1. Pinga Kusovoli Walio Oco a ku Kuatise

Ukãi umue wo kofeka yo Italia o tukuiwa hati, Ninfa, wa popia ndoco: “Olonjanja vimue, nda enda oku tanga Embimbiliya luteke, osimbu handi sia endele pula. Nda enda oku ci linga momo nda kũlĩhĩle okuti Embimbiliya Ondaka ya Suku. Ndaño okuti sia kuatele esanju lioku tanga elivulu liaco, pole, nda yonguile oku kũlĩha eci Suku a tuma oku soneha Vembimbiliya. Nda yonguile oku tanga Embimbiliya liosi. Kefetikilo ca lelukile, pole ndeya oku limbuka okuti olonepa vimue via tĩla calua kuenje nda liwekapo oku li tanga.”

ANGA hẽ wa siatavo oku liyaka locitangi ndeci ca Ninfa? Omanu valua, va siata oku pita locitangi caco. Ndomo tua ci konomuisa ale vocipama catete, Yehova Suku, Usovoli Wembimbiliya, o yongola okuti o kuata elomboloko Liondaka yaye. O pondola ndati oku kuata elomboloko liaco? Catete, o sukila oku pinga ekuatiso Kusovoli walio.

Ovapostolo va Yesu, va tendiwile okuti, “omanu vaño, haivo ka va longisiwile,” momo ka va pitile kolosikola via velapo via vakuavihandeleko. (Ovilinga 4:​13) Pole Yesu wa va sapuila okuti va sukilile oku kuata elomboloko Liondaka ya Suku. Ndamupi? Yesu wa popia hati: “Ñuatisi, haeye espiritu sandu, una Isia a tumila vonduko yange, eye u longisa ovina viosi.” (Yoano 14:​26) Suku wa talavaya lespiritu sandu liaye poku lulika ongongo kuenda oviendalomuenyo viosi vi kasimo. (Efetikilo 1:⁠2) Lekuatiso liespiritu sandu liaye, wa vetiya eci ci soka 40 kalume oco va sonehe Embimbiliya. (2 Petulu 1:​20, 21) Cimuamue haico ci pondola oku pita koloneke vilo, okuti espiritu sandu li kuatisavo vosi va yongola oku kuata elomboloko Liembimbiliya.

Ove o pondola oku tambula ndati espiritu sandu lia Suku? O sukila oku li pinga kokuaye lekolelo. Ocili okuti o sukila oku ci linga lolupili. Yesu hati: “Pingi kuenje cu wihiwi . . . Nda ene . . . wa kũlĩhi oku eca oviali viwa komãla vene, Isiene ukuailu hẽ, ka velipo oku avela espiritu sandu kuava vo pinga?” (Luka 11:​9, 13) Omo okuti Yehova ukuacali, eca espiritu sandu liaye komanu vosi va li pinga lekolelo. Olio li ku kuatisa oku kuata elomboloko liovina via sonehiwa Vembimbiliya kosimbu. Espiritu lia Suku, li ku ĩha olondunge vioku kapako olonumbi Viembimbiliya.​—⁠Va Heveru 4:12; Tiago 1:​5, 6.

Olonjanja viosi, eci ove o tumãla oku tanga Embimbiliya, pinga ku Suku espiritu sandu liaye, oco li ku kuatise oku kuata elomboloko Liondaka yaye.