Ceci Ci Kuatisa Apata Oku Kala Lesanju

Pongiya Omãla Vove Vatito Oku Kula Ciwa

“Nda solele oku sapela lomãla vange. Eci nda enda oku vangula lavo, va enda oku njevelela lutate, kuenda va enda oku pokola kokuange. Omo kaliye va kula, tua siata oku lihoyisa calua. Ovo ka va sole vali ovina viatiamẽla kefendelo lietu, kuenda va mulisa ndoco: ‘Anga hẽ tu sukila oku vangula lika ovina viatiamẽla Kembimbiliya?’ Eci ovo handi ka va pitĩlile vetunu, sia la sima okuti vepata lietu mua laikele oku pita ovitangi evi, ndeci ca siata vapata amue.”​—⁠Reggie.a

ANGA hẽ o kasi oku tekula omõla umue utito? Nda oco, wa siata oku mola apongoloko a pita laye osimbu a kasi oku kula. Otembo yaco yi koka asakalalo alua. Ovitangi tuka tukula via siata hẽ oku pitavo vepata liove?

▪ Eci omõlove ukuenje a kala utito, wa kala ndolundovi lua leluka oku u nãla. Cilo, omo o kasi loku kula, wa linga ndolundovi lua tĩla oku lu nãla, kuenje ove o sima okuti ku tẽla vali oku u longa.

▪ Eci omõlove wukãi a kala utito, wa enda oku ku sapuila ovina vialua. Cilo omo eye o kasi loku kula, o kuete lika ukamba lomãla vana va kasi vusue waye, kuenje cu ku kokela oku sima okuti vendo liavo kusuimo vali.

Nda o kasi oku liyaka lovitangi ndevi vepata liove, ku ka sime okuti omãla vove va ku ñualẽlapo. Oco hẽ, nye ci kasi oku pita lavo? Oco tu sange atambululo kapulilo ava, tu konomuisi ovina vimue via siata oku pita lomãla, osimbu va kasi oku kula.

Ovomalẽhe​—⁠Otembo Yimue ya Velapo

Tunde eteke lioku citiwa, omõla o lilongisa ovina vialua ndeci, oku fetika oku enda, oku popia olondaka viatete, oku enda kosikola kuenda ovina vikuavo. Olonjali poku mola apongoloko aco, vi sanjuka calua. Eci ci lekisa okuti omãla va kasi oku kula.

Otembo yovomalẽhe yiwa calua pole, olonjali vimue, ka vi sanjukila otembo yaco, momo ci va kokela asakalalo alua. Anga hẽ oku mola okuti omõla o kasi oku kula, ka ci sanjuisa olonjali? Ovomalẽhe otembo yimue yi kuatisa omãla oku kula ciwa. Ndamupi?

Embimbiliya li lekisa okuti noke yotembo yimue “ulume o sia isiaye la inaye.” (Efetikilo 2:​24) Ovomalẽhe oyo otembo yoku kuatisa omõla wulume ale wukãi oku li pongiyila oloneke vio kovaso. Eci a ka linga ukulu, o ka popia ndeci upostolo Paulu a popele okuti: “Eci nda kala omõla nda vangola ndomõla, nda yeva yeva ndomõla, nda soka soka ndomõla. Eci nda linga ukulu, nda liwekapo evi viumõla.”​—⁠1 Va Korindo 13:⁠11.

Esunga lieci o sukilila oku kuatisa omõlove wulume pamue wukãi vutila, oku u pongiyila oku kuata olondunge eci a ka linga ukulu oco a tẽle oku li songuila eye muẽle pana okuti wa tunda konjo yove. Elivulu limue lia sokisa utila ‘ndocina cimue ci pita ombamba.’

Cilo, ove o kuete esunga lioku sima okuti omõlove wulume ale wukãi, ka kuete handi epondolo lioku li tumĩla eye muẽle omo ‘utito.’ Pamue o li pula ndoco:

▪ Nda okuti omõlange wulume ka tẽla oku yelisa ohondo yaye, o ka yelisa ndati onjo yaye muẽle?

▪ Nda omõlange wukãi ka tẽla oku pitĩla konjo vowola ya sokiyiwa, o ka sanga ndati upange eci a kula?

Nda eci oco ocitangi cove, ivaluka okuti: Oku kuata elianjo hacina cimueko ca leluka, pole ca ambata otembo yalua. Kaliye wa limbuka okuti “vutima womõla [wulume ale wukãi] muli esanda.”​—⁠Olosapo 22:⁠15.

Puãi lepindiso, omõlove o pondola oku kula lolondunge vi ko kuatisa “oku tepisa pokati keci ciwa leci cĩvi.”​—⁠Va Heveru 5:⁠14.

Olonumbi vi Nena Asumũlũho

Oco omõlove a kule lolondunge, ove o sukila oku u kuatisa oco a kuate “uloño woku sokolola,” ovina via sunguluka okuti o kuama onjila yiwa.b (Va Roma 12:​1, 2, NW) Olonumbi Viembimbiliya vi kuãimo vi ka ku kuatisa oku ci linga.

Va Filipoi 4:5: “Esunguluko liene li limbukiwe lomanu vosi.” Omõlove poku ka ñuala ñuala, o pinga kokuove okuti ka ka tiuka konjo kelivala lia sokiyiwa. Ove ku wecelela, kuenje eye o fetika oku ñuñuna hati, “O kasi oku ndi tenda ndomõla utito!” Osimbu nda u tambulula hati, “Oco, ove wumõla muẽle,” sokolola ndoco: Amalẽhe va yongola elianjo, pole olonjali ka vi ecelela okuti omãla va linga cosi va yongola. Nye o sukila oku linga oco vokuenda kuotembo va kuate elianjo liaco? Momo lie ove wunjali ku sokoluila otembo wa kala omõla?

LINGA NDOCO: Soneha ovina vivali ale cimosi ove o sukila oku eca naito elianjo komõlove. U sapuila okuti, o kasi lika oku u seteka oku wĩha elianjo. Nda eye wa kuata olondunge, oka kuata elianjo lialua. Pole nda ka ci lingi, ka ka kuata elianjo.​—⁠Mateo 25:⁠21.

Va Kolosai 3:21: “Ene a vaisia, ko ka sanumuli onyeño yomãla vene, sanga ci va kokela esumuo.”​—⁠International Children’s Bible. Olonjali vimue via siata oku sakangiya omãla vavo vatito. Ovio, vi yikila omãla vavo vonjo kuenda vi lavulula ovina viosi va linga. Via siatavo oku kũlĩhĩsa akamba vomãla vavo loku yevelela eci va vangula votelefone. Pole, ocituwa caco ka ci kuatisa omãla. Oku yikila omãla vonjo, ku va kokela oku kuata ovisimĩlo vioku tila. Oku popia lika lãvi akamba vavo, ci vokiya vali onjongole yoku kala lavo, kuenda oku yevelela ombangulo yomãla votelefone, ci va vetiya oku sandiliya akamba vaco vokañunuñunu. Nda okuti otembo yosi o seteka ño oku lavulula ovina va linga, ku ka tẽla oku va songuila. Nda omõlove ka tẽla oku nõla onjila a sukila oku kuama osimbu a kasi konjo, o ka li songuila hẽ ndati eye muẽle pana okuti wa tunda konjo?

LINGA NDOCO: Onjanja yikuavo o sapela lomõlove ovina viatiamẽla kekalo liaye, u kuatisa oku limbuka esilivilo lioku nõla onjila ya sunguluka. Ku ka popie lãvi akamba vaye, pole u pulisa ndoco: “Nda okuti ekamba liove [tukula onduko yaye] li kapiwa vokayike omo lioku lueya ocihandeleko cimue, nye ove nda wa linga? Nda wa tenda hẽ ndati elinga liaco?” Kuatisa omõlove oku limbuka okuti akamba vaye va pondola oku kokela oluhimo luwa ale ekalo lĩvi.​—⁠Olosapo 11:​17, 22; 20:⁠11.

Va Efeso 6:4: “Ene, a vaisia, ko ka wenguli onyeño yomãla vene, puãi va longisi loku va pindisa lovilongua via [Yehova.]” Ondaka oku “pindisa lovilongua” ka yi tiamisiwila lika koku eca olonumbi. Oyo yi lomboloka oku vetiya ovisimĩlo viomõla, oco a tẽle oku nõla eye muẽle onjila ya sunguluka. Eci ci kuete esilivilo liocili komõlove osimbu a kasi oku kula. Isia umue o tukuiwa hati Andre, wa popia hati: “Osimbu omõla a kasi loku kula, ove wu isia ku sukila lika oku u pindisa, o sukilavo oku kala ekamba liaye.”​—⁠2 Timoteo 3:⁠14.

LINGA NDOCO: Eci vu kuata ocitangi cimue, seteki oku pongolola ovikele. Pulisa omõlove onumbi eye nda a ku ĩha nda ove, ove wa kaile omõlaye. Eye o sukila oku sandiliya olonumbi vi ko kuatisa oku lombolola ocisimĩlo caye. Vokuenda kuosemana votola vali ombangulo yaco.

Va Galatia 6:7: “Eci omunu a kũla haico a lombola.” Omõla o kasi vutila citava okuti o pindisiwa poku u kangisa, poku u tuma oku kala vohondo yaye, kuenda oku likala oku wĩha ovina a sole. Pole omõla una okuti wa kula naito, o sukila oku lomboluila ovitangi vi iyilila koku kuama onjila yimue.​—⁠Olosapo 6:⁠27.

LINGA NDOCO: Ku ka fete olofuka viaye, kuenda ku ko fundileko kulongisi waye nda ka lingile ovina vo tuma kosikola. A limuile eye muẽle ovitangi vi iyilila kelinga liaye, kuenje eci ci ko kuatisa oku yuvula ovitangi viaco kovaso yoloneke.

Ove wunjali pamue o yongola okuti omõlove o tunda lonjanga vutila ndelende li pita ombamba. Haimo lumue, ove ku tẽla oku yayuisa oku kula kuomõlove. Osimbu eye handi ka kulile, ove o kuete epuluvi lioku “pindisa omõla vonjila yo sesamẽla.” (Olosapo 22:⁠6) Vembimbiliya mu sangiwa olonumbi viwa vi pamisa epata oku kuata esanju.

[Etosi pombuelo yemẽla]

LI PULA NDOCO: . . .

Eci omõlange wulume ale wukãi a ka tunda konjo, o ka tẽla hẽ oku linga ovina evi vi kuãimo?

▪ oku nõla ciwa onjila a kuama

▪ oku sapela ciwa la vakuavo

▪ oku tata uhayele waye

▪ oku talavaya ciwa lolombongo

▪ oku tata ciwa onjo yaye

▪ oku kuata esanju

[Elitalatu kemẽla 30]

Nda omõlove wa siata oku lekisa olondunge, o pondola hẽ oku vokiya elianjo liaye?