Apulilo Valingiwa Lavakuakutanga
Anga hẽ kuli elavoko liokuti oñaña ya fila vimo lia ina yaye yika pinduiwa?
Komanu vana ka va kũlĩhĩle evalo lioku pesela oñaña lonjila ndeyi, ka ca lelukile oku sokolola esumuo liolonjali via siata oku pita locitangi caco. Olonjali vimue via siata oku sumua calua. Onjali yimue yukãi ya pesela omãla vatãlo osimbu handi ka va citiwile. Noke wa kuata esumũlũho lioku cita omãla vavali valume veya oku kula ciwa luhayele. Pole, wa siata oku ivaluka epese a pita lalio. Osimbu handi ka file, wa enda oku sokolola anyamo omãla vaye nda va kuete cilo nda va kaile lomuenyo. Anga hẽ, Akristão vaco va pondola oku kuata elavoko liokuti oloñaña viavo vika pinduiwa?
Etu, ka tu kuete etambululo liaco. Embimbiliya ka li lombolola loku teta onimbu catiamẽla kepinduko lioloñaña vina via pulumuiwa, ale vina via citiwa okuti via fa. Pole, Vondaka ya Suku mu sangiwa olonumbi via velapo viatiamẽla kepulilo eli kuenda yeca elembeleko.
Tu kũlĩhĩsi apulilo avali atiamẽla kondaka eyi. Catete, kovisimĩlo via Yehova, otembo yipi omuenyo womunu u fetika? Anga hẽ poku miniwa ale poku citiwa? Cavali, Yehova o tenda ndati oñaña ka ya citiwile yi kasi vimo lionjali? Anga hẽ omunu, ale ocimunga cimue ño coloselula? Embimbiliya li eca atambululo kapulilo ava.
Ocihandeleko Suku a ecele ku Mose, ca lekisile okuti omuenyo womunu ka u fetika poku citiwa, pole, u fetika poku miniwa. Ndamupi? Oco ca lekisile okuti omunu wosi o ponda oñaña yaco, o yambuiwa loku fa.a Kũlĩhĩsa ocihandeleko eci: “O feta omuenyo lomuenyo.” (Etu. 21:22, 23) Omo liaco, oñaña yina yi kasi vimo lionjali, yi tendiwa okuti omunu ukuamuenyo. Oku kũlĩha okuti oñaña yi kasi vimo lionjali yi tendiwa okuti omunu ukuamuenyo, ca siata oku kuatisa Akristão valua oku yuvula ocituwa coku pulumula locipango. Momo va kũlĩha okuti ocituwa caco, ci lomboloka ekandu linene ku Suku.
Anga hẽ, Yehova o tenda okuti omuenyo woñaña yaco u kuete esilivilo kokuaye? Ocihandeleko ca tukuiwa ndeti, ca lekisile okuti omunu wosi wa koka olofa vioñaña yina ka ya citiwile handi, o pondiwavo. Ocili okuti omuenyo woñaña yina ka ya citiwile handi, u kuete esilivilo kovaso a Suku. Handi vali, ovinimbu vialua Viovisonehua vi lekisa okuti Yehova o tenda oñaña ka ya citiwile okuti omunu. Soma Daviti wa vetiyiwa oku popia catiamẽla ku Yehova hati: “Wa ndulika vimo lia mai. ... Ovaso ove a ndete eci ovimatamata vietimba liange ka via lulikiwile handi. Velivulu liove oloneke viosi via nukuiwila omo via sonehiwa osimbu ka viko handi.”—Osa. 139:13-16; Yovi 31:14, 15.
Yehova wa kũlĩhavo ovituwa vioñaña ka ya citiwile kuenda epondolo liaye liovina aka linga kovaso yoloneke. Rebeka ukãi wa Isake osimbu a kala latimba avali vomãla vaye volonjamba, Yehova wa lombolola ocitumasuku cimue catiamẽla koku liyaka kuomãla vaco eci va kala vimo lia inavo. Eye wa lekisa okuti ovituwa viavo vika tiamisiwila komanu valua.—Efet. 25:22, 23; Va Rom. 9:10-13.
Ulandu watiamẽla ku Yoano Upapatisi, u komõhisavo. Evanjeliu li lombolola hati: “Eci Elisavete a yeva ocilamo ca Maria oco omõla vimo wa lisenga, kuenje Elisavete wa yukisua espiritu sandu.” (Luka 1:41) Ndotolo Luka poku lombolola ulandu waco, wa tukula ondaka yo Helasi yi timisiwila koñaña yina ka ya citiwile handi ale yina ya citiwa. Eye wa tukulavo ondaka yaco poku lombolola ulandu wa Yesu eci vo pekelisile vocililo colongombe.—Luka 2:12, 16; 18:15.
Poku kũlĩhĩsa ovolandu avo kuenda ovisonehua, anga hẽ, Embimbiliya li lekisa okuti pokati koñaña yina yi kasi vimo lia inaye kuenda yina ya citiwa ale, pali etepiso? Sio, ka pali. Etambululo eli, li likuata londaka yolonoño. Ovolandu olonoño a lekisa okuti oñaña yi kasi vimo yi yeva ovina vi lingiwa kosamua. Eli olio esunga lieca okuti onjali yina yi kuete atimba avali, yi pondola oku kuata ukamba loñaña yi kasi oku kulila vimo liaye.
Ocili okuti, oñaña yi citiwa muẽle votembo ya sokiyiwa. Kũlĩhĩsa ocindekaise eci: Onjali yimue yi cita oñaña osimbu otembo yaye yoku citiwa ka ya pitilile. Pole, noke yoloneke vimue, yi fa. Onjali yikuavo yi cita oñaña yaye votembo ya sokiyiwa. Pole, noke yoku citiwa yi fa. Anga hẽ, onjali yatete yi pondola oku kuata elavoko liokuti oñaña yaye yika pinduiwa omo okuti ka ya citiwile votembo ya sokiyiwa, osimbu okuti onjali yavali ka yi pondola oku kuata elavoko liaco?
Embimbiliya li longisa okuti omuenyo womunu u fetika poku miniwa, kuenda Yehova o tenda oñaña ka ya citiwile okuti omunu. Omo liolonumbi evi Viovisonehua, omanu valua va siata oku kuata elomboloko liokuti, ka ca sungulukile oku popia hati, oñaña yina ya citiwa okuti ya fa, ka kuli elavoko liokuti yika pinduiwa. Momo ovisimĩlo viaco ka vi likuata lesunga lieci Ovisonehua vi pisila ocituwa coku pulumula locipango.
Kanyamo apita, Utala Wondavululi wa katuile apulilo amue a nena atatahãi alua komanu atiamẽla kelavoko liepinduko lioloñaña vina via citiwa okuti via fa ale. Anga hẽ Voluali Luokaliye Suku oka kapa vimo lionjali oñaña oco yi kulilemo okuti noke yi citiwa? Osungu Yolombangi Via Yehova noke yoku konomuisa ciwa ondaka yaco lolohutililo, ya pitila petosi liokuti apulilo aco ka a kuete esilivilo lialua catiamẽla kondaka yelavoko liepinduko. Yesu wa popele hati: “Ovina viosi vi tẽliwa la Suku.” (Mar. 10:27) Ulandu wa Yesu, weca uvangi waco. Omuenyo waye wa pongoluiwa oku tunda kilu toke vimo liufeko umue ombutulua, okuti lomue o tẽla oku kuata elomboloko liocikomo caco ndomo ca lingiwa.
Anga hẽ, ovina evi vi lekisa okuti Embimbiliya li longisa hati, oloñaña vina via citiwa okuti via fa vika pinduiwa? Embimbiliya ka li eci etambululo liaco, kuenda omanu ka citava okuti va tamãlala lovisimĩlo viokuti oloñaña viaco vika pinduiwa. Momo ondaka eyi yi pondola oku katula vali apulilo alua. Omo liaco, tu sukila oku yuvula ovisimĩlo viesanda. Eci tua kũlĩha lika ceci okuti: Ondaka yaco yi kasi peka lia Yehova, ukuacisola ka ci pui haeye ukuahenda. (Osa. 86:15) Ocipango caye, oku imula olofa lekuatiso liepinduko. (Yovi 14:14, 15) Tu sukila oku kolela okuti eye olonjanja viosi wa siata oku linga eci ca sunguluka. Eye oka imula ovitangi viosi tua siata oku liyaka lavio voluali lulo lũvi eci aka tuma Omõlaye oku “nyõla ovilinga Vieliapu.”—1 Yoa. 3:8.
[Atosi pombuelo yamẽla]
a Ocinimbu eci Covisonehua olonjanja vimue ca siata oku pongoluiwa lovisimĩlo viokuti, olofa vionjali yaco ovio lika vi nena eyambulo lioku fa. Pole, ocinimbu caco kosimbu kelimi lio Heveru ca lekisa okuti ocihandeleko ca tukula eyambulo omunu a tambula omo liolofa vionjali yaco ale vioñaña yina ka ya citiwile.
[Elitalatu kemẽla 13]
Yehova oka imula ovitangi viosi tua siata oku liyaka lavio