3. Tava Oku Kuatisiwa la Vakuene

Ulume umue ukuakukonomuisa olofeka, o tukuiwa hati, Edward John Eyre, eci a pita vekalasoko lio Nullarbor, olonyitiwe viofeka via lekisa kokuaye ndomo a pondola oku sanga ovava veseke kuenda vitutu vioviti viokalipi. Omo lioku tava kekuatiso liomanu va kũlĩha ciwa ofeka, Eyre wa popela omuenyo waye.

ULANDU owu, u lekisa ciwa okuti, oco tu linge upange umue wa tĩla, tu sukila ekuatiso liomunu o kuete ukũlĩhĩso haeye wa loñolõha. Cimuamue haico ci pita love poku tanga Embimbiliya.

Yesu wa lekisa kolondonge viaye okuti, oco vi kuate elomboloko Liembimbiliya, vi sukila ekuatiso lia vakuavo. Onjanja yimue, “wa situlula ovitima viavo okuti va limbuka ovisonehua.” (Luka 24:​45) Yesu wa kũlĩhĩle okuti oco vakuakutanga Embimbiliya va kuate elomboloko Liovisonehua, va sukila oku kuatisiwa la vakuavo.

Ekuatiso li Tunda Kulie?

Yesu wa tuma olondonge viaye oku kuatisa vakuavo. Osimbu handi ka londele kilu, Yesu wa va handeleka hati: “Kuendi, ka tavisi olofeka viosi oco va linge olondonge . . . Va longisi oku linga ovina viosi ndo kundiki.” (Mateo 28:​19, 20) Vupange Wakristão vocili, mua kongela tete oku longisa, okuti oku lombolola ndomo tu pokola kolonumbi Viembimbiliya eteke leteke. Akristão vocili, va siata oku kuatisa vakuavo oku kuata elomboloko Liembimbiliya.

Noke lia Yesu oku eca ocikundi kolondonge viaye, kua pita ulandu umue u sanjuisa calua. Embimbiliya li popia hati, ulume umue kalei u Etiopia, wa kala oku tanga ocitumasuku ci sangiwa kelivulu lia Isaya. Onepa eye a kala oku tanga, ka yo lombolokele ciwa. Embimbiliya poku lekisa ulandu waco li popia ndoco: “Ndeci omeme ya tualiwa kepondelo, ndeci omõla omeme uhila vakuaku yi pemula, haico eye ka asamele. Omo embombe, wa pumba esunga. Elie o ci sapuila epata liaye? Momo omuenyo waye wopiwa kilu lieve.”​—⁠Ovilinga 8:​32, 33; Isaya 53:​7, 8.

Noke, kalei wa pulisa Filipu Ukristão umue wa kuata ukũlĩhĩso Wovisonehua hati: “Uprofeto wa ci tukuila elie? Eye muẽle ale, ele umue wiñi?” (Ovilinga 8:​34) Omo okuti, kalei u Etiopia wa endele ko Yerusalãi oku fendela, citava okuti wa kala oku pinga ekuatiso vohutililo. Citava okuti wa tanga lonjongole yalua kuenda lumbombe. Pole ka kuatele elomboloko liocinimbu a tanga. Omo liumbombe waye, wa pinga ekuatiso ku Filipu. Ovina Filipu a lomboluila ulume waco, vio vetiya oku linga Ukristão.​—⁠Ovilinga 8:​35-39.

Olombangi Via Yehova vi kasi oku amamako lupange Filipu Lakristão vakuavo va linga kocita catete. Koloneke vilo, Olombangi via Yehova vi kasi oku kuatisa vakuavo oku kuata elomboloko lieci Embimbiliya li longisa kueci ci pitãhala 235 kolofeka. Voku lilongisa Embimbiliya mua kongela oku konomuisa eci catiamẽla kondaka yimue.a​—⁠Tala vokakasia, “Atambululo Kapulilo Embimbiliya.”

“Apulilo Osi Nda Kuatele a Tambuluiwa”

Steven, Valvanera, kuenda Jo-Anne, vana tua tukula kocipama ca pita, va fetika oku lilongisa Embimbiliya Lolombangi Via Yehova. Steven wa popia hati: “Ca ndi komõhisa calua ndomo Ovisonehua via tambulula apulilo nda kuata. Osimbu sia fetikile oku lilongisa Embimbiliya Lolombangi Via Yehova, ka kua kaile umue wa ñuatisa oku sanga atambululo aco. Oku kũlĩha okuti poku lilongisa Embimbiliya ka ci sukila oku lihoyisa lolombangulo viaño, ca ndi lembeleka calua.”

Valvanera o tavavo kocisimĩlo caco. Eye wa popia ndoco: “Ovina nda lilongisa Lolombangi Via Yehova, via sunguluka kuenda viocili. Si kuete lika ekolelo liaco omo okuti vi longisiwa vetavo, pole nda ci kolela, momo ovina viaco via ndi lomboloka ciwa.’ Jo-Anne wa popia ndoco: “Omo okuti apulilo osi nda kuatele a tambuluiwa Lembimbiliya, cilo nda sumbila calua Usovoli walio. Eye tunde kosimbu, wa kũlĩhĩle okuti omanu va ka kuata apulilo alua, kuenje wa tuma oku sonehisa atambululo aco Vembimbiliya.”

Anga hẽ ove wa kũlĩha Ombangi yimue ya Yehova? Momo lie ku vanguila laye oco a ku lekise ndomo elilongiso Liembimbiliya lia siata oku lingiwa? Nda kua kũlĩhĩle oku ku sangiwa Olombangi Via Yehova, tu ku vetiya oku sonehela kolonumbi vi sangiwa kemẽla 2 vo revista yilo. Lekuatiso liespiritu sandu, lutima wa sunguluka kuenda ekuatiso liulongisi umue wa loñoloha, Embimbiliya ka li ka kala elivulu limue lia tĩla kokuove. Ove o pondola oku kuata muẽle elomboloko Liondaka ya Suku!

[Atosi pombuelo yamẽla]

Atambululo Kapulilo Embimbiliya

Apulilo a siata oku tambuluiwa Lolombangi Via Yehova poku lilongisa Embimbiliya:

• Cipi ocipango ca Suku catiamẽla koluali?

• Ava va fa va kasi pi?

• Anga hẽ tu kasi muẽle “koloneke via sulako?”

• Momo lie Suku a ecelela ohali?

• Ndamupi epata liange li kuata esanju?

[Elitalatu kemẽla 7]

EMBIMBILIYA

LI Longisa NYE?