Ocipama 3

Kakatela Kondaka ya Suku

1. (a) Ndamupi o Isareli yosimbu ya limbuka ocili Condaka ya Suku? (b) Momo lie ci kuetele esilivilo kokuetu?

“ENE vosi wa kulihi vovitima viene lovolonulo viene, okuti polondaka viosi viwa Yehova Suku yene o popeleli, layimue ya kambapo. Viosi muele vio suisiluipo.” (Yehosua 23:​14-16) Eci oco Yehosua a sapuila akulu voko Isareli noke yoku tumbikiwa Vofeka Yohuminyo. Ocili okuti, olohuminyo via Yehova viocili. Asapulo osi Embimbiliya a tatiwila omo lietu okuti tu ‘kuata elavoko.’​—⁠Va Roma 15:⁠4.

2. (a) Ndamupi Embimbiliya ‘liatumiwa la Suku?’ (b) Omo lioku kũlĩha okuti Embimbiliya lia tumiwa la Suku, ocikele cipi tu kuete?

² Ndaño okuti eci ci soka 40 komanu ovo va soneha Embimbiliya, Yehova eye muẽle Usovoli Wembimbiliya. Eci hẽ; ci lomboloka okuti eye wa endisa oku sonehiwa kuovina viosi vi kasimo? Oco. Eye wa ci linga omo liunene wespiritu sandu liaye. Upostolo Paulu wa popia hati: “Ovisonehua vi kola viosi ovitumasuku. . . okuti omunu wa Suku o loñoloha, haeye angiliyiwila ovopange osi awa.” Omanu kolonepa viosi va lalekiwa oku kapako Embimbiliya loku endisa omuenyo wavo ndomo mu litava levi vi kasimo.​—⁠2 Timoteo 3:​16, 17; 1 Va Tesalonike 2:⁠13.

Kuatisa Vakuene Oku Sola Embimbiliya

3. Onjila yipi yiwa yoku kuatisa ava ka va tava okuti Embimbiliya Ondaka ya Suku?

³ Valua tu sapela lavo ka va tava kueci tua kolela okuti Embimbiliya Ondaka ya Suku. Ndamupi tu pondola oku va kuatisa? Olonjanja vialua, onjila ya velapo yoku va kuatisa oku tuvula Embimbiliya loku va lekisa eci ci kasimo. “Ondaka ya Suku yi kasi lomuenyo haiyo yi kasi loku talavaya. . . haiyo ya tua enene, omoko ya tua nelembali yi sule. Haiyo yi limbuka ovisimilo lovipango viutima.” (Va Heveru 4:12) “Ondaka ya Suku” hesapulo limue ko ño, pole oyo yi kasi lomuenyo! Olohuminyo via Suku vi kasi loku amamako koku tẽlisiwa. Esapulo Liembimbiliya li kuete unene walua koku vetiya utima womunu okuti ondaka yimue tu pondola oku vangula yi sule.

4. Alomboluilo api ocili Cembimbiliya a siata oku pongolola ovituwa viomanu, kuenda momo lie?

⁴ Oku mõla onduko ya Suku Vembimbiliya komanu valua ca siata oku va vetiya calua. Vakuavo va nõlapo oku lilongisa Embimbiliya poku va lekisa eci ca sonehiwamo catiamẽla kocimãho comuenyo, esunga lieci Suku a ecelela evĩho, elomboloko liovina vi kasi loku pita voluali ale elavoko liomuenyo ko pui Vofeka Yelau. Kolofeka kuna okuti ovituwa vietavo via kapa omanu vehonguo lialua omo liaspiritu ãvi, elomboluilo Liembimbiliya liatiamẽla kovina vi ci koka kuenda ndomo ku sangiwa ekavuluko, lia siata oku vetiya ombili yomanu. Momo lie atosi ava a vetiyila onjongole ya vakuotima wa sunguluka? Momo Embimbiliya olio lika ono yolonumbi viosi vi koleliwa viatiamẽla kolondaka evi visilivila.​—⁠Osamo 119:130.

5. (a) Nda omunu o popia hati ka kolela Kembimbiliya, pamue momo lie? (b) Ndamupi tu pondola oku kuatisa omunu waco?

⁵ Oco hẽ, nye hẽ ci lingiwa nda omanu tu sapela lavo va popia hati ka va tava Kembimbiliya? Eci hẽ ci kuete oku sulisa ombangulo? Sio, nda eye o yongola oku ci konomuisa. Pamue ovo va tenda Embimbiliya ndelivulu limue Liakristão vesanda. Ovitumbulukila vakuambambe Akristão vesanda, kuenda vakuakulitenga vopulitika, loku amamako kuavo koku pinga olombongo, pamue va lombolola ocisimĩlo cavo ka ca sungulukile catiamẽla Kembimbiliya. Momo lie ku u pulila nda oco ocisimĩlo caye? Episo lisangiwa Vembimbiliya liovilinga viovoluali vi lingiwa Lakristão vesanda, kumue latosi a tepisa Akristão vesanda Lakristão vocili, ci tava okuti ci vetiya ombili yavo.​—⁠Mika 3:​11, 12; Mateo 15:​7-9; Tiago 4:⁠4.

6. (a) Nye ca ku vetiya oku kolela okuti Embimbiliya Ondaka ya Suku? (b) Akonomuiso api akuavo o pondola oku linga oco o kuatise omanu oku limbuka okuti Embimbiliya li tunda muẽle ku Suku?

⁶ Komanu vamue ombangulo yimue yocili yatiamẽla kovovangi a lekisa Embimbiliya ocitumasuku, pamue yi va kuatisa. Kokuove hẽ, uvangi upi u ku lekisa okuti Embimbiliya lia tumiwa la Yehova Suku? Nye Embimbiliya li popia catiamẽla koku fetikiwa kualio? Ocili okuti Embimbiliya li kuete ovitumasuku vialua vi lombolola ciwa ukũlĩhĩso woloneke viokovaso. Anga hẽ eci oco ci lekisa okuti omanu havoko ono yaco? (2 Petulu 1:​20, 21) Ale elitokeko li komohĩsa Liembimbiliya, ndaño okuti olio lia sonehiwa lomanu va soka 40 vokuenda kuotembo yi soka 1.600 kanyamo? Ale ocili calio catiamẽla kovoloño okuti ca litepa lalivulu akuavo a sonehiwa kotembo yaco? Anga hẽ ocili ca sonehi vaco? Ale oku tatiwa kualio ndaño lalikolisilo alua oku li nyõla? Eci ove wa sanga okuti ca ku komohĩsa oka pondolavo oku kuatisa laco vakuene.a

Oku Tanga Kuetu Embimbiliya

7, 8. (a) Nye tu kuete oku linga Lembimbiliya? (b) Oku tanga Embimbiliya pokolika ka citẽla, pole nye tu kuete oku linga vali? (c) Ndamupi ove wa kuata elomboloko liocipango ca Yehova?

⁷ Hakukuatisako lika vakuetu oku tava Kembimbiliya, pole etu muẽle tu sukila oku sanda otembo yoku li tanga eteke leteke. O kasi hẽ loku ci linga? Pokati kalivulu osi asonehiwa, Embimbiliya li kuete esilivilo lia velapo vali. Pole, eci ka ci lomboloka okuti nda tua li tanga ño ka tu sukila vali cimue. Ovisonehua vi tu lungula kueci catiamẽla koku likalila. Ka tu ka simi okuti tu pondola oku kũlĩha ovina viosi koku linga akonomuiso etu muẽle. Pole elilongiso liopokolika kuenda oku endaenda kolohongele ci kuete esilivilo lialua nda tu yongola oku kala Akristão vawa.​​—⁠ Olosapo 18:1; Va Heveru 10:​24, 25.

⁸ Embimbiliya li lombolola eci catiamẽla ku kesongo woko Etiopia wa kala loku tanga ocitumasuku ca Isaya. Ungelo wa songuila Filipu, ukundi Ukristão oco a pule ulume waco hati: “Eci o kasi loku tanga hẽ, ca ku lomboloka?” Lumbombe walua, ulume waco woko Etiopia wo kumbulula hati: “Ci ndomboloka ndati nda lomue o ndomboluila?” Wa pinga ku Filipu elomboluilo Liovisonehua. Filipu ka kale utangi umue Wembimbiliya okuti eca ovisimĩlo viaye viatiamẽla Kovisonehua. Eye wa kakatelele kocisoko ci letiwe ca Suku. Omo liaco, Filipu wa pondola oku kuatisa ulume woko Etiopia okupa esilivilo lielongiso Yehova a eca vonduko yocisoko eci. (Ovilinga 6:​5, 6; 8:​5, 26-​35) Cimuamue haico etaili, okuti lomue pokati ketu wa pitĩla kelomboloko liwa liocipango ca Yehova lika liaye. Vosi yetu tu sukila ekuatiso liocisola li tunda ku Yehova vonduko yocisoko caye ci letiwe.

9. Esokiyo lipi lioku tanga Embimbiliya lika tu kuatisa vosi yetu?

⁹ Ocisoko ca Yehova ca siata oku eca ovipama viwa valivulu alua oco tu kuatisiwe koku sanga elomboloko Liembimbiliya. Handi vali, kua tu angiliyiwila, esokiyo lioku tanga Embimbiliya kumue Losikola Yuviali wa Suku, kakongelo Olombangi via Yehova voluali luosi. Tu pondola okupa esilivilo lialua koku konomuisa Ovisonehua vi Kola. (Osamo 1:​1-3; 19:​7, 8) Linga elikolisilo limue lilikasi lioku tanga Embimbiliya eteke leteke. Ndaño okuti ovina haviosiko via ku lomboloka ciwa, oku tanga Ovisonehua ci kuete esilivilo lialua. Ndeci, nda okuti o tanga lika amẽla akuãla ale atãlo eteke leteke, kesulilo liunyamo oka malusula oku tanga Embimbiliya liosi.

10. (a) Otembo yipi ove wa sokiya yoku tanga Embimbiliya? (b) Helie vali o pondola oku kongelamo eci o tanga Embimbiliya? Oco hẽ momo lie ci kuetele esilivilo keteke leteke?

¹⁰ Otembo yipi oka tanga Embimbiliya? Nda okuti wa sokiya akukutu 10 ale 15 keteke leteke cika ku kuatisa calua. Ale sokiya apuluvi olonjanja viosi vosemana losemana noke kakatela kesokiyo liaco. Nda okuti ove u hueli, ove lukuanjo yove u pondola oku kuata esanju lioku tangela vakuene Embimbiliya lolukandi. Nda okuti ava u tangela omãla okuti va kasi vutunga woku tanga, ovo muẽle ci tava okuti va pitamo lokukandi. Oku tangiwa Kuembimbiliya te ku kuata esilivilo lialua ndokulia. Ndomo wa ci kũlĩha, nda okuti omunu kali ciwa kaka kuata uhayele. Cimuamue haico, omuenyo wetu kespiritu, kuenda omuenyo wetu ko pui, wa tiamisiwila koku litekula olonjanja viosi “Kondaka yosi yi tunda vomẽla wa Yehova NW”​—⁠Mateo 4:⁠4.

Ocimãho Cetu

11. Ocimãho cetu koku tanga Embimbiliya te ci kala ce?

¹¹ Koku tanga Embimbiliya ocimãho cetu te ci kala ce? Ocimãho cetu ka cika kale lika coku tanga amẽla alua ovipama. Ocimãho cetu te ci kala coku kũlĩha ciwa Suku. Omo liaco, tu pondola oku vokiya ocisola tu u kuetele loku u vumba ndomo mu taviwa. (Yoano 5:​39-42) Ocituwa cetu te ci kala ndeci cusonehi Wembimbiliya wa popia hati: “A Yehova, ndekise olonjila viove. Njimbe onumbi yalila ove.”​—⁠Osamo 25:⁠4.

12. (a) Momo lie ci kuetele esilivilo oku kuata “ukũlĩhĩso wa suapo”? Elikolisilo lipi omunu a kuete oku linga koku tanga oco a kuate ukũlĩhĩso? (b) Atosi api a kuãla okuti nda a kuamiwa a pondola oku tu kuatisa koku konomuisa eci tu kasi loku tanga Vembimbiliya? (Tala vokakasia kemẽla 30 ) (c) Linga ocindekaise catosi ava poku tambulula apulilo a kasi vocipama eci. Tala Ovisonehua via tukuiwa okuti ka via lomboluiwile.

¹² Koku tambula elongiso li tunda ku Yehova, onjongole yetu te yi kala yoku kuata “ukũlĩhĩso wa suapo.” Nda ka tu kuete ukũlĩhĩso wa suapo, tu pondola ndati oku kapako ciwa Ondaka ya Suku vomuenyo wetu, loku yi lomboluila ciwa vakuetu? (Va Kolosai 3:10; 2 Timoteo 2:15) Oco tu kuate ukũlĩhĩso wa suapo tu sukila oku tanga lutate walua. Kuenda, nda okuti onepa yimue ya tĩla calua pamue tu sukila oku yi tanga olonjanja vialua oco tu sange elomboloko liaco. Tu kopa esilivilo lialua nda tua sokiya otembo yoku sokolola lutate ocipama tua tanga, loku ci tiamisila kolonepa viñi viñi. Kemẽla 30 kuli olonepa vikuãla vioku konomuisa ciwa. Ovipama vialua Viovisonehua vi tava okuti vi konomuisiwa lesilivilo lialua nda tua kapako etosi limue ale atosi akuavo. Poku tambulula apulilo a kasi kamẽla a kuaĩmo, oka mõla ndomo ci lingiwa.

(1) Ocipama Covisonehua o kasi loku tanga ci pondola oku ku sapuila cimue catiamẽla kekalo lia Yehova. Ndeci Kosamo 139:​13, 14, tu lilongisilako unene wa Suku koku lekisa esakalalo kuava ka va ci tiwile handi: “Wa ndulika vimo lia mai. Hu sivayaila ocikomo como wa ndulika. Ovopange ove a komohisa. Ove wa kũlĩha pe utima wange.” Ovopange a Suku a komohĩsa calua! Oku tuwa kuomanu ku lekisa ocisola caye calua a tu kuetele.

Omo lieci ca popiwa kelivulu lia Yoano 14:​9, 10, eci tu tanga ndomo Yesu a tata vakuavo, tu limbuka ciwa ndomo Yehova nda a linga. Ovisimĩlo vie tu pondola catiamẽla ku Yehova kueci ca pita ko okuti ca sonehiwa kelivulu lia Luka 5:​12, 13 kuenda Luka 7:​11-15?

(2) Kũlĩhĩsa ndomo esapulo li kuatisa koku lomboluiwa kuosapi Yembimbiliya, okuti eteyuilo liomoko ya Yehova yoku viala kuenda oku kola kuonduko yaye vonduko Yusoma wa Yesu Kristu, okuti eye Ombuto ya likuminyiwa.

Osapi Yembimbiliya ya tukuiwa ndati la Esekiele kuenda la Daniele? (Esekiele 38:​21-23; Daniele. 2:44; 4:17; 7:​9-14)

Ndamupi Embimbiliya li situlula ciwa Yesu Ndombuto ya likuminyiwa? (Va Galatia 3:⁠16)

Ndamupi elivulu Liesituluilo li lombolola evokiyo linene liosapi Yusoma? (Esituluilo 11:15; 12:​7-10; 17:​16-18; 19:​11-16; 20:​1-3; 21:​1-5)

(3) Lipula ove muẽle ndomo o pondola oku kapako eci o kasi loku tanga. Ndeci tua tanga kelivulu Lietundilo kuenda Liesinumuĩlo, eci catiamẽla kovituwa vĩvi haivio viesino via va Isareli. Tua lilongisa okuti ovituwa viaco lovilinga viaco vĩvi via va nenela ohali. Omo liaco, etu tu kuete oku vetiyiwa oku sanjuisa Yehova, okuti ka tu setukula ongangu yĩvi ya va Isareli. “Ovina evi via va sanga ndelungulo, etu puãi, tu kasi kasukiyo oloneke, via tu sonehiwila oku tu longisa.”​—⁠1 Va Korindo 10:⁠11.

Esapulo liatiamẽla ku Kaini oku ponda Havele li kuete elungulo lie kokuetu? (Efetikilo 4:​3-12; Va Heveru 11:4; 1 Yoano 3:​10-15; 4:​20, 21)

Elungulo lipi Embimbiliya lieca Kakristão va kuete elavoko liokuenda kilu, okuti li tiamisiwilavo Kakristão va kuete elavoko liomuenyo ko pui palo posi? (Atendelo 15:16; Yoano 10:⁠16)

Ndaño okuti tu kuete ovikele vekongelo Liakristão, momo lie tu sukilila oku tenda ndomo tu kapako vali ciwa elungulo Liembimbiliya liovina tua kũlĩha ale? (2 Va Korindo 13:5; 1 Va Tesalonika 4:⁠1)

(4) Sokolola ndomo o pondola oku kapako eci o kasi loku tanga oco o kuatise vakuene. Omanu vosi vana okuti va ñualiwa lovitangi viuhayele tu pondola oku va tangela eci Yesu a linga oco o lekise eci aka linga vali vunene Wusoma voluali luosi ndeci: “Omanu va lua veya kokuaye. Va nena ovilema lava va lemehua, lolomeke, lovitende, la va lua vakuavo. . . yu wa va sakula.”​​—⁠Mateo 15:⁠30.

Helie o pondola oku kuatisiwa lesapulo liepinduko liomõla a Yairo? (Luka 8:​41, 42, 49-56)

13. Nye tu pondola oku lavoka poku kuata esokiyo limue lioku tanga Embimbiliya eteke leteke, loku lilongisa kumosi locisoko ca Yehova?

¹³ Eci tu kapako atosi akuãla a tukuiwa konano, oku tanga Embimbiliya ku nena esanju lialua! Ocili okuti, oku tanga Embimbiliya ocina cimue okuti ka ca lelukile. Pole, ku pondola oku tu kuatisa komuenyo wosi. Omo lioku tanga Ovisonehua tu pamisiwa vali kespiritu. Oku tanga Embimbiliya eteke leteke cika tuamisa ku Isietu ukuacisola, Yehova kuenda ku vamanjetu Akristão. Cika tu kuatisa oku kapako elungulo lioku “kakatela kondaka yomuenyo.”​—⁠Va Filipoi 2:⁠16.

[Atosi pombuelo yamẽla]

Apulilo Voku Pitulula

• Momo lie Embimbiliya lia sonehiwila okuti lia tatiwa toke koloneke vilo?

• Ndamupi tu pondola oku kuatisa vakuetu oku sola Embimbiliya?

• Momo lie oku tanga Embimbiliya pokolika eteke leteke ci kuetele esilivilo? Atosi api akuãla okuti nda a kuamiwa a pondola oku tu kuatisa koku konomuisa eci tu kasi loku tanga?

[Elitalatu kemẽla 30]

ECI O TANGA OCIPAMA CIMUE CEMBIMBILIYA, KŨLĨHĨSA

Eci ci ku sapuila eci catiamẽla kekalo lia Yehova

Ndomo ci litava losapi Yembimbiliya

Ndomo ci tiamisiwila komuenyo wove muẽle

Ndomo o pondola oku kuatisa laco vakuene