Epandi Liove Li Sanjuisa Utima Wa Yehova

“Kuata olondunge amõlange, sanjuisa utima wange, oco nambulule u o njimbula.”—OLOSAP. 27:11.

1, 2. (a) Elivulu lia Yovi li lombolola alundi api Satana a linga? (b) Nye ci lekisa okuti Satana wamamako oku imbula Yehova noke yoku fa kua Yovi?

YEHOVA wa ecelela okuti Satana o seteka esunguluko liukuenje waye Yovi. Omo liaco, Yovi wa pesela ukuasi waye, omãla vaye, kuenda uhayele waye. Pole, eci Satana a kala oku seteka esunguluko lia Yovi, ka tiamisilile lika utima ku Yovi. Eye wa popia hati: “Ekova lekova! Cosi omunu a kasi laco o ci ecela omuenyo waye.” Ondaka eyi ya katula ocitangi cimue okuti ka ca sulile lika ku Yovi, pole, camamako toke noke yoku fa kuaye.—Yovi 2:4.

² Eci papita 600 kanyamo tunde eci Yovi a liyaka lovitangi, Salomone wa vetiyiwa oku soneha hati: “Kuata olondunge amõlange, sanjuisa utima wange, oco nambulule u o njimbula.” (Olosap. 27:11) Ocili okuti kotembo yaco Satana wa kala oku imbula Yehova. Handi vali, vocinjonde upostolo Yoano a kuata, wa mola okuti Satana o kasi oku lundila omanu va Suku, kuenje noke yo katembo kamue eci Usoma wa Suku wa tumbikiwa kunyamo wo 1914, Satana wa tundisiwa kilu. Toke cilo koloneke vilo via sulako, Satana o kasi oku amamako oku seteka ekolelo liomanu va Suku!—Esit. 12:10.

3. Ovina vipi vi kuete esilivilo tu lilongisa kelivulu lia Yovi?

³ Tu kũlĩhĩsi ovina vitatu vi kuete esilivilo tu lilongisa kelivulu lia Yovi. Catete, ovitangi via Yovi vi situlula unyali wa velapo womanu kuenda ono yelambalalo liomanu va Suku. Satana Eliapu eye unyali waco. Cavali, oku kuata ukamba uwa la Suku, ci tu kuatisa oku amamako lepandi ndaño tu liyaka lovitangi vialua. Catatu, eci tu liyaka lovitangi leci tu setekiwa volonepa vikuavo, Suku o tu kuatisa ndeci a linga la Yovi. Koloneke vilo, Yehova o ci linga lekuatiso Liondaka yaye, ocisoko caye, kuenda espiritu sandu.

Olonjanja Viosi Ivaluka Unyali wa Velapo

4. Helie ono yovitangi vi kasi voluali?

⁴ Omanu valua ka va tava okuti kuli Satana. Ovo ndaño va sumua calua omo liovitangi vi kasi voluali, ka va limbuka okuti Satana Eliapu eye ono yovina viaco vĩvi. Pole, olonjanja vimue ovitangi omanu va siata oku liyaka lavio, vi tunda kovilinga viavo. Olonjali vietu viatete Adama la Heva, via nõlapo oku litepa Lululiki wavo. Tunde kotembo yaco toke cilo, omanu va siata oku nõlapo oku kuama onjila ka ya sungulukile. Pole, Eliapu olio lia vetiya Heva oku sinila Suku. Eye wa tumbika uviali pokati komanu ka va lipuile, momo oluali lu kasi povaka aye. Omo okuti, Satana eye “osuku yoluali lulo,” omanu va siata oku lekisa ovituwa ndevi viaye okuti: epela, ukuse, oku livelisapo, ocipululu, uhembi, kuenda esino. (2 Va Kor. 4:4; 1 Tim. 2:14; 3:6. tanga Tiago 3:14, 15.) Ovituwa viaco, via siata oku nena ovoyaki opulitika, kuenda ovoyaki vatavo, esuvu, oku nyana, kuenda onjuela vina via siata oku nena ohali komanu.

5. Nye tu sukila oku linga lukũlĩhĩso tu kuete?

⁵ Ocili okuti, etu tumanu va Yehova tu kuete ukũlĩhĩso wocili! Tua kũlĩha u wa nena ovitangi vi kasi voluali. Anga hẽ ka tu vetiyiwa oku enda kupange woku kunda oco tu sapuileko omanu catiamẽla kono yovitangi viaco? Anga hẽ ka tu sanjukila oku kala konele ya Yehova Suku yocili kuenda oku sapuila vakuetu ndomo eye a ka kundula Satana loku malako ovitangi viomanu?

6, 7. (a) Helie wa siata oku nena elambalalo komanu va Suku? (b) Tu kuama ndati ongangu ya Elihu?

⁶ Satana ka siatele lika oku nena ohali voluali, pole, wa siatavo oku nena elambalalo komanu va Suku. Eye wa nõlapo oku seteka ekolelo lietu. Yesu Kristu wa sapuila Petulu hati: “A Simono, a Simono, limbuka okuti Satana wa panga oku vu kuata vosi okuti o vu sisa ndotiliku.” (Luka 22:31) Cimuamue haico ci pita letu tu kasi oku kuama volomãi via Yesu. Tu pondolavo oku setekiwa volonepa vialua. Petulu wa sokisa Eliapu “ndohosi yi koma oku sandiliya u a lia.” Paulu wa popiavo hati: “Vosi va panga oku kala lomuenyo wesunga lia Suku vu Kristu Yesu va kangisiwa.”—1 Pet. 5:8; 2 Tim. 3:12.

⁷ Eci manji umue a liyaka lovitangi, tu lekisa ndati okuti tua kũlĩha unyali wetu wa velapo? Tu sukila oku yuvula oku liamuha la manji yaco, pole, tu kuama ongangu ya Elihu una wa lembeleka Yovi lolondaka vi lekisa ukamba wocili. Tu likongela la manji yaco oku liyaka lunyali wetu Satana. (Olosap. 3:27; 1 Va Tes. 5:25) Tu sukila oku kuata ocimãho coku kuatisa vamanji oco vamameko lekolelo eci va liyaka lovitangi kuenda oku sanjuisa utima wa Yehova.

8. Momo lie Satana ka tẽlelele oku tateka Yovi koku sivaya Yehova?

⁸ Oseteko yatete Satana a nena ku Yovi, epese liukuasi waye. Ovinyama via Yovi, via kuatele esilivilo momo via enda oku u kuatisa. Pole, ovinyama viaco via enda oku kuatisavo Yovi kefendelo. Noke yoku yelisa omãla vaye, wa enda oku “pasuka ociteketeke, wa va lumbaila ovilumba vioku yoka, omõla ocilumba, omõla ocilumba, momo Yovi hati, Sanga omãla vange va linga ekandu kuenje va simãila Suku cimue cĩvi vovitima viavo. Oco Yovi a lingainga.” (Yovi 1:4, 5) Ocili okuti, Yovi wa enda oku eca ku Yehova ovilumba viovinyama. Pole, eci a fetika oku liyaka lovitangi ka kuatele vali epondolo liaco. Momo ka kuatele vali ‘ovipako’ vioku vumba lavio Yehova. (Olosap. 3:9) Pole, wa vumba Yehova lomẽla waye!

Kuata Ukamba Uwa la Yehova

9. Ukuasi upi wa velapo tu kuete?

⁹ Cikale okuti tu kuete ukuasi ale tulohukũi, tuamalẽhe ale tuakulu, nda tu kuete uhayele uwa ale sio, tu pondola oku kuata ukamba uwa la Yehova. Ndaño tu liyaka lovitangi, pole, nda tua kuata ukamba uwa la Yehova Suku, tu amamako lekolelo lietu kuenda tu sanjuisa utima waye. Omanu vana va kuete ukũlĩhĩso utito Wondaka ya Suku, va pondolavo oku pandikisa lekolelo liavo.

10, 11. (a) Manji umue ukãi wa pandikisa ndati lekolelo? (b) Etambululo lipi manji yaco a eca ku Satana?

¹⁰ Kũlĩhĩsa ulandu wa Manji Valentina Garnovskaya umue pokati Kolombangi vialua Via Yehova kofeka yo Russia okuti wa pandikisa kovitangi vialua ndeci ca pita la Yovi. Kunyamo wo 1945 eci a kuata ci soka 20 kanyamo, manji umue wo wĩha uvangi. Eye wo nyula vali olonjanja vivali oco va sapele eci catiamẽla Kembimbiliya, pole, noke ka va li muile vali. Valentina wa fetika oku kundilavo omanu vana a lisunguile lavo. Noke omo lioku kunda, wa kuatiwa kuenje eci a sombisiwa vo sapuila okuti o kala vokayike ci soka anyamo ecelãla. Kunyamo wo 1953, wa tunda vokayike, kuenje wa fetika vali oku kunda. Noke wa kuatiwa vali, kuenje vo tukuila oku kala vokayike ci soka anyamo ekũi. Noke yoku pita anyamo alua kocitumãlo caco, wa tumiwa kocitumãlo cikuavo. Kocitumãlo caco, wa sangako vamanji vamue akãi va kuatele Embimbiliya. Eteke limue manji umue wa lekisa ku Valentina Embimbiliya liaco. Hesanjukuolio Valentina a kuata! Ivaluka okuti, kunyamo wo 1945 oco Valentina a mola onjanja yatete Embimbiliya peka lia manji una wo kundila olondaka viwa!

¹¹ Kunyamo wo 1967, Valentina wopiwa vokayike kuenje wa litumbika ku Yehova loku papatisiwa. Eye wamamako lupange woku kunda toke kunyamo wo 1969. Kunyamo waco wa kuatiwa vali, kuenje vo tukuila oku kala vokayike anyamo atatu. Pole, Valentina wamamako loku kunda olondaka viwa. Vokuenda kuomuenyo waye, wa kuatisa eci ci soka 44 komanu oku kũlĩha ocili Condaka ya Suku toke eci a fa kunyamo wo 2001. Eye wa pesela eci ci soka 21 kanyamo vokayike kuenda kovitumãlo vioku talisa omanu ohali. Oco amameko lekolelo liaye, wa eca ovina viosi a kuatele oku kongelamo elianjo liaye. Osimbu handi ka file, Valentina wa popia hati: “Sia la kuata ocitumãlo coku kala. Nda kuata lika ekolombele lioku kapa uwalo lovina vikuavo, pole, nda kuata esanju omo lioku vumba Yehova.” Ocili okuti, Valentina wa eca etambululo liwa ku Satana, una wa popia hati, omanu eci va liyaka lovitangi, ka va pandikisa lekolelo ku Suku! (Yovi 1:9-11) Tu sukila oku kolela okuti, Valentina wa sanjuisa utima wa Yehova, kuenda Yehova ndopo oko pindula kumosi lomanu vakuavo va fa lekolelo.—Yovi 14:15.

12. Ocisola ci kuete esilivilo lie kukamba wetu la Yehova?

¹² Ukamba wetu la Yehova u tunda kocisola tu u kuetele. Tua sanjukila ovituwa via Suku kuenda tu likolisilako oku endisa omuenyo wetu locipango caye. Ca litepa leci Satana a popia ceci okuti, tu eca ocisola cetu ku Yehova lutima wetu wosi ndaño lovitangi. Ocisola caco, ci tu kuatisa oku amamako lepandi ndaño loloseteko. Handi vali, Yehova “o vetatela onjila yolondingesunga viaye.”—Olosap. 2:8; Osa. 97:10.

13. Yehova o tenda ndati ovina tu u lingila?

¹³ Ocisola ci tu vetiya oku sivaya onduko ya Yehova ndaño lovitangi. Yehova wa kũlĩha onjongole yetu kuenda eye ka tu pisa nda ka tua kuatele epondolo lioku tẽlisa ovina tua yonguile oku linga. Eye ka velisilepo lika ovina tu linga, pole, wa velisapo esunga lieci tu lingila ovina viaco. Yovi ndaño okuti wa sumuile, kuenda wa pandikisa calua, wa sapuila ovanyali vaye ndomo a solele olonjila via Yehova. (Tanga Yovi 10:12; 28:28.) Kocipama ca sulako celivulu lia Yovi, Suku wa lekisa onyeño yaye ku Elifasi, Bilidade, kuenda ku Cofare omo lioku vangula uhembi. Pole, Yehova wa lekisa ocisola caye a kuatela Yovi poku u tukula olonjanja vikũala hati, ‘ukuenje wange’ kuenda wo sapuila oco a likutilileko olondingaĩvi viaco. (Yovi 42:7-9) Omo liaco, tu sukilavo oku lekisa ocituwa caco oco Yehova a tu sanjukile.

Yehova o Kuatisa Omanu Vaye Vakuekolelo

14. Yehova wa kuatisa ndati Yovi oco a pongolole ovisimĩlo viaye?

¹⁴ Yovi ndaño okuti ka lipuile, pole, wamamako lepandi. Olonjanja vimue omo liohali, wa enda oku kuata ovisimĩlo vĩvi. Eye wa popia ku Yehova hati: “Ndi ku vilikiya kuenje ku ñumbulula. ... O nalisa ohali lolohõlo vieka liove.” Handi vali, Yovi wa enda oku li teyuila calua eci a popia hati: “Siukuevĩhoko,” kuenda “ovaka ange ka a lingile cimue cĩvi, kuenje olohutililo viange vi yela.” (Yovi 10:7; 16:17; 30:20, 21) Pole, Yehova wa kuatisa Yovi poku u linga apulilo alua. Apulilo aco a kuatisa Yovi oku limbuka okuti Suku ukuonene kuenda omunu ka sokisiwa laye. Yovi wa tava kelungulo liaco kuenje wa pongolola ovisimĩlo viaye.—Tanga Yovi 40:8; 42:2, 6.

15, 16. Koloneke vilo Yehova wa siata oku eca ndati ekuatiso komanu vaye?

¹⁵ Koloneke vilo, Yehova wa siatavo oku eca olonumbi viwa komanu vaye. Handi vali, tua siata oku kuatisiwa calua. Yesu Kristu wa eca ocilumba cocisembi ci tuala kongecelo yakandu. Omo liocilumba caco, tu pondola oku kuata ukamba la Suku ndaño ka tua lipuile. (Tia. 4:8; 1 Yoa. 2:1) Eci tu liyaka lovitangi tu likutilila oku pinga ekuatiso, kuenda oku pamisiwa lespiritu sandu lia Suku. Handi vali, tu kuete Embimbiliya kuenje nda tua li tanga loku sokolola ovina tua tanga, tu li pongiyila ovitangi vi seteka ekolelo lietu. Oku lilongisa Ondaka ya Suku, ci tu kuatisa oku kuata elomboloko liocitangi ca katuiwa catiamẽla komoko ya Suku yoku viala kuenda kesunguluko lietu.

¹⁶ Handi vali, tu kuatisiwavo poku tiamẽla kocisoko cimue ca vamanji va kuete elitokeko koluali luosi, vana Yehova a siata oku ĩha okulia kuespiritu lekuatiso ‘liukuenje wa kolelua haeye wa lunguka.’ (Mat. 24:45-47) Kueci ci panda 100.000 kakongelo Olombangi Via Yehova, va siata oku linga olohongele vina vi tu longisa haivio vi tu pamisa oco tu pandikise kovitangi vi seteka ekolelo lietu. Uvangi waco wa lekisiwa kulandu wumalẽhe umue o tukuiwa hati, Sheila Ombangi ya Yehova kofeka yo Alemanya.

17. Lombolola ulandu umue u lekisa esilivilo lioku pokola kolonumbi viocisoko ca Yehova koloneke vilo.

¹⁷ Eteke limue kosikola, ulongisi wa Sheila keyile oku longisa. Noke akamba vaye va nõlapo oku seteka oku linga uloño umue u tukuiwa hati, Ouija board watiamẽla kolondele oco omunu a kũlĩhe eci cika pita laye kovaso yoloneke. Omo liaco, Sheila wa tundila lonjanga posamua. Ovina via pita lakamba vaye, vieya oku u vetiya oku eca olopandu omo lioku tunda pokati kavo. Momo osimbu akamba vaye va kala oku linga uloño waco, va mola okuti va kasi lolondele, kuenje va fetika oku kuata usumba walua. Nye ca kuatisa Sheila oku tunda lonjanga pokati kavo? Eye wa popia hati: “Eteke limue kohongele Konjango Yusoma, va lomboluile ohele yi tunda koku seteka oku linga uloño wo Ouija boards. Omo liaco, nda kũlĩhĩle eci ndi linga. Nda yonguile oku sanjuisa Yehova ndomo ca lomboluiwa kelivulu Liolosapo 27:11.” Ocili okuti, Sheila omo lioku kuata ocituwa coku endaenda kolohongele loku yevelela ciwa, wa kuatisiwa calua!

18. Nye ove wa nõlapo oku linga komuenyo wove?

¹⁸ Vosi yetu tu nõlipo oku kuama olonumbi tu tambula vocisoko ca Suku. Poku endaenda kolohongele, loku tanga Embimbiliya, oku lilongisa alivulu a sandekiwa lukuenje wa kolelua, olohutililo, kuenda oku kuata ukamba la vamanji, tu tambula olonumbi viaco kuenda ekuatiso tu sukila. Yehova o yongola okuti tu yula kuenda eye wa kolela okuti tu amamako lekolelo. Tu kuete esumũlũho liocili omo lioku sivaya onduko ya Yehova, loku pandikisa lekolelo, kuenda oku sanjuisa utima wa Yehova!

Ocilavuka?

• Ovitangi vipi Satana a siata oku nena?

• Ukuasi upi wa velapo tu kuete?

• Nye ci tu kuatisa oku kuata ukamba la Yehova

• Koloneke vilo volonepa vipi Yehova a siata oku tu kuatisa?

[Elitalatu kemẽla 8]

Ove hẽ, o vetiyiwa oku sapuilako vakuene ukũlĩhĩso wove?

[Elitalatu kemẽla 9]

Tu pondola oku kuatisa vamanji oku amamako lesunguluko liavo

[Elitalatu kemẽla 10]

Valentina wa nõlelepo oku pesela ovina viosi oco amamako lesunguluko liaye