Lekisa Ocisola ku Vamanji Ovisitatũi!

AFENDELI va Suku koloneke vilo, va linga epata linene konepa yespiritu, momo va kuete ovituwa ndevi viomanu vo kosimbu. Vomanu vaco mua kongela Samuele, Daviti, Samisone, Rahava, Mose, Avirahama, Sara, Noha, kuenda Havele. Pokati kafendeli va Yehova, pali omanu valua ovisitatũi. Ulume umue lukãi waye okuti vosi yavo ovisitatũi, ovo Olombangi Via Yehova via tete kofeka yo Mongolia. Omo liekolelo lia vamanjetu ovisitatũi kofeka yo Rusia, Ombala Yinene yi Teyuila Ovitangi Viomanu kofeka yaco, ya tu ĩha elianjo lioku linga upange woku kunda olondaka viwa.

Koloneke vilo, “ukuenje wa kolelua haeye wa lunguka,” wa siata oku sandeka alivulu velimi lioku ilaika, loku sokiya akongelo, olohongele vimbo, kuenda viofeka kelimi liaco. (Mat. 24:​45) Eliangiliyo liaco, lia siata oku kuatisa ovisitatũi.a Anga hẽ, o pondola oku sokolola ndomo ovisitatũi via tẽla oku lilongisa ocili catiamẽla ku Suku kuenda oku kula kespiritu osimbu ka kua lingiwile eliangiliyo liaco? Ove hẽ, wa limbuka ovina o sukila oku linga oco okuatise ovisitatũi vi kasi vimbo liove?

Ceci ka Kua Kaile Aliangiliyo Aco

Nda wa pulisa vamanji vamue akulu ovisitatũi catiamẽla kovolandu avo ndomo va kũlĩha Suku, nye va ku sapuila? Citava okuti, va ku sapuila esanju va kuata poku kũlĩha onduko ya Suku, kuenda ndomo ocili caco ca pongolola omuenyo wavo. Kuenje, ca va kuatisavo vokuenda kuanyamo alua osimbu ka kua kale olovideo kelimi lioku ilaika vina via siata oku va kuatisa cilo oku vokiya ukũlĩhĩso wavo watiamẽla Kovisonehua. Va pondolavo oku ku sapuila ovitangi va liyaka lavio osimbu ka kua kale omunu o pitiya ovipama violohongele kelimi lioku ilaika. Kua kala vamanji vamue va enda oku tumala ponele yavo lopapelo yimue okuti, o sonehamo olondaka vi va kuatisa oku kuata elomboloko liovipama viohongele. Manji umue ulume wa lilongisa Embimbiliya lekuatiso liaco vokuenda kuanyamo epanduvali osimbu ka kua kale eliangiliyo lioku pitiya ovipama violohongele kelimi lioku ilaika.

Olombangi Via Yehova akulu vana okuti ovisitatũi, va ivaluka ndomo va endaile la vamanji vakuavo kupange woku kundila omanu “va yevite ciwa.” Ovo va enda oku ambata opapelo yimue va soneha olondaka vioku fetika ombangulo kupange woku kundila konjo lanjo. Noke va eca Utala Wondavululi lo Despertai! viokaliye. Kokuavo ka ca lelukile oku longisa Embimbiliya komunu una okuti ocisitatũi, velivulu limue okuti lomue pokati kavo o kuete elomboloko lia suapo liulandu waco. Ovo va ivaluka esumuo va enda oku kuata poku sapela catiamẽla kovina viespiritu. Momo olonjanja vimue va enda oku liwekapo oku vangula omo ka va kuatele elomboloko liovina viaco. Ovo va ivalukavo esumuo va enda oku kuata omo okuti, ndaño va solele Yehova, pole, ka va tẽlele oku ci lekisa kovilinga. Momo lie? Momo ka va kũlĩhĩle nda va kuatele elomboloko lia suapo liovina vimue.

Ndaño lovitangi viaco, pole, vamanjetu ovisitatũi va siata oku amamako loku pandikisa. (Yovi 2:⁠3) Ovo va imba ovaso ku Yehova. (Osa. 37:⁠7) Omo liaco, Yehova wa siata oku va sumũlũisa lovina vialua ka va lavokaile.

Kũlĩhĩsa elikolisilo lia lingiwa la manji umue ulume ocisitatũi okuti, okuele haeye onjali. Osimbu ka kua kalele eliangiliyo liolovideo kelimi lioku ilaika, eye wa enda oku songola elilongiso liepata liaye. Omõlaye ulume wa popia hati: “Isietu wa liyaka locitangi coku songola elilongiso liepata. Momo ovina viosi a sukilile oku tu longisa vi sangiwa valivulu. Olonjanja vimue ka kuataile elomboloko liovina via sonehiwa valivulu. Etu tumãla, ka tua kuatele epondolo lioku u kuatisa. Nda isietu ka lombolola ciwa ovina vimue, tu yayulako oku sapela laye oco a kuame onjila yikuavo yoku vi lombolola. Ndaño lovitangi viaco, pole, wa enda oku linga elilongiso liepata olonjanja viosi. Eye wa kũlĩhĩle okuti oku tu longisa ovina viatiamẽla ku Yehova, ci kuete esilivilo lia velapo okuti esumuo liaye lioku liyaka locitangi coku pitiya ulandu wa sonehiwa kelimi Liongelesi omo liukũlĩhĩso waye utito, li sule.”

Kulivo ulandu wa manji umue Richard o kuete ci pitahãla 70 kanyamo, wo kofeka yo Estados Unidos, kolupale luo Brooklyn ko Nova Yorke okuti, ocisitatũi haeye omeke. Manji Richard wa kũlĩhĩwa ciwa omo lioku endaenda olonjanja viosi kolohongele. Ndaño poku enda kolohongele, wa siata oku endela vomboyo, pole, o sokolola apa a sukila oku tulukila. Eteke limue pokuenye, kua kala ombambi yalua locikokoto, kuenje vamanji vosi va va sapuila hati, ka ku kala ohongele. Pole, manji Richard vo wivala. Eci vamanji vo sokolola, va fetika oku u sandiliya kuenje, vo sanga okuti o tãi posamua Yonjango Yusoma oku kevelela eci va yulula epito. Eci vo pulisa esunga lieci a tundila konjo yaye loku pita vocikokoto, wa tambulula hati: “Ndi sole Yehova.”

Nye o Pondola Oku Linga?

Anga hẽ vimbo liene muli omanu vamue ovisitatũi? O pondola hẽ oku lilongisa elimi lioku ilaika oco o sapele lavo? Ovisitatũi via sunguluka calua, kuenda vi kuete epandi poku longisa vakuavo elimi liavo. O pondola oku li sanga lavo kolonepa viosi, ale kupange woku kunda. Nye o sukila oku linga? Seteka oku sapela lavo. Linga olondimbukiso, loku soneha olondaka vimue vopapelo, ale ovina vikuavo vi ku kuatisa oku sapela lavo. Ndaño wa sanga umue ocisitatũi o linga ondimbukiso yokuti, ka yongola oku yevelela ondaka ya Suku, sapuila manji umue ocisitatũi ale umue wa kũlĩha elimi lioku ilaika, oco o lomboluile esunga lieci weyilila konjo yaye. Ovisitatũi vi yevelela vali ciwa esapulo liusoma nda tua vi kundila kelimi lioku ilaika.

Citava okuti, o kasi oku lilongisa elimi lioku ilaika, kuenda watiamẽla vekongelo lielimi liaco. O pondola ndati oku kuata elomboloko lielimi lioku ilaika? Ndaño vekongelo liene muli akundi va yevite ciwa, momo lie ku lilongisila elimi lioku ilaika? Nda wa ci linga, ci ku kuatisa oku sokolola elimi liaco. Omo okuti, wa lilongisa elimi lioku ilaika, nda wa sanga ocisitatũi, kuka vangule laye lolondaka. Pole, linga olondimbukiso vielimi lioku ilaika poku sapela laye. Oco o vangule elimi liove wa sukilile oku likolisilako calua. Cimuamue haico o sukila oku linga poku lilongisa elimi lioku ilaika.

Nda tua likolisilako oku vangula elimi lioku ilaika la vamanji ovisitatũi, tu lekisa ocisola lesumbilo kokuavo. Ovisitatũi via siata oku sumua kovopange, kuenda kosikola omo okuti ka va pondola oku kuata elomboloko liovina vakuavo va vangula. Manji umue ulume ocisitatũi, wa popia hati: “Omanu vosi ndi kasi lavo, va pondola oku vangula. Olonjanja vimue nda siata oku sumua loku kuata onyeño, omo lioku sima okuti, lomue wa ndi kapako kuenda ndi kasi ulika. Si tẽla oku lombolola esumuo nda siata oku kuata.” Vamanji ovisitatũi va sanjuka calua poku enda kolohongele, kuna va siata oku tambula okulia kuespiritu, loku sapela la vakuavo kuenda oku kuata ukamba lavo.​—⁠Yoa. 13:​34, 35.

Tu sukila oku kapako ovimunga via vamanji ovisitatũi va kasi vakongelo. Ovipama violohongele via siata oku pitiyiwa kokuavo kelimi lioku ilaika. Oco va kuate elomboloko liovina vi lomboluiwa kolohongele, va sukila oku tumãla kovaso ocipepi lembumbua. Nda va ci linga, ci va kuatisa oku mola manji o kasi oku linga ohundo kuenda ukuavo o kasi oku yi pitiya kelimi liavo. Ovolandu a lekisa okuti oku kuama onjila yaco, ci kuatisa vamanji vakuavo oku kuata elomboloko lieliangiliyo liaco, kuenda ka ci va tateka oku yevelela lutate ovipama violohongele. Eliangiliyo liaco lia siata oku kuamiwavo kolohongele vimbo, kuenda viofeka kuna okuti, ulandu waco u pitiyiwa kelimi lioku ilaika. Vamanji vana va siata oku likolisilako oku pitiya ulandu waco kelimi lioku ilaika, va sesamẽla epandiyo. Momo va siata oku kuatisa ovisitatũi oku kuata elomboloko liovina va lilongisa.

Citava okuti, o kasi vekongelo limue muli ovisitatũi okuti, vi sukila oku pitiya kokuavo ulandu wolohongele kelimi lioku ilaika. Nye o sukila oku linga oco o lekise okuti wa kapako vamanji ovisitatũi? Va laleka konjo yove. Nda citava, lilongisa olondimbukiso vimue vielimi liaco. Kuka kuate ohele yoku sapela lavo omo okuti ku tẽla elimi liaco. Nda wa likolisilako oku sapela lavo, o lekisa ocisola kokuavo, kuenda oka ivaluka esanju wa kuata poku ci linga. (1 Yoa. 4:⁠8) Vamanjetu ovisitatũi, va pondola oku linga ovina vialua vi nena esanju. Ovo va kuete ocituwa coku sapela, va sunguluka, kuenda vonjuka. Manji umue ulume okuti olonjali viaye ovisitatũi, wa popia hati: “Otembo yosi yomuenyo wange, nda siata oku kala lovisitatũi, kuenda va nyiha ovina vialua okuti si tẽla oku vi tiula. Tu pondola oku lilongisa ovina vialua la vamanji ovisitatũi.”

Yehova o sole afendeli vaye vakuekolelo, oku kongelamo ovisitatũi. Ongangu yavo yekolelo lepandi, vi vokiya asumũlũho tua siata oku tambula vocisoko ca Yehova. Omo liaco, tu amamiko oku lekisa ocisola ku vamanji ovisitatũi!

[Atosi pombuelo yamẽla]

[Elitalatu kemẽla 31]

Ovisitatũi vi pondola oku kuata elomboloko liesapulo Liusoma, nda tua va longisa kelimi lioku ilaika

[Elitalatu kemẽla 32]

Vamanji ovisitatũi va siata oku pamisiwa kespiritu poku endaenda kolohongele