa longangu ya Yeremiya. Eye wa popia hati: “Vokuenda kueci ci pitahãla 70 kanyamo kupange wange woku kunda, olonjanja vimue nda siata oku sumua omo liomanu ka va tava kolondaka viwa, kuenda esuvu liavo. Vapuluvi aco, nda siata oku ivaluka ulandu wa Yeremiya. Ocisola caye ku Yehova kuenda ukamba a kuatele laye, vio vetiya oku amamako kupange waye wuprofeto.” (Yer. 1:17) Manji umue o tukuiwa hati, Rafał wa vetiyiwavo longangu ya Yeremiya. Eye wa popia hati: “Yeremiya ka tiamisilile utima kovitangi viaye, pole, wa lekisa ekolelo ku Suku. Eye wamamako oku kunda lutõi ndaño lesuvu lialua. Nda siata oku sokolola ovina evi.”
Ongangu yuprofeto Isaya ya siatavo oku kuatisa vamanji valua oku pandikisa kupange woku kunda. Suku wo sapuilile hati: Omanu va kala kofeka yaye, ka vaka tava kesapulo a va kundila. Yehova wo sapuila hati: “Lemisa utima womanu ava, lemisa ovatui avo.” Anga hẽ, Isaya ka tavele kocikele caco? Ocili okuti, wa tava oku tumiwa la Suku! Eci a nõliwa oco a kale uprofeto, wa popia hati: “Ame ulo, va nume ño.” (Isa. 6:8-10) Isaya wa tẽlisa ocikele caye. Anga hẽ, eli olio etambululo liove kocikele o kuete coku kunda olondaka viwa?
Oco tu pandikise kupange woku kunda ndaño omanu ka va lekisa onjongole, tu sukila oku yuvula oku tiamisila utima ketambululo lĩvi liomanu tu kundila ndeci Isaya a linga. Manji Rafał wa liyakavo lesumuo, kuenje wa popia hati: “Nda siata oku likolisilako oku yuvula oku tiamisila utima ketambululo lĩvi liomanu ka va tava kesapulo lietu. Omanu vocikanjo cange, va kuete omoko yoku tambulula ndomo va yongola.” Manji umue Anna wamisako hati: “Nda siata oku likolisilako oku yuvula oku sokolola atambululo a ndi sumuisa. Olohutililo kuenda oku konomuisa ovisonehua eteke leteke osimbu sia endele kupange woku kunda ovio via siata oku ndi kuatisa oku cilinga. Ndi yuvula ovisimĩlo viosi vĩvi.”
Uprofeto Esekiele wa kundila pokati ka va Yudea vakuesino kumandekua ko Bavulono. (Esek. 2:6) Nda uprofeto Esekiele wa yuvuile oku kundila ondaka ya Suku komanu, kuenda umue pokati kavo wa file, nda wa kuata ekandu liomunu waco. Yehova wa sapuila Esekiele hati: “Omuenyo waye puãi ho pula peka liove.”—Esek. 3:17, 18.
Manji Henryk wa kuatelevo ovisimĩlo ndevi via Esekiele. Eye wa popia hati: “Si yongola oku kuata ekandu liosonde yomanu. Omuenyo womanu u kasi kohele.” (Ovil. 20:26, 27) Manji umue o tukuiwa hati, Zbigniew wa kuatavo ovisimĩlo vimuamue eci a popia hati: “Esekiele wa sukilile oku yuvula oku kapako ovisimĩlo vĩvi viomanu. Ulandu waye, u ndi kuatisa oku tenda upange woku kunda ndomo Ululiki a u tenda.”
Ku Kasi Lika Liove
Eci o kasi kupange woku kunda ku ka sime okuti o kasi lika liove. Ndeci ca pita lupostolo Paulu, tu pondola oku popiavo hati: “Tu londingupange kumosi la Suku.” (1 Va Kor. 3:9) Manji Krystyna una wa lombolola okuti olonjanja vimue wa siata oku sumua, wa popia hati: “Eli olio esunga lieci nda siatela oku pinga ku Yehova oco a ndi kuatise. Eye lalimue eteke a ndi yanduluka.” Ocili okuti, vosi yetu tu sukila espiritu lia Suku oco li tu kuatise kupange woku kunda!—Sak. 4:6.
Eci tu kasi kupange woku kunda olondaka viwa, espiritu sandu li tu kuatisa oku lekisa ovituwa viatiamẽla ‘kapako espiritu.’ (Va Gal. 5:22, 23) Ovituwa viaco vi tu kuatisa oku pandikisa kovitangi viosi tu liyaka lavio kupange woku kunda. Manji Henryk wa popia hati: “Oku talavaya kupange woku kunda ci ndi kuatisa oku mioñolola ciwa ovituwa viange. Ndi lilongisa oku kuata epandi, loku lekisa esunguluko okuti si liwekapo kupange waco.” Oku pandikisa kupange woku kunda ndaño lovitangi, ci ku kuatisa oku lekisa ciwa apako espiritu.
Yehova wa nõla ovangelo vaye oco va songuile upange waco. (Esit. 14:6) Embimbiliya li lekisa okuti, kuli “ohuluwa yolohuluwa, lohũlũkãi” viovangelo. (Esit. 5:11) Ovangelo omo okuti, va kasi oku songuiwa la Yesu, va kuatisa afendeli va Suku va kasi palo posi. Ove hẽ, wa siata oku ivaluka ovina evi eci o kasi kupange woku kunda?
Manji Anna wa popia hati: “Oku sokolola okuti ovangelo va kasi kumue letu kupange woku kunda, ca siata oku ndi pamisa calua. Nda siata oku kapako calua ekuatiso liovangelo va kasi oku songuiwa la Yehova kuenda Yesu.” Tu kuete esumũlũho liocili omo lioku talavaya kumosi lovangelo vakuekolelo!
Nye ci popiwa catiamẽla kekuatiso tu tambula ku vamanji tu talavaya kumosi kupange woku kunda? Tua siata oku tambula asumũlũho alua omo lioku talavaya kumosi la vamanji vakuekolelo. Ocili okuti, wa siata oku mola uvangi woku tẽlisiwa kuolondaka vi sangiwa kelivulu Liolosapo vi popia hati: “Ndeci utale u lepika utale, haico omunu a lepika omunu.”—Olosap. 27:17.
Oku talavaya kupange woku kunda la vamanji, ci tu ĩha epuluvi lioku kũlĩha olonjila via litepa vioku eca uvangi. Manji umue o tukuiwa hati, Elżbieta wa popia hati: “Oku talavaya la vamanji va litepa, ci nyiha epuluvi lioku lekisa ocisola cange kokuavo kuenda komanu tu kundila.” Omo liaco, likolisilako oku talavaya kupange woku kunda lakundi vakuavo. Momo poku ci linga cika ku kuatisa oku kũlĩha oku eca uvangi.
Litata Ciwa
Oco tu amameko oku kuata esanju kupange woku kunda, tu sukila oku lipongiya ciwa, oku kuata elilongiso lio pokolika, kuenda oku puyuka ciwa. Eci ci lomboloka okuti tu sukila oku litata ciwa konepa yespiritu kuenda ketimba.
Embimbiliya li popia hati: “Okuliangiliya kukuambili ku muisa elau.” (Olosap. 21:5) Manji umue o tukuiwa hati, Zygmunt okuti cilo o kuete 88 kanyamo, wa popia hati: “Oku linga esokiyo liwa kupange wange woku kunda, ci ndi kuatisa oku tẽlisa ciwa upange waco. Ndi sokiya ciwa otembo yange oco ndi kuate epuluvi liwa lioku eca uvangi.”
Oku kũlĩha ciwa Ovisonehua ci tu kuatisa, kuenda ci tu ĩha uloño woku kunda. Ndeci tu sukila okulia kuetimba oco tu kale lomuenyo, haico tu sukila oku litekula konepa yespiritu. Momo ci tu kuatisa oku amamako lupange woku kunda. Oku li tekula oloneke viosi Londaka ya Suku kuenda oku tambula ‘okulia kotembo ya tukuiwa,’ ci tu ĩha ongusu yoku pandikisa kupange woku kunda.—Mat. 24:45-47.
Manji Elżbieta wa linga apongoloko alua komuenyo waye oco a mioñolole upange waye woku kunda. Eye wa popia hati: “Nda tepulula otembo nda enda oku pesela koku tala o televisãu, kuenje cilo ndi kuete otembo yalua yoku lipongiyila upange woku kunda. Eci ndi tanga Embimbiliya koñolosi, ndi sokolola omanu nda sapela lavo vocikanjo. Ndi sandiliya ovisonehua kuenda ovipama vimue vialivulu vi pondola oku va kuatisa.”
Oku puyuka ciwa ku ku kuatisa oku kuata ongusu kuenda oku talavaya ciwa kupange woku kunda. Oku litumbika calua kolomapalo ku tepulula ombili yove kupange woku kunda. Manji umue o tukuiwa hati, Andrzej wa popia hati: “Ekambo liepuyuko liwa, li nena ekavo, kuenje noke ci tuala omunu kesumuo. Nda siata oku likolisilako oku yuvula ocituwa caco.”—Uku. 4:6.
Ndaño okuti tua siata oku likolisilako oku kunda, pole, omanu valua ka va siatele oku tava kolondaka viwa. Pole, Yehova lalimue eteke a ivalako upange wetu. (Va Hev. 6:10) Ndaño muẽle omanu valua ka va yongola oku vangula letu, pole, eci tu tunda vocikanjo va fetika oku vangula eci catiamẽla kokuetu. Onima yaco yika kala ndeci ca pita la Esekiele eci tu tanga hati: Omanu vaka “limbuka okuti pa kala uprofeto pokati kavo.” (Esek. 2:5) Ocili okuti, upange woku kunda ka wa lelukile, pole, kumosi lomanu vana va tu yevelela tu pondola oku kuata esumũlũho cilo.
Manji Zygmunt wa popia hati: “Oku kunda olondaka viwa Viusoma, ci tu kuatisa oku wala omunu wokaliye loku lekisa ocisola cetu ku Suku kuenda komanu.” Manji Andrzej wamisako hati: “Oku kuatisa kupange woku popela ovimuenyo viomanu, esumũlũho liocili. Upange waco, lalimue eteke uka lingiwa vali koluali luosi ale oku lingiwa lovitangi ndevi vi kasi koloneke vilo.” Omo liaco, ove o pondolavo oku kuata asumũlũho poku pandikisa kupange woku kunda u kasi oku lingiwa koloneke vilo.—2 Va Kor. 4:1, 2.
[Elitalatu kemẽla 31]
Oku litata ciwa konepa yespiritu kuenda ketimba ci tu kuatisa oku pandikisa kupange woku kunda