Ocivaluka?

Ove hẽ, wa sola oku tanga ovipama Viutala Wondavululi via sandekiwa volosãi via pita? Nda wa vi sola, seteka oku tambulula apulilo a kuãimo:

• Anga hẽ kuli elavoko liokuti oñaña ya fila vimo lia ina yaye yika pinduiwa?

Omuenyo womunu u fetikila poku miniwa. Yehova o pondola oku pindula omanu, momo, kokuaye, “ovina viosi vi tẽliwa.” (Mar. 10:​27) Pole, Embimbiliya ka li lombolola nda oñaña ya fila vimo lia inaye yika pinduiwa ale sio.​—⁠15/4, kemẽla 12, 13.

• Ongangu yolonjinji, yolohuma, yolohuita, kuenda yakokolo, yi tu longisa nye?

Ovinyama vikuãla via tukuiwa ndeti, vi kuete uloño u komohĩsa. Ovio, vi situlula uloño wa Suku. (Olosap. 30:​24-28)​—⁠15/4, kemẽla 16-19.

• Ulandu upi Wolombangi via Yehova wa pita vokuenda kueci ci soka 100 kanyamo?

Kunyamo wo 1909, Ombala Yolombangi Via Yehova, ya siata oku panga alivulu, yina ya kala ko Pittsburgh, Pennsylvania, va yi sondoluila ko Brooklyn, ko Nova Yorke, kuna yi kasi oku amamako lupange waco.​—⁠1/5, kemẽla 22-24, kelimi Lioputu.

• Momo lie Embimbiliya li popela okuti, tu sukila oku ũha?

Embimbiliya li lekisa okuti, oku ũha, ondimbukiso yesumbilo, kuenda yi tu kuatisa oku sokolola ovina tua tanga. Ondimbukiso yaco, yi lekisa okuti, tua lunguka, kuenda tu kuete olondunge viocili. (Sof. 1:7; Osa. 63:6; Olosap. 11:12)​—⁠15/5, kemẽla 3-5.

• Alume vamue ndeci: John Wycliffe, William Tyndale, Robert Morrison, kuenda Adroniram Judson, va linga ovina vipi vimuamue?

Alume vosi va tukuiwa ndeti, va solele Ondaka ya Suku, kuenda va yi pongoluila kalimi akuavo, oco yi tangiwe lomanu. Wycliffe la Tyndale, va pongoluila Ondaka ya Suku kelimi Liongelesi. Morrison, wa yi pongoluila kelimi lio China, kuenda Judson, wa yi pongoluila kelimi lio Birmanês (ko Mianmar).​—⁠1/6, kemẽla 8-11, kelimi Lioputu.

• Olosoma vimue vio ko Yuda via lekisa ndati ongangu yiwa yoku kuata ombili lonjo ya Suku?

Cisoka ekũi lecea kolosoma via vialele konano yo Yuda. Vikuãla pokati kavo ndeci, Asa, Yehosafata, Hesekiya, kuenda Yosiya, va lekisa ombili lonjo ya Suku.​—⁠15/6, kemẽla 7-11.

• Anga hẽ, Akristão vosi olombuavekua, va kuete ocikele coku eca okulia kuespiritu?

Sio, ka va kuete. Olombuavekua viosi via wavekiwa lespiritu lia Suku, viatiamẽla kocisoko cukuenje wa kolelua haeye wa lunguka. Pole, vana vatiamẽla Kosungu Yakulu Yolombangi Via Yehova, ovo lika va kuete ocikele caco.​—⁠15/6, kemẽla 22-24.

• Momo lie asualali vo ko Roma va solelele uwalo wa Yesu?

Asualali vana va ponda Yesu, ka va toluile uwalo waye. Momo ocikutu caye, ca kuatele olonepa vivali via tokekiwa, kuenda ca kuatele lika esilivilo nda lomue wa ci tola.​—⁠1/7, kemẽla 22, kelimi Lioputu.

• Momo lie ocisola ci tu kuatisila oku limbuka okuti, ovina Yesu a longisa, via litepele levi viovitunda?

Ovitunda vio koloneke viaco, ka via kuatele ocisola lolohukũi, kuenda va enda oku pembula omanu vaco. Ovitunda viaco, ka via kuatele ocisola la Suku. Yesu wa solele calua Isiaye kuenda wa vetiyiwa oku lekisa ohenda komanu. (Mat. 9:​36) Wa lekisa ocisola, locikembe, kuenda esunguluko poku va kuatisa.​—⁠15/7, kemẽla 15.

• Ovitangi vipi olohueli via siata oku liyaka lavio omo liekambo lioku sokiya ciwa olombongo, kuenda nye ci pondola oku va kuatisa oku yula ovitangi viaco?

Olohueli vimue, via siata oku liyaka lovitangi viatiamẽla kolombongo omo liekambo lioku likolela pokati, kuenda usumba. Momo va tambula epindiso lia litepa kolonjali viavo. Ovina vikuãla vi pondola oku va kuatisa vievi: Oku vangula lumbombe catiamẽla kolombongo, oku tava kocisimĩlo coku seleka olombongo, oku soneha ovina epata li sukila oku linga, kuenda oku nõla omunu o tẽlisa ocikele caco.​—⁠1/8, kemẽla 10-12, kelimi Lioputu.