‘Yehova wa Tuila Ocipala Caye Kokuavo’
KOCIPALA comunu, kuli eci ci pitahãla 30 kasipa. Poku yola, tu sukila lika 14 kasipa a naluhĩla kumosi! Nda omunu ka kuatele asipa aco, nda ka pondola oku sapela la vakuavo. Anga hẽ, ovina viaco ka vi komohĩsa? Vi komohĩsa calua. Asipa a kasi kocipala, a siata oku kuatisa ovisitatũi oku sapela la vakuavo, kuenda oku linga olondimbukiso vi kuete elomboloko. Omanu valua va siata oku komõha poku limbuka ndomo elimi lioku ilaika li pondola oku eca elomboloko liovina via tatama.
Koloneke vilo, ovisitatũi voluali luosi, via siata oku sanjuka calua okuti, omanu vakuavo ci sule. Vupopi wocindekaise, ovo va siata oku mola ‘ovaso a Yehova.’ (Asiõ. 2:19) Oku mola kuaco ovaso a Yehova, ku kuete esilivilo liocili. Momo Yehova wa siata oku lekisa ocisola kovisitatũi tunde kosimbu. Cimuamue haico a linga kepata lia va Isareli kosimbu. (Ovis. 19:14) Koloneke vilo, Suku wa siatavo oku lekisa ocisola kovisitatũi, momo, ‘o yongola okuti, omanu vosi va kuata ukũlĩhĩso wocili oco va popeliwe.’ (1 Tim. 2:4) Ovisitatũi via siata oku mola ovaso a Yehova, poku kuata ukũlĩhĩso wocili watiamẽla Kokuaye. Va siata oku kuata ndati elomboloko liaco, nda ka va pondola oku yeva ovina vi popiwa? Osimbu ka tua ecele etambululo kepulilo eli, tu konomuisi esunga lieci elimi lioku ilaika li kuetele esilivilo kovisitatũi.
Ovisitatũi vi Lilongisila Kovina va Lete
Omanu va kuete ovisimĩlo via litepa viatiamẽla kovisitatũi kuenda kelimi lioku ilaika. Tu konomuisi ovina vimue vi tu kuatisa oku kuata elomboloko liaco. Ovisitatũi vi pondola oku endisa ekãlu. Pole, ka ca lelukile kokuavo oku kuata elomboloko liovina omanu va siata oku vangula. Voluali muli alimi oku ilaika a litepa. Elimi liovisitatũi, li kuete elomboloko lia litepa leli liovisitatũi vi kasi kolonepa vikuavo viofeka.
Anga hẽ, ovisitatũi vi pondola oku tanga? Ndaño vamue pokati kavo va tẽla oku tanga, pole, vakuavo ka va pondola oku ci linga. Momo lie? Momo vana va tẽla oku tanga, ovo lika va pondola oku kuata elomboloko liovina via sonehiwa vopapelo. Tu konomuisi ndomo omõla wa loñoloha koku yevelela, a pondola oku lilongisa elimi limue. Noke yoku citiwa, o kala lomanu va vangula elimi liofeka. Vokuenda kuotembo, o tẽla oku kongela olondaka vimue, kuenda o fetika oku vangula. Eye o ci linga, poku yevelela elimi omanu va vangula. Eci omõla a fetika oku tanga, o limbuka okuti, o tẽla oku tokeka ololetala via sonehiwa vopapelo kuenda olondaka a kũlĩha.
Sokolola ndeci okuti, o kasi vofeka yikuavo. Noke, wa iñila vohondo yimue ya tungiwa lovindalasa okuti, ka mu iñila ocileñi. Kua kũlĩhĩle elimi omanu va vangula. Oloneke viosi, omanu veya kokuove kuenda va seteka oku vangula love vovindalasa. Pole, ku pondola oku yevelela ovina va kasi oku popia. O limbuka lika oku li senga senga kuovimẽla viavo. Eci va limbuka okuti, ovina va popia ka via ku lombolokele, va soneha olondaka viaco vopapelo, noke, va ku vi lekisila vovindalasa. Kuenje, va sima okuti, o pondola oku kuata elomboloko liaco. Nye o sima okuti, oco o sukila oku linga? Ocili okuti, ku kuata elomboloko liaco. Momo lie? Momo ovina viaco, via sonehiwa velimi limue kua kũlĩhĩle. Ovisitatũi via siata oku liyaka lovitangi viaco.
Elimi lioku ilaika, olio lia siata oku kuatisa ovisitatũi oku sapela. Omunu o kuama elimi lioku ilaika oco a limbuke ovina vi kasi ponele yaye. Ovisitatũi poku nyanyomõla ovaka, lovoko, kuenda oku li senga senga kuetimba liavo, vi kuama olonumbi vielimi lioku ilaika. Nda va ci linga, ci va kuatisa oku kuata elomboloko liovina va lete.
Olondimbukiso viosi ocisitatũi a linga lovaka, letimba, kuenda locipala, vi kuete esilivilo kokuaye. Ka va lingi olondimbukiso locipala oco va komõhise vakuavo. Olondimbukiso viaco, vi kuete esilivilo kelimi lioku ilaika. Tu kũlĩhĩsi ocindekaise cimue ndoco: Oku linga epulilo lovisokopia, ci lekisa okuti, ka tu sukila etambululo. Nda wa petamisa ovisokopia, ci lekisa okuti o kasi oku linga apulilo amue ndeci: Helie? Nye? Pi? Otembo yipi? Momo lie? Ale ndamupi? Olondimbukiso ovisitatũi vi linga lomẽla, vi lekisa okuti, va sukila ovina vimue. Citava okuti, omunu ocisitatũi o kumoha kutue, o memena, o tumula kapepe, kuenda o pakula iso liaye. Ovina evi, vi kuete elomboloko limue.
Ovina evi, vi kuatisa omanu oku kuata elomboloko lieci ovisitatũi vi kasi oku popia. Ovisitatũi vi kuete ukũlĩhĩso wolondimbukiso vioku ilaika, vi pondola oku pitiya olondaka vioku tondongola, vulandu umue wuloño. Vi pondolavo oku pitiya upopi wocisola vovinjembe, kuenda oku lombolola ovina vi letiwe levi ka vi letiwe.
Alivulu Kelimi Lioku Ilaika a Kuete Esilivilo Liocili
Nda ukũlĩhĩso Wembimbiliya u pitiyiwa velimi lioku ilaika, ovisitatũi vi pondola oku yeva ovina tu va kundila, kuenda vi lekisa ‘ekolelo’ ku Yehova wa tuma esapulo liaco. Omo liaco, Olombangi Via Yehova, via siata oku kundila ovisitatũi vi sangiwa voluali luosi kuenda oku pongiya alivulu a pondola oku va kuatisa. (Va Rom. 10:14) Toke cilo, voluali luosi muli eci ci soka 58 kovimunga via vamanji va pongolola alivulu kelimi lioku ilaika. Alivulu aco, a siata oku sandekiwavo Vovideo kueci ci soka 40 kalimi oku ilaika. Anga hẽ, elikolisilo lia vamanji lioku panga alivulu aco, lia siata oku kuatisa ovisitatũi voluali luosi?
Jeremy okuti, olonjali viaye ovisitatũi wa popia hati: “Isia yange wa enda oku kala olowola vialua vohondo loku lilongisa ovinimbu vimue viocipama Cutala Wondavululi, oco a kuate elomboloko liaco. Eci a tunda vohondo, o linga ondimbukiso yi lomboloka hati: ‘Ndi kuete elomboloko liovina nda lilongisa!’ Noke o ndi lomboluila ovina viaco. Otembo yaco, nda kuata lika 12 kanyamo. Nda tanga ocinimbu cimue, kuenda nda linga ondimbukiso yi lomboloka hati: ‘A Isia yange, si kuete elomboloko liovina nda tanga. . . . ’ Omo liaco, Isia wa linga ondimbukiso oco sika vangule vali. Kuenje, wa iñila vohondo yaye oco a konomuise lutate ocinimbu caco. Olonjanja viosi ndivaluka esumuo a kuata, kuenda ndivalukavo ndomo nda komõha, eci nda limbuka okuti, isia wa tiukila vohondo yaye. Omo okuti, alivulu elimi lioku ilaika a sandekiwa Vovideo, a siata oku u kuatisa oku kuata elomboloko liovina vi sangiwa valivulu aco. Kefetikilo sia limbukile ocisola Isiange a kuatele ku Yehova. Pole, noke nda limbuka esanju a kuata eci a lombolola ovina viatiamẽla Kokuaye.”
Tu konomuisi ulandu wolohueli vimue okuti, Olombangi Via Yehova. Ovo va kundila ufeko umue ocisitatũi o tukuiwa hati, Jessenia, kofeka yo Chile. Noke yoku pinga ku ina ya Jessenia oco vo lekise elivulu losapi hati, Elivulu Liasapulo Embimbiliya lia sandekiwa Vovideo Kelimi lioku Ilaika li vanguiwa ko Chile, va lombolola hati: “Eci Jessenia a tala ulandu waco, wa yola calua, noke wa fetika oku lila. Eci ina yaye a pula esunga lieci omõlaye a kala oku lilila, vamanji va popia hati, ovina a kala oku tala ovio vio vetiya oku lila. Omo liaco, ina yaye, wa limbuka okuti, omõla o pondola oku kuata elomboloko liovina viosi via lekisiwa Vovideo.”
Ukãi umue ocisitatũi o kasi vocikanjo cimue kofeka yo Venezuela, o kuete omõla umosi, wa mina onjanja yavali. Omo liuhukũi, eye kumue lulume waye, va yonguile oku pulumula oñaña yaco. Osimbu ka va tẽlisile onjongole yaco, va nyuliwa Lolombangi Via Yehova, kuenje, via va lekisa ocipama 12 vombrochura Suku Oyongola Nye Kokuetu?, ya sandekiwa vo Video Kelimi lioku Ilaika li vanguiwa ko Venezuela. Ocipama caco, ci lombolola ndomo Suku a tenda oku pulumula kuenda oku ponda omunu. Noke, ukãi waco wa sapuila vamanji hati, wa sanjuka calua omo lioku lilongisa ocipama caco. Kuenje, ukãi waco wa popia okuti, omo liovina a lilongisa, ka va tẽlisile onjongole yavo yoku pulumula. Oñaña yaco, ya puluka kolofa omo liekuatiso lielivulu lia sandekiwa Vovideo kelimi lioku ilaika!
Manji umue ocisitatũi o tukuiwa hati, Lorraine, wa lombolola hati: “Oku lilongisa Embimbiliya ku sokisiwa loku kongela ovina vimue okuti, ka calelukile oku vi kapa pamosi. Ka ca lelukile oku kuata elomboloko liovina nda siata oku tanga. Nda fetika lika oku kuata elomboloko Liembimbiliya, noke yoku sandekiwa kualivulu amue velimi lioku ilaika.” Manji umue ocisitatũi o tukuiwa hati, George okuti, tunde eci a linga Ombangi ya Yehova, papita ale 38 kanyamo, wa popia hati: “Uloño woku kuata elomboloko liovina, u kuatisa oku li sumbila ove muẽle, kuenda oku li kolela. Nda limbuka okuti, alivulu a sandekiwa Volovideo kelimi lioku ilaika, a ndi kuatisa oku kula kespiritu.”
“Va Linga Ohongele Kelimi Liange!”
Ndaño Olombangi Via Yehova via siata oku sandeka alivulu kelimi lioku ilaika, pole, via sokiyavo akongelo kelimi liaco. Toke cilo voluali luosi, muli eci ci pitahãla 1.100 kakongelo kelimi lioku ilaika. Vamanji va siata oku sapela lovisitatũi kelimi liavo, kuenda va siata oku va longisa Embimbiliya lonjila yimue okuti, va kuata elomboloko. Vamanji va siata oku va longisa lonjila yimue yi lekisa esumbilo kokuavo kuenda oku kapako ekalo liomuenyo wavo.
Anga hẽ, akongelo a sokiyiwa kelimi lioku ilaika, a kuete esilivilo? Tu konomuisi ulandu wa manji Cyril, wa papatisiwa kunyamo wo 1955. Vokuenda kuanyamo alua, wa enda oku lilongisa alivulu a sandekiwa lukuenje wa lunguka, kuenda wa kuata ocituwa coku endaenda kolohongele. Olonjanja vimue, kolohongele kua enda oku kala vamanji vo lomboluila ovipama kelimi lioku ilaika. Pole, olonjanja vikuavo ka va endele oku ci linga. Oco a kuate elomboloko liovipama vi lingiwa kohongele, manji umue wa enda oku soneha atosi amue vopapelo loku a lekisa. Eye wamamako vekongelo liaco toke kunyamo wo 1989, eci a tẽlisa 34 kanyamo tunde eci a papatisiwa. Kunyamo waco, volupale luo Nova Yorke, kofeka yo Estados Unidos, mua sokiyiwa ekongelo liatete kelimi lioku ilaika. Nye manji Cyril a yeva vutima eci kua sokiyiwa ekongelo liaco? Eye wa popia hati: “Nda kala ndomunu wa tunda kututa umue vusenge, kuenda esokiyo liaco, lia kala ndocinyi ca tuila vowelema!”
Vakongelo Olombangi Via Yehova kelimi lioku ilaika, omo ovisitatũi vi pondola oku lilongisa catiamẽla ku Suku kuenda oku u fendela. Vakongelo vaco, omo afendeli va Yehova va pondola oku kuata ukamba, kuenda oku li pamisa pokati. Ovisitatũi vi pondola oku sapela la vakuavo, kuenda oku kuata ukamba la vamanji vakuavo vakongelo vaco. Va pondolavo oku lilongisa catiamẽla ku Yehova, oku kula kespiritu, kuenda oku amamako lupange wavo. Valua pokati kavo, va siata oku litumbika kupange wakundi votembo yosi. Vamue, va siata oku ilukila kolofeka vikuavo, oco va kuatise ovisitatũi vikuavo oku lilongisa ovina viatiamẽla ku Yehova. Vamanji alume okuti ovisitatũi, va likolisilako oku kala alongisi va loñoloha okuti, va tẽlisa ovikele viavo, kuenda va tata ciwa ekongelo. Valua pokati kavo va siata oku tambula ovikele vikuavo vekongelo.
Kofeka yo Estados Unidos, kuli eci ci pitahãla 100 kakongelo velimi lioku ilaika, kuenda eci ci soka 80 kovimunga. Ko Brasil, kuli eci ci panda 300 kakongelo velimi lioku ilaika, kuenda eci ci pitahãla 400 kovimunga. Ko Mesiku, kuli eci ci panda 300 kakongelo velimi lioku ilaika. Ko Rusia, kuli eci ci pitahãla 30 kakongelo velimi lioku ilaika, kuenda 113 kovimunga. Ovolandu a tukuiwa ndeti, a lekisa okuti, akongelo kelimi lioku ilaika, a kasi oku livokiya voluali luosi.
Olombangi Via Yehova, via siata oku linga olohongele vimbo kuenda viofeka velimi lioku ilaika. Unyamo wa pita, voluali luosi mua lingiwa eci ci pitahãla 120 kolohongele viofeka valimi a litepa oku ilaika. Eliangiliyo liaco, lia siata oku kuatisa vamanji ovisitatũi oku limbuka okuti, va panga onepa kocimunga ca vamanji voluali luosi, kuenda va tambuila kumosi okulia kuespiritu.
Manji Leonard okuti ocisitatũi, tunde eci a papatisiwa pa pita 25 kanyamo. Eye wa popia hati: “Nda kũlĩha okuti, Yehova eye Suku yocili. Pole, toke cilo, si kuete elomboloko lieci a siatela oku ecelela ohali. Olonjanja vimue, ovina viaco via siata oku ndi vetiya oku kuata onyeño laye. Pole, kohongele yofeka eci kua lingiwa ohundo yimue velimi lioku ilaika, nda kuata elomboloko lieci Suku a siatela oku ecelela ohali. Kesulilo liohundo yaco, ukãi wange wa ndi tuñunya lohokolua loku ndi pula hati: ‘Wa sanjuka?’ Ndo tambulula okuti, nda sanjuka! Ndeca olopandu ku Yehova omo okuti, papita ale 25 kanyamo tunde eci nda fetika oku pandikisa loku u fendela. Ndaño nda lekisile ocisola ku Yehova, pole, sia kuatele elomboloko lialua liatiamẽla kokuaye. Cilo ndi kuete elomboloko liasuapo!”
Ndeca Olopandu Lutima Wosi
“Ovituwa” vipi via Yehova ovisitatũi vi pondola oku limbuka poku lilongisa ovina viatiamẽla kokuaye? Ovo va limbuka ovituwa vimue ndeci: Ocisola, ohenda, esunga, ekolelo, kuenda ovituwa vikuavo.
Vamanji ovisitatũi voluali luosi, va siata oku mola ocipala ca Yehova, kuenda va kasi oku amamako oku ci linga. ‘Yehova wa siata oku tuila ocipala caye’ kovisitatũi omo liocisola a va kuetele. (Ate. 6:25) Omo liaco, vamanji ovisitatũi va eca olopandu ku Yehova omo lioku lilongisa ovina viatiamẽla kokuaye!
[Elitalatu kemẽla 25]
Voluali luosi, muli eci ci pitahãla 1.100 kakongelo velimi lioku ilaika
[Elitalatu kemẽla 26]
Yehova wa siata oku kuatisa ovikanjo muli ovisitatũi