“Kali Vocisola Ca Suku”

“Kali vocisola ca Suku. Feleveli ohenda ya Ñala yetu Yesu Kristu yu neneli omuenyo ko pui.”​—⁠YUDA 21.

1, 2. Yehova wa siata oku lekisa ndati ocisola kokuetu? Tua kũlĩha ndati okuti, ka ecelela oku kala vocisola caye kovina viosi tu linga?

YEHOVA SUKU, wa siata oku lekisa ocisola kokuetu volonjila via litepa. Uvangi waco, tu u limbukila keliangiliyo a linga liocilumba cocisembi ca Yesu. Ocisola a kuetele omanu, co vetiya oku tuma palo posi Omõlaye wa soliwa, oco a tu file. (Yoa. 3:​16) Yehova wa linga eliangiliyo liaco, momo o yongola okuti, tu kuatisiwa locisola caye, oco tu kale otembo ka yi pui!

² Anga hẽ, ca sunguluka oku sima okuti, Yehova o tu ecelela oku kala vocisola caye, pole ka kapiko ovina tu linga? Sio, ka tu ecelela. Elivulu lia Yuda kocinimbu 21, tu tangako hati: “Kali vocisola ca Suku. Feleveli ohenda ya Ñala yetu Yesu Kristu yu neneli omuenyo ko pui.” Olondaka “kali vocisola ca Suku,” vi lomboloka okuti, tu sukila oku tẽlisa ocikele cimue. Nye tu sukila oku linga oco tu kale vocisola ca Suku?

Tu Pondola Ndati Oku Kala Vocisola ca Suku?

3. Ovina vipi Yesu a popia okuti, vio kuatisa oku kala vocisola ca Isiaye?

³ Etambululo kepulilo eli, li sangiwa volondaka Yesu a popia vuteke wa sulako womuenyo waye palo posi. Eye wa popia hati: “Nda vu pokola kovihandeleko viange, vu kala vocisola cange, ndeci ame nda pokola kovihandeleko via Tate, kuenje ñasi vocisola caye.” (Yoa. 15:​10) Yesu wa kũlĩhĩle okuti, wa sukilile oku pokola kolonumbi via Yehova Isiaye, oco a pamise ukamba wavo. Nda Omõla wa Suku wa sukilile oku linga ovina viaco, anga hẽ, ka tu sukilavo oku kuama ongangu yaye?

4, 5. (a) Nye tu sukila oku linga tete, oco tu lekise ocisola ku Yehova? (b) Momo lie ka tu kuetele esunga lioku suvuka ocisimĩlo coku pokola kovihandeleko via Yehova?

⁴ Catete, tu lekisa okuti, tu sole Yehova poku pokola kokuaye. Upostolo Yoano wa popia hati: “Okusola Suku [ci] lomboloka oku pokola kovihandeleko viaye. Ovihandeleko viaye ka vi lemi.” (1 Yoa. 5:⁠3) Koloneke vilo, omanu vamue ka va yongola oku lekisa epokolo. Tu kũlĩhĩsi olondaka viokuti: “Ovihandeleko viaye ka vi lemi.” Yehova ka tu kisika ovina ka tu tẽla oku linga.

⁵ Kũlĩhĩsa ndoco: Nda o kuete ekamba limue o sole, anga hẽ, u kisika oku ambata ocitele cimue wa kũlĩha okuti, ci lema calua? Sio, ku ci lingi! Ohenda ya Yehova ka yi sokisiwa leyi yetu. Momo wa kũlĩha ciwa ekalo lietu. Embimbiliya li tu sapuila okuti, Yehova ‘ivaluka okuti, tu neketela.’ (Osa. 103:​14) Eye ka tu kisika oku linga cimue ka tu tẽla. Omo liaco, ka tu kuete esunga lioku suvuka ocisimĩlo coku pokola kovihandeleko via Yehova. Momo, epokolo liaco, li tu ĩha epuluvi lioku lekisa ocisola ku Isietu wokilu, una tu sole calua, kuenda tu yongola oku kala vocisola caye.

Ombanjaile Yimue Yavelapo ya Tunda ku Yehova

6, 7. (a) Owanji wo vutima u lomboloka nye? (b) Lombolola ndomo owanji wo vutima u tu kuatisa oku kala vocisola ca Suku.

⁶ Omo okuti, tu kasi voluali lueyuka ovitangi, tu sukila oku pokola ku Suku, kovina viosi tu linga. Tu pondola ndati oku limbuka nda ovina tu yongola oku linga, vi likuata locipango ca Suku? Yehova wa tu ĩha ombanjaile yimue yi tu kuatisa oku pokola. Ombanjaile yaco, owanji wutima wetu. Owanji wutima u lomboloka nye? U lomboloka uloño tu kuete woku linga ovina. Owo u pondola oku tu pisa, kuenda u tu kuatisa oku kũlĩhĩsa onjila tu yongola oku kuama. U tu kuatisavo oku kũlĩha ovilinga vietu loku limbuka eci ciwa leci cĩvi, eci ca sunguluka, kuenda eci ka ca sungulukile.​—⁠Tanga Va Roma 2:​14, 15.

⁷ Owanji wutima wetu u tu kuatisa oku linga nye? Tu konomuisi ulandu umue ndeci: Omunu umue o kasi oku linga ungende vekalasoko ka likuete onjila, ndaño etapalo, ale olondimbukiso vi pondola oku u songuila. Pole, amamako oku linga ungende waye. Oci linga ndati? Eye o kuete omakina yimue yi tukuiwa hati, ombusula. Omakina yaco, yi kuete olondimbukiso vi lekisa avindi akuãla oluali kuenda ondimbukiso yikuavo yi lekisa konele yutundilo. Nda ka kuete omakina yaco, o nyelela. Cimuamue haico catiamẽla komanu. Nda ka va kuatele owanji wo vutima, nda va nyelela poku seteka oku nõla onjila va yongola oku kuama.

8, 9. (a) Ovina vipi viatiamẽla kowanji wutima wetu tu sukila oku kapako? (b) Nye tu sukila oku linga, oco tu limbuke nda utima wetu u kasi oku tu kuatisa oku linga ovina via sunguluka?

⁸ Omo okuti, ombusula ka ya lipuile, owanji wetu wo vutima ka wa lipuilevo. Nda omunu o linga ungende wa kapa o yimani ponele yombusula, o yimani yaco yi tiamisila ondimbukiso yombusula konẽle yikuavo, kuenje omunu o nyelela. Cimuamue haico catiamẽla kokuetu. Nye ci pita letu nda tua pitisa kovaso olonjongole viutima wetu? Olonjongole vietu, vi pondola oku yapula utima wetu. Embimbiliya li tu lungula hati, “utima wa piãla kelimbi haiwo wa hongua enene.” (Yer. 17:9; Olosap. 4:​23) Nda omunu o linga ungende ka kuatele omapa yu songuila, ombusula yaye ka yi pondola oku u kuatisa. Cimuamue haico catiamẽla kokuetu. Nda ka tua kolelele kolonumbi Viondaka ya Suku vi sangiwa Vembimbiliya, owanji wetu wo vutima ka u tu kuatisa. (Osa. 119:105) Koloneke vilo, omanu valua, va siata lika oku pitisa kovaso olonjongole viutima wavo, kuenda ka va pokola kolonumbi Viondaka ya Suku. (Tanga Va Efeso 4:​17-19.) Eli olio esunga lieci omanu valua va siatela oku linga ovina vĩvi, ndaño va kuete owanji wo vutima.​—⁠1 Timoteo 4:⁠2.

⁹ Tu sukila oku likolisilako oku yuvula ovituwa viaco! Pole, tuamamiko oku longisiwa Londaka ya Suku okuti, yi pindisa utima wetu, oco yi tu kuatise kovina viosi tu linga. Tu kuami owanji wutima wetu wa pindisiwa Lembimbiliya, kuenda, tu yuvuli oku yapuisiwa lolonjongole vĩvi vietimba. Tu sukilavo oku likolisilako oku sumbila ovisimĩlo via vamanjetu kespiritu. Tu likolisilako oku yuvula oku va kapela ocilondokua, loku ivaluka okuti, vamue pokati kavo ovitima viavo via leñela calua, okuti vietu ci sule.​—⁠1 Va Kor. 8:12; 2 Va Kor. 4:2; 1 Pet. 3:⁠16.

10. Olonepa vipi vitatu viomuenyo tu konomuisa cilo?

¹⁰ Tu konomuisi olonepa vitatu viomuenyo, tu pondola oku lekisa ocisola ku Yehova poku lekisa epokolo. Volonepa viaco vitatu, mua kongeliwa owanji wutima wetu. Pole, oco u tu songuile ciwa, tu sukila oku u pindisa lolonumbi Viembimbiliya. Olonepa viaco vitatu tu sukila oku pokola ku Yehova vievi: (1) Oku sola omanu vana Yehova a sole. (2) Oku lekisa esumbilo komanu vana va kuete omoko yoku tu songuila. (3) Oku likolisilako oku liyelisa kovaso a Suku.

Sola Vana Yehova a Sole

11. Momo lie tu sukilila oku sola vana Yehova a sole?

¹¹ Catete, tu sukila oku sola vana Yehova a sole. Catiamẽla koku kuata akamba, etu tumanu tua tuwa ndosiponja. Ndeci osiponja yi nyua ovava a kasi apa ya kapiwa, haico etu tumanu tua tuwa. Tu sole calua oku setukula ovituwa viomanu vana tu kasi lavo. Ululiki wetu, wa kũlĩha ndomo omanu ka va lipuile va siata oku yapuisiwa lakamba, kuenda ndomo va pondola oku kuatisiwa lavo. Omo liaco, o tu ĩha elungulo li popia hati: “U endaenda la vakualondunge o lingavo ukualondunge, u puãi endaenda laveke o yambuiwa.” (Olosap. 13:20; 1 Va Kor. 15:​33) Lomue pokati ketu o yongola oku kala ‘eveke.’ Pole, vosi yetu tu yongola oku linga “vakualondunge.” Omo okuti, Yehova o kuete olondunge via velapo, ka ya puisiwa lomunu. Pole, wa tu ĩha ongangu yiwa yatiamẽla koku nõla akamba. Sokolola ndoco: Omanu vapi Yehova a nõla oco va linge akamba vaye?

12. Akamba vapi Yehova a siata oku nõla?

¹² Yehova wa tukuile Avirahama hati, ‘ekamba liaye.’ (Isa. 41:⁠8) Avirahama wa sia ongangu yiwa yoku lekisa ekolelo, esunga, kuenda epokolo ku Suku. (Tia. 2:​21-​23) Yehova o yongola okuti, akamba vaye va lekisa ovituwa viaco. Koloneke vilo, wa siata oku nõla akamba va kuete ovituwa ndevi via Avirahama. Omo okuti Yehova wa siata oku nõla akamba vawa, tu sukilavo oku nõla akamba vawa. Tu ci linga poku endaenda la vakualondunge, oco tu lingevo vakualondunge.

13. Nye ci pondola oku tu kuatisa oku nõla akamba vawa?

¹³ Nye ci pondola oku ku kuatisa oku nõla akamba vawa? Oku lilongisa ovolandu Embimbiliya, ci pondola oku ku kuatisa. Tu kũlĩhĩsi ukamba wa kala pokati kafendeli vamue va Suku ndeci: Ruti la ndatembo yaye Naomi, Daviti la Yonatão, kuenda Timoteo la Paulu. (Ruti 1:​16, 17; 1 Sam. 23:​16-18; Va Fil. 2:​19-​22) Ovo va kala akamba vocili, momo, vosi yavo va kuatele ocisola la Yehova. Ove hẽ, o pondola oku kuata akamba vana va sole Yehova ndeci wa siata oku ci linga? Ivaluka okuti, vekongelo Liakristão vocili, mueyuka akamba valua va sole Yehova. Ovo, ka va ku vetiya oku linga cimue ci sumuiwa Yehova. Pole, va ku kuatisa oku pokola ku Yehova loku pamisa ukamba wove laye, kuenda oku kũlĩla espiritu. (Tanga Va Galatia 6:​7, 8.) Ovo vaka ku kuatisa oku amamako oku kala vocisola ca Suku.

Tu Sumbili Vana va Kuete Omoko Yoku tu Songuila

14. Nye ca siata oku tu tateka oku lekisa esumbilo ku vana va kuete omoko yoku tu songuila?

¹⁴ Vonepa yavali yoku lekisa ocisola ku Yehova, mua kongela oku pokola komanu vana Yehova a ĩha omoko yoku tu songuila. Tu sukila oku va sumbila. Momo lie ka ca lelukilile oku ci linga koloneke vilo? Momo omanu vana va kuete omoko yoku tu songuila, ka va lipuile. Kuenda, etu ka tua lipuilevo. Tua siata oku liyaka locituwa cesino tua citiwa laco.

15, 16. (a) Momo lie tu sukilila oku sumbila vana Yehova a nõla oco va songuile afendeli vaye? (b) Ulandu wa va Isareli ndomo Yehova a va tendele omo lioku lekisa esino ku Mose u tu longisa nye?

¹⁵ Ove pamue o lipula ndoco: ‘Nda ka ca lelukile oku pokola ku vana va kuete omoko yoku tu songuila, momo lie tu sukilila oku ci linga?’ Vetambululo liaco, mua kongela ocitangi catiamẽla kuviali wa Suku. Helie o sukila oku nõla okuti eye o kala ombiali yove? Nda tua nõla Yehova okuti, eye o tu Viala, tu sukila oku sumbila uviali waye. Nda ka tua ci lingile, anga hẽ, tu pondola oku popia hati, Yehova eye Ombiali yetu? Yehova wa siata oku lekisa uviali waye vonduko yomanu ka va lipuile, vana a nõla, oco va songuile afendeli vaye. Nda tua lekisa esino kokuavo, Yehova o tenda ndati ovilinga vietu?​—⁠Tanga 1 Va Tesalonike 5:​12, 13.

¹⁶ Eci va Isareli va lisiõsiõla loku lekisa esino ku Mose, Yehova wa tendele esino liavo ndu okuti, lia lekisiwa kokuaye. (Ate. 14:​26, 27) Suku ka pongolokele. Nda ka tua lekisile esumbilo komanu vana va kuete ocikele coku tu songuila, tu lekisa esino ku Yehova!

17. Ocituwa cipi tu sukila oku lekisa ku vamanji va kuete ocikele coku songuila ekongelo?

¹⁷ Upostolo Paulu, wa lekisa ocituwa ca sunguluka ku vamanji va kuata ocikele coku songuila ekongelo. Eye wa soneha hati: “Pokoli kasongui vene loku linga eci va tuma, momo va kasi loku lavulula ovimuenyo viene ndava va lombolola noke ndomo va vi tata. Pokoli kokuavo okuti va ci linga lesanju, haloku lisiõsiõlako, momo nda va ci linga loku lisiõsiõla nda ka cu kuatisi.” (Va Heveru 13:​17) Oco tu lekise epokolo loku linga ovina viosi va tuma, tu sukila oku likolisilako. Ivaluka okuti, tu yongola oku amamako oku kala vocisola ca Suku. Anga hẽ, ka tu sukila oku likolisilako oku cilinga?

Tu Amamiko Oku Liyelisa Kovaso a Yehova

18. Momo lie Yehova a yonguila okuti, tu liyelisa?

¹⁸ Onepa yatatu yoku lekisa ocisola cetu ku Yehova, oku likolisilako oku liyelisa kovaso aye. Olonjali, via siata oku likolisilako oku yelisa omãla vavo. Momo lie? Momo, oku yelisa omãla, ci kuatisa oku kuata uhayele kuenda ekalo liwa. Nda omãla va yela, ceca epandiyo vepata, kuenda kolonjali. Yehova o yongolavo okuti, tu liyelisa. Eye wa kũlĩha okuti, oku liyelisa ku kuete esilivilo kokuetu. Handi vali, wa kũlĩha okuti oku liyelisa kuetu ku situlula ekalo liaye, momo eye Isietu wo kilu. Nda tua ci linga, ci vetiya vakuetu oku fendela Suku, poku limbuka ndomo tua litepa lomanu va vĩha voluali lulo.

19. Tua kũlĩha ndati okuti, oku liyelisa ketimba ku kuete esilivilo?

¹⁹ Kovina vipi tu sukila oku amamako oku liyelisa? Tu sukila oku liyelisa kovina viosi. Kosimbu, Yehova wa sapuilile afendeli vaye va Isareli hati, oku liyelisa ketimba ci kuete esilivilo. (Ovis. 15:​31) Vocihandeleko Suku a ecele ku Mose, mua kongelele ovina vimue ndeci: Oku kuata eyala lioku pesila ovinene, oku yelisa ovikuata, oku sukula povaka, kolomãhi, kuenda oku yelisa uwalo. (Etu. 30:​17-21; Ovis. 11:32; Ate. 19:​17-20; Esin. 23:​13, 14) Mose wa sapulilile va Isareli hati, Yehova Suku yavo, “wa yela,” “wa lipua,” kuenda “o kola.” Omo liaco, afendeli va Suku una o kola, va sukilavo oku liyelisa kovina viosi.​—⁠Tanga Ovisila 11:​44, 45.

20. Kovina vipi tu sukila oku liyelisa?

²⁰ Tu sukila oku liyelisa vutima kuenda ketimba. Tu sukilavo oku likolisilako oku kuata ovisimĩlo via sunguluka. Tu pokola kolonumbi via Yehova viatiamẽla koku liyelisa kovituwa, kuenda kevĩho liukahonga lia siata voluali lulo. Oku yelisa efendelo lietu okuti, ka li vĩhĩsiwa lovituwa viatavo esanda, ci kuete esilivilo lia velapo. Tu sukila oku kapako elungulo li sangiwa kelivulu lia Isaya 52:​11, li popia hati: “Tundi, tundi, tundi mulo, ko ka lambi cimue ca vĩha. Tundi vokati kayo. . . . Liyelisi.” Koloneke vilo, tu liyelisa lika kespiritu poku yuvula ovina viosi Isietu wokilu a tenda okuti via vĩha kefendelo liaye. Eli olio esunga lieci tu sukilila oku yuvula ovipito viatavo esanda, kuenda vikuavo via siata voluali lulo. Ndaño ka ca lelukile oku amamako oku liyelisa, pole, afendeli va Yehova va siata oku likolisilako oku liyelisa. Poku ci linga, ci va kuatisa oku amamako oku kala vocisola ca Suku.

21. Tu limbuka ndati okuti, tu kasi vocisola ca Suku?

²¹ Yehova o yongola okuti, tu kala vocisola caye otembo ka yi pui. Pole, vosi yetu tu sukila oku likolisilako oku kala vocisola ca Suku. Tu ci linga lika, nda tua kuama ongangu ya Yesu, loku pokola kolonumbi via Yehova. Nda tua pokola, tu limbuka okuti, “lacimue ci tẽla oku tu tepa kocisola ca Suku ci kasi vu Kristu Yesu, Ñala yetu.”​—⁠Va Rom. 8:​38, 39.

Ivaluka Eci Tua Lilongisa?

• Owanji wutima wetu u tu kuatisa ndati oku kala vocisola ca Suku?

• Momo lie tu sukilila oku sola vana Yehova a sole?

• Momo lie ci kuetele esilivilo oku pokola ku vana va kuete omoko yoku tu songuila?

• Momo lie oku liyelisa ku kuetele esilivilo kafendeli va Suku?

[Okakasia Lelitalatu kemẽla 18]

Elivulu Limue Li Vetiya Oku Lekisa Ovituwa Viwa

Kohongele yofeka ya lingiwa kunyamo wo 2008, toke wo 2009, kua sandekiwa elivulu li kuete 224 kamẽla losapi hati: “Kali Vocisola ca Suku.” Lia sandekiwa locimãho cipi? Lia sandekiwila oku kuatisa Akristão oco va kũlĩhe Yehova, loku lekisa ocisola kokuaye, kuenda oku pokola kolonumbi viaye. Elivulu eli, li pamisa ekolelo Liakristão oco vamameko lovituwa viwa. Nda tua lilongisa lutate elivulu liaco, tu limbuka okuti, oku pokola kolonumbi via Yehova, ci kuete esilivo, kuenda li tu kuatisa oku ambata omuenyo wa sunguluka, lelavoko lioku kuata omuenyo ko pui.

Lia sandekiwilavo oku tu kuatisa oco tu limbuke okuti, ca leluka oku pokola ku Yehova. Momo, oyo onjila yoku lekisa ocisola cetu kokuaye. Elivulu eli, li tu vetiya oku li pula ndoco: ‘Momo lie ndi sukilila oku pokola ku Yehova?’

Vamanji vamue, ka va siatele oku yapuka vocisoko ca Yehova omo liekambo lielomboloko liolonumbi vimue Viembimbiliya. Pole, va siata oku yapuka omo lioku ambata omuenyo wa vĩha. Omo liaco, tu sukila oku pamisa ocisola cetu ku Yehova, loku pokola kolonumbi viaye, kuenda oku ecelela okuti, vi tu songuila kovina viosi tu linga! Tua kolela okuti, elivulu eli liokaliye, lika kuatisa afendeli va Yehova voluali luosi oku linga ovina via sunguluka, oco tuamameko oku kala vocisola ca Suku!​—⁠Yuda 21.

[Elitalatu kemẽla 18]

“Nda vu pokola kovihandeleko viange, vu kala vocisola cange, ndeci ame nda pokola kovihandeleko via Tate, kuenje ñasi vocisola caye”