Wa Tambuile Ale Ocikele Cimue Vekongelo? O Pondola Oku Fetika Vali Upange Waco?
OVE hẽ, wa tambuile ale ocikele cimue vekongelo? Citava okuti, wa kala oñuatisi yakulu vekongelo, ale ukulu wekongelo. Pamue wa kala ukundi wotembo yosi. Ocili okuti, wa sanjukilile upange waco, pole wa liwekapo omo liovitangi vimue.
Pamue wa siapo ovikele viove vekongelo omo lioku tata epata. Citava okuti, wa liwekapo omo lioku kuka, ale ekambo liuhayele. Pole, ndaño wa liwekapo upange waco, ka ci lekisa okuti, wa hongua. (1 Tim. 5:8) Kotembo yovapostolo, Filipu wa litumbikile kupange wumisionaliu, pole, noke wa liwekapo upange waco, kuenje wa tiukila ko Kaisarea oco a tate epata liaye. (Ovil. 21:8, 9) Soma Daviti u Isareli eci a kuka, wa eca omangu yusoma komõlaye Salomone. (1 Olos. 1:1, 32-35) Filipu la soma Daviti, va soliwile la Yehova, kuenda omanu koloneke vilo va siatavo oku lekisa esumbilo kovina va linga.
Citava okuti, wa siapo ocikele cimue wa tambuile vekongelo. Anga hẽ, wa siapo upange waco omo liocituwa cimue cĩvi, ale ovitangi viepata? (1 Tim. 3:2, 4, 10, 12) Pamue o sima okuti, akulu vekongelo ka va kuatele esunga liokupa ovikele viove. Kuenje, o kasi oku amamako lesumuo toke cilo.
O Pondola Oku Tambula Vali Ovikele Vekongelo
Anga hẽ, nda wopiwa ovikele, ku lavoka oku vi tambula vali? Citava okuti, o vi tambula vali. Pole, o sukila oku lekisa onjongole kovina viespiritu. (1 Tim. 3:1) Momo lie o kuetele onjongole yaco? Momo wa litumbika ku Yehova Suku, wa siata oku lekisa ocisola kokuaye, kuenda kafendeli vaye. Nda wa lekisa onjongole yoku tambula vali ovikele, Yehova oka ku kuatisa oku vi tẽlisa, omo liuloño wa kuata osimbu kuopiwile ovikele viaco.
Ivaluka ohuminyo Yehova a lingile ku va Isareli noke yoku vopa esumũlũho lioku u vumba. Ondaka yaye yi popia hati: “Ame ndi Yehova si pongoloka, oco ene, amãla va Yakoba, ka wa nyõlẽhẽlẽli.” (Mal. 3:6) Yehova wa solele calua va Isareli kuenda wa yonguile okuti, vamamako oku linga upange waye. Eye o yongola okuti, amamako oku linga upange waye. Ovina vipi ekalo liove liecelela oku linga? Ukamba wove la Yehova, owo uku vetiya oku linga upange waco okuti, uloño o kuete u sule. Ndaño ku kuete ovikele vekongelo, pamisa ukamba wove la Yehova.
Oco o kuate ‘ekolelo lia pama,’ o sukila oku ‘sanda Yehova longusu yaye.’ (1 Va Kor. 16:13; Osa. 105:4) O pondola oku ci linga lekuatiso liohutililo. Eci o lomboluila ku Yehova ovisimĩlo viove, pinga ekuatiso liespiritu liaye. Nda wa ci linga, o kuata ukamba Laye, kuenda o pamisiwa. (Osa. 62:8; Va Fil. 4:6, 13) Onjila yikuavo yoku pamisa ekalo liove kespiritu, oku amamako oku lilongisa Ondaka ya Suku. Nda wa tambula ovikele vitito, ci ku kuatisa oku amamako lelilongiso liove pokolika, kuenda liepata. Nda wa ci linga, ci ku vetiya oku amamako lelilongiso liaco.
Ove handi Umbangi ya Yehova. (Isa. 43:10-12) Tu kuete epuluvi lioku kala ‘olondingupange via Suku.’ (1 Va Kor. 3:9) Nda wa lekisa ombili kupange woku kunda, o pamisa ukamba wove la Yehova, kuenda la vamanji u kundila kumosi olondaka viwa.
Ndomo o Liyaka Lovisimĩlo Viove
Nda wopiwa ovikele viove viupange, o sumua, kuenda o kuata osõi. Kuenje, o sanda esunga lieci wa lingila ovina ka via sungulukile. Nye tu sukila oku linga nda vamanji va sapela letu va tu sapuila hati, ka tu pondola oku amamako lovikele vietu? Citava okuti, o kuatela vamanji ovisimĩlo ka via sungulukile, kuenje, ku kuata onjongole yoku pokola kovolandu afendeli va Suku va tukuiwa Vembimbiliya. Omo liaco, tu konomuisi ndomo ulandu wa Yovi, wa Manase, kuenda wa Yosefe, u pondola oku ku kuatisa oku yuvula ovisimĩlo ka via sungulukile.
Yovi wa kala mitavaso yomanu kovaso a Yehova, wa kalavo ukulu wekongelo, kuenda onganji kosimbu. (Yovi 1:5; 29:7-17, 21-25) Noke, wa liyaka lovitangi vimue ndeci: Oku pesela ukuasi waye, omãla vaye, kuenda wa kuatiwa luvei. Kuenje, ka kapiwileko vali la vakuavo. Omo liaco, Yovi wa popia hati: “Oloneñe viange vi njola epembe.”—Yovi 30:1.
Yovi wa kũlĩhĩle okuti, ka kuete eko, kuenda wa yonguile oku liteyuila kovaso a Suku. (Yovi 13:15) Pole, wa kevelela ekuatiso li tunda ku Yehova, kuenje, wa tambula asumũlũho alua. Eye wa limbuka okuti, wa sukilile elungulo, omo liocituwa a lekisa poku liyaka lovitangi. (Yovi 40:6-8; 42:3, 6) Omo liumbombe Yovi a lekisa, Suku weya oku u sumũlũisa lovina viosi a pesela.—Yovi 42:10-13.
Nda wa linga ekandu limue, o yongola okuti, Yehova kuenda vamanji, va ku ecela, okuti, ka va ivaluka vali ovina wa linga. Tu kũlĩhĩsi ulandu wa Manase, Soma yoko Yuda. Eye “wa linga evĩho lialua kovaso a Yehova lioku wengula onyeño yaye.” (2 Olos. 21:6) Pole, Manase wa kala osoma yiwa, kuenda wa fa lekolelo. Ulandu waco wa pita ndati?
Manase wa tava kelungulo. Omo okuti, otembo yimue ka tavele kalungulo, Yehova wa tumile olohoka via va Asuria vina vieya oku u kuata, kuenje vo tuala kumandekua ko Bavulono. Noke, Manase “wa likuambela ku Yehova Suku yaye. Wa liketisila calua kovaso a Suku yolosekulu viaye. [Kuenje] wa likutilila kokuaye.” Ovituwa viaye, via lekisa okuti, wa likekembela lutima wosi, kuenje wa eceliwa.—2 Asa. 33:12, 13.
Nda umue wopiwa ovikele, pamue ka ci leluka oku vi tambula viosi vonjanja yimosi. Vokuenda kuotembo, citava okuti, o fetika oku tambula vimue. Nda wa tava ovikele viaco, loku vi tẽlisa, ci ku kuatisa oku tambula vikuavo. Olonjanja vimue, ovina ka vi lingiwa ndomo o yongola. Citava okuti, o pita lovitangi vimue. Pole, nda wa lekisa onjongole lepandi, oka tambula onima yiwa.
Tu kũlĩhĩsi ulandu wa Yosefe, omõla wa Yakoba. Eci a kuata 17 kanyamo, wa landisiwa kupika la va kota liaye. (Efet. 37:2, 26-28) Eye, ka simĩle okuti, va kota liaye vo linga ovina viaco ka via sungulukile. Pole, wa lekisa epokolo, kuenda Yehova wo sumũlũisa, momo weya oku tambula ovikele “vonjo ya cime caye.” (Efet. 39:2) Noke, Yosefe wa kapiwa vokayike. Pole, omo liekolelo a lekisa, wa kuatisiwa la Yehova, kuenda wa tambula ocikele coku songuila olomandekua.—Efet. 39:21-23.
Eye ka limbukile okuti, otembo yosi a kala vokayike ya kuata ocimãho cimue. Pole, wamamako oku tẽlisa ocikele caye. Noke, weya oku tambula esumũlũho lioku tiamẽla kepata lina kua tunda ombuto Yehova a likuminyile. (Efet. 3:15; 45:5-8) Ndaño ka tu lavoka oku tambula ovikele ndevi Yosefe a tambuile, ulandu waye u lekisa okuti, Yehova eye wa siata oku kuatisa afendeli vaye oku tambula ovikele viaco. Omo liaco, amamako oku kuama ongangu ya Yosefe.
Lilongisila Kovitangi Viomanu vo Kosimbu
Yovi, la Manase, kuenda Yosefe, va liyaka lovitangi vialua. Vosi yavo va tava ovitangi Yehova a ecelela okuti, va liyaka lavio, kuenda via va kuatisa oku lilongisa ovina vialua. Ovolandu avo a ku longisa nye?
Pokola kovina Yehova a siata oku ku longisa. Ovitangi Yovi a liyaka lavio, vio vetiya oku kuata ovisimĩlo ka via sungulukile, kuenda ka ivalukile ovina via kongelamo. Pole, elungulo lia Yehova, lio kuatisa oku kuata ovisimĩlo via sunguluka, kuenje, wa litavela hati: “Nda popia ovina ka via ndombolokele.” (Yovi 42:3) Nda wa sumua omo liokupiwa ovikele, yuvula ‘oku lisokolola ove muẽle, pole, likũlĩhĩsa lolondunge.’ (Va Rom. 12:3) Citava okuti, Yehova oku kuatisa oku linga apongoloko amue okuti, ku kuata elomboloko liaco.
Tava kelungulo. Manase, pamue wa simĩle okuti, ka sesamẽlele elungulo a tambula. Pole, noke yoku tava, wa likekembela, kuenda, wa liwekapo oku linga ovina ka via sungulukile. Ndaño wa sumua omo lielungulo wa tambula, ‘lekisa umbombe kovaso a Yehova, kuenje eye oku kapa kunene.’—1 Pet. 5:6; Tia. 4:10.
Lekisa epandi lonjongole. Ovitangi Yosefe a liyaka lavio, citava okuti, nda vio vetiya oku kuata onyeño, kuenda oku fetuluinya va kota liaye. Pole, wa lekisa olondunge lohenda. (Efet. 50:15-21) Nda wa pita locitangi cimue ca ku sumuisa, lekisa epandi, kuenda tava oku pindisiwa la Yehova.
Ove hẽ, wa tambuile ale ocikele cimue vekongelo? Likutilila ku Yehova, oco a ku kuatise oku tambula ovikele kovaso yoloneke. Pamisa ekalo liove kespiritu. Lekisa epandi lumbombe kovisimĩlo viove. Tẽlisa ovikele viosi wa tambula. Kolela okuti, ‘Yehova ka limĩla cimue ciwa vana va endaenda lesunguluko.’—Osa. 84:11.
[Etosi lia velapo kemẽla 30]
O sukila oku likutilila, oco o kuate ekolelo lia pama
[Elitalatu kemẽla 31]
Oku vokiya upange woku kunda, ci kuatisa oku kula kespiritu
[Elitalatu kemẽla 32]
Ecelela okuti, Yehova oku ĩha ovikele kovaso yoloneke